چۆچەكلىك تېپىشماق

ئويغان · ۋاقتى: 2014-3-31 16:50:16


	بۇ يازمىنى ئاخىرىدا يۈكسەل تەھرىرلىگەن. ۋاقتى 2014-3-31 17:00 （بۇ مەزمۇن پۈتۈنلەي ئويلىرىم مۇنبىرىدىن كۆچۈرۈلگەن،تور ئادرېسى::http://bbs.oylirim.cn/ ） شاھزادە ۋە تېپىشماق （بۇ مەزمۇن پۈتۈنلەي ئويلىرىم مۇنبىرىدىن كۆچۈرۈلگەن،تور ئادرېسى::http://bbs.oylirim.cn/ ） ئەقىللىق شاھزادە بازاردىكى كىشىلەرگە ئىككى تېپىشماقنى ئېيتتى،لېكىن ئۇلار جاۋابىنى تاپالدىمۇ؟ بۇرۇنسىدا بىر پادىشاھنىڭ تولىمۇ ئەقىللىق بىر شاھزادىسى بولغانىكەن. پادىشاھ ئۇنىڭغا بەك ئامراق ئىكەن. بىر كۈنى، شاھزادە بازارغا كېلىپ ھەممەيلەنگە شۇنداق جاكارلاپتۇ: - مەن ئىككى تېپىشماق ئېيتىمەن، سىلەر جاۋابىنى تاپالمىغۇدەك بولساڭلار، بۈگۈن سودا - سېتىق قىلىشنى ئويلىماڭلار! ساتارمەنلەرنىڭ سېتىشىغا، ئالارمەنلەرنىڭ ئېلىشىغا رۇخسەت يوق. بىرىنچى تېپىشماق: «ئەتىگەندە تۆت پۇتلۇق، چۈشتە ئىككى پۇتلۇق، كەچتە ئۈچ پۈتلۇق، ئۇ قانداق ھايۋان؟»؛ ئىككىنچى تېپىشماق: «بىر دەرەختە 12 شاخ، ھەر بىر شاختا ئوتتۇز يوپۇرماق، ئۇ نېمە؟» دەپتۇ. كىشىلەرنىڭ بىرسىمۇ تېپىشماقلارنىڭ جاۋابىنى تاپالماپتۇ. شۇنىڭ بىلەن بازار تارقاپتۇ. بىر ھەپتە ئۆتۈپ، يەنە بازار كۈنى يېتىپ كەپتۇ. شاھزادىمۇ يەنە بازارغا كېلىپ: - مەن ئېيتقان تېپىشماقلارنىڭ جاۋابىنى تاپالىدىڭلارمۇ؟ - دەپ سوراپتۇ. كىشىلەر بۇ قېتىممۇ ئۈندىيەلمەي، كېتىشكە ئالدىراپتۇ. ساتارمەنلەر مېلىنى ساتالماپتۇ. ئالارمەنلەرمۇ ئالدىغىنىنى ئالالماپتۇ. شۇنداق قىلىپ بازار يەنە تارقاپتۇ. بازارغا كەلگەنلەر ئارىسىدا بىر بازار قاراۋۇلى بار ئىكەن. ئۇ تولىمۇ نامرات بولۇپ، ئۇنىڭ پەقەت ئىككى قىزى بار ئىكەن، چوڭ قىزى تولىمۇ گۈزەل ئىكەن، كىچىك قىزى بولسا ئورۇق، ۋىجىك، ئەمما ئادەتتىن تاشقىرى ئەقىللىق بولۇپ، ئەقىل - پاراسەتتە باشقىلارنى بېسىپ چۈشىدىكەن. كەچتە قاراۋۇل بوۋاي قايتىپ كەلگەندە، كىچىك قىزى دادىسىدىن: - دادا، سەن ئىككى قېتىم بازارغا باردىڭ، ئەمما ھەر قېتىمدىلا قۇرۇق قول قايتىپ كەلدىڭ، بۇ قانداق ئىش؟ - دەپ سوراپتۇ. - ھەي قىزىم، - دەپتۇ قاراۋۇل، - شاھزادە بازارغا كېلىپ: «سىلەر مېنىڭ ئېيتقان تېپشماقلىرىمنىڭ مەنىسىنى دەپ بېرەلمىسەڭلار، سودا - سېتىق قىلماڭلار» دەپ جاكارلىدى، - دەپتۇ. - شاھزادە سىلەرگە نېمە تېپىشماق ئېيتتى؟ - دەپ سوراپتۇ كىچىك قىزى. - ئۇنىڭ بىر تېپىشمىقى: «ئەتىگەندە تۆت پۇتلۇق، چۈشتە ئىككى پۇتلۇق، كەچتە ئۈچ پۇتلۇق، ئۇ قانداق جانىۋار؟»، يەنە بىرسى: «بىر دەرەختە 12 شاخ، ھەر بىر شاختا ئوتتۇز يوپۇرماق» ئىكەن، - دەپتۇ بوۋاي. - بۇنى تاپماق بەك ئاسانكەنغۇ، دادا، - دەپتۇ كىچىك قىزى ئويلىنىۋېلىپ، - بىرىنچى تېپىشماقتا دېيىلىۋاتقىنى - ئادەم. ئادەم، ئۆمرىنىڭ ئەتىگىنىدە يەنى بوۋاق چېغىدا ئىككى قول ۋە ئىككى پۇتى بىلەن ئۆمىلەپ ماڭىدۇ؛ چوڭ بولغاندىن كېيىن ئىككى پۇتى بىلەن ماڭىدۇ، قېرىغاندا ھاسىغا تايىنىپ ئۈچ پۇتلۇق بولۇپ قالىدۇ. ھېلىقى «دەرەخ» بولسا «يىل»، بىر يىلدا 12 ئاي بولىدۇ، ھەر بىر ئايدا ئوتتۇز كۈن بولىدۇ. بىر ھەپتە ئۆتۈپ، يەنە بىر بازار كۈنى يېتىپ كەپتۇ، شاھزادە يەنە بازارغا كەپتۇ. - بۈگۈن جاۋاپ تاپپتىڭلارمۇ؟ - دەپ سوراپتۇ ئۇ. - تاپتىم، ئالىيلىرى - دەپتۇ قاراۋۇل بوۋاي، - ئەتىگەندە تۆت پۇتلۇق، چۈشتە ئىككى پۇتلۇق، كەچتە ئۈچ پۇتلۇق بولىدىغان جانىۋار - ئادەم. ھېلىقى دەرەخ - يىل، بىر يىلدا 12 ئاي، ھەر بىر ئايدا ئوتتۇز كۈن بولىدۇ. - سودا - سېتىقنى باشلاڭلار! - دەپ بۇيرۇق قىپتۇ شاھزادە ھەيران بولغان ھالدا. گۇگۇم چۈشۈشكە ئاز قالغاندا، شاھزادە قاراۋۇل بوۋاينىڭ يېنىغا كېلىپ قاراۋۇل بوۋايدىن: - ساڭا تېپشماقلارنىڭ جاۋابىنى كىم تېپىشىپ بەردى؟ - دەپ سوراپتۇ. قاراۋۇل بوۋاي شاھزادىگە راست گەپنى ئېيتىپتۇ. - بۈگۈن كەچ مەن سېنىڭ ئۆيۈڭدە مېھمان بولىمەن، - دەپتۇ شاھزادە ئۇنىڭ گېپىنى ئاڭلىغاندىن كېيىن. شاھزادە قاراۋۇلنىڭ ئۆيىدە ئۇنىڭ ئىككى قىزىنى كۆرۈپتۇ. كىچىك قىزىنىڭ ئەقىل - پاراسىتى ئۇنىڭ قەلبىنى لەرزىگە ساپتۇ. كېيىن، شاھزادە قاراۋۇلنىڭ كىچىك قىزىنى ئۆزىنىڭ نىكاھىغا ئاپتۇ.

ھېسابات		ساقلاش	پارول قايتۇرىۋېلىش
پارول			ئەزا بۇلۇڭ