غەزەللەر

شەيتان كۆز

ئابلىكىم مۇھەممەت ئۇپقۇن

كۆزۈڭ شەيتانمۇ يا سەن ھەي، مېنى شۇنداق خازان قىلدى.
كۆزۈڭدە بارمۇ مىڭ خىسلەت، بۇ ھالىمنى يامان قىلدى.

سېنىڭ ئىشقىڭدا بىر ئۆمۈر، قېقىپ دەرۋازا ھارمىدىم،
ئىچىمدە دەردىم مىڭ پاتمان، چىرايىمنى سامان قىلدى.

ئىشىق بالاغا مەن چۈشتۈم، كۆزۈڭ ئوينايدۇ پىنھاندا،
نىچۈن سۆيگۈ بازارىدا، مېنى شۇنداق خامان قىلدى.

بولۇپ شەيتانغا مەن تۇتقۇن، قىلىپ كۆزۈڭنى بايراقدار،
ۋاپا چۆلىدە ئۆرتەندىم، ھاياتىمنى سەرسان قىلدى.

ئىشىق لەشكەرلىرى تۇرار، يۈرەكىمگە قورال تەڭلەپ،
ۋاپا ئەھلگە پۈتۈپ جازا، ئېسىپ دارغا پەرمان قىلدى.

كۆزۈڭنىڭ تەھتىگە چۆكتۈم، چۈشۈم بىرلەرگە يانداش بوپ،
ئۇيقىدىن بىقارار يېگىت، كېچە سېنى ئارمان قىلدى.

تومۇرۇمدا ئاقار قانلار، يۈرەككە قايتىدىن بىر رەت،
يالاپ ئۇپقۇن ئارا قىرغاق، كى ‹‹قۇرغان››نى ۋەيران قىلدى.

2016-يىلى1-ئاينىڭ7-كۈنى گۇما

كېچە لىرىكىسى


كېتەر ئۇيقۇغا كائىنات، ياتار ھەممە يېرىم جاندا.
يۇلتۇزلارغا ناۋا بولدى، ئايمۇ ئۇخلايدۇ پىنھاندا.

ھۇقۇشلار ھوۋلىسا ئەنسىز، كېلەر باغلاردىن تەشۋىشلىك،
خاماندا تۈنىگەن يېگىت، ناخشا توۋلايدۇ ئارماندا.

يوپۇرماقلار شىلدىرلايدۇ، سابالار سۆيسە مەڭزىگە،
بوۋايلار تارتىدۇ خوررەك، نەۋىرلەر ياتار بىر ياندا.

يېقىپ دىللارغا گۈلخاننى، كۆيۈپ ئۇنىڭدا كاۋاپ بوپ،
بىدار يىگىتلەر ئۇيقىدىن، يانار يۇلتۇزدەك ئاسماندا.

چۆكۈپ ئىشىق دەرياسىغا، بىلىق كەبى ئۈزۈپ ھەرچاغ،
ئۇزۇن كېچە يۇمۇلماي كۆز، خىيال توختايدۇ جاناندا.

2016-يىلى 1-ئاينىڭ11-كۈنى گۇما

بۇلاقتىكى قىز


سۈزۈك تاڭنىڭ زىياسىدەك، كۆزۈپ ئەكسىڭنى ئويلاندىم.
قوقاستا گۈللىتىپ جاننى، ئىشىق ئوتۇڭدا تولغاندىم.

سېنىڭ ۋەسلىڭنى يار ئەيلەپ، ئۆزۈمنى شۇنچە خار ئەيلەپ،
گۇگۇمدا سايرىسا پاختەك، جىنىم ھەلقۇمدا مۇڭلاندىم.

چۈشۈپ ئەكسىڭ بۇلاقلارغا، چېچىڭ بوستانغا تەققاس بوپ،
ئىشىق خۇمدانىغا سەكرەپ، ھارارەتلەردە تاۋلاندىم.

كىرپىك ئوقياسىنى بەتلەپ، يۈرەكىمنى ئاتار بۇلدۇڭ،
مېنىپ دۇلدۇلغا مەزگىلسىز، ماماتلىق جەڭگە ئاتلاندىم.

سۆزلەپ بۇلاققا رىۋايەت، تاراپ چېچىڭنى ئەنبەردە،
ئۇرۇپ ئۆزۈمنى مەن ساڭا، مەجنۇن ساباغا ئايلاندىم.

شۇڭغۇپ بۇلاقنىڭ تەھتىگە، سۈزۈپ كۆزۈڭدىن مىڭ گۆھەر،
ئىچىپ ئازاپ شارابىنى، چۈشۈمدىن نەچچە ئويغاندىم.

ئىشىق ئوتۇڭدا جان مەجرۇھ، سېنىڭ بىلەن خاراپ ھالىم،
سۆيگۈدىن چايقىلار ئۇپقۇن، سۆيۈپ قىرغاق ئارا ياندىم.

2016-يىلى 1-ئاينىڭ13-كۈنى گۇما

يار  يولۇڭغا كارۋانمەن


ئىچىپ دىلبەر لىۋىڭدىن مەي، ھاياتىمنى خاراپ ئەتتىم.
سېنى تۇتيا بىلىپ مەڭگۈ، مۇھەببەتتە تاۋاپ ئەتتىم.

كۆيۈك سەۋداسىدا كۆڭلۈم، ئۆتەر شۇنداق قىسىپ بويۇن،
بولۇپ كارۋان يولۇڭدا مەن، ئۆزۇمگە كۆپ ئازاپ ئەتتىم.

بېسىپ تۆگىگە جىق ئەشئار، باغاشلاپ دەشتى قۇملارنى،
ئۇلاپ ئىزىمنى ئەۋلاتقا، ئىچىشىمگە شاراپ ئەتتىم.

سېنى ئارزۇ قىلىپ ھەرچاغ، كېچەلمەستىن ۋىسالىڭدىن،
پىراق دەرياسىدا ئېقىپ، يۇرەكىمنى كاۋاپ ئەتتىم.

2016-يىلى1-ئاينىڭ24-كۈنى گۇما

ئىشىق خۇمدانغا مەن تۇترۇق


مېنىڭ قەبرەمگە گۈل چاچما، تۈمەن يانتاق چېچەك ئاچسۇن،
ھالاۋەتتىن گۈل ئۈزەرلەر، ئۈزەلمەستىن يىراق قاچسۇن.

ئازاپ بوينۇمدىن باغلىدى، يۈرەكنى قات -قات داغلىدى،
قارا يەردە قارا قەبرەم، ئۆزى يەكتا پۇراق چاچسۇن.

ئىشىق خۇمدىنغا مەن تۇترۇق، لېۋەن يارغا ئامالىم يوق،
قېنىمدىن چاچرىغان تۇلپار، يۈرەكىمگە ئۇدۇل چاپسۇن.

قۇياش بىرلەر ماڭار شۇنداق، تامان مەغرۇپكە ئەي يار دەپ،
بۇلاقتا كۆكلىگەن يالپۇز، كى ئىشقىڭنى ماڭا چاتسۇن.

قېقىپ ناخشامدا دەرۋازا، ئۆتۈپ كەتتىم تالاي كىچە،
ئىشىق جىڭىدە مەن ئۆلسەم، روھىم ھەيكەل بولۇپ قاتسۇن.

2016-يىلى 2-ئاينىڭ14-كۈنى گۇما