قىزىمغا دەيدىغانلىرىم

لەزىنە

	قىز ئۇ ئېچىلمىغان سىر، بېسىلمىغان ئىز. قىزلارنىڭ بايلىقى ئۇنىڭ شەرمى–ھاياسى، ئەدەپ–ئەخلاقى بىلەن خاراكتېرلىنىدۇ. قىزلارنى گۇلگە ئوخشاتساق، ئەدەپ –ئەخلاق دەل ئۇنىڭ ئۆتكۈر تىكىنى. بۇ ئۆتكۈر تىكەن ئۆزىنىڭ ئۆتكۈرلىكىنى ساقلاپ قالالىسىلا ھەر قانداق قارا قول ئۇنىڭغا چېقىلالمايدۇ. سەن مەن بەرپا قىلغان گۈزەل باغدىكى ئەڭ يارقىن ،ئەڭ خۇشپۇراق گۈل . مەن ئۇزۇندىن بېرى سېنى ھەم سېنىڭ ئۆتكۈر تىكەنلىرىڭنى تومۇز ئىسسىقتىن، جۇت–شىۋىرغانلاردىن ساقلاپ كەلدىم، ئەمدى كۆڭۈل قەسىرىڭنىڭ ئالتۇن ئاچقۇچىنى ئۆز كۈچىڭگە تايىنىپ قوغدايدىغان ۋاقتىڭ كەلدى. سەن بىر ئەرگە ئايال بولىسەن، بىر بالىغائانا بولىسەن، بىراق شۇنىمۇ ئۇنتۇپ قالما، سەن ماڭا ئوخشاش بىرئانىغا كېلىنمۇ بولىسەن. سەن مېنىڭلا قىزىم ئەمەس، بەلكى سەن سۆيگەن، سېنى سۆيگەن ئەرنى بۇ دۇنياغا ئاپىرىدە قىلغان ئانىنىڭمۇقىزى. پەرزەنتنىڭ ئەڭ چوڭ ئارزۇسى ئاتا–ئانىسىنى رازى قىلىش.لېكىن بۇنىڭدىنمۇ ئۇلۇغ بىر ئارزۇ ھەم بۇرچ بار،ئۇ بولسىمۇمەيلى كۈيئوغۇل بولسۈن ياكى كېلىن بولسۇن قېيناتا–قېينانىسىنىڭ رازىلىقىنى ئېلىش. سېنىڭ كۆپرەك ۋاقتىڭ شۇلار بىلەن بىرگە ئۆتىدۇ،ئۇلارنىڭ رازىلىقىسىز سەن روناق تاپالمايسەن. ئۇلارنىڭ كۆڭلىنى رەنجىتىپ قويغان بولساڭ،ئۇلاردىن تۆۋەنچىلىك بىلەن كەچۈرۈم سورا،ئەگەر ئۇلار سېنىڭ دىلىڭنى رەنجىتىپ قويسا بەك كۆڭلۈڭگە ئېلىپ كەتمە. ئۇلارنىڭ دېگىنى توغرا بولىشىمۇ مۇمكىن، ئەشۇ بىر قېتىملىق دىل رەنجىتىشتىن سەن يېڭى بىر ھايات لوگىكىسىنى يەكۈنلەپ چىقالىشىڭ مۇمكىن. 　　قىزىم، ئەدەپ–ئەخلاقلىق،شەرم–ھايالىق بولۇشتىن باشقا يەنە شېرىن سۆزلۈك،گۈزەل تەبىئەتلىك بولۇشمۇ قىزلارغا خاس خۇسۇسىيەت. مەيلى زامان قانچە تەرەققى قىلسۇن ، كىشىلەر قانچىلىك دەرىجىدە ئۆزگەرسۈن، زامان قانچە رەڭدارلاشسۇن سېنىڭ چاچلىرىڭدىكى قارىلىق، مەڭزىڭدىكى قىزىللىق، قەلبىڭدىكى ئاقلىق ھەرگىز ئۆزگەرمىسۇن. چاچلىرىڭدىكى قارىلىقنى كۆرۈپ، يولدىشىڭ ئۆزىنىڭ مىللىي غۇرۇرىنى، كۈچلۈك ئېتىقادىنى ھەرۋاقىت ئەستە ساقلايدۇ؛ مەڭزىڭدىكى قىزىللىقنى كۆرۈپ، يولدىشىڭنىڭ كۆزلىرىدە مۇھەببەت– نەپرەت ئۇچقۇنلىرى ئۇچقۇندايدۇ؛ قەلبىڭدىكى ئاقلىقنى كۆرۈپ يولدىشىڭ ئائىلە ۋە جەمئىيەتكە بولغان مەسئۇلىيەتچانلىق تۇيغۇسىنى ھېس قىلىدۇ. ئۇلار يەنە پەرزەنتلىرىڭگە قانداق ياشاشنى ،قانداق ئادەم بولۇشنى،باشقىلارغا قانداق مۇئامىلە قىلىشنى ئۆگىتىدۇ. سۆزۈڭ شېرىن بولسا مۇز يۇرەكلەرنىمۇ ئېرىتەلەيسەن. شېرىن سۆز،كەڭ قورساق،ئەپۇچان بولساڭ ھەممىنىڭ ئېتىراپ قىلىشىغا ئېرىشەلەيسەن، قېينانا–قېيناتاڭمۇ تەبىئىيلا ساڭا ئامراق بولۇپ قالىدۇ. دۇنيادا ئۆز–ئارا كۆيۈنۈشتىنمۇ ئارتۇق مېھىر– مۇھەببەت، بەخت يوق قىزىم. سەن ئۆزئەمەلىيىتىڭ ئارقىلىق بەخت ۋە خۇشاللىق كۆزئالدىدىلا تۇرسىمۇ تۇتالمىغانلارغا ئۇنى قانداق تۇتۇشنى ئۆگىتىپ قويىشىڭ كېرەك. 　　