ئۇپقۇن:شېئىرلار

شېئىرلار

ئۇپقۇن


بۇ كېچە گۈللەردىن چۈش تالاشتىم مەن

تاشلارنىڭ سۆھبىتى بۇزار تۇيغۇمنى،
ئەينەكتەك خىيالدا چايقىلار دۇنيا.
سارغايغان سىغىنىش يېرىم قان بولدى،
يۈرەكنى زىخلايدۇ بىر گۈزەل رەنا.

ئېچىلدى شامالنىڭ پىنھان رۇجىكى،
بۇ جايدا گۈللەردىن ياسىلار زىندان.
شېئىردەك بىر گۈزەل قىزنى سىغىندىم،
ئىچىمدە ئوت قالاپ تۇرار زىمىستان.

بۇ كېچە گۈللەردىن چۈش تالاشتىم مەن،
يىلتىزىم تەشتەكتىن تامار يۈرەككە.
سۆيگۈمىز چىگىكلىك قالغىلى نىكەم،
ئىزىڭدىن كۆكلىگگن يالغۇز تىرەككە.

تۆكۈلەر ئۈستۈمگە ئاينىڭ كىرپىكى،
ئۆزۈمنى چانايمەن ئىشىق يولىدا.
ئەرۋاھلار مەي ئېچەر باش سۆڭۈكۈمدە،
قاقشالغا ئايلاندىم يارنىڭ قولىدا.

بۇ كېچە ئۆتىدۇ قىرىق قاراقچى،
تۇيغۇمنىڭ چۆلىدىن چاپتۇرغانچە ئات.
يىرتىلغان تېنىمدە چۈش كۆرىدۇ گۈل،
ئازابنىڭ سايىسى لەۋ تەڭلەر ۋاي دات.

كەل ئامرىقىم سۆيۈپ ئۆلتۈرەي

ھارۋىكەش خىياللار چېكەر دېرىزە،
قاراسلاپ سۇنۇشقا تەيياردۇر ئاسمان.
سۆيۈش ئۇ ئاشىققا جىنايەت ئەمەس،
لېۋىڭدىن مەن چوقۇم ئۈزىمەن رەيھان.

بەختنىڭ شاخلىرى چاۋاك چالىدۇ،
ئۆلۈمنىڭ ئىشىكى ھاڭقىرقاي ئوچۇق.
كەل سېنى ئامرىقىم سۆيۈپ ئۆلتۈرەي،
يېرتىلغان يۈرەكنى يامار تۇمۇچوق.

تېنىمنىڭ چۆلىدىن ماڭار سىغىنىش،
بىر ناخشا ئىيتىلار يارنىڭ ھەققىدە.
جىنلاردەك چۇرۇقلاپ كېچە قوينىدا،
سۆيگۈنىڭ بەرگىگە يازار قەسىدە.

كىرپىكىم ئۈستىدە قۇشلار ئۇخلايدۇ،
يېپىشقىن باغرىمغا بىر پەس چۈش كۆرەي.
ئۇسسىغان بۇلاقنى قاندۇرايلى بىز،
كەل سېنى ئامرىقىم سۆيۈپ ئۆلتۈرەي.

يىغلىماقتا كەچكۈز ئاسمىنى

ساپ سىرىق خازاڭلار بولدى پەرىشان،
قەلبىمنىڭ شاخلىرى قالماقتا يەكتا.
يەريۈزى بىر قەۋەت تولدى ھەسرەتكە،
ئىسەدەپ تۇرىدۇ شۈمشەيگەن بىنا.

يۇلتۇزلار تىۋىشسىز كەتتى ئۇيقىغا،
سۇلارنىڭ لەۋلىرى يېرىلدى بۇدەم.
كەچكۈزنىڭ ئاسمىنى يىغلاۋاتقاندا،
تەمبۇردەك بۇلۇتتىن تۆكۈلدى ئەجەم.

نەشتەر سانجىماقتا سوغۇق شاماللار،
ئۇپۇقتەك قىززاردى پۈتكۈل كائىنات.
مۇڭدۇشۇپ خىيالەن كەچمىشى بىلەن،
ئەسكى تام تۈۋىدە ئولتۇرار ھايات.

يوللاردىن كۆز يېشى ئاقار توختاۋسىز،
كەچكۈزنىڭ ئىشىكىدىن كىرمەكتە بىر قىز.

كورلا