|
ئاپتۇبۇستا...
مىكرو ھېكايە
ياتىقىمدىن چىقىپ بازارغا بېرىش ئۈچۈن ئاپتۇبۇس بىكىتىگە كەلدىم، ھاۋانىڭ دىمىقلىقىنى نېمە دەي،غۇدۇڭشىغىنىمچە بىكەتتە ئاپتۇبۇس ساقلاپ تۇردۇم، كۈتۈش رايۇنىدىغۇ ئولتۇرىۋالاي دېسەم بوش ئورۇن بار لېكىن ئەتراپىمدا ماڭا ئوخشاش ئاپتۇبۇسقا چىقىمەن دەپ ساقلاۋاتقان قارا كۆزلەر خېلى باركەن ، گەرچە كۆڭلۈمگە كېلىدىغان ئاپتۇبۇستا بوش ئورۇننىڭ يوقلىقى ئايان بولسىمۇ مۇشۇنىڭدەك بىكەتنىڭ ئالدىنقى رېتىدە ساقلاپ تۇرمىسام ھېلى ھەممە ئادەم يۇپۇرۇلۇپ چىقىپ ئاپتۇبۇستا پۇت قويغىدەكمۇ يەر قالماسمىكى دېگەنلەرنى ئويلاپ بېشىمنى ھە دېسە غازدەك سوزۇپ ئاپتۇبۇسنىڭ يولىغا قاراپ تۇردۇم،ئالاھەزەل بەش مىنۇتتىن كېيىن ئاپتۇبۇس ئېغىر ئىنجىقلاپ بىكەتتە توختىدى.
-ۋايجان،نېمانداق جىق ئادەم بۇ، بولدىلا كىيىنكى ئاپتۇبۇسقا چىقايلى
يېنىمدىكى ئوتتۇز ياشلار چامىسىدىكى ئىككى ئايال شۇنداق دېگىنىچە بۇ قېتىمكى ئاپتۇبۇسنى ئۆتكۈزىۋەتتى، مەنمۇ كۆڭلۈمدە بەلكىم كېلەر قېتىمكى ئاپتۇبۇس سەل ئازادە بولۇشى مۇمكىن دېگەننى ئويلاپ بۇ قېتىملىق ئاپتۇبۇسقا چىقىشتىن يالتىيىپ قالدىم، ئۇلار نەچچە قېتىم كەلگەن ئاپتۇبۇسنى ئۆتكۈزىۋەتتى ئەلۋەتتە مەنمۇ قاچان بىز ئادەم ئازراق ئاپتۇبۇس كېلىپ قالاركىن دەپ ئويلايتىم ، لېكىن ھەممە ئاپتۇبۇس خۇددى سامان تاغىرىغا قاچىلانغان ساماندەك شۇنچىلىك سىغداپ ئادەم باسقانىدى، كۆڭلۈمدە بۇنداق ساقلىسام يولۇمدىن قالغۇدەكمەن ئەمدى چىقمايمۇ ئامال يوق ئوخشايدۇ دەپ كىيىنكى قېتىملىق ئاپتۇبۇسقا چىقماقچى بولدۇم.
-ئالە شەنى ،ما ئادەمنىڭ جىقلىقىنى،باشتىكى ئاپتۇبۇستا ئازمۇ نېمە ئادەم.
شۇلارنى ئويلاپ تىرىكىپ ئاپتۇبۇسقا چىقتىم، ۋە ئىختىيارسىزلا ئارقامغا قاراپ قالدىم، ھېلىقى ئىككى ئايالمۇ قەدەملىرىنى سۆرەپ ئاپتۇبۇسقا چىقىشقا باشلىدى، بەلكىم ئۇلارمۇ بۇ ساقلاشلاردىن زىرىككەن چېغى، بىزنىڭ چىقىشىمىش بىلەن ئاپتۇبۇس ئىچى تېخىمۇ تارىيىشقا باشلىدى، كىشىلەر بىر -بىرىگە چاپلىشىپ دېگۈدەك تۇراتتى، ھاۋانىڭ ئىسسقلىقىغا قۇشۇلۇپ بۇ يەردىكى مۇھىت ئادەمنى سەل بىئارام قىلاتتى،
-ئاداش دېققەت قىل ئاۋۇ يانچۇقچى سېنىڭ سومكاڭنى قەسلەۋاتىدۇ، نەچچە قېتىم قول ئۇزارتىپ باقتى
توساتتىن يېنىمدىنلا ئاڭلىنىۋاتقان بۇ گەپلەرگە قۇلۇقۇم كىرىپ قالدى، قارىسام ھېلىقى ئىككى ئايال نېمىلەرنى دەپ كۇسۇرلىشىۋېتىپتۇ ، ئۇلارغا پەرۋاسىز ھالدا سىرتقا قاراپ تۇردۇم .
