مىنى چۈشەنمىگەنلەرگە

مىنى چۈشەنمىگەنلەرگە



نۇرئەلى مەمەت كۆكلەم



چۈشەنمىسە ئەسكى ئېرىقمەن،
باغرىم چاۋا لاتقىغا پاتقان.
چۈشەنگەنگە ئېقىن دەريامەن،
سۈيى سۈزۈك بۇلاقتەك ئاققان.



چۈشەنگەنگە كەمسۆز، مۇلايىم،
ئېسىل مىجەز خۇشخۇي يىگىتمەن.
چۈشەنمەسكە ئەزەلدىن ۋات-ۋات،
ئاغزى يامان ئەسكى جوھوتمەن.


باغدا تۇرسام چۈشەنگەنلەرگە،
گۈل -غۇنچىگە ئاشىق بىرىمەن.
لېكىن دەيدۇ چۈشەنمىگەنلەر،
پەيلى بۇزۇق ئەسكى قېرىكەن.


ئەل غېمىنى يېسەم ھەركۈنى،
چۈشەنگەنلەر دەيدۇ ئەل ئوغلى.
ئەلنى بۇلاش نىيىتى بار دەپ،
چۈشەنمەسلەر دەيدۇ بىر ئوغرى.



شۇڭا دەيمەن ئاغرىسام ئۆلسەم،
چۈشەنگەنلەر قېشىدا ياتسام.
مەيلى دەيمەن چۈشەنگەنلەرنىڭ،
مەڭگۈلۈككە دەردىنى تارتسام.


2016-يىل3-ئاينىڭ12-كۈنى
ئۈرۈمچى