پاسىبان كۇلۇبى » فوتوگرافىيە

ھايۋانات فوتوگرافچىلىقى نادىر ئەسەرلىرىدىن تاللانما

پاسىبان — Sun, 06 Nov 2011 09:37:46 +0000

ھايۋانات فوتوگرافچىلىقى – فوتوگرافچىلىق ساھەسىدىكى بىر قەدەر مۇرەككەپ، خەتەرگە تەۋەككۈل قىلىش روھى تەلەپ قىلىدىغان، كۆپ كۈچ سەرپ قىلىنىدىغان ۋە تېخنىكا تەلەپ قىلىدىغان فوتوگرافچىلىق تۈرى. ھايۋاناتلار بىزنىڭ سۆزىمىزنى ئاڭلىمىغانلىقى ئۈچۈن ناھايىتى كەم ئۇچرايدىغان ھەرىكەتلەرنى قىلغىنىدا قىسقا ۋاقىت ئىچىدە جىددى ئىنكاس قايتۇرۇپ ئىنتايىن توغرا بىر ئۇسۇلدا زاتۋورنى بېسىشىمىز شەرت. چۈنكى «سەل ياخشى چىقماي قالدى، يەنە بىر چىشلەپ بېرەمسەن؟» دېگىلى بولمايدۇ…

مۇشۇنداق پۇرسەتنى قاچۇرىۋەتمىگەن فوتوگرافلارنىڭ نادىر چىققان ئەسەرلىرىدىن بىر قانچىنى بىر كۆرۈپ چىقايلى.

«تۈلكە ئۇيقۇدا، تۈلكە ئۇيقۇدا … »

بىر جۈپ ياش

مايمۇن شاش

كالا دېگەن، مۈڭگۈز باش ( قوشاق كەپقالدى ھە )

بۇ ياۋايى ھايۋان بولمىسىمۇ، ئورۇقلىتىش چېيىنىڭ ئېلانىغا چىققۇدەك كەلگەن ئىتكەن ئۆزى …

«مايمۇن ئاغا» سۇ ئۈزىۋېتىپتۇ

ھەئە، تاغىل ئات دېگەن شۇكەن.

بۇ رەسىمنى كۆرۈپ Steve Jobs نىڭ بىر ئېغىز سۆزى ئېسىمگە چۈشتى:

«قۇياشنى قولدىن بېرىپ قويغان بولساڭ، ئاينى بولسىمۇ چىڭ تۇتقىن»

بۇ كۈچۈكنىڭ سەبىيلىكىنى ئېنىق نامايەن قىلالىغان فوتوگرافقا قول قويدۇم.

Wild دېگىنى شۇكەندە …

كىنولاردىكى سورتلۇق مۈشۈك …

ئارقىدىكى قايسى تاغ چوققىسى؟ كىم بىلىدۇ؟

بۇ مۈشۈككە قارىسام بەكلا بىچارىدەك كۆرۈنىدۇ. ئاخشام ئويناپ يانغۇچە ئاۋۇ مايمۇن كۆزىگە ئېگىسدەك كۆرۈنۈپ قالغان بولسا «مىياۋ» دەپ كېلىشىگىلا موكلا تۇتۇلغان ئوخشايدۇ. ئۇنىڭغىمۇ ئامال قانچە؟ تويىدىغان بولدى 夜猫 بولغانغا!

ھەقىقىي بۆرىلەر …

بۇ رەسىم ماڭا بەك ياقتى. خۇددى سىزىۋالغاندەكلا!

بۇ بىچارىلەر يۇرتلىرىدىن ئايرىلىپ «كەيپىيات ناچار، چىشىمغا تەگمەي تۇرۇشە!» دەۋاتقاندەك… كونتا كېنتىدەك قار دېگەن نەرسىنى بىلمەس بولغىيتى ئافرىقىدا بولسا …

بۇمۇ بىزنىڭ سەھرادىكى ئېشەكلەردەك ئىسقىرتىپ بەرسە ئېغىناپ قويامدۇ نېمە؟

كەپسىز تاغىللار. رەسىمگە چۈشكەندەك تۇرىشىنى!

ماۋۇ رەسىمنى بەك جايىدا تارتىپتۇ.

ھە، قىستۇرما رەسىم شۇتى

كىچىك تازكەن، ئىشتان كەيمەپتۇ

ئاغزىغا بېشىم كىرىپلا كېتەمدۇ نېمە؟

ئېيىق راس ھورۇن نېمىكەن. شۇ تاپتا ھەسەل چۈشەۋاتقان بولسا كېرەك.

Three Wolves

مۇشۇنداق ساسلىقتىن بەك قورقىمەن. تىمساق چىقىپ قالامدىكىن دەپ.

گۈزەللىككە ھېرىسمەن ئىتكەن. پۈچەك بولسىمۇ گۈل پۇراپ يۈرۈپتۇ. رەسىم ماڭا بەك ياقتى.

بۇ قاپلاننىڭ بېشىغا مۈشۈكنى كەيدۈرۈپ قويغان PS ھاسىلاتى ئەمەس. 猞猁 Lynx دەپ ئاتىلىدىغان مۈشۈك ئائىلىسىگە تەۋە ھايۋان بولۇپ، ئۇيغۇرچە تاغ مۈشۈكى، سۈلەيسۈن دەپ ئاتايدىكەنمىز.

ئېيىق ئائىلىسى ئىچىدە مۈشۈكئېيىق بىلەن مۇشۇ ئېيىقنى بەك مۇلايىممىكىن دەيمەن.

مۇشۇنىڭ ئۆزى بۇ نەرسىنىڭ ئىنسانلاردىن تولىمۇ يىراق بىر نەرسە ئىكەنلىكىنى ئىسپاتلاشقا يېتەمدىكىن دەيمەن.

زادى مېنىڭ ئانام دادام يا ئۇلارنىڭ ئانا-دادىسى مايمۇنتى، دەيدىغانلارغا خروموسوم سانىنى دەلىل قىلىپ كۆرسەتسىمۇ كار قىلمايدىغۇ دەيمەن. ئۇنداقلارغا «ھە ماقۇل، سېنىڭ ئاناڭ مۇشۇنىڭدەك پىتىنى تېرىپ يەيدىغان مايمۇنتى» دەپلا قۇتۇلغان ياخشى.

سەكرەش

بىر ئائىلە كىشىلىرى دەرقەمتى ھېيتلىق بېلىق تۇتۇپ يىگىلى تۇرۇپتۇ. بەختلىككەن …

ئۆز يۇرتىدا، ئاتا-ئانىسى ئالدىدا ھېيت ئۆتكۈزۈشكە ئىمكانىيەت بولمىغانلارغا مەندىن چوڭقۇر سالاملار بولسۇن!

مونۇ شىر جەرەن ئوۋلاۋاتامدۇ ياكى فوتوگرافنىمۇ؟

سەندىن بىر ئىنجا چىقمىدى دادا، ئۆزەملا بىر نېمە تېپىپ كېلەي!

ماۋۇ رەسىمنىڭ قانداق ئەھۋال ئاستىدا تارتىلغىنى توغرىسىدا مەلۇمات يوقكەن. لېكىن بەك نوچى چىقىپتۇ. ئاستىدىكى تۇمان بۇ نېمە ئىشكىنە؟

كۆڭلىڭىزدىكىنى تاپايمۇ؟

مىنىمالىستچىلار سۈرەتلىرىدىن تاللانما

پاسىبان — Sat, 08 Oct 2011 06:12:00 +0000

مىنىمالىستچىلار – ئاددىيلىقنى تەرغىپ قىلغۇچىلار، مۇنداقچە قىلىپ ئېيتقاندا «ئاددىيزىمچىلار» دېگەن مەنىنى بىلدۈرىدۇ. ئىسمىدىنمۇ چىقىپ تۇرۇپتىكى، بۇنداق فوتوگرافلار رەڭ پەرقى ئاز، مەزمۇن ئاددىي بولغان مەنزىرە ياكى شەيئىنى تېما قىلىپ تاللاپ، ئۆزگىچە، راھەت ياكى پاكىز بىر تۇيغۇ ئاتا قىلىدۇ.

فوتوگراف ساھەسىدىمۇ مىنىمالىست فوتوگرافچىلىقى دەپ بىر تۈر، شۇ تۈرنىڭ ئۆزىگە يارىشا ئىشتىراكچىلىرى ۋە قىزىققۇچىلىرى بار. ئۇلار تىنچ ۋە يېنىك ئېلېمېنتلاردىن پايدىلىنىپ «سەنئەت» ياسايدۇ. بۇنىڭمۇ ئۆزىگە يارىشا قىيىن نوقتىسى بولۇپ، بىر ياكى ئىككى خىل شەيئىنى قويۇش ئارقىلىق بىر قاتار مەزمۇننى ئىپادە قىلىدىغان گەپ.

ئۆتكەندە خاڭجۇ ئايروپورتىغا كېتىۋاتقاندا يولدا بىر ئېلان تاختىسىنى كۆرگەن ئىدىم. ئۇ تاختا ناھايىتىمۇ چوڭ بولۇپ، %95 يېرى بۇلۇتسىز كۆك ئاسمان، پەقەت ئاستى تەرەپ 4/1 قىسمىدا باشتىن بوياق كېسىپ ئۆتۈۋاتقان خەلقئارا ئاۋىئاتسىيە شىركىتىنىڭ كىچىك بىر يولوچىلار ئايروپىلانىنىڭ سۈرىتى چۈشۈرۈلگەن ئىكەن. بۇ ئېلان ماڭا بەكمۇ ياققان ئىدى. مەنمۇ مىنىمالىست فوتوگرافچىلىقىغا ئامراق بولسام كېرەك.

تۆۋەندە مۇشۇنداق فوتوگرافلار تارتقان ئۆزى ئاددىي، لېكىن سەنئەت پۇرىقى كۈچلۈك رەسىملەردىن بىرقانچىسىنى كۆرۈپ ئۆتەيلى. بىر يەرلەردە كۆمۈلۈپ قالغان يوشۇرۇن كۈچلىرىمىزنى غىدىقلاپ ئويغۇتۇپ قالسا ئەجەپ ئەمەس.

كۆڭلىڭىزدىكىنى تاپايمۇ؟

پورترېت سۈرەتكە ئېلىشتىكى 10 تېخنىكا

پاسىبان — Tue, 04 Oct 2011 02:05:41 +0000

پورترېت (سىرتقى قىياپەت) سۈرەتكە تارتىش – فوتوگرافچىلىقنىڭ، ئېنىق قىلىپ ئېيتقاندا بىز ئەڭ بىلىدىغان ۋە ئىشلىتەلەيدىغان بۆلىكىنىڭ مۇھىم بىر قىسمى. زاتۋورنى بېسىش تولىمۇ ئاسان. لېكىن مۇۋاپپىقىيەتلىك ئاياغلاشتۇرۇش ئۇنچە ئاسان ئەمەس. خەلقئارا سەھنىلەردە پورترېت سۈرەتلىرى بىلەن داڭق چىقارغان كاتتا فوتوگرافلارنىڭ قانداق ئورتاقلىقى بار؟ نېمە شۇلارنى مۇشۇنداق مۇۋاپپىقىيەتكە ئېلىپ چىقالىدى؟ ئەمەلىيەتتە پورترېت ياساش سىز ۋە بىز ئويلىغاندەك ئۇنچە قىيىنمۇ ئەمەس.