-گەپ قىلىۋاتىمەن خېنىم،سەزمىدىلىما سومكىلىرىغا ئۇرۇلغاننى ، دېققەت قىلسىلا دېسەم
-ھە بىلدىم بۇ يانچۇقچىنى بايىلا سېزىپ قالغان ، بىكەتتىلا كۆزى چۈشكەن بۇنىڭ بىزگە شۇڭا نەچچە ئاپتۇبۇسنى ئۆتكۈزىۋەتتى ، مەنمۇ شۇ قاچان قول سېلىپ قالاركىن دەپ سەزمىگەنگە سېلىپ يۈرىۋاتىمەن، قېنى بىر قول سالسۇنا بۇ ساقلاندى ، شۇ چاغدا كۆرىدۇ يامانلىقىمنى ..
گەرچە بۇلار كۇسۇرلىشىپ سۆزلىشىۋاتقان بولسىمۇ لېكىن گەپلىرى قۇلاققا بىلىنەر-بىلىنمەس ئاڭلىنىپ تۇراتتى، توساتتىنلا ھەيران قالدىم.
-باياتىن بىرى دېگەن ئادىمى مەنمۇ نېمە ؟دېمىسىمۇ پەقەت مەنلا ئۇلار بىلەن تەڭ نەچچە ئاپتۇبۇسنى ئۆتكۈزىۋەتكەنىدىم ئەجىبا؟
ئۆزۈممۇ سەزمەيلا ئۇلارغا قارىدىم،قارىدىميۇ ھېلىقى ئايالنىڭ شۇنداق بىر سەت ئالىيىپ قارىشىدىن چۆچىگىنىمچە ئالدىمغا قارىۋالدىم، كاللامدا بۇلار زادى نېمىشقا مېنى ئوغرى دەيدۇ دېگەننىلا ئويلايتىم. ئويلا-ئويلا ئاخىرى بۇنىڭ سەۋەبىنى بىلدىم، ئەسلىدە ئاپتۇبۇستا ئادەم جىق بولغاچ قۇلۇم ئېھتىيازسىزلىقتىن ئۇ ئايالنىڭ سومكىسىنى سىيپاپ ئۆتۈپ كەتكەنىكەن،شۇڭا ئۇلار مېنى سومكىسىغا نەزەر سېلىۋاتقان چېغى دەپ ئويلاپ ماڭا يانچۇقچى دېگەن قالپاقنى كىيدۈرۈپ قويغانىدى،ئاچچىقلىنايمۇ ؟ بىر چاغلاردا نەلەردىندۇر ئەپۇچانلىق ئەڭ ياىشى خىسلەت دەپ ئۇقۇغانلىقىم ئېسىمدە، شۇڭا ئۆزۈمنىڭ ئۇلارنى بۇ ئويغا كەلتۈرۈپ قويغانلىقىمدىن خىجىل بولۇپ سومكىغا قول ئۇزاتقان بەڭۋاش قولۇمنى ئاستاغىنە يانچۇقۇمغا سېلىۋالدىم،ئۇف دېدىم ئىچىمدە ، جاھاندا تەتۈر قالپاقتىن قۇتۇلۇشتىنمۇ ھۇزۇر ئىش بولمىسا كېرەك ،مانا مەنزىلىمگىمۇ كەلدىم ،ئاپتۇبۇستىن چۈشتۈمدە مەندىن بارا-بارا يىراقلىشىۋاتقان ئاپتۇبۇسقا قاراپ تۇرۇپلا قالدىم، راست گەپ قىلسام كۆڭلۈم بايىقىدىن خوشال .بەلكىم ئۇلارمۇ مەندەك بىر يانچۇقچىنىڭ چۈشۈپ قالغانلىقىدىن كۆڭلى ئەمىن تېپىپ قالغاندۇ. ئالدىمغا نەچچە قەدەم ئېلىپ توساتتىنلا ئارقا يانچۇقۇمنى تۇتتۇم،ئەپسۇز يانچۇقۇمدا پورتىمالىم يوق تۇراتتى .
مەنبەسى: ئەپچىلەم
| 
بايلىق
شۆھرەت
ۋاقتى: 2013-12-10 11:54:02
ساقلاش
ھەمبەھر
قېزىلما
قوللاش
قارشى
ۋاقتى: 2013-12-10 14:57:46
ۋاقتى: 2014-10-18 18:58:38
› راس شۇنداقمۇ ئەپچىلەمكا ؟