قىزىم، ئاياللارنىڭ ئانا بولغاندىن كېيىنىكى ھاياتى ئۆزى ئۈچۈن ئەمەس، بەلكى يولدىشىڭ ۋە پەرزەنتلىرى ئۈچۈن داۋاملىشىدۇ. شۇڭا تۇرمۇشىڭدا ھەممىدىن ئاۋۋال ئېرىڭ ۋە پەرزەنتىڭنىڭ مەنپەئىتىنى ئالدىنقى ئورۇنغا قويىشىڭ كېرەك. مۇۋەپپەقىيەت قازانغان ئەرنىڭ ئارقىسىدا بىر قابىل، كۆيۈمچان، كەڭ قورساق ئايال بولىدۇ. بۇنىڭدىن كېيىنكى ھايات مۇساپەڭلاردا پەقەت سەنلا يولدىشىڭنىڭ بىردىنبىر قوللىغۇچىسى، ياردەمچىسى، يار يۆلىكى بولىسەن، شۇڭا سەن ئۇنىڭغا تېخىمۇ كۆپ مۇھەببەت ئاتا قىلىشىڭ كېرەك.   قىزىم، بالىنىڭ قانداق ئادەم بولۇپ چىقىشى ئانىنىڭ ئەخلاق پەزىلىتى بىلەن مۇناسىۋەتلىك. دادىنىڭ سۆز ھەرىكىتى قانچە مۇلايىم، مەدەنىي بولسىمۇ ئانىنىڭ ئەخلاقى ياخشى بولمىسا بالىنىڭ ياراملىق ئادەم بولالىشى تولىمۇ قىيىن. سېنىڭ قىممەت باھالىق كىيىم–كېچەكلىرىڭ، ئالتۇن جابدۇقلىرىڭ زىننەت ئەمەس، بەلكى ئالغان تەربىيەڭ زىننەتتۇر.ئالغان تەربىيەڭ قانچە مول ھەم ئەتراپلىق بولسا ئۇ سېنى تېخىمۇ گۈزەللەشتۇرىدۇ. قىزىم باشقىلارغا مۇلايىم، سىلىق سىپايە مۇئامىلە مۇئامىلە قىل. سېنىڭ مۇلايىملىقىڭ يولدىشىڭغا ئەرلىك خاراكتېر ئاتا قىلىدۇ. سېنىڭ ھەر بىر سۆز ھەرىكىتىڭ يولدىشىڭغا قانداق ئادەم بولۇشنى ئۆگىتىدۇ. سەن ئارقىلىق يولدىشىڭ ھۆرمەت تاپىدۇ. بۇنىڭ بىلەن سەنمۇ ھۆرمەتكە ئېرىشىسەن ،دەۋرنىڭ گۈلى بولىسەن. قېيناتا–قېيناناڭمۇئۆزىنىڭ سىلەردەك بىرجۈپ خۇشپۇراق گۈلىنىڭ باغۋىنى بولغانلىقىدىن ئىپتىخارلىنىدۇ. 　　قىزىم، قىزلار سىرىنى يوشۇرغانسېرى دانالىشىدۇ، جىسمىنى يوشۇرغانسېرى گۈزەللىشىدۇ، سەن سىرىڭنى باشقىلارغا ئېيتمىساڭلا، باشقىلار ھەرگىز سېنىڭ سىرىڭنى ئوغۇرلىۋالالمايدۇ، سىرىڭ سېنى دانالاشتۇرىدۇ، سىرىڭنىڭ بارلىقى قىممىتىڭنىڭ بارلىقىنى بىلدۇرىدۇ.جىسمىڭنى ھەر ۋاقىت يات كۆزلەردىن يوشۇر، قىسقا كىيىم بەدەننى ئېچىپ قويسا، كالتە پىكىر نادانلىقنى ئېچىپ قويىدۇ. 　　قىزىم ئاخىرىدا ساڭا دەيدىغىنىم ، مەيلى قانداق ئائىلىگە كېلىن بولۇپ كىرگىن ھەر ۋاقىت چوڭلارنى ھۆرمەتلە، كىچىكلەرنى ئىززەتلە،ئىشلاردا سەمىمىي، راستچىل، دادىل بول. تىلىڭ ھەر ۋاقىت شېرىن سۆزلۈك بولسۇن، ھەقنى سۆزلىسۇن،باشقىلار سېنىڭ تۇتقان ئۆيۇڭگە قاراپ ئەمەس، سېنىڭ تەربىيىلەپ يېتىشتۇرگەن بالاڭغا قاراپ ساڭا باھا بېرىدۇ. ھەر قانداق ئىشنى ئۆزۈڭدىن باشلا نەتىجىسىنى باشقىلاردىن سورا، شۇندىلا سەن پەرزەنتىڭ مەدھىيلىگەندەك ئانا، قېيناتا–قېيناتاڭ پەخىرلەنگۈدەك كېلىن، ئۆمۈرلۈك ھالال جۈپتىڭ ئىپتىخارلانغۇدەك ئايال بولالايسەن. مەنبە <<شىنجاڭ  ئاياللار>>ژۇرنىلى ************************************* بۇ تېمىنى  <<شىنجاڭ  ئاياللار>>ژۇرنىلىدا كۆرۈپ، ھەرقايسىڭلارنىڭ ھوزۇرىغا يوللاپ قويدۇم، توي قىلغان ۋە توي قىلىش ئالدىدا تۇرغان بارلىق قىز -ئاياللىرىمىز چوقۇم كۆرۈشكە تىگشلىك ئىكەن.

