پاسىبان كۇلۇبى » ماشىنا ئاتالغۇلىرى

ماشىنا ئاتالغۇلىرىغا ئىزاھات – تولغىنىش مومېنتى

پاسىبان — Fri, 04 Nov 2011 14:26:21 +0000

«ماشىنا ئاتالغۇلىرىغا ئىزاھ» تېمىلىرىمىزنى داۋاملاشتۇرىمىز. ئىلگىرىكى يازمىلاردا «ئات كۈچى» ۋە «چىقىرىش مىقدارى» توغرىسىدا چۈشەنچە بېرىپ ئۆتكەن. بۈگۈن ئىزاھلاپ ئۆتمەكچى بولغىنىمىز، ماشىنىنىڭ كۈچتۈڭگۈرلىكىنىڭ يەنە بىر بەلگىسى بولغان ئاتالغۇ – تولغىنىش مومېنتى.

ئۇيغۇرلار ئارىسىدا ماشىنىغا قىزىقىش دولقۇنى بارغانسىرى كۈچىيىۋاتىدۇ. لېكىن كەسپىي، تېگىدىن جانلىق تونۇشتۇرالايدىغان، بارلىق ئۇقۇم ۋە ئاتالغۇلارنى تېگى مەناسىدىن ئىلمىي ئۇسۇلدا تونۇشتۇرۇپ چىققۇدەك، قىسقىسى – چاڭقىغان جايغا بارغۇدەك بىرەر تور بەت ياكى ئورگان يوق. مۇشۇ سەۋەبلىك بەزىبىر ماشىنا ئاتالغۇلىرىنى قانداق ئاتاش توغرىسىدا مەندە بىر ئاز سىقىنتىلىق مەۋجۇد.

ماشىنا چۈشەندۈرىدىغان بىر قانچە تور بەتلەرنى كۆرۈپ چىقتىم. گەپنىڭ جىڭىنى قىلسام، ئىككى تۆت تال رەسىم چىقىرىپ قويۇپ، PV ياكى IP دىن پايدىلىنىپ ئېلاندىن پۇل تاپىدىغان ئاقماس تور بەتتىن باشقىسى ئەمەسكەن. گەپنى ئاچچىق قىلدىم. لېكىن راستىنى ئېيتتىم. بىكەت ئېگىسى كۆرگەن بولسا زادى شۇنداقمۇ يوق، ئۆزىدىن بىر سوراپ باقسا بولىدۇ.

چاڭقىغان جايغا بارىدىغان، ۋايىغا يەتكۈزۈپ چۈشەندۈرىدىغان، تېخنىكىلىق پارامېتىرلارنى بىر بىرلەپ يېشىپ بېرەلەيدىغان، كۆرۈرمەنلەرگە ھەقىقىي ئەمەلىي نەپ بېرەلەيدىغان بىرەر ئۇيغۇرچە تور بەت يوق بولغانلىقتىن، بولسىمۇ مەن دېگەن نەرسىلەرنى تاپالمىغانلىقىم ئۈچۈن ماشىنىغا ئائىت بىرەر ئۇچۇرغا ئېگە بولۇش ئۈچۈن ئەڭ دەسلىۋېدىلا سىنا ياكى 汽车之家 غا مۇراجىئەت قىلىۋاتىمەن.

يازمىنىڭ بېشىدا تېمىغا ھەم مۇناسىۋەتلىك، ھەم مۇناسىۋەتسىز سۆزلەر ئېيتىلىپمۇ قالدى. لېكىن بۇ ھازىرقى ئۇيغۇر تور بەتچىلىكىدىكى بىر بوشلۇق ھېسابلىنىدىغان، مەخسۇس گورۇپپا قۇرۇپ جانلىق ئېلىپ بارسا ھەم ئىقتىسادىي ئۈنۈم يارىتالايدىغان، ھەم خەلققە نەپ بېرەلەيدىغان بىر ئىش. مۇشۇنداق ئويى بار قېرىنداشلىرىمىز يەنىمۇ تەپسىلىي ئويلىنىپ قويسا بولىدۇ. قوللايمەن.

خوش، ئەمدى يازمىنىڭ پوسكاللىسىغا كېلەيلى. ئاۋال بۇ فىزىكىلىق ئاتالغۇغا ئىزاھ بېرىۋېتەيلى.

ئۇقۇم

تولغىنىش مومېنتى ( خەنچە Niu Ju 扭矩 ، ئېنگلىزچە Torsional Moment ياكى Torque ) بولسا فىزىكا ئېلمىدىكى كۈچ مومېنتىنىڭ چوڭ-كىچىكلىكىنى كۆرسىتىدىغان ئاتالغۇ. ئۇ شەيئىنى ھەرىكەتلەندۈرىدىغان كۈچنى كۆرسىتىدۇ. ماتورنىڭ كۈچ مومېنتى بولسا ئەگرى ئوقتىن كەلگەن كۈچ مومېنتىنى كۆرسىتىدۇ. ئاتالغۇنىڭ ئۆزىدىن چىقىپ تۇرۇپتىكى، بۇ يەردىكى مومېنت (كۈچ) تولغىنىش كۈچى. يەنى، ماتوردىن ئوق ئارقىلىق ئۇزىتىلغان كۈچنىڭ قانچىلىك كۈچ مىقدارىدا تولغىنىپ چاقنى ئايلاندۇرىدىغانلىقىنى ئىپادىلەيدىغان بىر بىرلىك ھېسابلىنىدۇ.

قۇۋۋەت مۇقىم بولغاندا تولغىنىش مومېنتى بىلەن ماتورنىڭ ئايلىنىشى تەتۈر تاناسىپلىق مۇناسىۋەتتە بولىدۇ. ماتور ئايلىنىشى بۇ چاغدا قانچە تىز بولسا، تولغىنىش مومېنتى شۇنچە كىچىك بولىدۇ. ئەكسىچە بولسا چوڭ بولىدۇ. بۇ پەقەت سېلىشتۇرما خالاس. چۈنكى ماتورنىڭ ئايلىنىشى بولسا قۇۋۋەتكە بىۋاستە مۇناسىۋەتلىك. تولغىنىش مومېنتى ماشىنىنىڭ بەلگىلىك دائىرىدىكى يۈك ئارتىش ئىقتىدارىنى ئەكس ئەتتۈرىدىغان ئاتالغۇ.

خەلقئارا بىرلىكى

تولغىنىش مومېنتى كۈچ ۋە كۈچ يەلكىسىنىڭ كۆپەيتمىسىگە تەڭ. خەلقئارا بىرلىكى نىيۇتون.مېتىر N.m .ئۇنىڭدىن باشقا قاداق.فۇت lb-ft ۋە كېلوگرام مېتىر kgm قاتارلىق بىرلىكلىرىمۇ بار. ئەمەلىيەتتە بۇلارنىڭ مەنىسىمۇ ئوخشاش. G=mg بولسا، g=9.8 دېسەك 1kg＝9.8N بولىدۇ. دېمەك 1kgm＝9.8Nm دېگەن گەپ.

چىگىش نوقتىنى يېشىش

يۇقىرىدا ئېيتقاندەك تولغىنىش مومېنتىنىڭ بىرلىكى نىيۇتون . مېتىر ياكى كېلوگرام مېتىر. يەنى 1 كېلوگرام كېلىدىغان نەرسىنى مۇشۇ كۈچ بىلەن 1 مېتىر ئارىلىققا ئىتتىرەلەيدۇ دېگەن مەنىدە ئىكەن. ئۇنداق بولسا بىز ئادەتتە كۆپ ئۇچرىتىدىغان 1300 كېلوگرام كېلىدىغان ماشىنىلارنىڭ كۈچ مومېنتى ئەڭ ئەڭ ئەڭ ئاز بولغاندىمۇ 1500 نيۇتون مېتىردىن ئارتۇق بولغاندا ئاندىن نورمال سۈرئەتتە ماڭالايدۇ دېگەن گەپ بولىدۇ. شۇنداقمۇ؟ مىسال ئېلىپ كۆرەيلى:

8-ئەۋلات خوندا Civic 1.8 نىڭ 4300 قېتىم ئايلىنىش سۈرئىتىدىكى تولغىنىش مومېنتى ئاران 173.5 Nm . ماشىنىنىڭ ئومومى ماسسىسى 1 توننىدىن ئارتۇق تۇرسا تولغىنىش كۈچى ئاران 173.5 Nm بولغان ماتور قانداق قىلىپ شۇنچە ئېغىر ماشىنىنى قوزغىتالايدىغاندۇ؟ بۇ سۇئال جايىدا سورالدى. بۇ مونۇ سەۋەبتىن :

ماشىنىنىڭ بىز بىلىدىغان <<خوت>> ئورۇنلاشتۇرۇلغان <<كورۇپكا>> قىسمى بولىدۇ. شۇنداققۇ؟ مۇشۇ كۈچكە ئېگە ماتورنى مۇشۇ كورۇپكا ئاشۇنداق گېگانت كۈچ قىلىپ ئۇزىتىش ۋەزىپىسىنى بېجىرىدۇ. ئۇنىڭ خەنزۇچىسى 变速箱 . بەلكىم بۇنىڭ مەنىسىدىن بىلگەنسىلەر. بۇ سۈرئەت ئۆزگەرتىش كورۇپكىسى دېگەن مەنىدە. بۇ خىزمەت كورۇپكىنىڭ ئىچىدە ئەمەلگە ئاشىدۇ. ماتورنىڭ تېز سۈرئەتتە ئايلىنىشىنى بىر قاتار چىشلىق چاقلار ئارقىلىق نەچچە ھەسسە كۈچلۈك قۇۋۋەتكە ئېگە قىلىۋەتكىلى بولىدۇ. خۇددى غالتەكنى نەچچە رەت يۇقىرى-تۆۋەن تەرتىپ بويىچە ئورۇنلاشتۇرۇش ئارقىلىق بىر قىزچاق نەچچە يۈز كېلوگرام كېلىدىغان كالىنى كۈچىمەيلا كۆتىرىۋەتكەندەكلا بىر ئىش. شۇڭا 170 كېلوگرام كۈچكە ئېگە ماتور 1700 كېلوگرام كېلىدىغان ماشىنىنى 200 كېلومېتىرلىق سۈرئەتتە چاپتۇرالايدۇ.

ئەركەكلەر بىلىشكە تېگىشلىك «تېخنىكا»

يۇقارقى مەزمۇنلار مېنىڭ بۇرۇنقى ئىزدىنىش مۇنبىرىدە يوللىغان تېمامدىن تولۇقلىنىپ ئېلىندى. مەن شۇ يازمىدا ئېيتمىغان يەنە بىر سىرنى، مۇنداقچە ئېيتقاندا ماشىنىغا ئامراق يىگىتلەر بىلىشكە تېگىشىلىك كىچىككىنە تېخنىكىنى سىلەرگە ئېيتىپ بېرەي. كۇلۇب زىيارەتچىلىرىگە ئىچىمىزدە بارنى تۆكۈۋاتىمىزغۇ ئىشقىلىپ…

تولغىنىش مومېنتىنىڭ تېخنىكىلىق پارامېتىرلىرى ئارىسىدىن تېپىپ قارىساڭلار ئۇنىڭ يېزىلىش فورماتى بۇ شەكلىدە بولىدۇ. بۇنىڭغا يەنىلا ئۈستىدىكى 8-ئەۋلاد Civic نى مىسالغا ئالايلى. شۇنىڭ تولغىنىش مومېنتى دېگەن جايدا 173.5Nm@4300rpm دەپ يېزىلغانلىقىنى كۆرىسىز. بۇنىڭ مەنىسى شۇكى:

«ماتور 4300 قېتىم ئايلانغاندا (rpm دېگەن قېتىم ھەر مېنۇت دېگەن گەپ. يەنى ماتور كۆرسىتىش ستىرىلكىسى 4.3 كە كەلگەندە ماتورنىڭ ھەر مىنۇتتا 4300 نى ئايلىنىۋاتقانلىقىنى بىلدۈرىدۇ) ئەڭ چوڭ تولغىنىش مومېنتى ھاسىل قىلىدۇ. بۇ مومېنت قىممىتى 173.5 نىيۇتون مېتىر بولىدۇ» دېگەن مەنىدە.

مۇشۇ سان-سىفىرنىڭ ئۆزى بولسىلا سىز مۇشۇ ماشىنىنى ئەڭ ئۆلچەملىك ھالدا، ناھايىتى تېزلا چاپتۇرۇپ مېڭىشتىكى ھالقىنى بىلىپ ئالالايسىز. نېمىشقا دەمسىز؟ ھۇشيار بولسىڭىز سەۋەبىنى مەن ئۈستىدىكى ئابزاستا ئېيتىپ بولدۇم.
يەنى، ماتور ئايلىنىپ 4300 گە كەلگەندە ماشىنىنىڭ تارتىش كۈچى ھەممىدىن كۈچلۈك بولىدۇ. بۇنىڭدىنمۇ ۋارقىرىتىپ 5~6 مىڭغا چىقىرىۋەتسەكمۇ پايدىسى يوق، ئەكسىچە تارتىش كۈچى تۆۋەنلەپ ماڭىدۇ. 4300 لىك ئايلىنىش سۈرئېتىدە ماتور ئەڭ كۈچلۈك تارتىدۇ. شۇنىڭ ئۈچۈن سىز 2-خوتقا تەخمىنەن .5 مىڭ 5 يۈز قېتىم ئايلانغاندا ئاندىن ئالماشتۇرۇڭ، خوت ئالمىشىپلا ماتورنىڭ ئايلىنىشى يەنە 4 مىڭ ئەتراپىغا چۈشىدۇ. بۇ دەل ماتورنىڭ ئەڭ كۈچلۈك تارتىش كۈچى بېرىدىغان ئايلىنىش سۈرئىتى، شۇنداق ئەمەسمۇ؟ شۇنىڭ بىلەن يەنە چاياندەك تارتىدۇ. سىز يەنە 5 مىڭ 5 يۈزگە چىققاندا 3-خوتقا سېلىڭ، بۇ چاغدا 3-خوتقا چۈشۈپ يەنە ماي باسقاندا 4300 ئەتراپىدا ئايلىنىپ مېڭىشقا باشلايدۇ. شۇنىڭ بىلەن يەنە چاياندەك تارتىپ ماڭىدۇ. مانا بۇ چاپتۇرۇپ ئويناشقا ئامراق يىگىتلەرگە ئېيتىپ بەرمەكچى بولغان تېخنىكا شۇ. بۇنى راللىي مۇسابىقىسىدە كۆپ ئىشلىتىمىز. لېكىن بۇنى مەن راللىي ئۆگەنگەندە ئەمەس، ئۆزۈم ئىزدىنىپ، ھېس قىلىپ ئۆگىنىۋالغان.

بۈگۈنكى يازمىنىڭ ئەڭ نېگىزلىك يېرىنى ئۈستىدىكى ئابزاستا دېسەم ئارتۇق كەتمەيدۇ. ئەگەر سىزمۇ ماشىنىغا قىزىقسىڭىز، قىزىققاندىمۇ سىرتقى كۆرىنىشى بىلەنلا ئۆرىلىشىدىغان، ماتور قىسمى بىلەن چاتىغى يوق «قىز مىجەز ماشىنا ھەۋەسكارى» بولمىسىڭىز بۇ يازما سىزگە ئەڭ ياخشى بىر بىلىم بىلەن تەمىنلىدى دەپ كېسىپ ئېيتالايمەن.

ئەمدى سىز ماشىنىڭىزنىڭ ئىشلىتىش قوللانمىسى ياكى توردىكى تېخنىكىلىق پارامېتىرلىرى ئارىسىدىن بىر ئىزدىنىپ كۆرۈڭ. سىزنىڭ ماشىنىڭىزنى تولغىنىش مومېنتى قانچە ئىكەن؟ ئەڭ ياخشى خوت ئالماشتۇرۇش ئايلىنىش ۋاقتى قانچە بولىدىكەن؟ ئۈستىدىكى ئابزاس بويىچە بىرلەشتۈرۈپ ئىنكاستا بىر چۈشەندۈرۈپ كۆرۈڭ.

كۆڭلىڭىزدىكىنى تاپايمۇ؟

ماشىنا ماتور قىسمىدىن – سۋىچ ھەققىدە چۈشەنچە

پاسىبان — Fri, 21 Oct 2011 05:32:09 +0000

سىۋىچ ( ئېنگلىزچە Spark Plug، خەنچە 火花塞 ) بولسا ئىچىدىن يانىدىغان دىۋىگاتېلنىڭ ئىش ئىشلەش دەۋرىدىكى ئەڭ ھالقىلىق ئۈسكەنە بولۇپ، بۇ نەرسە قىسىلغان ھاۋا بىلەن يېقىلغۇنىڭ ئارىلاشمىسىنى ئوت ئالدۇرۇش رولىنى ئۆتەيدۇ. ئوت ئالغاندىن كىيىنكى پارتىلاش مىخانىك كۈچ ھاسىل قىلىپ پورشىننى ئارقىغا قايتۇرىدۇ. شۇڭا سۋىچنى ئىش ئىشلەش باسقۇچىدىكى ئەڭ مۇھىم ئامىل دەيمىز.

دىۋىگاتېلدا ھاۋا كىرىش ئېغىزى ئېچىلىپ ئوق كەينىگە تارتىلىپ ھاۋا بىلەن يېقىلغۇنى سۈمۈرىدۇ، ئاندىن كلاپانلار ئېتىلىدۇ، ئوق يېقىلغۇ بىلەن ھاۋانى قىسىدۇ. بېسىم ئارتىلىپ تېمپراتۇرا ئاشقاندا، سۋىچ يۇقىرى بېسىمدا يېقىلغۇغا توك ئۇچقۇنى ئاتىدۇ. شۇنىڭ بىلەن يېقىلغۇ كۆيۈپ ئوقنى ئارقىغا ياندۇرىدۇ. بۇ ئارقىلىق ھەرىكەت ئېنىرگىيە ھاسىل بولىدۇ.

سۋىچ تۈرى ۋە ئىشلىتىش مۇددىتى

كۆپ ئۇچرايدىغان سىۋىچلار ماتىرىيالىغا قاراپ ئۈچ خىل بولىدۇ. ئۇلار ئادەتتىكى سىۋىچ، پلاتىنالىق سىۋىچ، ئىرىدىيلىق سىۋىچ.

زاۋۇتتىن سەپلەنگەن سىۋىچ نىكىل – مانگان بېرىكمە مىتالىدىن ياسالغان . بۇ ئادەتتىكى سىۋىچ دىگەن شۇ. ئادەتتە ئۇنى 10 مىڭ كېلومېتىر ياكى 1 يىلدا تەكشۈرۈپ ئالماشتۇرۇش لازىم. پلاتىنالىق سىۋىچ بولسا 100 مىڭ كلومېتىرغا يېتىدۇ. يېقىنقى يىللاردا تەتقىقاتچىلار ئىرىدىيلىق سىۋىچمۇ پلاتىنالىق سىۋىچقا ئوخشاش يۇقىرى ئىقتىدارغا ئىگە ئىكەنلىكىنى بايقاشتى.

يۇقىرىقىدەك ئاز ئۇچرايدىغان مىتاللارنى ئىشلىتىشتىكى سەۋەپ، قىسىلغان يېقىلغۇ بىلەن ھاۋانى ئوت ئالدۇرىدىغان بۇ نەرسە 900 سېلسىيە گرادۇس شارائىتىدا خىزمەت قىلىدۇ. نىكىلنىڭ ئىرىش نوقتىسى 1500 گرادۇس ئەتراپىدا بولغاچقا بۇ كەڭ دائىرىدە ئىشلىتىلىۋاتىدۇ. پلاتىنانىڭ بولسا 2000 گرادۇسقا يېقىنلىشىدۇ. شۇنىڭ ئۈچۈن بۇ مىتالدىن ياسالغان سىۋىچ نىكىلدىن ياسالغىنىدىن كۆپ ياخشى، ھەم مۇقىم.

