پاسىبان كۇلۇبى » فوتو-سۈرەت

ھايۋانات فوتوگرافچىلىقى نادىر ئەسەرلىرىدىن تاللانما

پاسىبان — Sun, 06 Nov 2011 09:37:46 +0000

ھايۋانات فوتوگرافچىلىقى – فوتوگرافچىلىق ساھەسىدىكى بىر قەدەر مۇرەككەپ، خەتەرگە تەۋەككۈل قىلىش روھى تەلەپ قىلىدىغان، كۆپ كۈچ سەرپ قىلىنىدىغان ۋە تېخنىكا تەلەپ قىلىدىغان فوتوگرافچىلىق تۈرى. ھايۋاناتلار بىزنىڭ سۆزىمىزنى ئاڭلىمىغانلىقى ئۈچۈن ناھايىتى كەم ئۇچرايدىغان ھەرىكەتلەرنى قىلغىنىدا قىسقا ۋاقىت ئىچىدە جىددى ئىنكاس قايتۇرۇپ ئىنتايىن توغرا بىر ئۇسۇلدا زاتۋورنى بېسىشىمىز شەرت. چۈنكى «سەل ياخشى چىقماي قالدى، يەنە بىر چىشلەپ بېرەمسەن؟» دېگىلى بولمايدۇ…

مۇشۇنداق پۇرسەتنى قاچۇرىۋەتمىگەن فوتوگرافلارنىڭ نادىر چىققان ئەسەرلىرىدىن بىر قانچىنى بىر كۆرۈپ چىقايلى.

«تۈلكە ئۇيقۇدا، تۈلكە ئۇيقۇدا … »

بىر جۈپ ياش

مايمۇن شاش

كالا دېگەن، مۈڭگۈز باش ( قوشاق كەپقالدى ھە )

بۇ ياۋايى ھايۋان بولمىسىمۇ، ئورۇقلىتىش چېيىنىڭ ئېلانىغا چىققۇدەك كەلگەن ئىتكەن ئۆزى …

«مايمۇن ئاغا» سۇ ئۈزىۋېتىپتۇ

ھەئە، تاغىل ئات دېگەن شۇكەن.

بۇ رەسىمنى كۆرۈپ Steve Jobs نىڭ بىر ئېغىز سۆزى ئېسىمگە چۈشتى:

«قۇياشنى قولدىن بېرىپ قويغان بولساڭ، ئاينى بولسىمۇ چىڭ تۇتقىن»

بۇ كۈچۈكنىڭ سەبىيلىكىنى ئېنىق نامايەن قىلالىغان فوتوگرافقا قول قويدۇم.

Wild دېگىنى شۇكەندە …

كىنولاردىكى سورتلۇق مۈشۈك …

ئارقىدىكى قايسى تاغ چوققىسى؟ كىم بىلىدۇ؟

بۇ مۈشۈككە قارىسام بەكلا بىچارىدەك كۆرۈنىدۇ. ئاخشام ئويناپ يانغۇچە ئاۋۇ مايمۇن كۆزىگە ئېگىسدەك كۆرۈنۈپ قالغان بولسا «مىياۋ» دەپ كېلىشىگىلا موكلا تۇتۇلغان ئوخشايدۇ. ئۇنىڭغىمۇ ئامال قانچە؟ تويىدىغان بولدى 夜猫 بولغانغا!

ھەقىقىي بۆرىلەر …

بۇ رەسىم ماڭا بەك ياقتى. خۇددى سىزىۋالغاندەكلا!

بۇ بىچارىلەر يۇرتلىرىدىن ئايرىلىپ «كەيپىيات ناچار، چىشىمغا تەگمەي تۇرۇشە!» دەۋاتقاندەك… كونتا كېنتىدەك قار دېگەن نەرسىنى بىلمەس بولغىيتى ئافرىقىدا بولسا …

بۇمۇ بىزنىڭ سەھرادىكى ئېشەكلەردەك ئىسقىرتىپ بەرسە ئېغىناپ قويامدۇ نېمە؟

كەپسىز تاغىللار. رەسىمگە چۈشكەندەك تۇرىشىنى!

ماۋۇ رەسىمنى بەك جايىدا تارتىپتۇ.

ھە، قىستۇرما رەسىم شۇتى

كىچىك تازكەن، ئىشتان كەيمەپتۇ

ئاغزىغا بېشىم كىرىپلا كېتەمدۇ نېمە؟

ئېيىق راس ھورۇن نېمىكەن. شۇ تاپتا ھەسەل چۈشەۋاتقان بولسا كېرەك.

Three Wolves

مۇشۇنداق ساسلىقتىن بەك قورقىمەن. تىمساق چىقىپ قالامدىكىن دەپ.

گۈزەللىككە ھېرىسمەن ئىتكەن. پۈچەك بولسىمۇ گۈل پۇراپ يۈرۈپتۇ. رەسىم ماڭا بەك ياقتى.

بۇ قاپلاننىڭ بېشىغا مۈشۈكنى كەيدۈرۈپ قويغان PS ھاسىلاتى ئەمەس. 猞猁 Lynx دەپ ئاتىلىدىغان مۈشۈك ئائىلىسىگە تەۋە ھايۋان بولۇپ، ئۇيغۇرچە تاغ مۈشۈكى، سۈلەيسۈن دەپ ئاتايدىكەنمىز.

ئېيىق ئائىلىسى ئىچىدە مۈشۈكئېيىق بىلەن مۇشۇ ئېيىقنى بەك مۇلايىممىكىن دەيمەن.

مۇشۇنىڭ ئۆزى بۇ نەرسىنىڭ ئىنسانلاردىن تولىمۇ يىراق بىر نەرسە ئىكەنلىكىنى ئىسپاتلاشقا يېتەمدىكىن دەيمەن.

زادى مېنىڭ ئانام دادام يا ئۇلارنىڭ ئانا-دادىسى مايمۇنتى، دەيدىغانلارغا خروموسوم سانىنى دەلىل قىلىپ كۆرسەتسىمۇ كار قىلمايدىغۇ دەيمەن. ئۇنداقلارغا «ھە ماقۇل، سېنىڭ ئاناڭ مۇشۇنىڭدەك پىتىنى تېرىپ يەيدىغان مايمۇنتى» دەپلا قۇتۇلغان ياخشى.

سەكرەش

بىر ئائىلە كىشىلىرى دەرقەمتى ھېيتلىق بېلىق تۇتۇپ يىگىلى تۇرۇپتۇ. بەختلىككەن …

ئۆز يۇرتىدا، ئاتا-ئانىسى ئالدىدا ھېيت ئۆتكۈزۈشكە ئىمكانىيەت بولمىغانلارغا مەندىن چوڭقۇر سالاملار بولسۇن!

مونۇ شىر جەرەن ئوۋلاۋاتامدۇ ياكى فوتوگرافنىمۇ؟

سەندىن بىر ئىنجا چىقمىدى دادا، ئۆزەملا بىر نېمە تېپىپ كېلەي!

ماۋۇ رەسىمنىڭ قانداق ئەھۋال ئاستىدا تارتىلغىنى توغرىسىدا مەلۇمات يوقكەن. لېكىن بەك نوچى چىقىپتۇ. ئاستىدىكى تۇمان بۇ نېمە ئىشكىنە؟

كۆڭلىڭىزدىكىنى تاپايمۇ؟

iPhone 4S تە تارتىلغان سۈرەتكە نەزەر

پاسىبان — Wed, 12 Oct 2011 08:59:02 +0000

5-ئەۋلاد iPhone بولۇپ ئېلان قىلىنغان iPhone 4S نىڭ كامېراسى 8 مېگاپېكسىللىق ئىكەنلىكىنى ھەممىمىز بىلىشتۇق. ئۇنىڭدا ھەتتا 30fps تېزلىكتىكى 1080P لىك سىنغىمۇ ئالغىلى بولىدىكەن. ئوپتىكىلىق لېنزا ئىشلىتىلگەن بولۇپ، سېنزورمۇ چوڭايتىلغان ئىكەن. ئالما تەرەپنىڭ ئېيتىشىچە بۇ كامېرا نۆۋەتتە دۇنيادىكى ئەقىللىق تېلىفونلارغا ئىشلەتكەن ئەڭ ئىلغار كامېرا ئىكەن.

زامانلار ئىلگىرى « سىفىرلىق ئاپاراتنىڭ تۈرلىرى (1) ۋە (2) » دېگەن بىر يازمىدا سىفىرلىق ئاپاراتنىڭ «كارتىسىمان ئاپارات» دەپ بىر تۈرىنىڭ بارلىقىنى ئېيتىپ ئۆتكەن. بۇ تۈردىكى ئاپاراتلارنى قىزلار كۆپرەك ئىشلىتىدۇ. چۈنكى بۇنىڭ ئۆزى ئىخچام، سۈرەتكە تارتىش ئىقتىدارى خېلى يامان ئەمەس ئىدى. بۇ خىلدىكى ئاپارات ئىخچاملىقىدىن بازاردىكى سېتىلىش مىقدارى جەھەتتە خېلى چوڭ ئورۇننى ئېگەللەيدۇ.

iPhone 4S نىڭ بۇ ئىقتىدارى مۇشۇنداق «كارتىسىمان ئاپاراتلار» نىڭكىگە يېقىنلىشىدىغان، ھەتتا بەزىلىرىدىن ئېشىپ چۈشىدىغان بولۇپ، بۇندىن كىيىن بەزى ئانالىزچىلار iPhone 4S نى كارتىسىمان ئاپاراتلارنىڭ ئورنىنى ئېگەللەپ كېتىدۇ دەپ قىياس قىلىشىۋاتىدۇ. ئۇنداقتا بۇ ئىلغار كامېرا زادى قانچىلىك ئىلغار. ئىقتىدارى زادى قانچىلىك ياخشىدۇ؟ بۇ قولىمىزغا كەلگۈچە مۇتەخەسىسلەرنىڭ نەزىرىدىكى « كارتىسىمان ئاپاراتنىڭ ئورنىنى ئالىدىغان iPhone 4S » تە تارتىلغان 3 پارچە رەسىمگە نەزەر سېلىپ باقايلى.

بۇ 3 پارچە رەسىم ئايرىم-ئايرىم iPhone 4 تە، iPhone 4S تە ۋە كارتىسىمان ئاپارات تۈرىگە كىرىدىغان RICOH GR-D دېگەن ئاپاراتتا تارتىلىپ بىزگە سېلىشتۇرۇشقا سۇنۇلغان. بىز تۆۋەندە بۇلارنىڭ پەرقىنى بىر كۆرۈپ باقايلى.

1- رەسىم

iPhone 4

iPhone 4S

RICOH GR-D

2- رەسىم

iPhone 4

iPhone 4S

RICOH GR-D

3- رەسىم

iPhone 4

iPhone 4S

RICOH GR-D

بۇ رەسىملەرنى Gruber تور بېكىتى ئوخشاش بىر جايدا تارتىپ، ھېچقانداق كىيىنكى رەسىم تەھرىرلەش باسقۇچىدىن ئۆتكۈزمەي يوللىغان رەسىملەر ئىكەن. GR-D دا ھەممىدىن بەكرەك ئاقارتىۋەتكەندەك، iPhone 4S تە يورۇقلۇق بەكلا ياخشى كونترول قىلغاندەك تۇرىدۇ. قارىغاندا بۇ قېتىم ئالما iPhone نىڭ ئاپاراتىغا بەكلا كۈچىگەندەك تۇرىدۇ…

مەنبە: tgbus.com

كۆڭلىڭىزدىكىنى تاپايمۇ؟

مىنىمالىستچىلار سۈرەتلىرىدىن تاللانما

پاسىبان — Sat, 08 Oct 2011 06:12:00 +0000

مىنىمالىستچىلار – ئاددىيلىقنى تەرغىپ قىلغۇچىلار، مۇنداقچە قىلىپ ئېيتقاندا «ئاددىيزىمچىلار» دېگەن مەنىنى بىلدۈرىدۇ. ئىسمىدىنمۇ چىقىپ تۇرۇپتىكى، بۇنداق فوتوگرافلار رەڭ پەرقى ئاز، مەزمۇن ئاددىي بولغان مەنزىرە ياكى شەيئىنى تېما قىلىپ تاللاپ، ئۆزگىچە، راھەت ياكى پاكىز بىر تۇيغۇ ئاتا قىلىدۇ.

فوتوگراف ساھەسىدىمۇ مىنىمالىست فوتوگرافچىلىقى دەپ بىر تۈر، شۇ تۈرنىڭ ئۆزىگە يارىشا ئىشتىراكچىلىرى ۋە قىزىققۇچىلىرى بار. ئۇلار تىنچ ۋە يېنىك ئېلېمېنتلاردىن پايدىلىنىپ «سەنئەت» ياسايدۇ. بۇنىڭمۇ ئۆزىگە يارىشا قىيىن نوقتىسى بولۇپ، بىر ياكى ئىككى خىل شەيئىنى قويۇش ئارقىلىق بىر قاتار مەزمۇننى ئىپادە قىلىدىغان گەپ.

ئۆتكەندە خاڭجۇ ئايروپورتىغا كېتىۋاتقاندا يولدا بىر ئېلان تاختىسىنى كۆرگەن ئىدىم. ئۇ تاختا ناھايىتىمۇ چوڭ بولۇپ، %95 يېرى بۇلۇتسىز كۆك ئاسمان، پەقەت ئاستى تەرەپ 4/1 قىسمىدا باشتىن بوياق كېسىپ ئۆتۈۋاتقان خەلقئارا ئاۋىئاتسىيە شىركىتىنىڭ كىچىك بىر يولوچىلار ئايروپىلانىنىڭ سۈرىتى چۈشۈرۈلگەن ئىكەن. بۇ ئېلان ماڭا بەكمۇ ياققان ئىدى. مەنمۇ مىنىمالىست فوتوگرافچىلىقىغا ئامراق بولسام كېرەك.

تۆۋەندە مۇشۇنداق فوتوگرافلار تارتقان ئۆزى ئاددىي، لېكىن سەنئەت پۇرىقى كۈچلۈك رەسىملەردىن بىرقانچىسىنى كۆرۈپ ئۆتەيلى. بىر يەرلەردە كۆمۈلۈپ قالغان يوشۇرۇن كۈچلىرىمىزنى غىدىقلاپ ئويغۇتۇپ قالسا ئەجەپ ئەمەس.

كۆڭلىڭىزدىكىنى تاپايمۇ؟

تەۋسىيە: رەسىم بىر تەرەپ قىلىش ئەپ توپلىمى

پاسىبان — Fri, 07 Oct 2011 06:32:51 +0000

ئالدىنقى يازمىمىزدا ساياھەتكە چىققاندا ئىشلەيدىغان ئەپلەر دەپ سۈرەتكە ئالىدىغان ئەپلەردىن نەچچىنى تەۋسىيە قىلىپ چىققان ئىدۇق. بۈگۈن رەسىمگە تارتقاندىن كىيىن ئۇنىڭغا ئايفوننىڭ ئۆزىدىلا ھەرخىل ئۈنۈملەرنى قوشىدىغان ئەپلەردىن بىرنەچچىنى تەۋسىيە قىلاي.

ئەگەر قۇربىتىڭىز يەتسە ئەسلى نۇسقىسىنى ھەق تۆلەپ سېتىۋېلىپ ئىشلىتىڭ. تۈرمىدىن قاچۇرغان بولسىڭىز ھەقسىزلىرىنى تور ئاختۇرۇپ تاپالايسىز. ئىزدەپ تېپىشىڭىزغا قولاي بولىشى ئۈچۈن خەنزۇچە ئىسمىنىمۇ قالدۇردۇم. شۇڭا مەن بىۋاستە بۇ يەردە ئېلان قىلىپ يۈرمەي. تەۋسىيە قىلىنغان ئۇلىنىشلارنىڭ ھەممىسى App Store دىكى سېتىۋېلىش ئادرېسى.

Color Splash 色彩大师
چوڭلىقى : 18.5 مېگابايت
باھاسى : 0.99 دوللار

Photogene 图片精灵
چوڭلىقى : 4.1 مېگابايت
باھاسى : 1.99 دوللار

Fotolr 照片工坊
چوڭلىقى : 18.3 مېگابايت
باھاسى : ھەقسىز

PicTools 修图工具
چوڭلىقى : 5.6 مېگابايت
باھاسى : 1.99 دوللار

照片文件夹管理器
چوڭلىقى : 20.0 مېگابايت
باھاسى : 0.99 دوللار

PicFrame 照片分格处理
چوڭلىقى : 3.9 مېگابايت
باھاسى : 0.99 دوللار

Ps Express 媲美PS
چوڭلىقى : 24.9 مېگابايت
باھاسى : ھەقسىز

美图 GIF
چوڭلىقى : 7.7 مېگابايت
باھاسى : ھەقسىز

专业打码
چوڭلىقى : 1.2 مېگابايت
باھاسى : 0.99 دوللار

Brushes
چوڭلىقى : 5.7 مېگابايت
باھاسى : 4.99 دوللار

禅笔 Zen Brush
چوڭلىقى : 13.7 مېگابايت
باھاسى : 2.99 دوللار

SketchBook Mobile
چوڭلىقى : 10.1 مېگابايت
باھاسى : 1.99 دوللار

Photo Forge2
چوڭلىقى : 19.9 مېگابايت
باھاسى : 1.99 دوللار

iMovie
چوڭلىقى : 69.2 مېگابايت
باھاسى : 4.99 دوللار

Art Studio
چوڭلىقى : 5.3 مېگابايت
باھاسى : 2.99 دوللار

GIF 快手
چوڭلىقى : 8.2 مېگابايت
باھاسى : ھەقسىز

ئۇنىڭدىن باشقا ئىلگىرى تەۋسىيە قىلغان بىر ئەپمۇ بار ئىدى. بۇ يەرنى بېسىپلا شۇ ئەپكە بېرىڭ.

كۆڭلىڭىزدىكىنى تاپايمۇ؟

پورترېت سۈرەتكە ئېلىشتىكى 10 تېخنىكا

پاسىبان — Tue, 04 Oct 2011 02:05:41 +0000

پورترېت (سىرتقى قىياپەت) سۈرەتكە تارتىش – فوتوگرافچىلىقنىڭ، ئېنىق قىلىپ ئېيتقاندا بىز ئەڭ بىلىدىغان ۋە ئىشلىتەلەيدىغان بۆلىكىنىڭ مۇھىم بىر قىسمى. زاتۋورنى بېسىش تولىمۇ ئاسان. لېكىن مۇۋاپپىقىيەتلىك ئاياغلاشتۇرۇش ئۇنچە ئاسان ئەمەس. خەلقئارا سەھنىلەردە پورترېت سۈرەتلىرى بىلەن داڭق چىقارغان كاتتا فوتوگرافلارنىڭ قانداق ئورتاقلىقى بار؟ نېمە شۇلارنى مۇشۇنداق مۇۋاپپىقىيەتكە ئېلىپ چىقالىدى؟ ئەمەلىيەتتە پورترېت ياساش سىز ۋە بىز ئويلىغاندەك ئۇنچە قىيىنمۇ ئەمەس.

كەسىپتە مۇۋاپپىقىيەت قازانغان ھەرقانداق بىر فوتوگراف ناھايىتى ئۇزاق ۋاقىت ئۆز كەسپىدە ئىزدىنىپ، ئۇچۇر توپلاپ، تەتقىق قىلىپ كاللا قاتۇرۇشنى باشتىن ئۆتكۈزگەن بولىدۇ. شۇڭا قاراپ ئولتۇرۇپ قالغۇدەك بىرەر پارچە رەسىمگە ھەرقانداق كىشى ئېرىشىۋەرمەيدۇ. لېكىن، ئاددىي ساۋات، قولاي مەشغۇلات ئارقىلىق مۇشۇنداق نەتىجىگە يېقىنلىشىش – بۇ چۈش ئەمەس.

1. ئېنىق، يارقىن باش تېما تاللاش

تارتماقچى بولغان سۈرەتتە ئېنىق، ئوچۇق ۋە سۈزۈك باش تېما ئەكس ئەتسۇن. ئادەم، شەيئى ۋەياكى ھايۋانات-ئۇچارقۇشلارمۇ؟ ئاۋال بۇ كاللىڭىزدا ئېنىق بولىشى كېرەك. بۇ ئېنىق بولغاندا سىز مۇشۇنى يارقىنلاشتۇرۇش ئۈچۈن تېرىشىسىز. سۈرەتتە مەزمۇن، ۋەقە بولىشىغا تېرىشىڭ. « مىكى-مىكى » لەرنى كاللىڭىزدىن چىقىرىپ تاشلاڭ. بىر قېتىم بولمىسا ئىككىنجى قېتىم قىلىشقا تېرىشىڭ.

2. دىققەت قىلىش نوقتىسىنى تېمىغا مەركەزلەشتۈرۈش

بىزنىڭ تارتقان سۈرەتنى كۆرگەن ھەرقانداق كىشى ئەڭ دەسلەپتە بىز ئىپادىلىمەكچى بولغان ئاساسى تېمىغا قارامدۇ-يوق؟ بىز مۇشۇنى ئويلاشقان ئاساستا مەنزىرىنى ئورۇنلاشتۇرىشىمىز كېرەك. بۇ سۈرەتتىكى مودېلنىڭ قولىدىكى ئەتىرگۈل ئاساسى تېمىنى ئەكس ئەتتۈرۈش تولىمۇ ياخشى ياردەمچى بولغان. سۈرەتتە بۇ قىزنىڭ گۈزەللىككە ئېنتىلگەنلىكىدەك روھى قىياپەت ناھايىتى ياخشى ئەكس ئەتتۈرۈلگەن.

3. سۈرەت مەزمۇنىنى تېخىمۇ ئاددىيلاشتۇرۇش

ئاساسى تېمىنى گەۋدىلەندۈرۈشكە ياردەم قىلالمايدىغان، ھەتتا ئۇنى بۇرمىلاپ باشقا مەزمۇن ئەكس ئەتتۈرۈپ قويىدىغان ئارتۇقچە نەرسىلەرنى سۈرەتتىن چىقىرىپ تاشلىشىمىز كېرەك. سۈرەتتىكىدەك كىچىك بالىنىڭ ئوماق، سەبىي چىراي ئىپادىسىنىلا قالدۇرۇڭ.

4. ئېلاجنىڭ بېرىچە تېما ئەسلى شەكلىنى ساقلاپ قالسۇن

سىرتتا پورترېت ياسىغاندا ئەڭ ياخشىسى مودېل بىلەن مەلۇم ئارىلىق ساقلاپ تۇرۇپ تارتقىنىمىز ئەۋزەل. لېنزا ئىشلەتكەندىمۇ كەڭ بۇلۇڭلۇق لېنزىنى تاللىمايمىز. ئەگەر سۈرەتكە بەك ھەددىدىن ئاشۇرىۋېتىدىغان ئۈنۈم قوشماقچى بولساق ئۇ باشقا گەپ. سىرتتا ئەڭ ياخشىسى 80-90 مىللىمېتىرلىق فوكۇس ئارىلىقىنى ئىشلىتىپ تارتسا ياخشى.

5. ھاياتلىق ئىپادىسى ئەكس ئەتسۇن

سۈرەتكە تارتماقچى بولغان ئادەمنىڭ قولى ئازراق بولسىمۇ ھەرىكەتتە بولسىمۇ ئۆزگىچە تۈس قوشىدۇ. مەسىلەن، پىشانىسىنى تۇتۇش، يۈزىنى سىلاش، بېلىنى تۇتۇش، تەرىنى سۈرتۈش، تۈگمىسىنى ئېتىش، چېچىنى تۈزەشتۈرۈش … ئىشقىلىپ بىرەر ھەرىكەت ئىپادىسى نامايەن بولسا رەسىم ئۆلۈك چىقىپ قالمايدۇ. ھەتتا قولىدا بىرەر قورال-ياراق ئېلىپ تۇرغان ھالەتمۇ سۈرەتكە ھاياتلىق تۈسى قوشالايدۇ.

6. ئوبيېكت تېخىمۇ تەبىئىي بولسۇن

كىشىلەرنى سۈرەتكە تارتقاندا ئۇلارنىڭ تەبىئىي تۇرىشى ئىنتايىن مۇھىم. بىزلەر سۈرەتكە چۈشسەك كۆپرەك «ھەربىيچە» تۇرۇپ قويىمىز بۇ بەكلا كونىلىق بوپقالدى. سۈرەتتىكى كىشىلەر ئۆزىنى قويىۋېتىپ ئەركىن-ئازادە تۇرغاندا ھېسسىيات يارقىن ئىپادىلىنىدۇ. بىز كونا شەكىلىدىكى «تاياقتەك تۇرۇپ سۈرەتكە چۈشۈش» ئىدىيىسىنى ئۇلارنىڭ كاللىسىدىن چىقىرىپ تاشلىشىمىز، ئۇلارغا «سۈرەتكە تارتىش» نى ئۇنتۇلدۇرىۋېتەيلى. ئەمەلىي شارائىتقا قاراپ تۇرۇپ ئولتۇرۇش، تىك تۇرۇش، يۆلېنىش، بېلىنى ئېگىش، ئىشقىلىپ تەبىئىيلىكنى ساقلاشقا تېرىشساق، قانچە تەبىئىي قانچە راھەت بولسا سۈرەت شۇنچە جانلىق چىقىدۇ.

7. ئادەمنى مەنزىرىدىن ئايرىپ ئېلىۋېلىش

بۇ تېمىنى ئېنىق ئەكس ئەتتۈرۈشنىڭ يەنە بىر ئۇسۇلى. بۇنىڭ ئۇسۇلى بەكلا ئاددى. چوڭراق نۇر چەمبىرىكى ئىشلىتىش (4.0 ھەتتا 2.8)، ئۇزۇن فوكۇس ئارىلىقى ئىشلىتىش ياكى بولمىسا ئادەمنى مەنزىرىدىن يىراقراق جايغا ئورۇنلاشتۇرۇش.

8. قارشى بۇلۇڭلۇق بەدىئىي تۈزۈلۈش قوللىنىش

يالغۇز كىشى سۈرەتكە ئالغاندا سۈرەتكە ئالغان شەيئى بىلەن مەلۇم ئارىلىق ساقلىشى، بەدىئي تۈزۈلۈش تاللاشتا قارشى بۇلۇڭلۇق بەدىئىي تۈزۈلۈش قوللىنىشى ئەڭ ئاقىلانىلىك. بۇنىڭدا پورترېت شەكىل ئۆزگىرىپ كېتىشىنىڭ ئالدىنى ئالغىلى بولىدۇ. يەنە ئازراق بوشلۇق ۋە يوچۇق قويۇپ قويۇپ، سۈرەتنى تېخىمۇ ئىچكىرىلەپ كىرىش ھالىتىگە كەلتۈرەلەيمىز.

9. مودېلنى ئۆزگىچە بىر شەكىلدە تۇرغۇزۇش

بىز تولا ئاڭلايدىغان POSE دېگەن شۇ. بۇ ئۇسۇل مۇشۇنداق مودېلنى سۈرەتكە ئالغاندا ئىشلەيدۇ. بىز بىرەر شەكىلدە تۇرغان مودېلنى سۈرەتكە ئالغىنىمىزدا ئىلاج بار ئۇنىڭ باش ۋە مۈرىسىنى ئوخشاش بىر سىزىق ئۈستىدە، بەدىنىنى ئەگرى سىزىق ياكى باشقا تۈزسىزىق ئۈستىدە تۇرغۇزۇپ ئالساق بولىدۇ.

10. يېرىم بەدەن ياكى باش سۈرەتنى مۇۋاپىق ئىشلىتىش

ئەگەر پورترېت ياسىماقچى بولغان پىرسوناژنىڭ كىيىم-كېچەك، تەققى-تۇرقى، مەيداندىكى ھەرخىل ئېلىمېنتلار ئاساسى تېما ياسىشىمىزغا تەسىر كۆرسىتىدىغان ئېھتىماللىق بولۇپ، مەزمۇن ئىپادە قىلالمىغان ۋاقتىمىزدا، يېرىم بەدەن ياكى باش قىسمىنى تاللاپ سۈرەتكە ئېلىش ئەڭ ئاقىلانىلىك. ئەلۋەتتە، بۇ چاغدا پىرسوناژنىڭ كۆزى ئەڭ مۇھىم ئامىل بولىدۇ.

يۇقارقى ئۇسۇللار قىياپەت سۈرەتكە ئېلىشتىكى بىرقانچە كۆرسەتمە بولۇپ، بۇنى ئۆزىمىزنىڭ ئادىتىمىز بويىچە ئىستىمال قىلىشقا ياكى پايدىلىنىشقا بولىدۇ. ئۆزىڭىزنىڭ ھېس قىلىپ يەتكەنلىرىڭىز، تەجرىبىلەرنى يىغىنچاقلاپ ھەزىم قىلغىنىڭىز ئۆزىڭىزنىڭ خاسلىقىنى ئىپادىلەشتىكى ئەڭ ياخشى ئۇسۇل. بۇ خاسلىقىڭىزنى باشقىلار ئېتىراپ قىلىپ باھا بەرگەن چاغدا سىز ھەقىقىي نەتىجە ياراتقان بولىسىز. ئۇ چاغقىچە بىز توختىماي ئۆگىنىپ، مەشىق قىلىپ تۇرايلى. بۇ ئۇسۇللارنى پەقەت تەكلىپ ياكى كىچىككىنە كۆرسەتمە دەپ چۈشۈنۈڭ. چوقۇم ھەربىر پارچە رەسىمدە مۇشۇ ئۇسۇلنىڭ ھەممىسىنى تەڭ قوللىنىمىز دېگەن گەپ ئەمەس. ئۇنداقمۇ قىلغىلىمۇ بولمايدۇ.

كۆڭلىڭىزدىكىنى تاپايمۇ؟

ساياھەتكە چىققاندا ئەسقاتىدىغان iPhone ئەپ توپلىمى

پاسىبان — Mon, 03 Oct 2011 08:51:01 +0000

ساياھەت بىزنىڭ ھاياتىمىزدىكى ئەڭ گۈزەل مىنۇتلارنىڭ بىرى. رەسىمگە تارتىش بولسا بۇ گۈزەل مىنۇتلارنى خاتىرىلەش ئۇسۇلى بولغاچ ساياھەتنىڭ ئەڭ كەم بولسا بولمايدىغان بىر بۆلىكى. مۇشۇنداق گۈزەل مىنۇتلاردا ئايفونىمىزنى يېنىمىزدىن ئايرىمايمىز ئەلۋەتتە. لېكىن ئايفوننىڭ ئۆزىدىكى ئاپاراتنىڭ باشقا ئالاھىدە ئىقتىدار ياكى رەسىمگە ئۈنۈم قوشۇشتەك ئالاھىدىلىكلىرى بولمىغانلىقتىن بەزى چاغلاردا تازا ھاجەتتىن چىقالماي قالىدۇ. تۆۋەندە مەن ئايفوننىڭ سۈرەتكە تارتىش ئىقتىدارىنى مۇكەممەللەشتۈرىدىغان بەزى ئەپلەرنى تەۋسىيە قىلاي.

يېقىندىن بۇيان تۈرمىدىن قاچۇرماسلىق لازىملىقىنى تېخىمۇ چوڭقۇر ھېس قىلىپ يەتتىم. مۇشۇ ئۇيغۇرچە فونتنى تونىتىدىغانلا ئىشنى دەپ قېلىۋاتىمەن، بولمىسا تارتىشقۇدەك باشقا نەرسەممۇ يوق ئىدى. قائىدىسى بويىچە ئىشلىتىشكە رازى ئېدىم. شۇڭا سىلەرگىمۇ تۈرمىدىن قاچۇرماسلىقنى تەۋسىيە قىلىمەن. شۇنىڭ ئۈچۈن بۈگۈن بولسىمۇ ھەممە ئەپلەرنىڭ بىۋاستە iTunes تىن چۈشۈرۈش ئادرىسىنىلا قالدۇراي. يېشىۋەتكەن نۇسقىسىنى توردىن ئۆزۈڭلار ئىزدەپ تېپىپ چۈشۈرىۋېلىڭلار. بۇنىڭ يوللىرىنى دېمىسەممۇ بىلىسىلەر ھەقاچان. 51ipa.com ، 威锋网 ۋە ئايفوننىڭ ئۆزىگە قاچىلايدىغان دۇنيادىكى ئەڭ داڭلىق Crack App چۈشۈرۈش دېتالى Installous دېگەندەك جايلاردىن تاپالايسىلەر. Installous نى Cydia دىن تېپىپ چۈشۈرىۋالساڭلار بولىدۇ. بۇ ئارقىلىق چۈشۈرگەن ئەپلەرنى iTools ئارقىلىق بىۋاستە كومپىيۇتېرغا چۈشۈرىۋېلغىلىمۇ بولىدۇ. مۇشۇنچىلىك دەپ بەرسەم قالغىنىنى ئۆزۈڭلار ئىزىدىنىپ تېپىپ قاچىلىۋېلىڭلار.

Camera360 – 手机摄影大师 چوڭلىقى : 24.9 مېگابايت باھاسى : 0.99 دوللار	Panoramatic 360全景摄影 چوڭلىقى : 14.3 مېگابايت باھاسى : 1.99 دوللار
TiltShift Generator 移轴 چوڭلىقى : 1.4 مېگابايت باھاسى : 0.99 دوللار	Hipstamatic 创意相机 چوڭلىقى : 19.8 مېگابايت باھاسى : 1.99 دوللار
Camera+ 超强相机 چوڭلىقى : 18.8 مېگابايت باھاسى : 0.99 دوللار	Nabit 极速抓拍 چوڭلىقى : 11.1 مېگابايت باھاسى : ھەقسىز
Dermandar 全景相机 چوڭلىقى : 2.6 مېگابايت باھاسى : 1.99 دوللار	Magic Shutter 魔法快门 چوڭلىقى : 0.4 مېگابايت باھاسى : 2.99 دوللار
KineticCam 智能动作捕捉 چوڭلىقى : 1.0 مېگابايت باھاسى : 0.99 دوللار	Lomo 相机乐么 چوڭلىقى : 19.9 مېگابايت باھاسى : ھەقسىز
Instagram分享拍照 چوڭلىقى : 10.9 مېگابايت باھاسى : ھەقسىز	CamCam Pro 声控相机 چوڭلىقى : 2.3 مېگابايت باھاسى : 0.99 دوللار

كۆڭلىڭىزدىكىنى تاپايمۇ؟

تەۋسىيە: مىكروسوفتتىن پەچەت بىر ئەپ – PhotoSynth

پاسىبان — Sat, 27 Aug 2011 10:28:03 +0000

ئايفوننىڭ رەسىمگە تارتىشقا ئائىت ئەپلىرى نۇرغۇن. لېكىن شۇ ئەپلەر ئىچىدە ئىشىنىمەنكى بۇنىڭغا ئوخشاش پەچەت ئەپتىن ساناقلىقلا چىقسا كېرەك. بەلكىم بۇ ئەڭ ياخشىسىدۇر. بۇ ئەپ زادى قانداق قىلالايدۇ؟ بۇنى يازمىنىڭ داۋامىغا قاراپ ئاندىن بىلگەيسىز.

رەسىم بىر تەرەپ قىلىش ۋە رەسىمگە تارتىشقا ئائىت ئەپ بىلەن تازا خوشۇم يوق. چۈنكى مەن ئايفوندا رەسىم سىزمايمەن. ئايفوندا رەسىمگە تارتقاندىمۇ بىۋاستە ئۆزىدىكى تارتىدىغان جاي بىلەنلا تارتىمەن. لېكىن بۇ ئەپنى قاچىلىماسلىققا باھانەم يوق بولدى! مېنىڭچە سىزنىڭمۇ باھانىڭىز بولمىسا كېرەك.

مىكروسوفت ئالمىنىڭ رىقابەتچىسى بولۇش سۈپىتى بىلەن iOS ئابونتلىرى ئۈچۈن مۇشۇنداق پەچەت بىر ئەپنى ياساپ چىققانلىقىغا قايىل بولدۇم. بىز بۇ ئەپ ئارقىلىق ھەقىقىي 360 گرادۇسلۇق + ئاستى ۋە ئۈستى بولۇپ نەچچە گرادۇس بولىدىكىن ئىشقىلىپ پۈتۈن شارسىمان ھالەتتە رەسىمگە ئالالايمىز. رەسىمگە ئالغاندىن كىيىن شۇ ئەپ ئارقىلىق 6 تەرەپ (ئوڭ، سول، ئالدى، كەينى، ئۈستى ۋە ئاستى) نىڭ ھەممىسىنى ئېنىق كۆرەلەيمىز.

ئەڭ پەچەت يېرى بۇ ئەپنى ئىشلىتىپ رەسىمگە تارتىش تولىمۇ قولاي. سىز ئېكرانغا بېسىپ سۈرەتكە تارتىشنى باشلايسىز. ئەقلى ئىقتىدارلىق بۇ ئەپ رەسىمنى ئۆزى ئاپتۇماتىك تارتىدۇ. ئەلۋەتتە ئۆزىڭىز بېسىپ تارتسىڭىزمۇ بولىدۇ.

ئېكراندىكى يېشىل رامكىغا دىققەت قىلىڭ. رامكا يېشىل ھالەتتە تۇرسۇن. سېرىق ياكى قىزىل رەڭدە بولغىنى مەنزىرىنى پەرق ئېتەلمىگىنى. ئەگەر بەك مۇرەككەپ مەنزىرىلا بولمىسا ئاساسەن كۆپ قىسىم ئەھۋالدا پەرق ئېتەلەيدۇ. يەنى ئۈستىدىكى رەسىمدىكى ئوڭ تەرەپتىكىسى تارتىلىپ بولغان مەنزىرە، بىز ئاپاراتنى سەل يۆتكەپ سول تەرەپكە ئەكەلسەك يېڭى مەنزىرىنى ئاپتۇماتىك تارتىدۇ. مۇشۇ بويىچە داۋاملاشتۇرۇپ ئەتراپنى پۈتۈن تارتىپ چىقىمىز. ئەگەر ياقمىغان جاي بولسا قايتىدىن تارتساقمۇ بولىدۇ. ئەگەر بىرەر پارچە رەسىمنى خاتا تارتىپ قالسا، ئاستىدىكى undo نى بېسىپ چىكىنىسىز. پۈتۈن مەنزىرە تارتىلىپ بولغاندىن كىيىن finish نى بېسىپ ئاياغلاشتۇرىسىز، ئاندىن Stitch نى بېسىپ قوراشتۇرۇشقا بۇيرۇق قىلسىڭىز ئىش تامام.

رەسىم پۈتكۈندىن كىيىن ئۇياق-بۇياققا سۈرۈپ كۆرۈپ بېقىڭ. نېمە دېگەن پەچەت ئەپ ھە؟

پۈتكەندىن كىيىن بۇنى Windows Live گە ھەمبەھرلىگىلى بولىدىكەن. بۇ قوشۇمچە ئىقتىدارلىرىنى ئىچىنى ماتىلاپ كۆرۈپ بىلىۋېلىڭلار.

ئەپ ئىسمى : Phorosynth

ساتقۇچى : Microsoft

تۈرى : قوللىنىشچان ، فوتو-سۈرەت

چوڭلۇقى : 4.4 MB

چۈشۈرۈش ئادرىسى :

كۆڭلىڭىزدىكىنى تاپايمۇ؟

ئالدىنقى ھەپتە ئالما ئېلان قىلغان 10 ياخشى ئەپ

پاسىبان — Sun, 31 Jul 2011 04:26:56 +0000

ئالدىنقى ھەپتە iOS ئۈسكۈنىلىرى ئىچىدىكى تەۋسىيە قىلىنغان ئالدىنقى قاتاردىكى 10 ئەپنى تىزىپ چىقىپتۇمىش. سىز بۇلارنىڭ قايسىسىنى چۈشۈرۈپ قاچىلاپ باقتىڭىز؟ قايسىسىنى كۆرۈپ باققان ئىدىڭىز؟ 300 مىڭدىن ئارتۇق ئەپلەرنىڭ ئىچىدە ئالدىنقى قاتاردىكى تەۋسىيە قىلىنغان 10 ئەپ زادى قايسى، بىرلىكتە كۆرۈپ ئۆتەيلى.

10-سى : Baby Monitor

بۇنىڭ 10-سى Baby Monitor ئىسىملىك ئەپ بولۇپ، بۇ ئەپنىڭ ئىقتىدارى بولسا بوۋاقنىڭ يىغىسىنى نازارەت قىلىپ چوڭلارغا خەۋەت بېىرىكەن. سىز بۇ ئەپنى قوزغىتىپ iOS ئۈسكۈنىسىنى (مەسىلەن، ئايفوننى) بوۋاقنىڭ ئالدىغا قويۇپ قويۇپ مەيلى ئۆيدە ۋەياكى سىرتتا بولماڭ، بوۋىقىڭىز يىغلىغان ھامان ئۇنىڭ ئاۋازىنى ئاڭلايدىكەنسىز. لېكىن شەرتى، تور مۇھىتى بولىشى كېرەك ئىكەن.

سېتىۋالغۇچىنىڭ بىرى باھا يېزىپ، بۇ بەلكى بوۋاق تەربىيىسىنىڭ كەلگۈسىدىكى ئەينىكى بولسا كېرەك، ھەيران قالارلىقى بوۋىقىم يىغلىغان ھامان مەن ئۇچۇر قوبۇل قىلىۋالدىم، ھەقىقەتەن قالتىس ئىكەن! دەپتۇ.

ئەپ ئىسمى : Baby Monitor

باھاسى : 4.99 $

ياسىغۇچى : JEFF MCMORRIS

تۈرى : قوللىنىشچان

چوڭلۇقى : 2.2 MB

چۈشۈرۈش ئادرىسى :

9-سى : SKTCH for iPad

Sktch ئىسىملىك بۇ ئەپ iPad ئۈچۈن لايىھەلەنگەن بولۇپ، خاسلىققا ئېگە ھەرخىل 2D لىك ۋە 3D لىك رەسىم سىزغىلى بولىدۇ. ئالدىن قوشىۋېتىلگەن 16 خىل ئىقتىدارى ئارقىلىق 2D ۋەياكى 3D لىك ئۈنۈم ھاسىل قىلغىلى، ھەتتا كۆپ نوقتىنى تەڭ بېسىش ئارقىلىق ئۆ‍زگىچە تۈس قوشقىلى بولىدىكەن. رەسساملار ئۈچۈن پەچەت ئەپ بولسا كېرەك.

ئەپ ئىسمى : Sktch

باھاسى : 1.99 $

ياسىغۇچى : Filip Visnjic

تۈرى : فوتو-سۈرەت

چوڭلۇقى : 7.7 MB

چۈشۈرۈش ئادرىسى :

8-سى: Thrutu

بۇ قوللىنىشچان ئەپ بولۇپ، تېلىفون ئۇرىۋاتقان ۋاقىتنىڭ ئۆزىدە رەسىم، تېلىفۇن دەپتىرىدىكى ئۇچۇرلار ۋە ياكى ئورنىمىز قاتارلىقلارنى ئېۋەتكىلى بولىدىكەن. بۇنداق قىلسا نېمە پايدىسى بار دېيىشىڭىز مۇمكىن. لېكىن ئويلاپ باقسىڭىز، چوڭراق بىرەر يىغىلىش ۋە ياكى مەيدان، ياكى بىرەر زالدا بۇ ئەپ ھەقىقى رولىنى كۆرسىتەلەيدۇ. ئىۋەتكەن رەسىم ۋە ئورنى ئارقىلىق سىز ئۇ كىشىنى دەرھاللا تاپالايسىز.

ئەپ ئىسمى : Thrutu

باھاسى : ھەقسىز

ياسىغۇچى : MetaSwitch

تۈرى : قوللىنىشچان

چوڭلۇقى : 2.0 MB

چۈشۈرۈش ئادرىسى :

7-سى: Sid Meier’s Pirates! for iPad

ئىلگىرى ئايفون ئويۇنلىرى ئىچىدە قارشى ئېلىنغان Pirates ئويۇنىنىڭ iPad نۇسقىنى ئاخىرى ئېلان قىلىنىپتۇ. Pirates ئويۇنىدا سىز كاپىتاننىڭ رولىنى ئېلىپ، دېڭىزنى كېزىپ دۈشمەننى ئىزدەيسىز. باشقا پاراخوتتىكىلەر بىلەن ئېتىشىسىز. جەڭدە يېڭىپ fame غا ئېرىشسەك يېڭى جايلارنى ئېگەللىيەلەيدىكەنمىز. بۇ ئويۇن sandbox قا ئوخشاپ كېتىدىغان پەچەت PC ئويۇنلىرىدەك ياخشى ئويۇن بولغاچ iPad نۇسقىسىمۇ بەكلا قارشى ئېلىنغان.

ئەپ ئىسمى : Sid Meier’s Pirates! for iPad

باھاسى : 3.99 $

ياسىغۇچى : 2K Games

تۈرى : ئويۇن

چوڭلۇقى : 436 MB

چۈشۈرۈش ئادرىسى :

6-سى: Biophilia

بۇ قانداقتۇر بىرەر ئەپ بولماستىن، مۇزىكانت Björk نىڭ ناخشا توپلىمى ئىكەن. بۇ مۇزىكا توپلىمى تەبىئەت ۋە پەن-تېخنىكىنىڭ ئادەتتىن تاشقىرى بېرىكىشىنىڭ ھاسىلاتى ئىكەن. Biophilia پەقەت ناخشا توپلىمىلا بولماستىن مۇزىكا ۋە سەنئەت يىتەكچىسى بولالايدىكەن. Biophilia نىڭ ئۆزىدىلا 10 دانە ئەپ بار ئىكەن. ئەپلەرنى ئاچسىڭىز سىمفونىيە Cosmogony نىڭ لەرزان مۇڭى بىلەن سامانيولىنى مەستخۇشلۇق بىلەن ئايلىنىدىكەنسىز. بۇنىڭ شۇنچە كۆپ ئىقتىدار بولغىنى بىلەن ھەقسىز ئىكەن.

ئەپ ئىسمى : Biophilia

باھاسى : ھەقسىز

ياسىغۇچى : Second Wind Ltd Apps

تۈرى : مۇزىكا

چوڭلۇقى : 114 MB

چۈشۈرۈش ئادرىسى :

5-سى : grüvtron

سىز grüvtron ئارقىلىق نۇرغۇن سازلارغا، ئاۋازغا ئېلىش ئۆيىگە ۋە ھەرخىل ئۈنۈم قوشۇدىغان كەسپىي خىزمەت ئۆيىگە ئېگە بولالايسىز. ئىشلىگەن مۇزىكىلارنى iTunes قا يوللىغىلىمۇ بولىدىكەن. بۇ ئەپنىڭ كەسپىيلىكى بىر قەدەر يۇقىرى بولغاچ بىر قاراپلا بىلىۋالغىلى بولمىسا كېرەك. بىر كىشى باھا بېرىپ، بۇ ئەپ KORG نىڭ قاتىلى ئىكەن، دەپتۇدەك.

ئەپ ئىسمى : grüvtron

باھاسى : 4.99 $

ياسىغۇچى : Sound Trends LLC

تۈرى : مۇزىكا

چوڭلۇقى : 104 MB

چۈشۈرۈش ئادرىسى :

4-سى : Moviefone Movies

بۇ ئەپنىڭ چۈشەندۈرىشىدە Flixster نى ئارام ئېلىشقا خىتاب قىپتۇدەك. Moviefone ناملىق بۇ ئەپنىڭ كۆرىنىشى كۆركەم بوپقالماستىن، ھەرقانداق كىنوخۇمارلارنىڭ ياقتۇرىدىغان نەرسىسىنى ئۆزىگە مۇجەسسەملىگەن. ئەڭ يېڭى فىلىملەرنىڭ ئۇچۇرلىرى، تەشۋىق فىلىملىرى، كىنوغا مۇناسىۋەتلىك خەۋەرلەر ۋە سىزنىڭ جۇغراپىيەلىك ئورنىڭىزغا ئاساسەن قويۇلماقچى بولغان ئەڭ يېڭى فىلىملەر … بۇلارنىڭ ھەممىسى Moviefone دا بار ئىكەن.

ئەپ ئىسمى : Moviefone Movies – Movie Theaters, Trailers, Showtimes, and News from Hollywood

باھاسى : ھەقسىز

ياسىغۇچى : AOL, Inc.

تۈرى : كۆڭۈل ئېچىش

چوڭلۇقى : 5.1 MB

چۈشۈرۈش ئادرىسى :

3-سى: EDITION29 STRUCTURES

بۇ ئەپ سىزنى دۇنيادىكى ئىسىل قۇرۇلۇش-ئىمارەت، گۈزەل مەنزىرە ۋە بەدىئىي سۈرەت قاتارلىق يېقملىق فوتو-سۈرەتلەر بىلەن تەمىنلەيدۇ. لېكىن ئايپەد بولىشى كېرەككەن. بۇ ئەپنىڭ 29-نەشىرىدە 100 نەچچە بەتلىك دۇنيادىكى داڭلىق ئىمارەتلەرنىڭ رەسىملىرى باركەنمىش.

ئەپ ئىسمى: EDITION29 STRUCTURES

باھاسى : ھەقسىز

ياسىغۇچى : 29GPS, LLC.

تۈرى : كۆڭۈل ئېچىش، فوتو-سۈرەت

چوڭلۇقى : 1.3 MB

چۈشۈرۈش ئادرىسى :

2-سى: Calvetica Calendar

Calvetica Calendar ناملىق بۇ ئەپ نۆۋەتتىكى ئەڭ ياخشى كالىندار ۋە ئايلىق پىلان تۈزىدىغان ئەپ بولۇپ كېلىۋاتىدۇ. بۇنىڭ ئايپەد نەشىرىمۇ بار ئىكەن. ئايپەد ئۈچۈن Calvetica Calendar بەلكى تولىمۇ چىرايلىق، تولۇق ئىقتىدارلىق كالېندار بولسا كېرەك. بۇ كالېندار ئارقىلىق سىز بىرەر كۈنگە پائالىيەت ئورۇنلاشتۇرالايسىز. ئايلىق پلانلىرىڭىزنى ئورۇنلاشتۇرالايسىز. ۋاقتى كەلگەندە ئاۋازلىق ئەسكەرتىدىكەن. بۇنى دېمىسەممۇ بىلىسىلەرغۇ دەيمەن. ئايفوننىڭ ئۆزىدىكى كالېندارنىڭمۇ مۇشۇنداق ئىقتىدارى بار. 2 دوللار ساتسىمۇ كىشىلەر بەس-بەستە سېتىۋالغانغا قارىغاندا بۇنىڭ چوقۇم سەۋەبى بولسا كېرەك. ئاستىدا يېشىۋەتكەن نۇسقىسىنىڭ ئادرىسىمۇ قالدۇرۇلدى. قاچقۇنلار قاچىلاپ سىناپ كۆرۈڭ.

ئەپ ئىسمى: Calvetica Calendar

باھاسى : 1.99 $

ياسىغۇچى : Mysterious Trousers, LLC

تۈرى : قوللىنىشچان

چوڭلۇقى : 3.4 MB

چۈشۈرۈش ئادرىسى :

يېشىۋەتكەن نۇسقىسىنى چۈشۈرۈڭ:

ئەڭ ئاخىرقىسى، يەنى ئەڭ ياخشى باھا بېرىلگىنى : Google+

+ Google بولسا گوگل شىركىتىنىڭ يېڭىدىن يولغا قو ئىجتىمائى ئالاقە مەھسۇلاتى. ئالاقىدار بۆلۈملەرنى نەچچە ھەپتىلەپ مۇزاكىرە قىلىشى ئارقىلىق بۇ مەھسۇلاتنى App Store دا ئېلان قىلغان. بۇ ئەپ App Store دا قويۇلغان كۈنىلا چۈشۈرۈلۈش تەرتىۋى بويىچە 1- ئورۇنغا ئۆتۈپ كەتكەن. نۆۋەتتە بۇ مەھسۇلات Facebook نىڭ ئەڭ چوڭ رىقابەتچىسى بوپقالىدىكەن. چۈشۈرۈلۈش قېتىم سانى ۋە ئىشلەتكۈچىلەرنىڭ باھاسىغا قارىغاندا Google ھەقىقەتەن ئىسىل مەھسۇلاتتىن بىرنى چىقارغاندەك قىلىدۇ.

تولىمۇ ئەپسۇس، بۇ ئەپ ھازىر سىناق باسقۇچىدا بولغاچقا بىرەر كىشىنىڭ تەكلىپى بولمىسا ئىشلەتكىلى بولمايدىكەن. مەنمۇ قاچىلىدىميۇ ئىشلىتەلمىدىم. ھەقىقى بازارغا سېلىشىغا قاراپ ئولتۇرۇپتۇق. Facebook قا ئوخشاش چەكلەنمىسىلا مەيلىتىغۇ ئىشقىلىپ…

ئەپ ئىسمى: Google +

باھاسى : ھەقسىز

ياسىغۇچى : Google Mobile

تۈرى : قوللىنىشچان، ئىجتىمائى ئالاقە(پاراڭلىشىش)

چوڭلۇقى : 5.3 MB

چۈشۈرۈش ئادرىسى :

كۆڭلىڭىزدىكىنى تاپايمۇ؟

رەسىمگە چەبدەس ئۈنۈم قوشىدىغان ئەپ – uSketch

پاسىبان — Tue, 12 Jul 2011 12:21:35 +0000

App Store دا رەسىمگە ئۈنۈم قوشىدىغان نەرسىلەر خېلىلا كۆپ. ھەقسىزلىرىنىڭ ئىقتىدارى كۈچلۈكلىرى ئاز. ياخشىراقلىرىنى بولسا «كۆك»كە ئالىدىغان گەپ. بۇ ئەپ ئارقىلىق سىز رەسىملىرىڭىزگە رەڭلىك ۋە رەڭسىز تېز سىزما ئۈنىمىنى سېكونت ئىچىدە قوشالايسىز. ئۆزگىچە سىدام سىزما ئۈنىمى لازىم بولسا بۇ ھەقسىز ئەپكە مۇراجىئەت قىلىڭ!

uSketch دەپ ئاتىلىدىغان بۇ ئەپ ئىلگىرى پەقەت ئايفونغىلا ماس كېلەتتى. يېڭى نەشىرىدە ئايفون ۋە ئايپەدكە بىراقلا ماس كىلىدىغان بولۇپ، يېڭى نەشىرى Universal تېخنىكىسى بىلەن ياسىلىپتۇ. يېڭى نەشىرىدە تېخى ئايفون 4 نىڭ رېتىنا ئېكرانىغا ماس كېلىدىغان يۇقىرى ئېنىقلىقتىكى سۈزۈك ئۈنۈمدىن بىرقانچىنى قوشقان بولۇپ، 2400*1600 پىكسېلغا يېتىدىكەن.

بۇنداق بولغاندا ئۈنۈم قوشۇلغاندا كىچىك ئالدىن كۆرۈش رەسىمى بىلەن ئەمەلىي رەسىمنىڭ ئوخشىماسلىق خاتالىقى زور دەرىجىدە كېمەيگەن. بۇ ئوماق ئەپنى چۈشۈرمەسلىككە باھانىڭىز يوققۇ دەيمەن.

ئەپ ئىسمى : uSketch

ساتقۇچى : SOFTVISION Consulting INC

تۈرى : قوللىنىشچان، فوتو-سۈرەت

چوڭلۇقى : 3.4 MB

چۈشۈرۈش ئادرىسى :

كۆڭلىڭىزدىكىنى تاپايمۇ؟

ئۆزۈم تارتقان سۈرەتلەر (1)

پاسىبان — Sat, 14 May 2011 14:09:56 +0000

خىزمەت ئالدىراشچىلىقى بىلەن سىرتقا چىقىپ سۈرەتكە تارتمىغىلى ئۇزۇن بوپتىكەن، بۈگۈن ئىشتىن چۈشۈپ بىر-ئىككى پارچە سۈرەتكە تارتقۇم كېلىپ قالدى. داۋاملىق زاتۋور بېسىلىپ تۇرمىسا ئادەمنىڭ قولىمۇ قېتىپ قالىدىغان ئوخشايدۇ. تازا قاملاشمىسىمۇ يوللاۋەردىم. ھېس قىلغانلىرىڭلارنى كۆرسەتسەڭلار تەڭ ئۆگىنەرمىز!

چېچىكىنىڭ ئۆزى كىچىك بولسىمۇ پۇرىقى خېلى كۈچلۈك ئىكەن. بىرى بىناسىنىڭ ئاستىدىكى كىچىككىنە جايغا تېرىۋالغان ئىكەن، شۇ ئەتراپنى پۈتۈنلەي مۇشۇ گۈلنىڭ خۇشبۇي ھىدى قاپلاپ كېتىپتۇ

ئۇنىڭ يېنىدىلا بۇ ئەتىرگۈللەر …

گەرچە ھاۋا سەل تۇتۇق بولسىمۇ ئۇلترا بىنەپشە نۇر يەنىلا كۈچلۈكتەك … ئاق بالانىسنى يەنە ئۆزگەرتىپ تارتىپ باقتىم

ئەتىرگۈلنى كۆرسەملا تارتقۇم كېلىدۇ…

بۈگۈن ئىشتىن چۈشۈپ شۇنداق بىر ئىشتىياق تۇغۇلدى. دەرھال بىنادىن چۈشتۈميۇ، نېمىنى تارتىش كېرەكلىكىنى بىلەلمەي تۇرۇپ قالدىم. شۇنىڭ بىلەن كۆزۈمگە چېلىققان جاينى شۇنداقلا تارتىۋەردىم

ھاۋا تۇتۇق بولغانلىقتىن ئاق بالانىسنى قانداق قىلسام ئەڭ ياخشى تەڭشەك ھالىتىگە كەلتۈرۈش ئۈچۈن نەچچە قېتىملاپ ئۆزگەرتتىم

يول، مۇشۇ جايدىن ھەممە باشلىنىدۇ …

ئالدىغا يەنە بىر قەدەم …

ئولتۇراق رايونىمىزنىڭ مۇھىتى بولامدىكەن؟

ئامانلىق خىزمەتلىرىمۇ خېلى ئەتراپلىق ئىكەن

بۇ يول بايىقىغا قارىغاندا سەل ياخشىراق چىقتىمۇ نېمە؟

سۈرەتكە تارتىۋاتقىنىمنى كۆرۈپ بۇ قىزچاق يۈگرەپ ئالدىمغا كېلىپ تۇنجى قىلغان سۆزى مېنى ھەيران قالدۇرى:

- سىز ئۇيغۇرما ؟

بۇ شەھەردە شۇ بىر-ئىككى تونۇش-بىلىشلەردىن باشقا كىشىلەردىن ئۇيغۇرچە سۆز ئاڭلىمىغانلىقىم ئۈچۈن تولىمۇ ھەيران قالدىم

مەنمۇ ھەيران بولۇپ سورىدىم:

- سىزمۇ ئۇيغۇرما؟ چۈنكى بۇ قىز ئۇيغۇرغا تۈزۈك ئوخشىمايتتى

- ياق، مەن قىرغىز.

ئەسلى بۇ قىزنىڭ دادىسى بۇ جايدا خىزمەت قىلىدىكەن. بۇ قىز مەن بۇ يەرگە كۆچۈپ كېلىپ كۆرگەن 2-شىنجاڭلىق ئىدى.

ئاپاراتىمغا سالغان لېنزىنىڭ نۇر چەمبىرىكى يار بەرمىگەنلىكتىن زاتۋور ۋاقتىنى ئۇزۇنراق قىلىپ نۇر بېرىش مەقسىتىگە يەتتىم

چۈنكى بۇ چاغ ھەم سىم-سىم يامغۇر يېغىۋاتقان، ھەم نامازشامغا ئاز قالغان ۋاقىت ئېدى.

بىزنىڭ قورونىڭ مەركىزىدىكى راۋاق. ئەسلى شۇ جايغا كۆپرەك سۈرەتكە تارتماقچى ئېدىم. بىراق يامغۇر ئەدەپ كېىتپ قالدى

ئەگەر 3 پۇتلۇق جازىغا ئورۇنلاشتۇرۇپ نۇر بېرىش ۋاقتىنى ئۇزاقراق تەڭشىسەك، قاشقارايغانغا ئاز قالغان بولسىمۇ مانا مۇنداق يورۇق رەسىمگە ئېگە بولىمىز.

ئىشىك ئالدىدىكى يېشىللىق

يېشىللىق ئارىسىدىكى «قىزىللىق»

ماۋۇ رەسىمنى قانداق تارتقانلىقىمنى بىلەمسىز؟

بۇ ھىچقانداق ئىش قوشۇش، كومپىيۇتېردا ئۈنۈم بېرىش باسقۇچلىرىدىن ئۆتمىگەن، بىۋاستە ئاپارات ئارقىلىق تارتىلغان رەسىم. بۈگۈنكى رەسىملەرنىڭ ھەممىسى شۇنداق.

بىر ئازدىن كىيىن بۇ بالا يۈگرەپ ئالدىمغا كېلىپ قالدى

مەن تېخى ئافرىقىدىكى بىرەر ئەرەپ ئەللىرىدىنمىكىن دەپتىمەن

بۇ ئىككەيلەن ئاكا-سىڭىل ئىكەن

بۇلار ئېفئوپىيەدىن كەلگەن بولۇپ، ئائىلىسى بويىچە بۇ شەھەردە تۇرىدىكەن. دادىسى تىجارەت قىلىدىغان ئوخشايدۇ.

باشتا بىر-ئىككى پارچە سۈرەتكە تارتقۇچە ئېنگلىزچە گەپ قىلسام چۈشىنەمدىغاندۇ دەپ خەنزۇچە-ئېنگلىزچە ئارىلاشتۇرۇپ ئەبجەش گەپ قىلىپ يۈرۈپتىمەن. كىيىن پاراڭلىشىپ نەدىن كەلگەنلىكىنى سوراپ قويغىنىمىغا ئېنگلىزچە شەمەردەك كالدىرلاپلا كەتتى. ئېنگلىزچە دېگەننى ئۆتتۈرىدىكەن ئەمەسمۇ! لېكىن سەت چاندىم!

سىڭلىسى مۇزقايماققا شۇنداق ئامراق ئىكەن. كىچىك بالىغا بۇ ئەيىپ ئەمەستە!

ئەمدى ئۆيگە كىرىپ كېتەي دەپ لىفىتكە بىللە چىقتۇق. سىلەرنىڭ ئۆي مۇشۇ بىنادىمۇ دېسەم، ياق، بىز ئۆگزىگە چىقىپ ئوينايمىز دەيدۇ. شۇنىڭ بىلەن مەن ئۇلار بىلەن بىللە چىقىپ بىر كۆرۈپ بېقىش نىيىتىگە كېلىپ «ئۇلارغا ئەگىشىپ» ئەڭ ئۈستۈنكى قەۋەتكە چىقتۇق. چۈنكى مەن ئۆزۈم تۇرغان قەۋەتتىن بىرەر قەۋەتمۇ ئۈستىگە چىقىپ باقمىغان ئىكەنمەن. بۇ تازلار كۈندە مۇشۇنداق ئوينايمىش

سىڭلىسى ئېگىزگە چىقىپ شۇنداق خوش بوپكەتتى. خۇشاللىقىدىن توختىماي سەكرەيتتى

ئاكىسى بولسا توختىماي پو ئاتاتتى. تېخى مەندىن قانداقراق ھېس قىلىۋاتقانلىقىمنى، قورققان-قورقمىغانلىقىمنى سوراپ قوياتتى. قارىسام يېشى بالامدىن ئازراقلا چوڭدەك تۇرىدۇ بولمىسا، مېنى بەكلا ئۇششاق بالا كۆرۈپ قالدىمۇ بۇياق؟

مەن ئۆزۈم بىلەن بولۇپ سۈرەتكە تارتقۇچە بۇ يىگىت پوچىلىق قىلىپ ھېلى ئۇيەر، ھېلى بۇيەرگە ياماشقىلى تۇردى.

بۇ قىزنىڭ قولىدىكى مۇزقايماق شۇنداق بەرىكەت قىلدىكى! يىگەنسىرى ئاۋۇپ كېتىۋاتقاندەك بىلىنىپ كەتتى

چەتئەللىكلەرنىڭ بالىلىرى بەكلا چىقىشقاق كېلەمدۇ، ئۆزىنىڭ ئۈستى-بېشىنى بىر قىلىپ بولۇپ ئەمدى ماڭا سۈكەشكىلى تۇردى.

مەن بۇ تەرەپتە سۈرەتكە تارتسام بۇ ئىكىسى كۆزۈمنى ئىلەشتۈرۈپ بىرى ئۇيانغا بىرى بۇيانغا چېپىپ، ئۈستىدە بىرەر ئىش چىقىپ قالمىسۇن دەپ ئاستا ئۇلارنى ئېلىپ يېنىپ چۈشتۈم. بۇ ئىككى شاكىچىكنى ئۆيگە تەكلىپ قىلسام ھېچ ئىككىلەنمەي OK لا دېدى. ئۆيگە كىرىپ بىردەم ئولتۇرۇشىمغا ئاران رەتلىگەن ئۆينى ئېگىز-پەس قىلغىلى تۇردى. بۇلار شۇنداق ئەركىن، قەتئىي تارتىنىش ۋەياكى ھىيقىش دېگەندەك ئالامەتلەر يوقتە! يەنە قويىۋەتسەم ئۇكام ئىككىمىز يېرىم كۈن ئۆي رەتلىسەك بولىدىغان ئوخشايدۇ، شۇنىڭ بىلەن «مېڭىڭلار پەسكە چۈشۈپ ئوينايمىز» دەپلا ئاستا ئېلىپ چۈشۈپ كەتتىم. پەسكە چۈشۈپ تۇرىشىمىزغا ئاپىسى ئىزدەپ چىققانىكەن، ئۇلارنى تاپشۇرۇپ بېرىپ خوشلىشىپ يېنىپ چىقتىم ۋە ئىسسىغىدا ماقالىنى يوللىۋەتتىم.

كۆڭلىڭىزدىكىنى تاپايمۇ؟

بۇ يازمىلارغىمۇ ئىشتاھايىڭىز بولىشى مۇمكىن
App Store دىكى ئۇيغۇرچە ئەپلەر توپلىمى	ئادىل ئىسمائىل فوتو سۈرەت ئەسەرلىرى	مىنىمالىستچىلار سۈرەتلىرىدىن تاللانما	تەۋسىيە: ئايفون ۋە ئايپەد ئۈچۈن – قانخور مەخلۇق Death Worm	تەۋسىيە : ئاجايىپ – غارايىپ ئەپ (5) Remix your life
无觅

بۇ يازمىلارغىمۇ ئىشتاھايىڭىز بولىشى مۇمكىن
iOS 5.0.1 ئېلان قىلىندى	ھېيتلىق لازىممۇ؟! مانا ئەمىسە!	5-ئەۋلاد ئايفون iPhone 4S ئاخىرى ئېلان قىلىندى	ئايفوننىڭ 9 ئاي ئىچىدە قانچىلىك سېتىلغانلىقىنى بىلەمسىز؟	تەۋسىيە : ئاجايىپ – غارايىپ ئەپ (5) Remix your life
无觅

بۇ يازمىلارغىمۇ ئىشتاھايىڭىز بولىشى مۇمكىن
ھايۋانات فوتوگرافچىلىقى نادىر ئەسەرلىرىدىن تاللانما	App Store دىكى ئۇيغۇرچە ئەپلەر توپلىمى	پورترېت سۈرەتكە ئېلىشتىكى 10 تېخنىكا	ئۆزۈم تارتقان سۈرەتلەر (1)	فوتوگرافتا بولۇشقا تېگىشلىك 5 خىل ئادەت
无觅

بۇ يازمىلارغىمۇ ئىشتاھايىڭىز بولىشى مۇمكىن
ھېيتلىق لازىممۇ؟! مانا ئەمىسە!	ھايۋانات فوتوگرافچىلىقى نادىر ئەسەرلىرىدىن تاللانما	تەۋسىيە : ئاجايىپ – غارايىپ ئەپ (5) Remix your life	App Store دىكى ئۇيغۇرچە ئەپلەر توپلىمى	تەۋسىيە: ئاجايىپ ئېسىل ئەپ – Orient
无觅

بۇ يازمىلارغىمۇ ئىشتاھايىڭىز بولىشى مۇمكىن
ھايۋانات فوتوگرافچىلىقى نادىر ئەسەرلىرىدىن تاللانما	App Store دىكى ئۇيغۇرچە ئەپلەر توپلىمى	iOS 5 نى نامۇكەممەل تۈرمىدىن قاچۇرۇش	دورامچۇق ئىت-مۈشۈكلەرنىڭ جېڭى يەنە باشلىنىپتۇدەك	ئايفونىڭىز بىلەن سۈرەتلەرنى مۇنداق ئۇسۇلدا مەخپىيلەشتۈرەلەيسىز
无觅

بۇ يازمىلارغىمۇ ئىشتاھايىڭىز بولىشى مۇمكىن
ھېيتلىق لازىممۇ؟! مانا ئەمىسە!	سىرىنى iPhone 4 كە سۆرەپ ئەكىرەيلىمۇ؟	تەۋسىيە: بالىلارنىڭ زېھنىنى ئاچىدىغان ئېسىل ئەپ	iPhone 4S ئېلان قىلىش يىغىنىنىڭ خەنچە چۈشەندۈرىلىشى	تەۋسىيە : ئاجايىپ – غارايىپ ئەپ (5) Remix your life
无觅