sardor

	قولىڭىزغا دەرت بەمىسۇن !ئىسىل ئىدىيە ....

كارتون

	ئەدەپ–ئەخلاقنى،شەرمى–ھايانى  بىلمەيدىغان ئۇيغۇر قىزلىرىمىز كۆرگەن بولسىچۇ كاشكى...

quxanmas

	ياخشى   ئەسەركەن  ساقلىۋېلىپ    كۈندە  بىر ئوقۇپ    ئۆزىمىزگە  باھا   بېرىپ  ،ياخشى  يول  تۇتۇشقا  تىرىشساق  بولغۇدەك

سەۋېر

	قىزىم، قىزلار سىرىنى يوشۇرغانسېرى دانالىشىدۇ، جىسمىنى يوشۇرغانسېرى گۈزەللىشىدۇ.

سەۋېر

	قىزىم، قىزلار سىرىنى يوشۇرغانسېرى دانالىشىدۇ، جىسمىنى يوشۇرغانسېرى گۈزەللىشىدۇ.

sada510

	قىز ئۇ ئېچىلمىغان سىر، بېسىلمىغان ئىز ئەجرىڭىزگە،،تەشەككۇر................

monix

	ھەجەپ ئىسىل يازمىكەن . كىيىنچە خۇتۇن ئالغاندا مۇشۇ تەرەپلەرنى ئوبدان ئۇقۇپ بېقىپ ئاندىن ئاسام بولىدىغان ئوخشايدا جۇما

mujahitmen

	بۇنداق ئېغىر مەسئۇلىيەتنى  كۆتۈرۈپ ماڭالايدىغان قىزلىرىمىز كۆپلەپ كۆپەيسىدى  تۇرمۇش گۈل  ،ھايات نