چۈشۈڭگە كىرىمەن ئاستا تۇيدۇرماي

چۈشۈڭگە كىرىمەن ئاستا تۇيدۇرماي


رەڭگارەڭ خىيالار، ئوتلۇق سۇئاللار،
تۈنلەردە كەچمىشنى سالىدۇ ئەسكە.
نىگارنىڭ يۇرتىدىن كەلگەن شاماللار،
پىرقىراپ يۈرىدۇ قولىدا دەستە.

چېلىشىپ كېتىمەن ئايدىڭ كەچلەردە،
يوچۇن بىر سىيمانى تالىشىپ خەقتىن.
كىملەرنىڭ كۆڭلىنى قويۇپ غەشلەردە،
سۆز ئاچتىم ئۇنىڭغا ناھەق، يا ھەقتىن؟

ئۈن-تىنسىز بىرسىنى كەلدىم سېغىنىپ،
ۋەلىكىن ئۇ مېىنى تونۇماس بەلكىم.
ھېچكىمگە دېمىگەن ، بىرەيمەن ئېيتىپ،
مەن ئۇنى كۆرمەستىن چېگىلگەن قەلبىم.

مەن ئاڭا تەلپۈنۈپ تۇرارمەن كىشنەپ،
تۇيۇقسىز چۆچۈدۈم ، كەتتىم ئويغىنىپ.
چۈشۈمدە كىلىدۇ بىر گۈلنى چىشلەپ،
ئويغانسام كېتىدۇ تاتلىق نازلىنىپ.

مەۋھۇم بۇ سۆيگۈنىڭ مەھكۇملىقىدا،
سۆيگۈنىڭ ئەلچىسى بولدى تولۇن ئاي.
چاقلىنىپ مۇھەببەت تاش-قۇملىرىدا،
چۈشۈڭگە كىرىمەن ئاستا تۇيدۇرماي.