سۋىچنىڭ تۈرگە ئايرىلىشى

بۇنىڭ تىمپىراتۇرىغا چىداملىق بولىشىدىن سىرت، يالقۇننى جايىغا ئاتالىشى ۋە تولۇق قويۇپ بىرىشىغا قاراپ ئىقتىدارى بەلگىلىنىدۇ. يەنە ئالدىنقى تىمىدا ئېيتقاندەك، يۇقىرى سۈرئەت ۋە يۇقىرى تىزلىنىش تەلەپ قىلىنسا ئەلۋەتتە بۇنىمۇ ئۆزگەرتىشكە توغرا كېلىدۇ.
ئۇنداقتا سىۋىچنى ئالماشتۇرۇشقا قانداق نەرسىلەرنى ئالماشتۇرىمىز؟ قاندىغىغا ئالماشتۇرىمىز؟

ئادەتتە سىۋىچنى خىزمەت تېمپىراتۇرىسىغا ئاساسەن تىپقا ئايرىيمىز. سىۋىچ تاللىغاندا ئادەتتە ماتورنىڭ قىسىش نىسبىتى (压缩比)غا ئاساسەن تاللىنىدۇ. قىسىش نىسبىتى يۇقىرى بولغان ماتورغا سوۋۇتۇش ئىقتىدارى كۈچلۈك بولغان سىۋىچ تاللىنىدۇ. بازاردىكى سېتىلىدۋاتقان سىۋىچلارنىڭ ئۆلچىمى 5 گرادۇستىن 13 گرادۇسقىچە بولۇپ، زاۋۇتنىڭ سەپلىگىنى 6~7 گرادۇسقىچە بولىدۇ. بۇ سىفىرلار سىۋىچنىڭ ئىقتىدارىنى بەلگىلەيدىغان ئۆلچەم بولۇپ، سانلىق قىممىتى قانچە چوڭ بولسا سىۋىچنىڭ سوۋۇتۇش ئىقتىدارى شۇنچە ياخشى بولىدۇ. شۇنىڭغا ماس ھالدا ئىقتىدارىمۇ يۇقىرى بولۇپ، ياسىلىشى ئىنچىكە-نەپس. ماتور يۇقىرى سۈرئەتتە ئايلانغاندا ئوتنى دەل جايىغا ئېتىش، تولۇق ئېتىش، ئوت سۈپىتى ياخشى بولۇش قاتارلىق جەھەتلەردە پەرق قىلىدۇ. بۇ ئارقىلىق ماتورنىڭ كۈچىنىڭ تولۇق چىقىشىغا كاپالەتلىك قىلغىلى بولىدۇ.

سىۋىچنى ئالماشتۇرغاندا ئىقتىدارىغا ماس ھالەتتىكى سىۋىچنى تاللاش زۆرۈر. ئەگەر تۆۋەن قىسىش نىسبىتىدىكى ماشىنىغا يۇقىرى گرادۇسلۇق سىۋىچنى تاللىۋالسا تۆۋەن سۈرئەتتە ئوت ئېتىش مۇقىم بولماسلىق، ماتور ئوت ئېلىشى توسقۇنلۇققا ئۇچراش قاتارلىق ئەھۋاللار كۆرىلىدۇ، شۇنىڭ ئۈچۈن باھاسى قانچە قىممەت، ئىقتىدارى يۇقىرى بولغانسىرى ماشىنىڭىز شۇنچە ياخشى ئىشلەيدۇ دىگەن گەپ ئەمەس. ئادەتتە دۆلىتىمىزگە 7 ياكى 8 بولغان سىۋىچ بولسا يېتىدۇ. 9 ياكى يۇقىرىسىنى ئىسسىق بەلباغدىكى مۇسابىقە ماشىنىلىرغا ئىشلىتىش ماس كېلىدۇ. ماتىرىيالىنىڭ قانداق بولىشىغا كەلسەك، ئىقتىسادى جەھەتتىن ئۆزىڭىز قارار قىلسىڭىز بولىدۇ.

يەنە ئەسكەرتىشكە تېگىشىلىكى شۇكى، سىۋىچ ئىقتىدارىنىڭ ئەڭ ماس كېلىشى، ماشىنىڭىزغا مەلۇم دەرىجىدە ماي تىجەپ بېرىدۇ.

سۋىچنىڭ بۇزۇلىشى

سۋىچنىڭ ئۆمرى ئادەتتە 15 مىڭ كېلومېتىر ئەتراپىدا بولىدۇ. ئۇزاق مۇددەتلىك (ياخشى سۈپەتلىك) سۋىچنىڭ ئۆمرىمۇ 30 مىڭ كېلومېتىر بولىدۇ. سۋىچ خىزمەت قىلىدىغان مۇھىتنىڭ تېمپىراتۇرىسى داۋاملىق 500~600 سېلسىيە گرادۇس بولغانلىقتىن بۇنى ۋاقتى-ۋاقتىدا ئالماشتۇرۇپ تۇرۇش ماتورنىڭ خىزمەت ئۈنىمىگە، ئۆمرىگە ۋە ماي ئىقتىسادچانلىقىغا پايدىلىق. ئەگەر تېمىپراتۇرا زىيادە يۇقىرى بولۇپ، ناچار سۋىچ ئىشلەتكەندە سۋىچنىڭ خىزمىتى ماتورنىڭ ھەرىكىتىگە ماسلاشماي چالا-پۇلا ئاتقان ئوتلىرى بىلەن ماتورنى يەنە ئەخلەتكە توشقۇزىۋېتىشىمۇ مۇمكىن.

ئەگەر ماتورنىڭ ئوت ئېلىشى ياخشى بولماسلىق، يېقىلغۇغا ناچار يېقىلغۇ ئىشلىتىش قاتارلىق سەۋەبلەر تۈپەيلى سۋىچنىڭ تېمپىراتۇرىسى نورمال خىزمەت مۇھىتىدىكىدىن تۆۋەن بولۇپ قالغان ئەھۋال ئاستىدا كاربون تەركىبلىك ئەخلەت (ئاساسلىقى تولۇق كۆيۈپ بولالمىغان كاربون بېرىكمە قالدۇقلىرى) يىغىلىۋېلىپ، سۋىچ ئۇچىغا قاپلىشىپ تۇرۇپ قېلىشىمۇ مۇمكىن. سۋىچنىڭ كۆپ ئۇچرايدىغان «بۇزۇلىشى» مانا مۇشۇنىڭدىن ئىبارەت. بۇنىڭ چارىسى سۋىچنى چىقىرىپ تازىلاپ تۇرۇش ياكى ۋاقىت بەلگىلەپ يېڭىسىغا ئالماشتۇرۇپ تۇرۇش. بۇنىڭغا ئوخشاش ئەخلەتلەرنى تازىلاشنىڭ يەنە بىر خىل ئەپچىل چارىسى شۇكى، ماتورنى 4 مىڭ ئەتراپىدا ئۇدا نەچچە مېنۇت ئايلاندۇرۇش. بۇنىڭدا يىغىلىپ قالغان ئەخلەتلەر يۇقىرى تېمپىراتۇرىدا كۆيۈپ، بېسىم بىلەن مورىدىن چىقىپ كېتىشى مۇمكىن.

داڭلىق ماركىلىق سۋىچلاردىن مىسال

1. ياپونىيە DENSO 电装

2. ياپونىيە NGK

3. ئامېرىكا CHAMPION 冠军

4. گىرمانىيە BOSCH 博世

كۆڭلىڭىزدىكىنى تاپايمۇ؟

ماشىنا ئاتالغۇلىرىغا ئىزاھات – چىقىرىش مىقدارى

پاسىبان — Mon, 10 Oct 2011 13:04:23 +0000

كۇلۇب يېڭىدىن قۇرۇلۇپ بىر مەزگىلدىن كىيىنلا ماشىنا ساھەسىدە بىزگە ئەڭ كۆپ ئۇچرايدىغان بىر ئاتالغۇ – ئات كۈچى توغرىسىدا تەپسىلىي توختىلىپ ئۆتكەن ئىدۇق. (بۇ جاينى بېسىپ شۇ يازمىغا بېرىڭ) بۈگۈن بىز داۋاملىق ئاڭلايدىغان «1.8 لىك ماشىنىكەن ماۋۇ» دېگەندەك جۈملىلەردىكى ئاشۇ ساننىڭ نېمىلىكى توغرىسىدا، يەنى چىقىرىش مىقدارى توغرىسىدا توختىلىپ ئۆتەيلى.

ئۇقۇم

چىقىرىش مىقدارى 排量 Car Emission بولسا سۇيۇقلۇق ئارقىلىق ھەرىكەت ئۇزىتىش ساھەسىدە كۆپ قوللىنىلىدىغان ئاتالغۇ. ھەممىمىزگە مەلۇم، پورشىننىڭ ئىچىدە كلاپان شەكىللىك ئوق بولىدۇ، ئۇ ئوق پورشىننىڭ ئۈستىدىن ئاستىغا، ئاستىدىن ئۈستىگە بېرىپ كېلىپ ھەرىكەت قىلىدۇ. بىز دەۋاتقان چىقىرىش مىقدارى بولسا، ئوقنىڭ پورشىننىڭ ئەڭ يۇقىرى قىسمىدىن ئەڭ تۆۋەن قىسمىغا چۈشكىچە بولغان ئارىلىقىغا سىغىدىغان ئاقما جىسىمنىڭ مىقدارىنى كۆرسىتىدۇ. بۇ بىر دانە پورشىننىڭ چىقىرىش مىقدارى. ئەگەر بىر ماتوردا بىرقانچە پورشىن بولسا، ھەرقايسى پورشىننىڭ مىقدارىنىڭ يىغىندىسى بۇ ماتورنىڭ چىقىرىش مىقدارى بولىدۇ. ئەمەلىيەتتە بۇنى چىقىرىش مىقدارى دېگەندىن، سىغدۇرۇش مىقدارى دېگەن تۈزۈكرەك.

مەسىلەن، ئۈستىدىكىسى بولسا ۋولكسۋاگېننىڭ بىرىنجى ئاپتوموبىل زاۋۇتى بىلەن بىرلىشىپ ياسىغان بورا دېگەن ماشىنىسىنىڭ 1.8 لېتىرلىق تۇربېنلىق بېسىم ئاشۇرۇش قۇرۇلمىسى ئورۇنلاشتۇرۇلغان ماتورى. بۇنىڭدا 4 تال پورشىن بار بولۇپ، ھەر بىرىنىڭ تەخمىنەن 450 مىللىلېتىر كېلىدۇ. شۇڭا بۇنىڭ ماتورى 1.8 لېتىرلىق بولغان بولىدۇ.

ئوغۇللار بەكرەك بىلىشى مۇمكىن، موتىسىكلىتنى 250 لىك، 150 لىك، 100 لىك دەپ قويىدىغان. ھازىرمۇ شۇنداق ئاتايمىز. كىچىمىزدە <<تۈنۈگۈن ئاكامنىڭ 250 لىك ياماخاسىنى ئېچىقىپ يېرىم كۈن چاپتۇرۇپ ئويناپتىمەن>> ، << پالانچىنىڭ دادىسىنىڭ 150 لىك سۇزۇكىسى بار>> … دېگەندەك ئىشلار ئارىمىزدا قىززىق تېما ئېدى. ئۇ چاغا بەزىلەر بۇنى ماتورنىڭ ئات كۈچىنى كۆرسىتىدۇ، 250 لىك دېگىنى 25 ئات كۈچىگە ئېگە، دېسە، يەنە بىرى ئۇنىڭ ئەڭ يۇقىرى سۈرئېتى، دېيىشەتتى. لېكىن مەن بۇنىڭغا ئىشەنمىگەن. ئەمدى سىز ماڭا ئىشىنىڭ! ئۇ بولسا ئاشۇ ماتورنىڭ چىقىرىش مىقدارىنى كۆرسىتىدۇ. 250 لىك ياماخا دېگىنى 250 مىللىلېتىرلىق ياماخا ماتورنى كۆرسىتىدۇ ۋە باشقىلىرىمۇ شۇنداق تەرىقىدە ئىزاھلىنىپ ماڭىدۇ.

چىقىرىش مىقدارىنى قانداق پەرق قىلىمىز؟

ماتورنىڭ چىقىرىش مىقدارى بولسا ئەڭ مۇھىم پارامېتىر بولۇپ، ماتورنىڭ ئات كۈچىگە بىۋاستە مۇناسىۋەتلىك بولىدۇ. بۇنى ماتورنىڭ چوڭ-كىچىكلىكى دىيىشكىمۇ بولىدۇ. ئادەتتە كۆپ قىسىم ماشىنىلارنىڭ ئارقا تەرىپىگە قارىساق ئۇنىڭ چىقىرىش مىقدارىنى كۆرگىلى بولىدۇ. مەسىلەن بىرىنجى ئاپتوموبىل زاۋۇتىنىڭ قىزىل بايراق دەيدىغان بىر ماشىنىسى بار. ئۇنىڭ ئارقا تەرىپىدىكى CA7202 دېگەن خەتنى كۆرگەن بولىشىڭلار مۇمكىن. ئالدىدىكى CA بولسا بىرىنجى ئاپتوموبىل زاۋۇتىغا ۋەكىللىك قىلىدۇ. 7 بولسا پىكاپ شەكىللىك ماشىنىنى كۆرسىتىدۇ، ئوتتۇرىدىكى 20 بولسا ئۇنىڭ چىقىرىش مىقدارى بولۇپ 2.0 لىك ماتور بارلىقىنى بىلدۈرىدۇ. ئارقىدىكى بىر خانىنى زاۋۇت خالىغانچە بەرسە بولىدۇ. باشقا تۈردىكى ماشىنىلارنىڭ مۇشۇنىڭغا ئوخشىغان ئالدىدا ئىككى ھەرپ، ئارقىدا 4 خانە سان بولغان بولسا سىز مۇشۇ ئۇسۇل بويىچە پەرقلەندۈرسىڭىز بولىدۇ. يەنە بەزى شىركەتلەر 4 خانە ساننىڭ ئارقىغا MT ياكى AT دېگەن ھەرپلەرنى يېزىپ قويىدۇ. MT بولسا قول خوتنى، AT بولسا ئاپتۇماتىك خوت ئىكەنلىكىنى بىلدۈرىدۇ. يەنە بەزىلىرى بىۋاستە ھەجمىنى يېزىپ قويىدۇ. بۇنىڭ بىر مىسالى سۇزۇكىنىڭ 羚羊1300 ماشىنىسى بولۇپ، ئۇنىڭدىكى 1300 بولسا ئۇنىڭ چىقىرىش مىقدارى، ئەلۋەتتە، بۇ يەردىكى بىرلىك مىللىلېتىر (ml) ياكى كۇپ سانتىمېتىر (cc) بولىدۇ.

بەزى ماشىنىلاردىكى چىقىرىش مىقدارىنى بىلىش ئۇسۇللىرى

چىقىرىش مىقدارىنى بەزى شىركەتلەر ئالاھىدە تەرتىپ بويىچە ئەسكەرتىدۇ. بۇنىڭدا مۇقىم بىر فورمۇلا ياكى قانۇنىيەت يوق. بۇنىمۇ زاۋۇت ئۆزى بەلگىلەيدۇ.

مىسالغا ئالساق، BMW نىڭ BMW325i دىگەن ماشىنىسىدىكى ئالدىدىكى 3 دېگەن ھەرپ ماشىنىسىنىڭ تۈرى، ئارقىسىدىكى 25 بولسا ئۇنىڭ چىقىرىش مىقدارى. يەنى 3 تۈرىدىكى 2.5 لېتىرلىق (بۇ چوقۇم 2.5 لېتىرلىقمۇ ئەمەس. بەزىدە 2.3 لېتىرلىقنى 25 دەپ ئالىدۇ. بەزىدە 3.0 لىكنى 35 دەپ ئالىدۇ) ماتور سەپلەنگەن ماشىنا ئىكەنلىكىنى بىلىۋالغىلى بولىدۇ. BMW318i بولسا 3 تۈرىدىكى 1.8 لېتىرلىق ماشىنا ئىكەنلىكىنى بىلەلەيمىز. BMW530i بولسا 5 تۈرىدىكى 3.0 لىك ماتور سەپلەنگەنلىكىنى، ۋە 760 Li بولسا 7 تۈرىدىكى 6.0 لىك ماتور ئىكەنلىكىنى بىلەلەيمىز. يەنە بىر قانچە ئالاھىدە تۈرلىرى بار، مەسىلەن X5 ، X6, Z4 دېگەندەك. بۇلارنىڭ چىقىرىش مىقدارىنى كەينى تەرىپىدىن ياكى يان تەرىپىدىن يېزىلغان 3.0 ، 4.2 دېگەندەك رەقەملەردىن بىلەلەيمىز.

بېنزىنىڭ يەنە باشقىچە بولۇپ، ئالدىدىكى ھەرپ تۈرىنى، ئارقىدىكى رەقەم ئۇنىڭ چىقىرىش مىقدارىنى بىلدۈرىدۇ. مەسىلەن، S 350 بولسا S تۈرىدىكى 3.5 لىك ماتور سەپلەنگەنلىكىنى، S 500 بولسا S تۈرىدىكى 5.0 لىك ماتور سەپلەنگەنلىكىنى، E 240 بولسا E تۈرىدىكى 2.4 لىك ماتور سەپلەنگەنلىكىنى بىلىۋالغىلى بولىدۇ. كۆپىنچە ماشىنىلاردا ماتورىنىڭ چىقىرىش مىقدارىنى لېتىر بىرلىكى بويىچە يېزىپ قويىدۇ. كىيۇ-كىيۇنىڭ ئارقىدىكى 0.8 دېگىنىمۇ شۇ. ئۇنىڭ 3 تال پورشىنىنىڭ چىقىرىش مىقدارى 800 مىللىلېتىر. يەنە بىر خىلى 1.1 لىك، يەنە بىر خىلى بولسا 1.3 لىك. ئادەتتە چىقىرىش مىقدارىنى مۇشۇنىڭغا ئوخشاش پەرقلەندۈرىمىز.

ماي سەرپىيات بىلەن بولغان مۇناسىۋىتى

ماشىنىنىڭ چىقىرىش مىقدارى بىلەن ماي سەرپىياتى بىۋاستە مۇناسىۋەتلىك. لىكىن ئۇلارنىڭ مۇقىم فورمۇلاسى يوق. گەرچە ماتورنىڭ چوڭلۇقى بىلەن بېنزىننى مۇقىم قىلىپ فورمۇلاغا سالغىلى بولغىنى بىلەن شوپۇرنىڭ، ئەمەلىي شارائىتنىڭ، ماشىنىنىڭ ئوخشىمىغان ۋاقىتتىكى ئېغىرلىقىنىڭ، ماتورنىڭ ئايلىنىش سۈرئىتىنىڭ … قاتارلىق بىرقاتار ئېلمىنتلارنىڭ بەلگىلەنگەن فورمۇلاسى بولمايدۇ. شۇڭا مانچە لېتىرلىق ماشىنىنىڭ ماي سەرپىياتى مانچىلەك دەيدىغان فورمۇلانىڭ بولىشى مۇمكىن ئەمەس ئىش. پەقەت، چىقىرىش مىقدارى يۇقىرى بولغان ماشىنىنىڭ ماي سەرپىياتى چوڭراق بولىدۇ دېگىنىلا بولىدۇ خالاس.

چىقىرىش مىقدارىغا ماس كېلىدىغان كىشىلەر توپى

1 لېتىرلىقتىن تۆۋەن

بۇنى ئېنىقلا شەھەرنىڭ كىچىك ئەرمەكلىرى دېيىشقا بولىدۇ. جۇغى كىچىك، سەرپىياتى تۆۋەن، تاشقى كۆرىنىشى مودىغا ماسلاشقان. بۇ ماشىنىلار قىزلارغا، يېڭى ئۆگەنگۈچىلەرگە، يېڭى خىزمەتكە چىقىپ ماشىنا بىلەن بېرىشقا توغرا كەلگەنلەر. بۇ خىلدىكى ماشىنىلارنىڭ مۇھىتقا بولغان بۇلغىشى ئاز بولغانلىقتىن ھۆكۈمىتىمىز توختىماستىن ئىتىبار سىياسەتلىرىنى يولغا قويۇپ، سېتىۋالغۇچىلارنى ۋە ياسىغۇچىلارنى رىغبەتلەندۈرىۋاتىدۇ. ئەلۋەتتە، بۇ پەقەت بىر ئۆتكۈنچى باسقۇچتىكى ماشىنا. يازنىڭ ئىسسىق كۈنلىرىدە ھاۋا تەڭشىگۈچنى ئېچىپ، ئېگىزرەك بىر يەرگە چىقسىڭىز، سىز <<سېتىۋالغىنىم قوڭغۇزمۇ ياكى ماشىنىمۇ؟>> دەپ قالىسىز. بۇ چاغدا سىزگە پەقەت بىر ئېغىز سۆز كۇپايە — سەبر !

ماس كېلىدىغان ئوبىكت : يېڭى ماشىنا ھەيدىگەنلەر، قىزلار، دەسلەپكى باسقۇچتىكى كارخانىچىلار

ۋەكىللىك ماشىنىلار : ئاۋتو، كىيۇ-كىيۇ، SPAKE

1.3 لېتىرلىق

ھازىرقىدەك ماي باھاسى قىممەت ۋاقتىدا ماي سەرپىياتىغا كۆڭۈل بۆلمەي بولمايدۇ. بۇمۇ كىچىك تىپتىكى ماشىنا قاتارىغا كىرىدىغان بولۇپ، چەتئەل كارخانىسىنىڭ ياكى بىرلەشمە مەبلەغدىكى كارخانىلارنىڭ بۇ تۈردىكى ماشىنىلىرى يوق دىيەرلىك. شۇڭا بۇ تۈردە دۆلىتىمىزنىڭ كارخانىلىرى ئىشلەپچىقارغان ماشىنىلار بار. لېكىن ئىھتىياج بۇنىڭغا كۆپلەپ چۈشىۋاتقان، ھۆكۈمەتمۇ تەشەببۇس قىلىۋاتقان تۈر بۇ بولغاچقا، ھازىر 20 گە يېقىن ماشىنا تىپى مۇشۇ يۆنىلىشكە قاراپ مېڭىۋاتىدۇ. فىئات، دەيخاتسۇ، تويوتا قاتارلىقلار بۇنىڭ مىسالى.

ماس كىلىدىغان ئوبىكت : ماتورنىڭ كۈچىنى تەلەپ قىلغۇچىلار، ئاز مەبلەغ سېلىشنى خالايدىغانلار، ماي سەرپىياتىنى كۆزدە تۇتقۇچىلار

ۋەكىللىك ماشىنىلار : چاڭئەن بىنبىن، يېڭى ۋىئوس، كىيا تۇلپار، لىفەن 520 …

1.4~1.5 لېتىرلىق

بۇ خىلدىكى ماشىنىلارنى شەھەرنىڭ ئەركىسى دېيىشكە بولىدۇ. 1.4 لېتىرلىق ماشىنىلارنىڭ تۈرلىرى بىر ئاز كۆپ. 1.5 لىكنىڭ ئازراق. شەھەردە كۆپ قىسىم يوللاردا 40~50 كېلومىتىرلىق چەكلىمە بار، بەزى جايلاردا بولسا 60 ، ناھايىتى ئاز قىسىم جايلاردا 80. 60 ئەتراپىدىكى بۇ سۈرئەت دەل مۇشۇ دائىرىدىكى ماشىنىلارنىڭ ئەڭ ماي تېجەيدىغان سۈرئىتى بولغاچقا، بۇ خىلدىكى ماشىنىلار << ھەم ماي تىجەيدىغان، ھەم كۈچلۈك بولغان>> ماشىنا تۈرىدۇر. شۇڭا بۇ خىلدىكى ماشىنىلارنىڭ سېتىلىش مىقدارى خېلىلا يۇقىرى.

ماس كېلىدىغان ئوبىكت : << ھەم ماي تىجەيدىغان، ھەم كۈچلۈك بولغان>> ماتورنى ياخشى كۆرىدىغان كىشىلەر توپى

ۋەكىللىك ماشىنىلار : چاڭچىڭ پوچى ئېيىق، چېۋرولىت 乐风 ، ستروئىت C2 ، پەيجوت 206، خوندا فىت …

1.6 لېتىرلىق

بۇ خىلىدىكى ماتورنى ئەڭ بازارلىق ماتور دېيىشكە بولىدۇ. بۇ خىلدىكى ماشىنىلار بېخەتەرلىك جەھەتتە بولسۇن، ئىچكى بېزىلىش ۋە تاشقى كۆرىنىش جەھەتتىن بولسۇن، ھەشەمەتلىككە قاراپ ماڭغان ماشىنا تۈرى. بازاردا ئەڭ كۆپ ئۇچرىتىدىغىنىمىزمۇ مۇشۇ خىلدىكىسى. ھەشەمەتلىك ماشىنىلارنىڭ دەرۋازىسى مانا مۇشۇ يەردىن باشلىنىدۇ. بۇ خىلدىكى ماشىنىلارنىڭ تۈرىمۇ ئىنتايىن كۆپ، شەكلىمۇ خىلمۇ-خىل. باھاسىمۇ پەرقلىق. شۇڭا ئىستىمالچىلارغا كەڭ تاللاش پۇرسىتى بار. بۇمۇ بۇخىلدىكى ماشىنىلارنىڭ كۆپ بولىشىدىكى بىر سەۋەپ بولىشى مۇمكىن.

ماس كېلىدىغان ئوبىكت : بېخەتەرلىك ۋە ماتور كۈچىنى تەلەپ قىلغۇچىلار

ۋەكىللىك ماشىنىلار : جېتتا ، بورا، پولو، گول، سايل، ئېكسېل، 307 ، ئېلەنترا، فەملىي …

1.8 لېتىرلىق

بۇ خىلدىكى ماشىنىنى بولسا شەھەرنىڭ سەركىسى دېيىشكە بولىدۇ. قۇۋۋىتى چوڭ، ئىچكى بېزىلىشى ھەشەمەت، كەڭرى-تاشا، تاشقى كۆرىنىشى كۆركەم، بىخەتەرلىكى تېخىمۇ ياخشى، باشقۇرۇش قولاي بولۇشتەك بىر قاتار ئۈستۈن بولغان ئالاھېدىلىككە ئېگە بولغاچقا، تەرەققى قىلىۋاتقان جەمئىيتىمىزگە بىر قەدەر ماس كېلىدىغان بىر خىل تىپ ھېساپلىنىدۇ. ئەلۋەتتە، ماي سەرپىياتى جەھەتتە بىر ئاز پەرق قىلىدۇ. لىكىن ھەيدىگۈچى تەجرىبىلىك بولسا 8~9 لېتىر دىن ئاشۇرماي ھەيدىگىلى بولىدۇ.

ماس كېلىدىغان ئوبىكت : ھۆكۈمەت ئىشى، ياخشىراق ئائىلە ماشىنى قىلىشنى ئويلايدىغانلار…
ۋەكىللىك ماشىنىلار : كوروللا، فوكس ، ئېلەنترا ، ئېكسېل …

بۇنىڭدىن يۇقىرى ھەجىمدىكى ماشىنىلار ئاساسەن ئوتتۇرا-ئالىي قاتلامدىكى ماشىنىلار بولۇپ، ماتورنىڭ كۈچىنى تەلەپ قىلىدىغان، چاپتۇرۇپ ئوينايدىغانلارغا ماس كېلىدۇ. ماشىنىنىڭ ئېغىرلىقى بىلەن ماتورنىڭ چىقىرىش مىقدارى ماس قەدەمدە چوڭىيىپ ماڭىدۇ. ئالىي دەرىجىلىك ھەشەمەت ماشىنىلارنىڭ ماتورى ئاساسەن 3.0 ياكى ئۇنىڭدىن چوڭ بولىدۇ. لېكىن ئۇنىڭ ناھايىتى كۆپ قىسىم كۈچى ئىسراپ بولۇپلا ماڭىدىغان گەپ. ھازىرغا قەدەر 200 ئات كۈچىدىن ئارتۇق كۈچكە ئېگە ماشىنىنى، راللىي مۇسابىقىسىدە پۈتۈن كۈچىنى چىقارغان چاغدا باشقۇرالايدىغان ئادەمدىن جۇڭگودا بىرسى بار دېسە مەن ئىشەنمەيمەن. ئىسراپ بولىدۇ دېيىشىمدىكى ئاساسىمنى بىلگەنسىز؟

مەنبەسى : ئىزدىنىشتىكى ئىلگىرىكى يازمام.

كۆڭلىڭىزدىكىنى تاپايمۇ؟

BMW 5 نىڭ 535 ئات كۈچىلىك Hybrid ماشىنىسى

پاسىبان — Sun, 02 Oct 2011 02:12:36 +0000

Hybrid نىڭ نېمىلىكىنى كۇلۇبىمىزدىكى مۇشۇنىڭغا مۇناسىۋەتلىك يازمىلارغا دىققەت قىلىپ كەلگەن، ياكى توردىن مۇشۇ ساھەدىكى ماشىنىلارغا يېقىندىن دىققەت قىلىپ كەلگەن دوستلار ئېنىق بىلىشى مۇمكىن. بۇ ئارىلاش كۈچ مەنبەلىك دېگەن مەنىدە. يەنى، بېنزىنغا ئوخشاش يېقىلغۇ بىلەن ئېلىكتىر كۈچىنى كۈچ مەنبەسى قىلىدىغان ماشىنىلارنى ئارىلاش كۈچ مەنبەلىك ماشىنىلار، يەنى بىز دەۋاتقان Hybrid ماشىنىلار دەپ ئاتايمىز. يەنە بىر ئاتالغۇغا ئىزاھ بېرىلدى. بىزگە ئەڭ تونۇشلۇق بولغان TOYOTA ماركىسىنىڭ Perius دەيدىغان ماشىنىسى دەل مۇشۇ تېخنىكىدىن ياسىلىپ بىز بىلەن كەڭ ئۇچراشقان ئىدى. ئەمدىلىكتە ئېنىرگىيە تېجەش كۈچلۈك تەشەببۇس قىلىنىۋاتقان مۇشۇ چاغلاردا ھەشەمەت ماركىلىرىدىن تارتىپ بۇنىڭغا كەڭ ئاۋاز قوشۇۋاتىدۇ. BMW مۇ بۇنىڭدىن مۇستەسنا ئەمەس ئىكەن.

يېقىنقى خەۋەرلەرگە قارىغاندا ھەشەمەت ماركىسى BMW ئۆزىنىڭ 5 تۈرىدىكى مەھسۇلاتلىرى ئىچىدە ئارىلاش كۈچ مەنبەلىك ماشىنا ياساش ئۈستىدە تەتقىق ئېلىپ بېرىپتۇدەك. 5 تۈرىنىڭ باتارىيەسى 3 كە قارىغاندا ئۇنچە بەك چوڭ كۈچ بېرەلمىسىمۇ، بۇ پاكىز ئېنىرگىيە يەنىلا ئىشلەتكۈچىلەرنىڭ قىزغىن ئالقىشىغا ئېرىشىشى مۇمكىن ئىدى.

گىرمانىيە ماشىنا ئىشلەپچىقىرىش كارخانىسى يېقىندا ئەڭ يېڭى مەھسۇلات ActiveHybrid 5 نى ئېلان قىلىپ كۆرگەزمە قىلدى.

ActiveHybrid 5 بولسا ئەسلىدىكى 535i نىڭ ھەرقايسى ئىقتىدار ۋە قۇرۇلمىلىرىنى ئۆزىگە مۇجەسسەملىگەن ئاساستا لايىھەلەنگەن بولۇپ، بۇ شىركەت لايىھەلىگەن 6 سېلىندىرلىق تۇربو (Turbo) ماتورغا 55 ئات كۈچىلىك ئېلىكتىر ماتور ۋە 8 خوتلۇق كورۇپكا ئورنىتىلغان.

بىر دانە لېتىيلىق ئاككۇمۇلياتور مەخسۇس ئېلىكتىر ماتور ئۈچۈن توك بىلەن تەمىنلەيدۇ. ئېلىكتىر ماتورى بىلەن قوشۇلۇپ جەمئىي 335 ئات كۈچى چىقىرالايدۇ. پەقەتلا ئېلىكتىر ماتور بىلەن قوزغالسا 22 ئېنگلىز مېلى (تەخمىنەن 35 كېلومېتىر) لىك سۈرئەتكە چىقالايدۇ. باتارىيەسى تولۇق ۋاقتىدا ئاران 2.5 مېل ( 4 كېلومېتىر ) يول يۈرەلەيدۇ.

قىياسلارغا قارىغاندا، گەرچە بۇ سان-سىفىرلار بەك ئويلىغىنىمىزدەك بولمىسىمۇ، 2 خانىلىق ماي سەرپىياتقا ئېگە 535i نىڭ ماشىنا ئېگىسىگە خېلىلا كۆپ سەرپىيات ئىقتىساد قىلىپ بېرەلەيدىكەن.

ActiveHybrid ئېلىكتىر ماتورنىڭ ياردىمى بىلەن 60 MPH (تەخمىنەن 96 كېلومتېرلىق) سۈرئەتكە چىقىشى ئۈچۈن پەقەت 5.7 سېكونت ۋاقىت سەرپ قىلغان. بۇ نەتىجە ئەسلىدىكى 535i غا قارىغاندا خېلىلا تېزلەشكەن.

BMW تەرەپنىڭ ئاشكارىلىشىچە بۇ ماشىنىنى كېلەر يىلنىڭ 3-ئايلىرىغىچە ئامېرىكىدىكى سېتىش نوقتىلىرىغا تەمىنلەشكە تېرىشىدىكەن. نۆۋەتتە بۇ ماشىنىنىڭ ھەقىقىي ماي سەرپىياتى توغرىسىدا BMW ھېچقانداق ئۇچۇر بىلەن تەمىنلىمىگەن. ماي سەرپىيات توغرىسىدىكى قاراشلارنىڭ ھەممىسى پەقەت قىياس، ئوي-پىكىردىن ئىبارەت ئىكەن.

بۇ قېتىمقى ActiveHybrid 5 نىڭ ئېلان قىلىنىشى، ئىلگىرىكى ActiveHybrid X6 نىڭ ئىشلەپچىقىرىشتىن ۋاز كېچىشىدىكى «تولۇقلىما» مىدۇ؟ ئەلۋەتتە، ھەممە ئادەم مۇشۇنداق ئويلىسا كېرەك. ئاللاھ نىسىپ قىلسا ActiveHybrid X6 نىڭ ئىشلەپچىقىرىشتىن ۋاز كېچىلىشى توغرىسىدا ئازراق مەلۇمات بېرىپ ئۆتىمەن. ئۇ چاغقىچە ھەقىقىي ئىشلەپچىقىرىلماقچى بولغان بۇ «كاساپەت» نىڭ بىر قانچە پارچە رەسىملىرىنى كۆرۈپ ئۆتەيلى.

كۆڭلىڭىزدىكىنى تاپايمۇ؟

بالوندىكى سان-سىفىرلارنىڭ مەنىسىنى بىلەمسىز؟

پاسىبان — Sun, 08 May 2011 11:21:59 +0000

ماشىنىنىڭ چاقىدىمۇ خېلى كۆپ بىلىملەر بار. چاق ئۈستىگە يېزىلغان سان-سىفىرلاردىن چاقنىڭ تىپ ئايرىمىسىنى، بەنداش چوڭلىقىنى، كەڭلىكىنى بىلگىلى بولىدۇ. لېكىن بۇ نەرسىلەر قايسى ئورۇنغا قانداق يېزىلغان؟ ئۇنىڭ بىرلىكى نېمە؟

بۇنى چۈشەندۈرۈش ئۈچۈن ئۈستىدىكى چاقنى مىسالغا ئالايلى. قارايدىغان بولساق 195/55R15 85H دەپ بار ئىكەن. بۇنىڭ مەنىسىنى بىردىنبىر يەشسەك:

195 بولسا چاقنىڭ كەڭلىكىنى كۆرسىتىدۇ. بىرلىكى مىللىمېتىر. يەنى بۇ چاقنىڭ كەڭلىكى 195 مىللىمېتىر.

55 بولسا قېلىنلىقىنى كۆرسىتىدۇ. يەنى يەرگە تېگىپ تۇرىدىغان جاي بىلەن بەنداشنىڭ ئىچىگە كىرىپ كېتىدىغان يېرىگىچە بولغان ئارىلىقى. بىرلىكى پىرسەنت. يەنى چاقنىڭ قېلىنلىقىنىڭ كەڭلىكى بولغان 195 مىللىمېتىرنىڭ 55 پىرسەنتىچىلىك ئىكەنلىكىنى بىلدۈرىدۇ. ئۇنداقتا بۇ چاقنىڭ قېلىنلىقى 195×55%=107.25 مىللىمېتىر.

R بولسا RADIAL نىڭ قىسقارتىلمىسى بولۇپ، چاقنىڭ ياسىلىش قۇرۇلمىسىغا قارىتىلغان.

15 بولسا بەنداشنىڭ دىئامېتىرىنى ئىپادىلەيدۇ. بۇنىڭ بىرلىكى ئېنگلىز سۇڭى. 1 ئېنگلىز سۇڭى تەخمىنەن 2.54 سانتىمېتىر. ئۇنداقتا 15 سۇڭلۇق بەنداشنىڭ دېئامېتىرى 38.1 سانتىمېتىر بولىدۇ.

85 بولسا چاقنىڭ كۆتۈرۈش سىغىمچانلىقىنى ئىپادىلەيدۇ. بۇ سانلارنىڭ قانچىلىك ئېغىرلىق كۆتۈرەلەيدىغانلىقى تۆۋەندىكى قىممەت بويىچە بولىدۇ:

82=475; 83=487; 84=500; 85=515; 86=530; 87=545; 88=560; 89=580; 90=600; 91=615; 92=630; 93=650; 94=670; مۇشۇ بويىچە بولۇپ، ئەڭ چوڭى 108=1000 كېلوگرام. مۇشۇ بويىچە بولغاندا ئۈستىدىكى بۇ چاق 515 كېلوگرام ئېغىرلىقنى كۆتۈرەلەيدۇ. ئوخشاش چاقتىن 4 نى ئورۇنلاشتۇرغان بولساق بۇ ماشىنىنىڭ كۆتۈرۈش ئېغىرلىقى 515×4=2060 كېلوگرام بولىدۇ.

H بولسا بەلگىلەنگەن سۈرئەت چېكى. بۇ ھەرپلەرنىڭ بىلدۈرىدىغان قىممەتلىرى تۆۋەندىكىچە:

B 50 km/h

C 60km/h

J 100km/h

K 110km/h

L 120km/h

M 130km/h

N　140km/h ئادەتتە زاپاس چاققا ئىشلىتىلىدۇ

P　150km/h

Q　160km/h قارلىق مەخسۇس بالونى

R　170km/h

S　180km/h

T　190km/h

U　200km/h

H　210km/h ئەڭ كۆپ ئىشلىتىلىدىغان چاق تۈرى

V　240km/h

Z　240km/h چاپقۇرلار ئىشلىتىدىغان چاق تۈرى

W　270km/h ئالاھىدە چاپقۇرلار ئىشلىتىدىغان چاق تۈرى

Y　300km/h دەرىجىدىن تاشقىرى چاپقۇرلارنىڭ مەخسۇس چاق تۈرى

بۇلارنىڭ ئىچىدە تۇرمۇشىمىزدا ئەڭ كەڭ قوللىنىلىدىغىنى P, S, T, H تۈىدىكىلەر. دېمەك چاق ئۈستىگە يېزىلغان بۇ پارامىتىرلار «سۈرئىتى ۋە كۆتۈرۈش ئېغىرلىقى | بەنداش دىئامېتىرى | چاق تىپى | قېلىنلىقى / كەڭلىكى» دېگەن فورمۇلا بويىچە يېزىلىدۇ.

كۆڭلىڭىزدىكىنى تاپايمۇ؟

كۆپلىگەن كىشىلەر ئالالايدىغان ماشىنا – SUZUKI SX4

پاسىبان — Sat, 15 Jan 2011 04:11:51 +0000

كۆپلىگەن ماشىنا ئىستىمالچىلىرىنىڭ، بولۇپمۇ بىر جايىدا بوغۇلۇپ قېلىشنى خالىمايدىغان، يېڭى – يېڭى شەيئىلەر بىلەن ئۇچرىشىشنى ئىستەيدىغان ئىستىمالچىلارنىڭ، ئازدۇر-كۆپتۈر چىگرا ئاتلاپ بۇياق-بۇياققا بېرىش ئستىكى كۈچلۈكرەك بولىدۇ. ئۇلار ئۈچۈن ماشىنا تۇرمۇشنىڭ لەززىتىنى تېتىشتىكى كۆۋرۈك، ئەركىن ساياھەت قىلىشتىكى ئەڭ مۇھىم قورالدۇر.

تۇرمۇش – پەقەت شەھەر ئىچىدىلا چەكلەنسە بولمايدۇ. ھازىر ئۆزىمىزنىڭ ماشىنىمىز بارلار ئائىلە بويىچە ياكى دوست-بۇرادەرلەر بىلەن بىللە ساياھەتكە چىقىش بارغانسىرى ئوموملىشىۋاتىدۇ. بۇ ساياھەت ھەتتا بەزىلىرىمىز ئارىسىدا ماشىنا ئەترىتى تۈزۈپ ساياھەت قىلىشتەك ھالەتلەرنىمۇ شەكىللەندۈرۈپ بولدى. بۇنى «شۇشەن تۇرمۇش» دېگەن «مودا» سۆز بىلەن تەسۋىرلەش مۇمكىن.

ساياھەت قىلىدىغان جايلارنىڭ ھەممىسىنىڭ تۈز يول بولىشى ناتايىن، ئەلۋەتتە. مۇشۇنداق ئۇنىۋېرساللىققا ماسلىشالايدىغان ماشىنىنىڭ پەقەت تاشقى كۆرىنىشىلا ياخشى بولۇشى يەتمەيدۇ. كۆپ قىسىملىرىمىز ئۇنىڭ ئىچكى بېزىلىشىگە، ماتور ئىقتىدارىغا، ماشىنىنىڭ ئەڭ يېڭى ئېلىكترونلۇق تېخنىكىلارنىڭ قوللانغان ياكى ئەمەسلىكىگە دىققەت قىلىدىغان بوپكەتتۇق. چۈنكى ئۇلارغا ئاشۇنداق «شۇشەن» تۇرمۇشقا ماس كېلىدىغان، شۇنىڭ ھۆددىسىدىن چىقالايدىغان ئۇنىۋېرسال ماشىنا لازىم.

گەپنىڭ پوسكاللىسىغا كەلسەك، بۈگۈن تونۇشتۇرماقچى بولغان سۇزۇكىنىڭ SX4 دېگەن ماشىنىسى، مۇشۇنداق تەلەپتىكى كىشىلەرگە يۇقىرى دەرىجىدە ماس كېلىدىغان ئاممىباپ، ئۇنىۋېرسال ماشىنا. بۇ ماشىنىنى ئومومى ئىقتىدارىغا قاراپ چىگرا ھالقىيدىغان ماشىنا دىيىشكە تامامەن بولىدۇ.

ماشىنىنىڭ ئەڭ دەسلەپكى لايىھەسىگىلا شەھەر ۋە ساياھەتنى سىڭدۈرىۋەتكەن بولغاچقا، بۇلارغا ماسلاشقان راھەتبەخش تۇيغۇسى ۋە يۇقىرى ئىقتىدار ماشىنىدا ئەكس ئېتىشى كېرەك ئىدى. خاسلاشتۇرۇلغان ئىچكى بېزىلىش، ھەيدىگەندىكى كونترول تۇيغۇسى، كەڭرى بوشلۇق، ئالدى تەرەپتىكى كۆرۈش دائىرىسىنىڭ كەڭلىكى قاتارلىق بىر قاتار ئالاھىدىلىك بۇ ماشىنىنىڭ ئۇنىۋېرساللىققا ھەقىقەتەن مايىل ئىكەنلىكىنى ئىسپاتلىيالايدۇ.

يەنە بىر جەھەتتىن، بۇ ماشىنىنىڭ تەگلىك ئېگىزلىكى 175mm بولۇپ، دالا ماشىنىسىنىڭ ئارقىسىدىلا تۇرىدۇ. بۇ تەرەپتىكى ئارتۇقچىلىقى رىقابەتچىسى بولمىش CROSSPOLO دېگەندەك ماشىنىلارغا قاش ئاتالايدۇ. يەنە، بوشلۇقىنىڭ چوڭلۇقى دەل چىگرا ھالقىيدىغان ماشىنا بولۇشتىكى ئاساس.

شەھەر ئىچىدىكى ماشىنا قىستاڭچىلىقى، ئۇزۇن يولدىكى سەپەر ئەرزىيىتى دېگەندەك تەرەپلەردە ئورۇندۇقنىڭ راھەتبەخش بولىشى ناھايىتى مۇھىم ئامىل. بۇ ماشىنىنى سېتىۋالغان كۆپ قىسىم ماشىنا ئېگىلىرىنىڭ تەسىراتى بويىچە ئېيتساق، SX4 نىڭ ئورۇندۇقىنى يۇمشاق – قاتتىقلىقى ئوتتۇراھال، تۇتقاندىكى سەزگۈ راھەت، بەدەننى ئوراش ۋە تېرەش جەھەتتە ئالاھىدە بولۇپ، ئولتۇرغاندا ناھايىتى راھەت ھېس قىلىدىكەن. مۇشۇنداق بولغاچقا ئۇزاق ئولتۇرغاندا ئاسان چارچاش ھېس قىلمايدىكەن.

ئىنچىكىلەپ ئىزدىنىش ئارقىلىق چوقۇم ھېس قىلالايسىز، SX4 ئادەمنىڭ بەل، مۈرە ۋە دۈمبە تەرەپتىن تېرەش ۋە ئوراش جەھەتتە ئالاھىدە ئارتۇقچىلىقى بار. بۇ پۈتۈنلەي ئادەم بەدىنىگە ماسلاشتۇرۇپ لايىھەلەنگەن. شۇنىڭ بىلەن ماشىنىنى ھەيدىگەن كىشىنىڭ راھەتبەخش تۇيغۇسى كۈچلۈك بولىدۇ.

ماتورى ماشىنىنىڭ يۈرىكى. SX4 كە ئىشلەتكەن ماتور 2007-2008 يىلىدا يىللىق 10 ياخشى ماتور دېگەن نامغا ئېرىشكەن. 205 مىللىمېتىرلىق كەڭ چاق ماشىنىنى تېخىمۇ چوڭ سۈركۈلۈش كۈچىگە ئېگە قىلىپ كونترولنى كۆرۈنەرلىك كۈچەيتىدۇ. 1.6 لېتىرلىق M16A تىپلىق بۇ ماتور، ئايلىنىشى پەقەت 2000 دىن ئېشىشقا باشلىغاندىلا ئەڭ يۇقىرى تولغىنىش مومېنتىغا يېقىنلىشىدۇ. شۇڭا تىزلىنىش ناھايىتى ياخشى.

بۇ ماشىنىنىڭ ھازىر 2 خىل نۇسقىسىنىڭ قول خوت ۋە ئاپتۇماتىك خوت بولۇپ جەمئىي 4 خىل تۈرى بار. ماتورى ئوخشاشلا 1.6 لېتىرلىق ( 1.8 لېتىرلىقىنى ھازىر تېخى ياسىمىغان ئوخشايدۇ، سانلىق مەلۇماتلىرىنى تاپالمىدىم ). ئات كۈچى 108. قۇۋۋىتى 80 كېلوۋات.

1.6 لىك 灵动型 نىڭ قول خوت نۇسقىسى 98 مىڭ 8 يۈز يۈەن. ئاپتۇماتىك خوت نۇسقىسى 108 مىڭ 8 يۈز يۈەن.

1.6 لىك 运动型 نىڭ قول خوت نۇسقىسى 108 مىڭ 8 يۈز يۈەن. ئاپتۇماتىك خوت نۇسقىسى 118 مىڭ 8 يۈز يۈەن.

运动型 نىڭ بىرقانچە ئارتۇقچىلىقىنى مىسال ئېلىپ ئۆتەي.

بۇ نۇسقىسىنىڭ رولىغا تېرە ئورالغان. رولىدا باشقۇرۇش كونۇپكىلىرى بار. ئىشىكنى ئاچقۇچ سالماي ئاچالايسىز. تۇڭلۈك (天窗) بار. ماشىنا توختىتىش رادارى بار. ئۇچۇر كۆرسىتىش كومپىيۇتېرى بار (ماي سەرپىياتى، سىرتنىڭ تېمپراتۇرىسى، ماينىڭ قانچىلىك يېتىدىغانلىقى، قانچلىك يول يۈرگەنلىكى دېگەندەك ئۇچۇرلارنى كۆرسىتىپ بېرىدىغان نەرسە). ئالدى رەت ئورۇندۇق ئارىسىدا جەينەكلىك بار. GPS يول باشلاش سېستىمىسى ۋە چوڭ ئېكران بار. قويغۇچى MP3/WMA نى قوللايدۇ.

كۆڭلىڭىزدىكىنى تاپايمۇ؟

2010-يىللىق 10 نادىر ئۇقۇم ماشىنىلىرى

پاسىبان — Tue, 04 Jan 2011 14:40:20 +0000

ئۇقۇم ماشىنىسى بىر زاۋۇتنىڭ ئەڭ يۇقىرى تېخنىكىسىغا ۋەكىللىك قىلىدۇ. ئۇ ئەڭ ئىلغار تېخنىكىدىن ياسالغان، كۆپلەپ ئىشلەپچىقىرىلمايدىغان، دۇنيادا شۇ دەۋرنىڭ ئەڭ يۇقىرى تېخنىكىسىدا ياسىلىدىغان نادىر تۈر، ئىسىل ئەسەردۇر. ئۇقۇم ماشىنىسى ئەڭ ئاۋال يەرمەنكىلەردە ئېلان قىلىنىدۇ. يەرمەنكىدە ئېلان قىلىنغان ئۇقۇم ماشىنىلىرى ئەڭ تېز بولغاندا 2 يىلدىن كىيىن كۆپلەپ ئىشلەپچىقىرىلىدۇ. بەزىلىرى شۇ ھالەتتە نادىر ئەسەر سۈپىتىدە قېپقالىدۇ. رەسىمدىكى 10 ئۇقۇم ماشىنىسى 2010-يىلى ئىچىدە ئېلان قىلىنغان ماشىنىلار ئىچىدىن تاللانغان 10 نادىر ماشىنا بولۇپ باھالانغانلىرى.

بۇلار تەرتىپ بويىچە :

1. جېپ Nukizer

2. لوتۇس Esprit

3. ئالفا – رومىئو 2uettottanta

4. رېناۋلت Dezir

5. بېنزCLS Shooting Break

6. لەمبورگىنى Sesto Elemento

7. مازدا Shinari

8. جاگۇارC-X75

9. ئاۋدى Quattro

10. پورش 918 Spyder

دىققەت قىلغان بولسىڭىز بۇ تېمىدا ۋە ئالدىنقى مەزگىللەردە يوللىغان ئۇقۇم ماشىنىسىغا ئائىت تېمىلاردا ئۇقۇم ماشىنىسىنىڭ نېمىلىكى، قانداق مەنا بىلدۈرىدىغانلىقىنى بىلىپ بولغان بولىسىز. دېمەك، ماشىنا ئاتالغۇلىرىغا تەۋە يەنە بىر ئاتالغۇغا ئىزاھات تامام.

رەسىم چوڭايتىش ئۇسۇلىنى بىز بىلەن ئورتاقلاشقان ئۇيغۇربەگ بۇرادىرىمىزگە تەشەككۈر!

كۆڭلىڭىزدىكىنى تاپايمۇ؟

ماشىنا ئاتالغۇلىرىغا ئىزاھات – ئات كۈچى

پاسىبان — Sat, 01 Jan 2011 12:53:54 +0000

مەيلى ماشىنىسازلىق ساھەسىدە بولسۇن، مەيلى ئېلىكتىر ساھەلىرىدە بولسۇن، قۇۋۋەت ئېيتىلىدىغان جايلاردا «ئات كۈچى» دېگەن بۇ ئۇقۇمنى پات-پات ئاڭلاپ قالىمىز. ئات كۈچى ھەرقايسى ئەللەردە كەڭ ئوموملاشقان، يېشى ئەڭ چوڭ بولغان، ھەمدە تا ھازىرغىچە كەڭ قوللىنىلىۋاتقان ئەڭ قېرى بىرلىكلەرنىڭ بىرى ھېساپلىنىدۇ.

ئات كۈچى بايا ئېيتقىنىمىزدەك قۇۋۋەت بىرلىكى. قىسقارتىلمىسى HP بولۇپ، بۇ ئېنگلىزچىدىكى HorsePower دەىن كەلگەن. بۇ كەڭ قوللىنىلىدىغان ساھەلەردىن ماشىنا سانائىتى، ئىچىدىن يانىدىغان دېۋىگاتىللار ۋە ھاۋا تەڭشىگۈچ قاتارلىقلار بولۇپ، كۆپ ئىشلىتىدىغان قۇۋۋەت بىرلىكىدىن بۇنىڭدىن باشقا يەنە ۋات ۋە كېلوۋات بۇ ئىككىسى بار.

ئات كۈچى نېمىگە ئاساسەن ئۆلچىنىدۇ؟

بۇنىڭغا جاۋاب بېرىش ئۈچۈن 1 ئات كۈچىنى مىسال قىلىپ ئېيتساق، 1 ئات كۈچى – 75 كېلوگرام ئېغىرلىقتىكى بىر جىسىىمنى بىر سېكونت ئىچىدە 1 مېتىر ئېگىزلىككە كۆتۈرەلىگەندىكى قۇۋۋەتكە تەڭ. بۇ مېتىر سېستىمىسىدىكى ھېساپلاش ئۇسۇلى. بىز دەپ ئۆتكەن HP مېتىر سېستىمىسىدىكى ئات كۈچىنى كۆرسىتىدۇ. مېخانىكىدىكى ھېساپلاش ئۇسۇلى بويىچە بولغاندا بىر كۈچ مەنبەسى 200 قاداق ئېغىرلىقتىكى جىسىمنى بىر مېنۇت ئىچىدە 165 ئېنگلىز چىسى ئېگىزلىككە كۆتۈرەلىگەندە بۇ كۈچ مەنبەسى ئېگە بولغان ئات كۈچى 1 بولىدۇ. بۇنى قىسقارتىپ PS ياكى HP-M دەپ ئاتايمىز.

ئات كۈچى بىلەن ۋات ئوتتۇرىسىدا قانداق مۇناسىۋەت بولىدۇ؟

ئات كۈچى بايا ئېيتقىنىمىزدەك بىرقانچە خىل بولىدۇ. بۇنى مۇقىم بولغان ۋاتقا ئايلاندۇرۇش ئۈچۈن تۆۋەندىكىدەك ھېساپلاش كېرەك:

1) مېتىر سېستىمىسى بويىچە ھېساپلاش:

1 ئات كۈچى = 745.69 ۋات (يەنى 0.746 كېلوۋات)

1 كېلوۋات = 1.34 ئات كۈچى

2) مېخانىكىدىكى ھېساپلاش ئۇسۇلى

1 ئات كۈچى = 735.5 ۋات (يەنى 0.735 كېلوۋات)

1 كېلوۋات = 1.36 ئات كۈچى

بىر ئات كۈچىنىڭ قانچە ۋاتقا تەڭ بولىدىغانلىقىنى جەيمىس ۋات (James Watt) ئىسىملىك بۇ كىشى 18-ئەسىرنىڭ ئاخىرلىرىدا ھور ماشىنىسى بىلەن ئاتنىڭ خىزمەت ئۈنىمىگە ئاساسەن ھېساپلاپ چىقىپ كىشىلەرگە ئېلان قىلغان ئىكەن.

ئات كۈچىنىڭ ئەڭ كۆپ ئۇچرايدىغانلىرى يۇقىرىدىكى ئىككىسى بولۇپ، ئۇنىڭدىن باشقا ئېلكىتىر ئىلىمى ۋە سۇيۇقلۇق بېسىمىدىكى 1 ئات كۈچى 746 ۋاتقا تەڭ.

بىز كۇلۇبىمىزدا ماشىنا ساھەسىدە كۆپرەك توختىلىدىغان بولغانلىقىمىز ئۈچۈن مېتىر سېستىمىسىنى ئىشلىتىمىز. تۆۋەندە بىز كۆپ ئۇچرىتىدىدىغان بىرقانچە خىلدىكى ماشىنىلارنىڭ ئات كۈچىنى مىسالغا ئېلىپ ئۆتىمەن.

نومۇر	ماشىنا تىپى	ماتور ھەجمى (لېتىر)	قۇۋۋىتى (كېلوۋات)	ئات كۈچى
1	سانتانا 3000	1.8	70	94
2	ۋولكسۋاگېن گولف	1.6 ۋە1.4T	77 ، 96	103 ، 129
3	فەرارى ئىتالىيە	4.5	425	570
4	ئاۋدى A6	2.0T	125	168
5	ئاۋدى Q7	3.0 ۋە 3.7	200 ، 206	268 ، 276
6	خوندا فىت	1.4 ۋە 1.5	73 ، 88	98 ، 118
7	خوندا سۋىك	1.8	103	138
8	BMW X5	3.0T ۋە 4.4T	225 ، 300	301 ، 402
9	خان تاجى	2.5 ۋە 3.0	142 ، 167	190 ، 224
10	لەند كرۇيزىر	4.0 ۋە 4.7	179 ، 202	236 ، 270

* باشقا جايدا ئېلان قىلماقچى بولسىڭىز مەنبەنى چوقۇم ئەسكەرتىڭ.

يازما ئادرىسى : /20110101568.html

كۆڭلىڭىزدىكىنى تاپايمۇ؟

بۇ يازمىلارغىمۇ ئىشتاھايىڭىز بولىشى مۇمكىن
ھېيتلىق لازىممۇ؟! مانا ئەمىسە!	iOS 5 نى نامۇكەممەل تۈرمىدىن قاچۇرۇش	iOS 5 نى تۈرمىدىن قاچۇرۇشقا تەييارلىق – SHSH نى زاپاسلاش	ماشىنا ماتور قىسمىدىن – سۋىچ ھەققىدە چۈشەنچە	سىرىنى iPhone 4 كە سۆرەپ ئەكىرەيلىمۇ؟
无觅

بۇ يازمىلارغىمۇ ئىشتاھايىڭىز بولىشى مۇمكىن
ماشىنا ئاتالغۇلىرىغا ئىزاھات – تولغىنىش مومېنتى	ھېيتلىق لازىممۇ؟! مانا ئەمىسە!	iOS 5 نى نامۇكەممەل تۈرمىدىن قاچۇرۇش	iOS 5 نى نامۇكەممەلمۇ ئەمەس، مۇكەممەلمۇ ئەمەس بىر نېمە قىلىش	2010-يىللىق 10 نادىر ئۇقۇم ماشىنىلىرى
无觅

بۇ يازمىلارغىمۇ ئىشتاھايىڭىز بولىشى مۇمكىن
ماشىنا ئاتالغۇلىرىغا ئىزاھات – تولغىنىش مومېنتى	iOS 5 نى نامۇكەممەل تۈرمىدىن قاچۇرۇش	ھېيتلىق لازىممۇ؟! مانا ئەمىسە!	iOS 5 نى نامۇكەممەلمۇ ئەمەس، مۇكەممەلمۇ ئەمەس بىر نېمە قىلىش	iOS 5 نى تۈرمىدىن قاچۇرۇشقا تەييارلىق – SHSH نى زاپاسلاش
无觅

بۇ يازمىلارغىمۇ ئىشتاھايىڭىز بولىشى مۇمكىن
BMW X6 نىڭ Hybrid نۇسقىسىنى ياساش بېكار قىلىندى	ماشىنا ئاتالغۇلىرىغا ئىزاھات – تولغىنىش مومېنتى	سىرىنى iPhone 4 كە سۆرەپ ئەكىرەيلىمۇ؟	iOS 5 نى نامۇكەممەل تۈرمىدىن قاچۇرۇش	BMW ئۇقۇم ماشىنىسى Vision Efficient Dynamics دۈبەيدە
无觅

بۇ يازمىلارغىمۇ ئىشتاھايىڭىز بولىشى مۇمكىن
ماشىنا ئاتالغۇلىرىغا ئىزاھات – تولغىنىش مومېنتى	iOS 5 نى نامۇكەممەل تۈرمىدىن قاچۇرۇش	ھېيتلىق لازىممۇ؟! مانا ئەمىسە!	iOS 5 نى تۈرمىدىن قاچۇرۇشقا تەييارلىق – SHSH نى زاپاسلاش	iOS 5 نى نامۇكەممەلمۇ ئەمەس، مۇكەممەلمۇ ئەمەس بىر نېمە قىلىش
无觅

بۇ يازمىلارغىمۇ ئىشتاھايىڭىز بولىشى مۇمكىن
سىرىنى iPhone 4 كە سۆرەپ ئەكىرەيلىمۇ؟	سېستىما يېڭىلاشتىكى تەجرىبىلىرىم ( 1013خاتالىقىنى ھەل قىلىش)	تۈرمىدىن قاچۇرغانمۇ؟ ئۇنداقتا ئايفوننى ئىسراپ قىلماڭ (4)(فىلىملىك)	ماشىنا ئاتالغۇلىرىغا ئىزاھات – تولغىنىش مومېنتى	iPhone 4S ئېلان قىلىش يىغىنىنىڭ خەنچە چۈشەندۈرىلىشى
无觅