كەسىپتە مۇۋاپپىقىيەت قازانغان ھەرقانداق بىر فوتوگراف ناھايىتى ئۇزاق ۋاقىت ئۆز كەسپىدە ئىزدىنىپ، ئۇچۇر توپلاپ، تەتقىق قىلىپ كاللا قاتۇرۇشنى باشتىن ئۆتكۈزگەن بولىدۇ. شۇڭا قاراپ ئولتۇرۇپ قالغۇدەك بىرەر پارچە رەسىمگە ھەرقانداق كىشى ئېرىشىۋەرمەيدۇ. لېكىن، ئاددىي ساۋات، قولاي مەشغۇلات ئارقىلىق مۇشۇنداق نەتىجىگە يېقىنلىشىش – بۇ چۈش ئەمەس.

1. ئېنىق، يارقىن باش تېما تاللاش

تارتماقچى بولغان سۈرەتتە ئېنىق، ئوچۇق ۋە سۈزۈك باش تېما ئەكس ئەتسۇن. ئادەم، شەيئى ۋەياكى ھايۋانات-ئۇچارقۇشلارمۇ؟ ئاۋال بۇ كاللىڭىزدا ئېنىق بولىشى كېرەك. بۇ ئېنىق بولغاندا سىز مۇشۇنى يارقىنلاشتۇرۇش ئۈچۈن تېرىشىسىز. سۈرەتتە مەزمۇن، ۋەقە بولىشىغا تېرىشىڭ. « مىكى-مىكى » لەرنى كاللىڭىزدىن چىقىرىپ تاشلاڭ. بىر قېتىم بولمىسا ئىككىنجى قېتىم قىلىشقا تېرىشىڭ.

2. دىققەت قىلىش نوقتىسىنى تېمىغا مەركەزلەشتۈرۈش

بىزنىڭ تارتقان سۈرەتنى كۆرگەن ھەرقانداق كىشى ئەڭ دەسلەپتە بىز ئىپادىلىمەكچى بولغان ئاساسى تېمىغا قارامدۇ-يوق؟ بىز مۇشۇنى ئويلاشقان ئاساستا مەنزىرىنى ئورۇنلاشتۇرىشىمىز كېرەك. بۇ سۈرەتتىكى مودېلنىڭ قولىدىكى ئەتىرگۈل ئاساسى تېمىنى ئەكس ئەتتۈرۈش تولىمۇ ياخشى ياردەمچى بولغان. سۈرەتتە بۇ قىزنىڭ گۈزەللىككە ئېنتىلگەنلىكىدەك روھى قىياپەت ناھايىتى ياخشى ئەكس ئەتتۈرۈلگەن.

3. سۈرەت مەزمۇنىنى تېخىمۇ ئاددىيلاشتۇرۇش

ئاساسى تېمىنى گەۋدىلەندۈرۈشكە ياردەم قىلالمايدىغان، ھەتتا ئۇنى بۇرمىلاپ باشقا مەزمۇن ئەكس ئەتتۈرۈپ قويىدىغان ئارتۇقچە نەرسىلەرنى سۈرەتتىن چىقىرىپ تاشلىشىمىز كېرەك. سۈرەتتىكىدەك كىچىك بالىنىڭ ئوماق، سەبىي چىراي ئىپادىسىنىلا قالدۇرۇڭ.

4. ئېلاجنىڭ بېرىچە تېما ئەسلى شەكلىنى ساقلاپ قالسۇن

سىرتتا پورترېت ياسىغاندا ئەڭ ياخشىسى مودېل بىلەن مەلۇم ئارىلىق ساقلاپ تۇرۇپ تارتقىنىمىز ئەۋزەل. لېنزا ئىشلەتكەندىمۇ كەڭ بۇلۇڭلۇق لېنزىنى تاللىمايمىز. ئەگەر سۈرەتكە بەك ھەددىدىن ئاشۇرىۋېتىدىغان ئۈنۈم قوشماقچى بولساق ئۇ باشقا گەپ. سىرتتا ئەڭ ياخشىسى 80-90 مىللىمېتىرلىق فوكۇس ئارىلىقىنى ئىشلىتىپ تارتسا ياخشى.

5. ھاياتلىق ئىپادىسى ئەكس ئەتسۇن

سۈرەتكە تارتماقچى بولغان ئادەمنىڭ قولى ئازراق بولسىمۇ ھەرىكەتتە بولسىمۇ ئۆزگىچە تۈس قوشىدۇ. مەسىلەن، پىشانىسىنى تۇتۇش، يۈزىنى سىلاش، بېلىنى تۇتۇش، تەرىنى سۈرتۈش، تۈگمىسىنى ئېتىش، چېچىنى تۈزەشتۈرۈش … ئىشقىلىپ بىرەر ھەرىكەت ئىپادىسى نامايەن بولسا رەسىم ئۆلۈك چىقىپ قالمايدۇ. ھەتتا قولىدا بىرەر قورال-ياراق ئېلىپ تۇرغان ھالەتمۇ سۈرەتكە ھاياتلىق تۈسى قوشالايدۇ.

6. ئوبيېكت تېخىمۇ تەبىئىي بولسۇن

كىشىلەرنى سۈرەتكە تارتقاندا ئۇلارنىڭ تەبىئىي تۇرىشى ئىنتايىن مۇھىم. بىزلەر سۈرەتكە چۈشسەك كۆپرەك «ھەربىيچە» تۇرۇپ قويىمىز بۇ بەكلا كونىلىق بوپقالدى. سۈرەتتىكى كىشىلەر ئۆزىنى قويىۋېتىپ ئەركىن-ئازادە تۇرغاندا ھېسسىيات يارقىن ئىپادىلىنىدۇ. بىز كونا شەكىلىدىكى «تاياقتەك تۇرۇپ سۈرەتكە چۈشۈش» ئىدىيىسىنى ئۇلارنىڭ كاللىسىدىن چىقىرىپ تاشلىشىمىز، ئۇلارغا «سۈرەتكە تارتىش» نى ئۇنتۇلدۇرىۋېتەيلى. ئەمەلىي شارائىتقا قاراپ تۇرۇپ ئولتۇرۇش، تىك تۇرۇش، يۆلېنىش، بېلىنى ئېگىش، ئىشقىلىپ تەبىئىيلىكنى ساقلاشقا تېرىشساق، قانچە تەبىئىي قانچە راھەت بولسا سۈرەت شۇنچە جانلىق چىقىدۇ.

7. ئادەمنى مەنزىرىدىن ئايرىپ ئېلىۋېلىش

بۇ تېمىنى ئېنىق ئەكس ئەتتۈرۈشنىڭ يەنە بىر ئۇسۇلى. بۇنىڭ ئۇسۇلى بەكلا ئاددى. چوڭراق نۇر چەمبىرىكى ئىشلىتىش (4.0 ھەتتا 2.8)، ئۇزۇن فوكۇس ئارىلىقى ئىشلىتىش ياكى بولمىسا ئادەمنى مەنزىرىدىن يىراقراق جايغا ئورۇنلاشتۇرۇش.

8. قارشى بۇلۇڭلۇق بەدىئىي تۈزۈلۈش قوللىنىش

يالغۇز كىشى سۈرەتكە ئالغاندا سۈرەتكە ئالغان شەيئى بىلەن مەلۇم ئارىلىق ساقلىشى، بەدىئي تۈزۈلۈش تاللاشتا قارشى بۇلۇڭلۇق بەدىئىي تۈزۈلۈش قوللىنىشى ئەڭ ئاقىلانىلىك. بۇنىڭدا پورترېت شەكىل ئۆزگىرىپ كېتىشىنىڭ ئالدىنى ئالغىلى بولىدۇ. يەنە ئازراق بوشلۇق ۋە يوچۇق قويۇپ قويۇپ، سۈرەتنى تېخىمۇ ئىچكىرىلەپ كىرىش ھالىتىگە كەلتۈرەلەيمىز.

9. مودېلنى ئۆزگىچە بىر شەكىلدە تۇرغۇزۇش

بىز تولا ئاڭلايدىغان POSE دېگەن شۇ. بۇ ئۇسۇل مۇشۇنداق مودېلنى سۈرەتكە ئالغاندا ئىشلەيدۇ. بىز بىرەر شەكىلدە تۇرغان مودېلنى سۈرەتكە ئالغىنىمىزدا ئىلاج بار ئۇنىڭ باش ۋە مۈرىسىنى ئوخشاش بىر سىزىق ئۈستىدە، بەدىنىنى ئەگرى سىزىق ياكى باشقا تۈزسىزىق ئۈستىدە تۇرغۇزۇپ ئالساق بولىدۇ.

10. يېرىم بەدەن ياكى باش سۈرەتنى مۇۋاپىق ئىشلىتىش

ئەگەر پورترېت ياسىماقچى بولغان پىرسوناژنىڭ كىيىم-كېچەك، تەققى-تۇرقى، مەيداندىكى ھەرخىل ئېلىمېنتلار ئاساسى تېما ياسىشىمىزغا تەسىر كۆرسىتىدىغان ئېھتىماللىق بولۇپ، مەزمۇن ئىپادە قىلالمىغان ۋاقتىمىزدا، يېرىم بەدەن ياكى باش قىسمىنى تاللاپ سۈرەتكە ئېلىش ئەڭ ئاقىلانىلىك. ئەلۋەتتە، بۇ چاغدا پىرسوناژنىڭ كۆزى ئەڭ مۇھىم ئامىل بولىدۇ.

يۇقارقى ئۇسۇللار قىياپەت سۈرەتكە ئېلىشتىكى بىرقانچە كۆرسەتمە بولۇپ، بۇنى ئۆزىمىزنىڭ ئادىتىمىز بويىچە ئىستىمال قىلىشقا ياكى پايدىلىنىشقا بولىدۇ. ئۆزىڭىزنىڭ ھېس قىلىپ يەتكەنلىرىڭىز، تەجرىبىلەرنى يىغىنچاقلاپ ھەزىم قىلغىنىڭىز ئۆزىڭىزنىڭ خاسلىقىنى ئىپادىلەشتىكى ئەڭ ياخشى ئۇسۇل. بۇ خاسلىقىڭىزنى باشقىلار ئېتىراپ قىلىپ باھا بەرگەن چاغدا سىز ھەقىقىي نەتىجە ياراتقان بولىسىز. ئۇ چاغقىچە بىز توختىماي ئۆگىنىپ، مەشىق قىلىپ تۇرايلى. بۇ ئۇسۇللارنى پەقەت تەكلىپ ياكى كىچىككىنە كۆرسەتمە دەپ چۈشۈنۈڭ. چوقۇم ھەربىر پارچە رەسىمدە مۇشۇ ئۇسۇلنىڭ ھەممىسىنى تەڭ قوللىنىمىز دېگەن گەپ ئەمەس. ئۇنداقمۇ قىلغىلىمۇ بولمايدۇ.

كۆڭلىڭىزدىكىنى تاپايمۇ؟

پارچە-پارچە رەسىملەردىنمۇ قاملاشقان قىسقا فىلىم ئىشلەش مۇمكىن

پاسىبان — Sun, 31 Jul 2011 03:09:10 +0000

كەسپىي فوتوگراف ئاپاراتلىرى بولغان يەككە رېفلىكىسنىڭ زاتۋور ۋاقتىنى نەچچە ئون سېكونت، ھەتتا نەچچە مىنۇت تەڭشىگىلى بولىدۇ. مۇشۇنداق ئۇزۇن تەڭشەش ئارقىلىق ئاپاراتنىڭ ئالدىدا ھەرخىل رەڭدە نۇر تارقىتىدىغان نەرسىلەرنى ئايلاندۇرۇپ يۈرۈش ئارقىلىق ئۆزگىچە رەسىملەرگە ئېرىشكىلى بولىدۇ. مەنمۇ ئىلگىرى ئاپاراتنىڭ ئالدىدا ئايفوننىڭ چاقمىقىنى ئايلاندۇرۇپ يۈرۈپ خەت يېزىپ باققان ئېدىم.

مۇشۇ خىل ئۇسۇل ئارقىلىق بىر قاتار رەسىملەرنى كىرىشتۈرۈش ئارقىلىق فىلىم ئىشلەش بۇلارنىڭ خىيالىغا قانداق كەلدىكىن، قاملاشقان بىر ئېتىشۋازلىق فىلىمى پەيدا بوپتۇ. فىلىمدىكى كۆرۈنۈشلەر كارتون فىلىمدىكىدەك ناھايىتى ئوماق، ئوبرازلىق بولۇپ، ئاۋازمۇ ناھايىتى ياخشى ماس كەلگەن.

ئايفون، ئايپەدتە كۆرۈش ئۈچۈن بۇ جاينى بېسىڭ.

كۆڭلىڭىزدىكىنى تاپايمۇ؟

ئۆزۈم تارتقان سۈرەتلەر (1)

پاسىبان — Sat, 14 May 2011 14:09:56 +0000

خىزمەت ئالدىراشچىلىقى بىلەن سىرتقا چىقىپ سۈرەتكە تارتمىغىلى ئۇزۇن بوپتىكەن، بۈگۈن ئىشتىن چۈشۈپ بىر-ئىككى پارچە سۈرەتكە تارتقۇم كېلىپ قالدى. داۋاملىق زاتۋور بېسىلىپ تۇرمىسا ئادەمنىڭ قولىمۇ قېتىپ قالىدىغان ئوخشايدۇ. تازا قاملاشمىسىمۇ يوللاۋەردىم. ھېس قىلغانلىرىڭلارنى كۆرسەتسەڭلار تەڭ ئۆگىنەرمىز!

چېچىكىنىڭ ئۆزى كىچىك بولسىمۇ پۇرىقى خېلى كۈچلۈك ئىكەن. بىرى بىناسىنىڭ ئاستىدىكى كىچىككىنە جايغا تېرىۋالغان ئىكەن، شۇ ئەتراپنى پۈتۈنلەي مۇشۇ گۈلنىڭ خۇشبۇي ھىدى قاپلاپ كېتىپتۇ

ئۇنىڭ يېنىدىلا بۇ ئەتىرگۈللەر …

گەرچە ھاۋا سەل تۇتۇق بولسىمۇ ئۇلترا بىنەپشە نۇر يەنىلا كۈچلۈكتەك … ئاق بالانىسنى يەنە ئۆزگەرتىپ تارتىپ باقتىم

ئەتىرگۈلنى كۆرسەملا تارتقۇم كېلىدۇ…

بۈگۈن ئىشتىن چۈشۈپ شۇنداق بىر ئىشتىياق تۇغۇلدى. دەرھال بىنادىن چۈشتۈميۇ، نېمىنى تارتىش كېرەكلىكىنى بىلەلمەي تۇرۇپ قالدىم. شۇنىڭ بىلەن كۆزۈمگە چېلىققان جاينى شۇنداقلا تارتىۋەردىم

ھاۋا تۇتۇق بولغانلىقتىن ئاق بالانىسنى قانداق قىلسام ئەڭ ياخشى تەڭشەك ھالىتىگە كەلتۈرۈش ئۈچۈن نەچچە قېتىملاپ ئۆزگەرتتىم

يول، مۇشۇ جايدىن ھەممە باشلىنىدۇ …

ئالدىغا يەنە بىر قەدەم …

ئولتۇراق رايونىمىزنىڭ مۇھىتى بولامدىكەن؟

ئامانلىق خىزمەتلىرىمۇ خېلى ئەتراپلىق ئىكەن

بۇ يول بايىقىغا قارىغاندا سەل ياخشىراق چىقتىمۇ نېمە؟

سۈرەتكە تارتىۋاتقىنىمنى كۆرۈپ بۇ قىزچاق يۈگرەپ ئالدىمغا كېلىپ تۇنجى قىلغان سۆزى مېنى ھەيران قالدۇرى:

- سىز ئۇيغۇرما ؟

بۇ شەھەردە شۇ بىر-ئىككى تونۇش-بىلىشلەردىن باشقا كىشىلەردىن ئۇيغۇرچە سۆز ئاڭلىمىغانلىقىم ئۈچۈن تولىمۇ ھەيران قالدىم

مەنمۇ ھەيران بولۇپ سورىدىم:

- سىزمۇ ئۇيغۇرما؟ چۈنكى بۇ قىز ئۇيغۇرغا تۈزۈك ئوخشىمايتتى

- ياق، مەن قىرغىز.

ئەسلى بۇ قىزنىڭ دادىسى بۇ جايدا خىزمەت قىلىدىكەن. بۇ قىز مەن بۇ يەرگە كۆچۈپ كېلىپ كۆرگەن 2-شىنجاڭلىق ئىدى.

ئاپاراتىمغا سالغان لېنزىنىڭ نۇر چەمبىرىكى يار بەرمىگەنلىكتىن زاتۋور ۋاقتىنى ئۇزۇنراق قىلىپ نۇر بېرىش مەقسىتىگە يەتتىم

چۈنكى بۇ چاغ ھەم سىم-سىم يامغۇر يېغىۋاتقان، ھەم نامازشامغا ئاز قالغان ۋاقىت ئېدى.

بىزنىڭ قورونىڭ مەركىزىدىكى راۋاق. ئەسلى شۇ جايغا كۆپرەك سۈرەتكە تارتماقچى ئېدىم. بىراق يامغۇر ئەدەپ كېىتپ قالدى

ئەگەر 3 پۇتلۇق جازىغا ئورۇنلاشتۇرۇپ نۇر بېرىش ۋاقتىنى ئۇزاقراق تەڭشىسەك، قاشقارايغانغا ئاز قالغان بولسىمۇ مانا مۇنداق يورۇق رەسىمگە ئېگە بولىمىز.

ئىشىك ئالدىدىكى يېشىللىق

يېشىللىق ئارىسىدىكى «قىزىللىق»

ماۋۇ رەسىمنى قانداق تارتقانلىقىمنى بىلەمسىز؟

بۇ ھىچقانداق ئىش قوشۇش، كومپىيۇتېردا ئۈنۈم بېرىش باسقۇچلىرىدىن ئۆتمىگەن، بىۋاستە ئاپارات ئارقىلىق تارتىلغان رەسىم. بۈگۈنكى رەسىملەرنىڭ ھەممىسى شۇنداق.

بىر ئازدىن كىيىن بۇ بالا يۈگرەپ ئالدىمغا كېلىپ قالدى

مەن تېخى ئافرىقىدىكى بىرەر ئەرەپ ئەللىرىدىنمىكىن دەپتىمەن

بۇ ئىككەيلەن ئاكا-سىڭىل ئىكەن

بۇلار ئېفئوپىيەدىن كەلگەن بولۇپ، ئائىلىسى بويىچە بۇ شەھەردە تۇرىدىكەن. دادىسى تىجارەت قىلىدىغان ئوخشايدۇ.

باشتا بىر-ئىككى پارچە سۈرەتكە تارتقۇچە ئېنگلىزچە گەپ قىلسام چۈشىنەمدىغاندۇ دەپ خەنزۇچە-ئېنگلىزچە ئارىلاشتۇرۇپ ئەبجەش گەپ قىلىپ يۈرۈپتىمەن. كىيىن پاراڭلىشىپ نەدىن كەلگەنلىكىنى سوراپ قويغىنىمىغا ئېنگلىزچە شەمەردەك كالدىرلاپلا كەتتى. ئېنگلىزچە دېگەننى ئۆتتۈرىدىكەن ئەمەسمۇ! لېكىن سەت چاندىم!

سىڭلىسى مۇزقايماققا شۇنداق ئامراق ئىكەن. كىچىك بالىغا بۇ ئەيىپ ئەمەستە!

ئەمدى ئۆيگە كىرىپ كېتەي دەپ لىفىتكە بىللە چىقتۇق. سىلەرنىڭ ئۆي مۇشۇ بىنادىمۇ دېسەم، ياق، بىز ئۆگزىگە چىقىپ ئوينايمىز دەيدۇ. شۇنىڭ بىلەن مەن ئۇلار بىلەن بىللە چىقىپ بىر كۆرۈپ بېقىش نىيىتىگە كېلىپ «ئۇلارغا ئەگىشىپ» ئەڭ ئۈستۈنكى قەۋەتكە چىقتۇق. چۈنكى مەن ئۆزۈم تۇرغان قەۋەتتىن بىرەر قەۋەتمۇ ئۈستىگە چىقىپ باقمىغان ئىكەنمەن. بۇ تازلار كۈندە مۇشۇنداق ئوينايمىش

سىڭلىسى ئېگىزگە چىقىپ شۇنداق خوش بوپكەتتى. خۇشاللىقىدىن توختىماي سەكرەيتتى

ئاكىسى بولسا توختىماي پو ئاتاتتى. تېخى مەندىن قانداقراق ھېس قىلىۋاتقانلىقىمنى، قورققان-قورقمىغانلىقىمنى سوراپ قوياتتى. قارىسام يېشى بالامدىن ئازراقلا چوڭدەك تۇرىدۇ بولمىسا، مېنى بەكلا ئۇششاق بالا كۆرۈپ قالدىمۇ بۇياق؟

مەن ئۆزۈم بىلەن بولۇپ سۈرەتكە تارتقۇچە بۇ يىگىت پوچىلىق قىلىپ ھېلى ئۇيەر، ھېلى بۇيەرگە ياماشقىلى تۇردى.

بۇ قىزنىڭ قولىدىكى مۇزقايماق شۇنداق بەرىكەت قىلدىكى! يىگەنسىرى ئاۋۇپ كېتىۋاتقاندەك بىلىنىپ كەتتى

چەتئەللىكلەرنىڭ بالىلىرى بەكلا چىقىشقاق كېلەمدۇ، ئۆزىنىڭ ئۈستى-بېشىنى بىر قىلىپ بولۇپ ئەمدى ماڭا سۈكەشكىلى تۇردى.

مەن بۇ تەرەپتە سۈرەتكە تارتسام بۇ ئىكىسى كۆزۈمنى ئىلەشتۈرۈپ بىرى ئۇيانغا بىرى بۇيانغا چېپىپ، ئۈستىدە بىرەر ئىش چىقىپ قالمىسۇن دەپ ئاستا ئۇلارنى ئېلىپ يېنىپ چۈشتۈم. بۇ ئىككى شاكىچىكنى ئۆيگە تەكلىپ قىلسام ھېچ ئىككىلەنمەي OK لا دېدى. ئۆيگە كىرىپ بىردەم ئولتۇرۇشىمغا ئاران رەتلىگەن ئۆينى ئېگىز-پەس قىلغىلى تۇردى. بۇلار شۇنداق ئەركىن، قەتئىي تارتىنىش ۋەياكى ھىيقىش دېگەندەك ئالامەتلەر يوقتە! يەنە قويىۋەتسەم ئۇكام ئىككىمىز يېرىم كۈن ئۆي رەتلىسەك بولىدىغان ئوخشايدۇ، شۇنىڭ بىلەن «مېڭىڭلار پەسكە چۈشۈپ ئوينايمىز» دەپلا ئاستا ئېلىپ چۈشۈپ كەتتىم. پەسكە چۈشۈپ تۇرىشىمىزغا ئاپىسى ئىزدەپ چىققانىكەن، ئۇلارنى تاپشۇرۇپ بېرىپ خوشلىشىپ يېنىپ چىقتىم ۋە ئىسسىغىدا ماقالىنى يوللىۋەتتىم.

كۆڭلىڭىزدىكىنى تاپايمۇ؟

تۇتۇق ھاۋادا نېمىنى قانداق سۈرەتكە تارتىش كېرەك؟

پاسىبان — Fri, 04 Mar 2011 14:41:23 +0000

ھەممىمىزگە ئايان. ھاۋا تۇتۇق ۋاقىتتا رەڭ ئېلىمىنت پەرقى كىچىك ۋە روشەن كۆرۈنگەن سايە بولمايدۇ. كۈن نۇرى ئاستىدىكىدەك قاراڭغۇ يەرلىرى قاراڭغۇ، يورۇق جايلىرى زىيادە يورۇق بولىدىغان ئەھۋالمۇ بولمايدۇ. ھاۋا تۇتۇق ۋاقىتتا تارتقان سۈرەت كىشىگە كۈچلۈك رەڭ تۇيغۇسى بېرەلمەيدۇ. چۈنكى ئاسمان پارچە-پارچە ئاق بۇلۇتلىرى بار كۆك ئاسمان بولماستىن كۈلرەڭ ھالەتتە بولىدۇ. بۇ بەلكى كۆرگۈچىگە تازا ھوزۇر بېرەلمەسلىكى مۇمكىن. شۇنىڭ ئۈچۈن سۈرەتكە تارتقاندا كۈلرەڭ ئاسماننىڭ سۈرەتتىكى ئورنىنى مۇۋاپىق تەڭشەپ ئۇنىڭغا جاينى كۆپ بېرىۋەتمەسلىك كېرەك.

ئاپاراتىڭىزنى ئېگىزرەك ئورۇنلاشتۇرۇڭ

رەسىمگە تارتقاندا ئىلاجنىڭ بېرىچە ئاپاراتنى سەل ئېگىزرەك ئورۇنلاشتۇرۇشقا توغرا كېلىدۇ. بۇنداق قىلىشتىن مەقسەت مەركىزى ئىددىيەنىڭ ئەتراپىدا خىزمەت قىلىدىغان شەيئىلەرنى كۈلرەڭ ئاسماندىن زىمىنغا يۆتكەپ ئەكىلىشتىن ئىبارەت. قوشۇمچە شەيئىلەرنى تاللىغاندا ئەتراپتىكى يېشىل ئوت-چۆپلەر، ئورۇندۇق ياكى كىچىك چىغىر يول دېگەندەك نەرسىلەرنى تاللاش ئوبىكتى قىلىش لازىم. گەرچە قۇياش نۇرى كەمچىللىكتىن روشەن رەڭ پەرقى بولمىسىمۇ، ئاپاراتنىڭ ئىچىدىكى 阴天 ياكى 生动 ، ۋەياكى 风光 دېگەندەك ھالەتلەرنى تاللاپ كەملىگەن رەڭ ئېلىمىنتلىرىنى قوشىۋالساق بولىدۇ.

ئالدى مەنزىرە ئارقىلىق بوشلۇق تۇيغۇسى پەيدا قىلىڭ

تۇتۇق كۈندە نۇر كۈچلۈك بولمىغاچقا جىسىمدىن قايتقان نۇر مەلۇم ۋاقىت سەرپ قىلىپ ئاپاراتقا قايتقۇچە بولغان جەرياندا، نۇر مىقدارى كۆرۈنەرلىك تۆۋەنلەيدۇ. بۇ ئارقىلىق ئالدى ۋە كەينى مەنزىرىدە ئوچۇق ۋە خۇنۈك بولغان مەنزىرە يارقىن شەكىللىنىدۇ. شۇنىڭ بىلەن بوشلۇق ياكى ئارىلىق تۇيغۇسى كۈچىيىدۇ دېگەن گەپ. قىستۇرما رەسىمگە قارىساق بۇ گەپنىڭ مەنىسىنى چۈشىنەلەيمىز.بوشلۇق تۇيغۇسى مەنزىرە رەسىملىرىنى تارتقاندا ئەڭ تەلەپ قىلىنىدىغان مۇھىم ئامىل. بۇنى كۈچەيتىش ئۈچۈن چوڭ نۇر چەمبىرىكى ئىشلىتىش كېرەك (ئاپاراتتىكى A ياكى Av دېگەن جايغا ئەكىلىپ =f نى ئەڭ كىچىك سانلىق قىممەتكە توغرىلاپ تارتىڭ. مەسىلەن 4.0 ياكى 3.6 دېگەندەك). چوڭ نۇر چەمبىرىكى نۇر كىرىش مىقدارىنى كۈچەيتىپ يورۇقلۇق قوشۇش بىلەن بىرگە، قوشۇمچە ئېلىمىنتلارنى خۇنۇكلەشتۈرۈش ئارقىلىق سۈرەتكە ھەقىقىيلىق ۋە مەۋھۇملۇق تۇيغۇسىنى تەڭ بېرىش مەقسىتىگە يېتىشىمىزغا ياردەم قىلىدۇ.

ئادەم ئوبرازى يارىتىشتىكى ياخشى پەيت

ھاۋا تۇتۇق كۈندە يورۇقلۇق ئاز بولغاچقا، كۆرۈش ئارىلىقى بىز ئاز تۆۋەن بولىدۇ. شۇنىڭ ئۈچۈن يىراقتىكى جىسىملار ياكى ئاسمان زىمىن بىرلىشىپ كەتكەن سۈرەتلەرنى تارتىش تەۋسىيە قىلىنمايدۇ. گەرچە كۈچلۈك قۇياش نۇرى بولمىغىنى بىلەن بۇ خىل يورۇقلۇقنىڭمۇ ئۆزىگە يارىشا ئالاھىدىلىكى بار. مەسىلەن، ھاۋا تۇتۇق كۈنى يورۇقلۇق بىر قەدەر ئىللىق، يورۇق ۋە قاراڭغۇ جايلارنىڭ پەرقى چوڭ ئەمەس. ئېنىق سايە يوق. بىز بۇ ئالاھىدىلىكلەرنى چىڭ تۇتۇپ بىز بىر ئاز نازۇك نوقتىلارنى ئوچۇق يورىتىپ بېرىش لازىم بولغان، قەۋەت تۇيغۇسى كۈچلۈك بولىشى كېرەك بولغان تېمىلارنى تاللىساق مۇۋاپىق بولىدۇ. مەسىلەن، يېقىندىن ئادەم ئوبرازى يارىتىش ئۈچۈن بۇ ياخشى پەيت بولسا كېرەك. ئەگەر ئاپاراتىڭىزدا ئادەم تارتىش ھالىتى بولسا شۇنىڭغا توغرىلاپ، چوڭ نۇر چەمبىرىكى بىلەن سۈرەتكە تارتىڭ. چۈنكى نۇر بىر ئاز تۇتۇق بولغاچ تېرە رەڭگى بىر ئاز ئاجىز چىقىپ قېلىشى مۇمكىن.

بۇنىڭدىن باشقا يەنە ئۈستىدىكى رەسىمدىكىدەك تەشتەكتىكى ياكى گۈللۈكتىكى گۈللەرنى تارتىشقىمۇ بولىدۇ. لېكىن يوپۇرماقتىكى سۇ تامچىسىنى تارتقىنىمىزدا سۈرەت كۆڭۈلدىكىدەك چىقماسلىقى مۇمكىن. چۈنكى سۇ تامچىسىدا قۇياش نۇرى پارلاپ تۇرسا تېخىمۇ جانلىق، ئاشۇنىڭدىمۇ بىر دۇنيا باردىكىدەك كۆرىنىدۇ، شۇنداققۇ؟

شاقىراتمىنى تېما قىلىپ تاللىساقمۇ بولىدۇ. نۇر تولۇقلاش ئۈچۈن ئۇزاقراق زاتۋور ۋاقتىنى قوللىنىپ، ماي بوياق سىزمىدەك ئۇلىشىپ كەتكەن سۇ تامچىلىرىنى ھاسىل قىلساق ئۆزگىچە بىر تۇيغۇ بېرىشى مۇمكىن.

كۆڭلىڭىزدىكىنى تاپايمۇ؟

رەسىمنىڭ بىر پۈتۈن تەڭپۇڭلىقىنى قانداق تەڭشەيمىز؟

پاسىبان — Mon, 21 Feb 2011 06:38:09 +0000

بىر پارچە سۈرەتنىڭ ئىچىدىكى ھەر بىر ئېلىمېنتنىڭ پۈتۈن بىر مەزمۇننى ئىپادە قىلغاندىكى جەريانىدا، بىر پۈتۈن گەۋدىدىكى تەڭپۇڭلۇقىنىڭ قانداق بولغانلىقىغا ئېتىۋار بېرىشمۇ ناھايىتى مۇھىم بىر باسقۇچ. بۇ بىۋاستە رەسىمنىڭ قۇرۇلمىسىغا تەسىر كۆرسىتىپلا قالماستىن، سۈرەتنىڭ تىپىك زوق بېرىش دەرىجىسىگىمۇ بىۋاستە تەسىر كۆرسىتىدۇ. چۈنكى، ھەممىنىڭ تەڭپۇڭ بولىشى، تولۇق بولىشى كىشىلەرنىڭ ئۇزۇن تۇرمۇشتىن بۇيان تەبىئىي ھاسىل بولغان پىسخىك ئالاھېدىلىكى. شۇڭا كىشىلەر بىر پارچە سۈرەتتىن زوقلانغان ۋاقىتتا بۇ خىل پىسخىكا تەبىئىي ھالدا باھاغا كىرىشىپ كېتىدۇ.

تەڭپۇڭ بولمىغاندا ناھايىتى قولايسىز بولىدىغانلىقىغا مىساللار دېگەن كۈندىلىك تۇرمۇشىمىزدا ناھايىتىمۇ جىق. بىز مۇشۇنداق كۆپلىگەن تەڭپۇڭ شەيئىلەر ئارىسىدا ياشاۋاتقاچقا بۇ خىل تەبىئىي ھاسىل بولغان پىسخىك ھالىتى بىزنىڭ سۈرەتتىن ھوزۇرلىنىشىمىزدا مۇھىم ئورۇننى ئېگەللەيدۇ. بىر پارچە سۈرەت قانداق بولغاندا ئادەمگە مۇكەممەل، مۇقىم، تەڭپۇڭلىقى مۇۋاپىق ئورۇنلاشتۇرۇلغان ھېسياتنى بېرەلەيدۇ؟ بۇنىڭ ئۈچۈن بىز بايا ئېيتىپ ئۆتكەن «پىسخىك ھالەت» تىن ئوبدان پايدىلىنىش كېرەك.

ئۇنداق بولسا، ھەرقانداق تېمىدىكى سۈرەتتە پۈتۈن شەيئىلەرنى تەپمۇ-تەكشى ئورۇنلاشتۇرۇش ئەڭ ئاقىلانىلىك بولامدۇ؟ ئۇنداق ئەمەس.

ئەگەر سۈرەت سالماق، تەمكىن، ئېغىر بېسىق، جىمجىتلىق تېمىسىدىكى سۈرەت بولسا ئۇ چاغدا شەيئىلەر مۇۋاپىق تەڭپۇڭلۇقنى ئاساس قىلىش كېرەك. ھەتتا سىممېتىرىك ماس ئورۇنلاشتۇرۇلىشى، تەكشى مۇقىم تۈسىنى ئېلىشى كېرەك. بۇنىڭدا جىمجىتلىق، خىلۋەت ۋە ئېغىر بېسىقلىق، سالماقلىق ئىپادە قىلىدۇ.
ئەگەر سۈرەت نازۇك، ئىللىقلىق ۋە لىرىك تېمىدىكى مەنزىرە سۈرەتلىرى بولسا سىممېتىرىك بولمىسىمۇ، زىچلىق ۋە شالاڭلىق، ھەقىقىيلىق ۋە مەۋھۇملۇق ئارىلىشىپ كەلسە بولىدۇ. لېكىن ئومۇمى جەھەتتىن يەنە تەڭپۇڭ بولىشى كېرەك. خۇددى ئۈستىدىكى قىستۇرما رەسىمدىكىدەك.

بۇ خىل تەڭپۇڭلۇققا ۋاقتى كەلسە مەلۇم مۇددىئا بويىچە يەنە ئازراق خىلاپلىق قىلىشقىمۇ بولىدۇ. سۈرەتتە بىر خىل تەڭپۇڭسىز ھالەت ياساپ ئۇلار ئىچىدە بىر خىل ئەنسىزلىك تۇيغۇسى پەيدا قىلىش، خۇددى مەلۇم سىرتقى كۈچنىڭ تەسىرىگە ئۇچرىغاندەك ھالەتكە ئەكىلىش. بۇ ئارقىلىق ئاساسى تېمىنى يەنە يورۇتۇپ بېرىشكە بولىدۇ. بۇ خىلدىكىلىرى ئۈستىدىكى دېيىلگەن سۈرەتتىن نوقۇل پەرق قىلىدىغان باشقا تېمىدىكى سۈرەت. لېكىن بۇ تەڭپۇڭسىزلىق خالىغانچە قالايمىقان ئورۇنلاشتۇرۇش دېگەن گەپ ئەمەس.

سۈرەتنىڭ تەڭپۇڭلۇقىنى تەڭشەشتە مونو 5 نوقتا بىزنىڭ دىققەت قىلىشىمىزغا ئەرزىيدۇ.

ئاساسى تېمىنىڭ سۈرەتتىكى ئورنى
قوشۇمچە شەيئىلەرنىڭ سۈرەتتىكى ئورنى
مەنزىرىنىڭ ئاساسى تېمىنى يورۇتۇپ بېرىشتىكى رولى
سۈرەتكە يەنە ئازراق بىكار بوشلۇق قوشۇپ قويۇش
ئاخىرىدا ئومومى گەۋدىنىڭ تەڭپۇڭلىقىغا دىققەت قىلىش

بۇ 5 نوقتىغا ئۈستىگە قىستۇرۇلغان قىستۇرما رەسىم ناھايىتى ئوبدان مىسال بولالايدۇ. ھەۋەسكار دوسلارنىڭ كىيىنكى ئەسەرلىرىدە ئوبدان پايدىلىنىشىنى ئۈمىد قىلىمەن.

كۆڭلىڭىزدىكىنى تاپايمۇ؟

فوتوگرافتا بولۇشقا تېگىشلىك 5 خىل ئادەت

پاسىبان — Sat, 29 Jan 2011 17:35:51 +0000

سۈرەتكە تارتىش بىزنىڭ نەزىرىمىزدە ئۇنداق ئاددىي ئۇقۇم بولماسلىقى كېرەك. كەسپىي فوتوگرافنىڭ ئۆزىگە يارىشا يېتىلدۈرگەن ئوخشاش بولمىغان كەسپىي ئادەتلىرى بولىدۇ. ئۇلار مۇنتىزىم تەربىيىلەنگەن بولغانلىقتىن ياكى ئۇزۇن مەزگىللىك فوتو سۈرەتچىلىك كەسپى تارىخىغا ئېگە بولغانلىقتىن بۇ ئادەتلەرنى يېتىلدۈرگەن بولىدۇ. لېكىن بىزگە ئوخشاش بوۋاق دەۋرىدىكى ھەۋەسكارلار بۇ ئادەتلەرنى قانداق يېتىلدۈرىشىمىز كېرەك؟ تۆۋەندە بۇ توغرىسىدا توختىلىپ ئۆتىمىز.

1. كۆپ سۈرەتكە تارتىش

زادى قانچىلىك بولسا كۆپ بولغان بولىدۇ؟ بۇنىڭ چېكى يوق. كۆپ رەسىمگە تارتىش نېمە كۆرسە قالايمىقان تارتىۋېرىش ئەمەس. بۇ پەقەت مەشىق قىلىش بولۇپ، سىزنىڭ فوتو سۈرەتچىلىكتىكى ئىقتىدارىڭىزنى ساقلاپ قېلىشنى ئاساسى مەقسەت قىلىدۇ. بۇنىڭ سانىنى تەخمىنەن ھەر كۈنى ئوتتۇرا ھېساپ بىلەن 30 پارچە دەپ بېكىتىۋالساق بولىدۇ.

سىز پەقەت مۇشۇ مىقدارنى ئۆزىڭىزگە نىشان بېكىتىۋالسىڭىز، ھەر كۈنى مەقسەتلىك، بىرەر تېمىنى ئاساس قىلغان ھالدا تارتىش ئۈچۈن ئاپاراتنى قولىڭىزغا ئالىسىز. مۇشۇ ھېساپ بويىچە 1 يىلدا تەخمىنەن 10 مىڭ پارچە رەسىمگە تارتقان بولىسىز. سىز مۇشۇ ساننى ساقلاپ قالالىسىڭىز، قولىڭىزدىن فوتوگرافنىڭ پۇرىقى چىقىپ تۇرغان بولىدۇ.

يەنە بىر ئىشنى مىسالغا ئالساق، سىز بىر يىلدا ئاپاراتىڭىزنى تەخمىنەن 1000 يۈەن ئارقىغا دەسسىدى دەپ پەرەز قىلىڭ. دېمەك سىز 1000 يۈەنگە 10 مىڭ پارچە رەسىمنى سۈرەتكە ئالغان بولىسىز. ئۇنداقتا ھەر بىر پارچە رەسىمىڭىز 1 مودىن توغرا كەلگەن بولىدۇ. بۇ سان كۆپ قىسىم كىشىلىرىمىزگە ئانچە قىممەت ئەمەس. مۇشۇنداق ئويلىساق، يەككە رېفلېكىسمۇ قىممەت ئەمەس.

2. كۆپ كىتاب كۆرۈش

بىر دانە ئىسىل فوتو سۈرەت ئەسەرلىرى توپلىمى – بىر ھەۋەسكار ئۈچۈن ئىنتايىن قىممەتلىك بولغان ماتىرىيالدۇر. بۇ ماتىرىيالنىڭ كونكىرتنى نامى ۋە تۈرى پەقەت ئۆزىڭىزگە ھاۋالە. ئۆزىڭىز توردىن ياكى يەرلىك كىتابخانىلاردىن ئىزدىنىپ كۆرسىڭىز بولىدۇ.

سىز كىتاب كۆرگەندە داڭلىق فوتوگرافلارنىڭ ئەسەر تاللاشتىكى ماھارىتىنى تەپسىلىي كۈزىتىڭ. ئەسىرىڭىز تېمىسى ئۈستىدە چوڭقۇر ئويلىنىش ۋە ئۇنى بىر باشقا ئېلىپ چىقىش سىزنىڭ ئەسىرىڭىزنىڭ يېرىمىنى ھەل قىلغانلىقىڭىز. سىز ئۆز ئەسىرىڭىز ئۈچۈن ئويلىغان خىيالىڭىز ۋە مۇددىئايىڭىزنى باشقىلار رەسىمىڭىزنى بىر كۆرۈپلا بىلەلىسۇن. ئەگەر سىز مەلۇم بىر مۇددىئا بويىچە رەسىمگە تارتقان بولسىڭىز بۇنى شۇ رەسىمدىن بىلمەك قىيىن ئەمەس.

مىسالغا ئالساق، سىز ئايالىڭىز ۋە بالىڭىزنى سۈرەتكە تارتقاقچى بولسىڭىز سىز ئۇنىڭدىن قايسى نەرسىنى ئاساسى تېما قىلماقچى؟ ئايالىڭىزنىڭ نازاكىتىنىمۇ؟ بالىڭىزنىڭ تاتلىق قىلىقلىرىنىمۇ؟ سەبى – گۆدەكلىكىنىمۇ؟ بۇلارنى ئايدىڭلاشتۇرىۋالغاندىن كىيىن سىزنىڭ تارتقان رەسىمىڭىزدىن باشقىلار كۆرۈپلا سىز ئويلىغاندەك ئويغا كېلەلىشى كېرەك.

قاملاشقان بىر كىتابنى تولۇق كۆرۈپ چىقسىڭىز سىزدە مەلۇم يورۇقلۇقتا قايسى خىل يورۇقلۇق تەڭشىكىنى ئىشلىتىشكە بولغان دەسلەپكى تونۇش شەكىللىنىدۇ. بۇ خىل ھالەتتە سىز EV نى + ياكى – قىلىپ تەڭشەشنى، نوقتا بەلگىلەپ نۇر سېزىش ياكى پۈتۈن دائىرىلىك نۇر سېزىش قاتارلىقلارنىڭ قايسىسىنىڭ ماس كېلىدىغانلىقىنى تونۇپ يېتەلەيسىز.

3. ئۆزىڭىزگە بىرەر تېما تاللىۋېلىڭ

بىز مەقسەتلىك سۈرەتكە تارتىشىمىز كېرەك. خۇددى بايا دېگەندەك قولىمىزغا ئاپاراتنى ئېلىپلا نېمە كۆرسەك شۇنى رەسىمگە تارتساق، بىر قاتار مەنىسىنى چۈشۈنۈپ بولمايدىغان «ئەخلەت» ئەسەرلەر مەيدانغا كېلىدۇ. ئەگەر بىز بىرەر تېمىنى تاللىۋالساق سۈرەتكە تارتىش جەريانىدا ئىلاجىنى قىلىپ ئاشۇ تېمىنى يورۇتۇش ئۈچۈن خىزمەت قىلىمىز. شۇنىڭ بىلەن «گەپ قىلىدىغان تىلى بار» رەسىم دۇنياغا كېلىدۇ.

بىر تېمىنى يورۇتۇپ بېرىش ئۈچۈن سىز بەلكى 40 پارچە رەسىمگە تارتىشىڭىز مۇمكىن. شۇنداقمۇ؟ ئەمدى سىز ئاشۇ 40 پارچە رەسىمىڭىزنى قولىڭىزغا ئېلىپ كۆرۈپ بېقىڭ. ئاساسى تېمىڭىز يورۇتۇپ بېرىلگەنمۇ يوق؟ بەلكى بىر يەرلىرى كەمدەك قىلىدۇ، شۇنداقمۇ؟ سىز يەنە بىر مەزگىلدىن كىيىن بۇ تېما ئۈچۈن 20 پارچە رەسىمنىڭ كۇپايە قىلىدىغانلىقىڭىزنى بايقايسىز. شۇنداق 20 پارچە رەسىم تامامەن يېتىدۇ. يەنە بىر مەزگىللەر ئۆتكەندە بولسا 10 پارچىلا يىتىدىغانلىقىنى بايقايسىز. سىز ھەقىقىي پىشىپ يېتىلگەندە بولسا پەقەت 1 پارچە رەسىمدىلا نەچچە ئون بەتلىك ماقالىلاردا نامايان قىلىنىدىغان مەزمۇنلانى مۇجەسسەملىگىلى بولىدىغانلىقىنى ۋە سىزنىڭ ئاشۇ تېمىڭىز ئۈچۈنمۇ پەقەت 1 پارچىلا رەسىم كۇپايە قىلىدىغانلىقىڭىزنى بايقايسىز. سىز مۇشۇ 1 پارچە رەسىمنى تارتىپ چىقالىغىنىڭىزدا، مۇبارەك بولسۇن! سىز پىشىپ يېتىلگەن بولىسىز. ئەلۋەتتە بۇنىڭ ئۈچۈن ئۇزۇن بىر جەريان كېتىدۇ. بۇ جەريان ھېلىھەم بىزنىڭ ئورتاق بېسىپ ئۆتىشىمىزنى كۈتمەكتە!

4. كۆپ رەسىم كۆرۈش

دۇنيادىكى داڭلىق فوتوگرافلارنىڭ تارتقان رەسىملىرىنى كۆپ كۆرۈش، ئۇلارنىڭ شۇ رەسىمنى تارتقاندىكى ھېسياتىنى ئۆزىمىزگە تەدبىقلاش، باشقىلارنىڭ تېما تاللاشتىكى ماھارىتىدىن پايدىلىنىش، نۇر بېرىش ۋە پەيت تاللاش … بۇلارنى بىز پەقەت كۆپلەپ ياخشى ئەسەرلەرنى كۆرۈش ئارقىلىق ھېس قىلالايمىز. نادىر فوتو سۈرەت ئەسەرلىرىنىڭ نادىرلىقى زادى قەيەردە؟ ئاپتورنىڭ مۇشۇ رەسىمنى تارتقىچە كىشىنى ئەڭ قايىل قىلىدىغىنى زادى قايسى ئورۇن؟ بۇنى كۆپ تەپەككۇر قىلىش لازىم. رەسىمنىڭ ئورۇنلاشتۇرۇلىشى لاياقەتلىك چىقىش چىقماسلىقىدىكى چوڭ ئامىل. نادىر ئەسەرلەرنىڭ بۇ جەھەتتە تەلىپى خېلى يۇقىرى.

بېسىپ 2~3 كۈندە 1 توم كىتابنى تۈگىتىش شەرت ئەمەس. بوش ۋاقىت چىققاندا سەنئەتتىن ھوزۇرلانغاندەك ھوزۇرلىنىپ، ھەر بىر پارچە رەسىم ئۈستىدە ئازراقتىن مۇلاھىزە يۈرگۈزگىنىمىزدە بۇ ئادەتنىڭ پايدىسىنى ئەلۋەتتە كۆرىمىز.

5. رەسىملىرىمىز ئۈستىدە پات-پات يەكۈن چىقىرىپ تۇرۇش

مىسالغا ئالساق، سىز بىر يىل ئىچىدە تارتقان ئاشۇ 10 مىڭ پارچە رەسىمىڭىز ئىچىدە ئۆچۈرىۋېتىش توغرا كەلسە زادى قايسىلىرىغا ئەڭ قىيمايسىز؟ شۇ رەسىمگە نېمە ئۈچۈن قىيمايسىز؟ سىز شۇ رەسىمنى تارتقۇچە قايسى تېمىنى ئويلاپ تارتقان ئېدىڭىز؟ شۇ تېمىڭىز رەسىمدە زادى ئېنىق نامايەن بولدىمۇ يوق؟ بۇلارنى ئويلاپ پىكىر يۈرگۈزىشىڭىز كېرەك. بۇ ئادەت بۇ كەسىپتە ئىلگىرىلەشنىڭ ئەڭ ياخشى شوتىسى.

ئەگەر سىز تەپسىلىي كۈزەتسىڭىز سىز بىرەر تېما ئۈستىدە تەپەككۇر قىلىپ تارتقان سۈرەتلىرىڭىز ئىچىدە ناھايىتى كۆپ قىسىم رەسىملەرنىڭ ئۆچىرىۋەتسىمۇ بولىدىغانلىقىنى بايقايسىز. بەلكى سىز شۇ تېمىدىكى رەسىملىرىڭىزنى كىيىنچە ياراتماي قايتا رەسىمگە تارتىشىڭىزمۇ مۇمكىن. بۇ خىل ھالەت ۋاقىتنىڭ ئۆتىشىگە ئەگىشىپ قايتا-قايتا تەكرارلىنىۋېرىپ، ھەتتا ئاخىرىغا كەلگەندە ئەڭ دەسلەپتىكى رەسىملىرىڭىزنىڭ ھەممىسىنى ئۆچۈرىۋەتسىمۇ بولىدىغان نەرسە ئىكەنلىكىنى بايقىشىڭىز مۇمكىن. بۇ چاغدا سىز چوڭ بولغان ھالىتىڭىزدە بالىلىق دەۋرىڭىزدىكى بەزى قىلىقلىرىڭىزدىن كۈلگىڭىز كەلگەندەك ھېسياتقا كەپقالىسىز.

سىز ئىلگىرى تارتقان سۈرەتلىرىڭىزگە سەپ سېلىپ قاراپ بېقىڭ. سىز كۆپ قىسىم ئەھۋاللاردا قايسى دائىرىدىكى فوكۇس ئارىلىقىنى كۆپ قوللىنىدىكەنسىز؟ قايسى نۇر چەمبىرىكىنىچۇ؟ ئادەمنى كۆپ تارتامدىكەنسىز ياكى مەنزىرىنىمۇ؟ ھەرىكەتلىك شەيئىلەرنمۇ ياكى تىنچ شەيئىلەرنىمۇ؟ بۇلارنى تەپسىلىي كۆزىتىپ چىققىنىڭىزدا سىز تەبىئىي ھالدا ئۆزىڭىزگە ماس كېلىدىغان ئاپارات ياكى لېنزىنى تېپىپ چىقالايسىز. مۇشۇ ئارقىلىق سىز مۇناسىۋەتلىك بىلىملەرنى چوڭقۇرلاپ ئىزدەيسىز. شۇنىڭ بىلەن تەبىئىي ھالدا سىزدە بۇ جەھەتتە ئىلگىرىلەش بولىدۇ.

خوش، سىز فوتوگراف ئۈچۈن يەنە قانداق ئادەتلەرنى مۇھىم دەپ قارايسىز؟ بىز بىلەن ئورتاقلىشىشىڭىز ئۈچۈن ئىنكاسىڭىزغا قاراپ قالدۇق.

كۆڭلىڭىزدىكىنى تاپايمۇ؟

ئادىل ئىسمائىل فوتو سۈرەت ئەسەرلىرى

پاسىبان — Sat, 22 Jan 2011 09:30:45 +0000

تالانتلىق فوتوگراف ئادىل ئىسمائىل سانسىزلىغان ئۇيغۇر ياشلىرىغا ئوخشاش تىرىشچانلىقنى ئۆزىنىڭ ھايات مۇساپىسىدىكى ئەڭ ياخشى نەتىجىلەرنىڭ ئاساسى دەپ بىلگەن. تەلەپچان تالانتلىق فوتوگراف ئادىل ئىسمائىل گۆھەر زىمىن شىنجاڭ ئۇيغۇر ئاپتونوم رايونىنىڭ چىگرا شەھىرى – گۈزەل غۇلجا شەھىرىدىن بولۇپ، ئۇ 1963- يىلى 2- ئاينىڭ 11- كۈنى شۇ شەھەردە ئوقۇمۇشلۇق زىيالىي ئائىلىسىدە دۇنياغا كەلگەن.
فوتو سۈرەت كەسپىگە ئوتتەك ئىشتىياق باغلىغان ئادىل ئىسمائىلنىڭ فوتو-سۈرەت ئەسەرلىرى 1986-يىلىدىن باشلاپ رەسمىي ئېلان قىلىنىشقا باشلىغان. ئۇ بۇ يىگىرمە نەچچە يىل مابەينىدە جەمئىيەت ۋە كىشىلىك تۇرمۇشنىڭ ھەر قايسى قاتلاملىرىغا چوڭقۇر چۆكۈپ، ئۈزلۈكسىز ئىزدىنىش، ئۈزلۈكسىز تىرىشىش نەتىجىسىدە كۆپ تەرەپلىمە ئىقتىدارنى يېتىلدۈرگەن.

ئىجتىھاتلىق، تىرىشچان ، يول ئىچىپ ئالغا ئىنتىلىدىغان ئىشتىن سىرتقى فوتوگراف بولۇپ، ئۇ فوتو سۈرەتچىلىك سەنئىتىگە كىچىكىدىن باشلاپلا چوڭقۇر ئىشتىياق باغلىغان. ئۇ ئۆزىنىڭ ئۆسۈپ يېتىلگەن يۇرتىنىڭ گۈزەل تاغ – دەريالىرى ، رەڭگارەڭ تۇرمۇشى ، قويۇق ئۆرۈپ- ئادەتلىرى ھەم يۇرتىدىكى خەلقىنىڭ مەردانە خارەكتىرى، گۈزەل تۇرمۇشقا بولغان ئىنتىلىشى، تىرىشچانلىق ۋە باتۇرلۇق روھى بەئەينى ئانا سۈتىدەك ئۇنىڭ ئىجادىيىتىنىڭ تۈگىمەس بۇلىقى بولۇپ قالغان. فوتو – سۈرەتچىلىك سەنئىتى ھازىرقى زاماندىكى ئەڭ تەرەققىي قىلغان سەنئەت كەسىپلىرىنىڭ بىرى. بۇ سەنئەت يۇقىرى ماھارەت ، چوڭقۇر تۇرمۇش بىلىمى، يېتەرلىك دۇنيا قارىشى ، قايىل قىلارلىق بەدىئىي دىت، يۈكسەك مەسئۇلىيەتچانلىقنى تەلەپ قىلىدىغان جاپالىق كەسىپ.ئۇ مۇشۇ جاپا- مۇشەققەتلىك يولدا باسقان ھەر بىر قەدىمىدە بىر ئىز قالدۇرۇپ، يىگىرمە نەچچە يىلنى تىرىشىپ ئۆگىنىش ، ئىزدىنىش، سۈرەت تارتىش بىلەن ئۆتكۈزگەن، ئادىل ئىسمائىل يۇرتىدىكى خەلقىنىڭ رەڭگارەڭ تۇرمۇشىنى ئەكس ئەتتۈرگەن سان – ساناقسىز سۈرەتلىرىدە ئەينەن ئەكس ئەتتۈرۈلگەن ئەسەرلىرىدىن قويۇق تۇرمۇش ھىدى، كۈچلۈك يەرلىك ئالاھىدىلىك ، قويۇق مىللىي ئۆرۈپ ئادەتلەر بىلەن كۈچلۈك رەڭنىڭ سېلىشتۇرمىسى ھەر نۇردىن ئەپچىللىك بىلەن پايدىلىنىشى روشەن ئىپادىلىنىپ تۇرىدۇ.ئۇنىڭ ھەر بىر ئەسىرى ئۇنىڭ تۇرمۇش ھەققىدىكى تەسۋىرى ، قەلب ھەققىدىكى تەسۋىرى ، چىنلىق ھەققىدىكى تەسۋىرى ھېسابلىنىدۇ.
ئۇ 2001- يىلى تۇنجى بولۇپ ئۇيغۇرلاردىن بېيجىڭدىكى ئەڭ مەشھۇر گۈزەل سەنئەت سارىيى بولغان جۇڭگو گۈزەل سەنئەت سارىيىدا كۆرگەزمە ئۆتكۈزگەن. ئۇ بۇ قېتىمقى كۆرگەزمىنى ئىچىشتىن ئىلگىرى تۆت يىلدىن كۆپرەك ۋاقىت سەرپ قىلىپ، شىمالى ۋە جەنۇبى شىنجاڭنىڭ چەت يېزا – قىشلاقلىرى، يىراق تەكلىماكان بويلىرىنى ئارىلاپ، تۇرمۇش ئۆگىنىپ، مەزمۇنى ساغلام ، شەكلى خىلمۇ – خىل ، تۇرمۇش پۇرىقى كۈچلۈك، بەدىئىيلىكى يۇقىرى بولغان 1500 پارچىدىن ئارتۇق سۈرەت تارتىپ، بۇنىڭ ئىچىدىن مۇئەييەن بەدىئىيلىككە ئىگە 146 پارچە سۈرەتنى تاللاپ ، تۇنجى ئۇيغۇر فوتوگرافنىڭ جۇڭگو سەنئىتىنىڭ ئەڭ ئالىي قەسىرى بولغان جۇڭگو گۈزەل سەنئەت سارىيىدا كۆرگەزمە ئۆتكۈزىدۇ.
ئۇ بېيجىڭدىن قايتىپ كەلگەندىن كىيىن 2001-يىلى 10- ئايدا ئۆز يۇرتى غۇلجا شەھىرىدە يەنە بىر قېتىم كۆرگەزمە ئاچتى. 2005-يىلى جۇڭگونىڭ ئەڭ چوڭ شەھەرلىرىدىن بىرى بولغان گۇاڭجۇ شەھىرىدە 3- قېتىملىق كۆرگەزمىسىنى ئىچىپ، گۇاڭجۇدىكى ھەرمىللەت خەلقىنىڭ ياخشى باھاسىغا ئېرىشتى.
تۆۋەندە كۆرگەزمىگە قويۇلغان سۈرەتلەردىن بىر قانچە پارچىنى كەڭ تورداش دوستلارنىڭ ھۇزۇرىغا سۇندۇق.

جۇدۇندىكى ھايات

غۇنچىلار ئارىسىدا

رەئىسمۇ كۈلەلەيدۇ

تۈگىمەس يوللار

ئۇيغۇر ھويلىلىرى

يېڭى بىر كۈن

ساڭا مەن ھەمرا بولاي

تۇرمۇش ھەلەكچىلىكىدە

ئەسىر ھالقىغان بوۋاي

تۇغۇلسىلا ھېساپما؟

ئۇيغۇر ئاسمىنىدىكى يۇلتۇز

ئۇيغۇر مىئمارچىلىقى

خېرىدار كۈتۈپ

ئۆزىمىز يول تاپايلى

ئېلى بەيتۇللاھ مەسچىتى

تەڭرىتاغ ئوغلى

بىزنىڭمۇ كۈلىدىغان ۋاقتىمىز كەلدى (جالالىدىن بەھرام بىلەن ئەخەت تۇردى)

سەرەڭگە ساتقۇچى بالا

قەدىمي شەھەر

بىر تىلىم قوغۇن

قاچانمۇ پۇل تاپارمەن

بىز تېخى ياشاۋاتىمىز…

قۇلىقىڭغا بىر گېپىم بار

بازارنىڭ بىر چېتىدە

مايلامچى بالا

ئوتۇنچىنىڭ ئوغلى

بىزمۇ ئوقۇغان بولساق ھە؟

ئاتا-بالا قىززىقچىلار

تەكلىماكاننىڭ چۈشى

ھالاكەت

بوۋا، نېمىشقا يىغلايسىز؟

بۈگۈن پۇل تاپالمىدىم

ئېتىز بېشىدا

يۈك

ھېيتگاھ مەيدانى

ئاخىرقى بېسات

* ئەسلى مەنبەنىڭ قەيەردىن كەلگەنلىكى ئېنىق ئېسىمدە قالماپتۇ. شۇڭا مەنبەسى – ئۇيغۇر تور دۇنياسى. ئاخىرىدا ئادىل ئاكىمىزنىڭ كەسپىگە ئۇتۇق، ئىشلىرىغا ئوڭۇشلۇق ۋە بەرىكەت تىلەيمىز!

كۆڭلىڭىزدىكىنى تاپايمۇ؟

فوتوگرافىيە كەسپىي ئاتالغۇلىرىغا ئىزاھات

پاسىبان — Thu, 06 Jan 2011 14:58:42 +0000

فوتو سۈرەتچىلىك كەسپىگە بىز ناھايىتى كىيىن كىرگەن كەسىپ بولغاچقا ئاساسەن ھەممە ئاتالغۇلار بىزگە ناتونۇش، ياكى بىر ئاڭلاپلا چۈشۈنەلىگۈدەك ئەمەس. شۇڭا بۇنىڭغا دائىر كۆپ ئۇچرايدىغان ئاتالغۇلارغا ئۆزۈمنىڭ چۈشەنچەم بويىچە ئىزاھ بېرىپ ئۆتۈشنى لايىق تاپتىم.

1. زاتۋور

ئاپاراتنى قولىمىزغا ئېلىپ سۈرەت ئوبىكتىنى مۇقۇملاشتۇرۇپ بولغاندىن كىيىن باسىدىغان ئاشۇ كونۇپكا دەل زاتۋور شۇ. بۇنى خەنچە 快门 دەيدۇ. خەتچە تەرجىمە قىلساق «تىز ئىشىك» دېگەن مەنا چىقىدۇ. نېمە ئۈچۈن بۇنداق ئاتايمىز؟ چۈنكى زاتۋورنى بىر قېتىم باسقىنىمىزدا سۈرئەت سەزگۈچنىڭ ئالدىدىكى «ئىشىك» ناھايىتى تىز سۈرئەتتە بىر قېتىم ئېچىلىپ-يېپىلىدۇ. ئېچىلىپ يېپىلىش ئۈچۈن كەتكەن ۋاقىتنى زاتۋور ۋاقتى، ياكى نۇر بېرىش ۋاقتى دەپ ئاتايمىز. بۇنىڭ ۋاقىت ئۇزۇنلىقى ئاپاراتنىڭ ئىقتىدارىغا قاراپ ئۇزۇنى بىرقانچە سېكونتتىن قىسقىسى 1/4000 ياكى ئۇنىڭدىنمۇ قىسقا بولىدۇ.

بۇنىڭ مەنىسى، زاتۋور كونۇپكىسىنى باسقاندىكى شۇ پەيتتە سەزگۈچنىڭ ئىشىكى ئېچىلىپ 4000 دەن 1 سېكونت ئىچىدە يېپىلىپ بولىدۇ. بۇنى تەسەۋۋۇر قىلساق بۇنىڭ نەقەدەر تىز ئىكەنلىكىنى ھېس قىلالايمىز. شۇڭا تىز سۈرئەتلىك زاتۋور تىز سۈرئەتتىكى شەيئىنىڭ ھەرىكىتىنى ئېنىق تۇتىۋالالايدۇ.

كېىتىۋاتقان ماشىنىنىڭ چاقى، ئۇچىۋاتقان تىك ئۇچار ئايرۇپىلاننىڭ پالىقى، شامالدۇرغۇچنىڭ پالىقى قاتارلىقلارنىڭ تىز زاتۋور ئارقىلىق تارتقان چاغدىكى رەسىمىگە قارىساق جىم تۇرىۋاتقاندەك تۇيغۇغا كەپ قالىمىز.

ئوخشىمىغان تەلەپكە ئاساسەن ئوخشىمىغان زاتۋور تىزلىكىنى تەڭشەپ تارتىش ئۈچۈن ئاپاراتنىڭ T ياكى Tv دېگەن جايىغا ئەكىلىپ سۈرەتكە تارتىمىز.

رەسىم ئۇچۇرلىرى ئارىسىدا سېكونت بىرلىكى بىلەن بېرىلگەن قىممەت دەل زاتۋور ۋاقتى ياكى نۇر بېرىلىش ۋاقتى بولۇپ، 1/200 سېكونت، ياكى 1 سېكونت دېگەندەك ھالەتتە ئۇچرايدۇ.

2. نۇر چەمبىرىكى

نۇر چەمبىرىكى بولسا زاتۋور ئېچىلغاندا قانچىلىك نۇرنىڭ سەزگۈچكە چۈشۈدىغانلىقىنى بەلگىلەيدىغان قىممەت بولۇپ، زاتۋور ئىشىكىنىڭ ئېچىلىش چوڭ-كىچىكلىكىگە قارىتىلغان. ئۇنىڭ سانلىق قىممىتى چوڭ بولغانسىرى ئېچىلىش مەيدانى شۇنچە كىچىك بولىدۇ. 1 گە يېقىنلاشقانسىرى تولۇق ئېىچىلىدۇ. شۇنىڭ بىلەن سەزگۈچكە كىرىدىغان نۇر كۆپىيىدۇ، رەسىم يورۇق تارتىلىدۇ.

رەسىمدىكىدىكى ئوڭ ئۈستى تەرەپتىكىسى چوڭ نۇر چەمبىرىكى، ئاستىدىكىسى كىچىك نۇر چەمبىرىكى. كۆزنىڭ يوغان ياكى كىچىك ئېچىلىشى بىلەن رەسىم سەزگۈچكە كىرىدىغان نۇرنىڭ ئاز-كۆپلىكىنى كونترول قىلىمىز.

رەسىملەرنىڭ ئاستىغا رەسىم ئۇچۇرلىرى يېزىلغان بولسا ئۇنىڭ ئارىسدىكى ??F دېگىنى دەل نۇر چەمبىرىكىنىڭ قىممىتى بولىدۇ. مەسىلەن، F22 , F10, F5.6 دېگەندەك.

3. فوكۇس نوقتىسى

فوكۇس نوقتىسى - ئاپاراتنىڭ سۈرەتكە تارتىشىدىكى مەركىزى نوقتا. فوكۇس نوقتىسى سۈرەتكە تارتماقچى بولغان جىسىمنىڭ دەل ئۆزىگە توغرىلانمىسا تېما ئوچۇق يورىتىلماي مەركىزىي ئىددىيە باشقا نەرسىگە يۆتكىلىپ كېتىدۇ.

ئائىلىدىكى ئاپاراتلاردا فوكۇس نوقتىسىدىكى يورۇقلۇققا ئاساسەن ئاق بالانىس تەڭشىلىدۇ. بۇنداق ئاپاراتلارنىڭ كۆپىنچىسىدە فوكۇس نوقتىسى ئاپاراتنىڭ ئاپتۇماتىك ئىقتىدارى ئارقىلىق توغرىلىنىدىغان بولۇپ، قول ئارقىلىق توغرىلىغىلى بولمايدۇ. كەسپىي يەككە رېفلېكىسنىڭ ئاپتۇماتىك فوكۇس توغرىلاش جەھەتتىكى ئىقتىدارى ئىنتايىن كۈچلۈك بولۇپ، تەلەپنىڭ ئوخشىماسلىقىغا ئاساسەن بەزىدە قول بىلەن توغرىلاشقىمۇ توغرا كېلىدۇ.

ماۋۇ رەسىمدىكى ئاساسى تېما ۋە فوكۇس نوقتىسى ئوخشاشلا ماشىنا، شۇنىڭ ئۈچۈن بۇ ئايال كىشى خۇنۈك كۆرۈنگەن. ئەمەلىيەتتە بۇ ناھايىتى ئەقىلگە ئۇيغۇن. خۇددى بىز قولىمىزغا بىر كۆزىمىزنى يۇمىۋېلىپ قارىغىنىمىزدا قولىمىزنىڭ ئارقا تەرىپىدىكى مەنزىرە خۇنۈك كۆرۈنگەندەك. كەسپىي ئاپاراتلارنىڭ بۇ جەھەتتىكى ئىقتىدارى ناھايىتى كۆرۈنەرلىك. ئەگەر ئائىلىۋى ئاپارات بىلەن بۇ مەنزىرىنى تارتقان بولساق ئايال كىشى بۇنچىۋالا خۇنۈكلىشىپ كەتمەيتىدە، تېمىنىڭ ئوبرازلىقىغا دەخلە يېتەتتى.

4. فوكۇس ئارىلىقى

فوكۇس ئارىلىقى بولسا لېنزىنىڭ ئىقتىدارى ئارقىلىق يىراق-يېقىننى تەڭشەش ئېلىپ بارغاندىكى ئىككى لېنزا ئوتتۇرىسىدىكى ئارىلىقنى كۆرسىتىدۇ. فوكۇس ئارىلىقى قانچە ئۇزۇن بولسا، يىراقتىكى جىسىم شۇنچە يېقىن كۆرىنىدۇ. يەككە رىفلېكىسنىڭ لېنزىلىرى ئۈستىگە يېزىلغان 18-135 مىللىمېتىر، 24-105 مىللىمېتىر، 70-300 مىللىمېتىر دېگەنلەر ئاشۇ لېنزىنىڭ ئۆزگەرتەلەيدىغان فوكۇس ئارىلىقى ھېساپلىنىدۇ. بىرلىكى مىللىمېتىر. رەسىم ئۇچۇرلىرى ئارىسىدا مۇشۇ بىرلىك بويىچە قەيت قىلىنىدۇ.

5. ئاق بالانىس

ئاق بالانىس دېگىنىمىز – ئاپاراتنىڭ ئەمەلىي شارائىتقا قاراپ ھەرخىل رەڭلەرنى ئاجىزلىتىش ياكى كۈچەيتىش ئارقىلىق تەڭشەپ بالانىسلاشتۇرىدىغان ئىقتىدار. ئاق بالانىسنىڭ ئاپاراتتا ئالدىن بەلگىلەپ قويغان بىرقانچە خىل تاللاش تۈرى بولىدۇ. مەسىلەن، قۇياش نۇرى، تۇتۇق ھاۋا، قۇياش نۇرىلىق لامپا، ئۆي ئىچى … دېگەندەك. بىز ئۆزىمىزنىڭ تەلىپىمىز بويىچە بۇنى خالىغانچە تەڭشىۋالساق، ياكى قولىمىز ئارقىلىق ھەر قايسى قىممەتلەرنى ئۆزگەرتسەك بولىدۇ. بۇ ئەلۋەتتە يۇقىرى سەۋىيەلىك فوتوگرافلارنىڭ قىلىدىغان ئىشى.

رەسىمدىكىسى ھەرخىل ئاق بالانىس تەڭشىكى ئاستىدىكى ئوخشاش رەسىمنىڭ رەڭ ئۈنۈملىرى.

6. نۇر بېرىش

نۇر بېرىش (曝光) ئاپاراتنىڭ ئىقتىدارى بولۇپ ئېكسپوزىتسىيە دەپمۇ ئاتىلىدۇ. بۇنى يورۇقلۇق يېتىشمىگەندە ئاپاراتنىڭ ئۆزىدىكى بۇ ئىقتىداردىن پايدىلىنىپ قوشۇمچە يورۇقلۇق قوشۇش ياكى زىيادە يورۇق مەنزىرىدە نۇر بېرىلىشنى تۆۋەنلىتىش قاتارلىق يوللار بويىچە ئەمەلگە ئاشۇرىمىز.بۇنىڭ قىممىتى 2- دىن 2+ ئارىسىدا بولىدۇ. بىرلىكىنى EV دەپ ئاتايمىز.

مەسىلەن، سىز ئاپئاق قارنى رەسىمگە تارتىپ باققان بولىسڭىز بىلىسىز. قارنىڭ ئاقلىقىغا ئاساسەن ئاپارات ئاپتۇماتىك ھالدا ئاق بالانىسنى يورۇق ئاق جىسىمغا ئاساسەن قاراڭغۇراق تەڭشەيدۇ. شۇنىڭ بىلەن قارنىڭ رەڭگى سېرىق ياكى سۈترەڭ، ئىشقىلىپ ئاق كۆرۈنمەيدۇ. سىز بۇ چاغدا مۇۋاپىق ھالدا نۇر بېرىش ئارقىلىق ئاقايتىپ ھەقىقى ئاپئاق قار ئۈنىمىگە يېتەلەيسىز.

7. ISO نۇر سېزىش دەرىجىسى

ISO نىڭ قىممىتى 100, 200, 400, 800, 1600, 3200, 6400 شەكلىدە بولۇپ، بۇمۇ ئاپاراتنىڭ ئۆزىدىكى ئىقتىدار. نورمالدا ئىلاج بولمىغاندا يۇقىرى نۇر سېزىمچانلىقنى تاللاپ رەسىمگە تارتىمىز. چۈنكى بۇنىڭ قىممىتى يۇقىرىلىغانسىرى پىكسېل چىكىت سانى ئازلاپ كېتىدۇدە، رەسىمنىڭ سۈزۈكلىكىگە بەلگىلىك تەسىر يېتىدۇ. يورۇقلۇق يېتىشمىگەندە چاقماق بېرىش، ياكى ئاپاراتنى مۇقۇملاشتۇرۇپ قويۇپ ئۇزۇن زاتۋور ۋاقتى بېرىش ئارقىلىق يورۇقلۇق كۆپەيتسەك بولىدۇ. ISO نىڭ 800 دىن ئاشمىغىنى ئەۋزەل.

رەسىمدىكىسى ھەر قايسى قىممەتتىكى ئۈنۈمنىڭ سېلىشتۇرمىلىرى. رەسىمدىكى ماۋۇ كىچىككىنە ئورۇن چوڭ رەسىمنىڭ سول تەرەپ بۇرجىكىدىكى كىچىك جاي، تولۇق رەسىم ئەمەس. ئۈنۈمنى تېخى ئوچۇق كۆرۈپ يېتىش ئۈچۈن كىچىك جاينى چوڭايتىپ سېلىشتۇرۇشقا توغرا كەلدى.

ئەسلى رەسىم

ISO 100

ISO 200

ISO 800

ISO1600

رەسىمگە قارايدىغان بولساق بۇنىڭ نېمە مەنا بىلدۈرىدىغانلىقىنى ئېنىق چۈشىنەلەيمىز.

8. نۇر ئۆلچەش نوقتىسى

نۇر ئۆلچەش نوقتىسى دېگىنىمىز ئاپاراتنىڭ ئىكرانىنىڭ ئوتتۇرىسىدا كۆرىنىدىغان، بەزىسى غىچ شەكلىدە، بەزىسى چاسا كەلگەن دائىرىگە ئېلىنغان رايوندىكى مەلۇم بىر نوقتىنى كۆرىسىتىدىغان بولۇپ، ئاپارات مۇشۇ نوقتىنىڭ ئەمەلى يورۇقلۇقىغا ئاساسەن يورۇقلق تەڭشەيدۇ. بۇ نوقتىنى ئۆزى بەلگىلەشكىمۇ، ۋە ئاپاراتقا ھاۋالە قىلىشقىمۇ بولىدۇ.

بۇ نۇقتىغا ئاساسەن ئاپارات پۈتكۈل سانلىق مەلۇماتلارنى ھېساپلاپ چىقىدۇ. ئۇنىڭ ئىچىدە، ISO، تىزلىك، نۇر چەمبىرىكى، ئاق بالانىس ھەممىسى بار. شۇنىڭ ئۈچۈن مۇشۇلارنىڭ قانداق بولىشى، نۇر ئۆلچەش نوقتىسىنىڭ قەيەرگە مەركەزلەشكەنلىكىگە بىۋاستە مۇناسىۋەتلىك.

مەسىلەن سىز كەينى يورۇقلۇقى كۈچلۈك بولغان جايدا بىر ئادەمنى رەسىمگە تارتسىڭىز، ئادەتتە ئاپارات كەينىدىكى يورۇقلۇقنى ئاساس قىلىپ تۇرۇپ يورۇقلۇق تەڭشەيدۇ. شۇنىڭ بىلەن ئادەمنىڭ يۈزى قاراڭغۇ چىقىپ قالىدۇ. سىز بۇ چاغدا نوقتىنى ئادەمنىڭ يۈزىگە تەڭشەپ زاتۋورنى يېرىم باسسىڭىز، باشقا تەڭشەكلەرنىڭمۇ شۇنىڭغا ماس ئۆزگەرگەنلىكىنى بايقىايسىز. چۈنكى ئادەمنىڭ يۈزى ئارقا مەنزىرىگە نىسبەتەن قاراڭغۇ بولغاچقا ئاپارات شۇنىڭغا ئاساسەن يورۇقلۇق بېرىدۇ. بۇ چاغدا ئۇ ئادەمنىڭ يۈزى ئوچۇق كۆرىنىدۇ.

فوتوگرافىيەگە دائىر تېمىلار بەكلا قول تۇتقاچقا شۇنچە سائەت ئولتۇرۇپ بۈگۈن بىرلا تېما يوللاپتىمەن. بۈگۈن مۇشۇ يەرگىچە يازاي. ئەگەر بۇلارنىڭ ئىچىدە يوق بولغان يېڭى ئاتالغۇلار بولسا ۋاقتىدا ئىزاھلاپ ماڭىمەن، ئىنشا ئاللاھ.

ئاپتورنىڭ ئەمگىكىگە ھۆرمەت قىلىپ، باشقا جايدا ئېلان قىلمىغايسىز. بۇ تېمىنى مەنبەنى ئەسكەرتىپ ئېلان قىلىشىڭىزنىمۇ خالىمايمەن.

كۆڭلىڭىزدىكىنى تاپايمۇ؟

بۇ يازمىلارغىمۇ ئىشتاھايىڭىز بولىشى مۇمكىن
مىنىمالىستچىلار سۈرەتلىرىدىن تاللانما	App Store دىكى ئۇيغۇرچە ئەپلەر توپلىمى	پورترېت سۈرەتكە ئېلىشتىكى 10 تېخنىكا	تەۋسىيە : ئاجايىپ – غارايىپ ئەپ (5) Remix your life	فوتوگرافتا بولۇشقا تېگىشلىك 5 خىل ئادەت
无觅

بۇ يازمىلارغىمۇ ئىشتاھايىڭىز بولىشى مۇمكىن
ھايۋانات فوتوگرافچىلىقى نادىر ئەسەرلىرىدىن تاللانما	App Store دىكى ئۇيغۇرچە ئەپلەر توپلىمى	تەۋسىيە: مىكروسوفتتىن پەچەت بىر ئەپ – PhotoSynth	فوتوگرافىيە كەسپىي ئاتالغۇلىرىغا ئىزاھات	تەۋسىيە : ئاجايىپ – غارايىپ ئەپ (5) Remix your life
无觅

بۇ يازمىلارغىمۇ ئىشتاھايىڭىز بولىشى مۇمكىن
ھايۋانات فوتوگرافچىلىقى نادىر ئەسەرلىرىدىن تاللانما	App Store دىكى ئۇيغۇرچە ئەپلەر توپلىمى	تەۋسىيە: مىكروسوفتتىن پەچەت بىر ئەپ – PhotoSynth	تەۋسىيە: رەسىم بىر تەرەپ قىلىش ئەپ توپلىمى	ساياھەتكە چىققاندا ئەسقاتىدىغان iPhone ئەپ توپلىمى
无觅

بۇ يازمىلارغىمۇ ئىشتاھايىڭىز بولىشى مۇمكىن
ئۇلۇغ قۇربان ھېيتىڭلارغا مۇبارەك بولسۇن!	App Store دىكى ئۇيغۇرچە ئەپلەر توپلىمى	تەۋسىيە: بالىلارنىڭ زېھنىنى ئاچىدىغان ئېسىل ئەپ	ئاتا ئانا ھەققىدە كۆرۈشكە تېگىشلىك بولغان نۇتۇق	دورامچۇق ئىت-مۈشۈكلەرنىڭ جېڭى يەنە باشلىنىپتۇدەك
无觅

بۇ يازمىلارغىمۇ ئىشتاھايىڭىز بولىشى مۇمكىن
ھايۋانات فوتوگرافچىلىقى نادىر ئەسەرلىرىدىن تاللانما	پورترېت سۈرەتكە ئېلىشتىكى 10 تېخنىكا	App Store دىكى ئۇيغۇرچە ئەپلەر توپلىمى	فوتوگرافىيە كەسپىي ئاتالغۇلىرىغا ئىزاھات	تەۋسىيە : ئاجايىپ – غارايىپ ئەپ (5) Remix your life
无觅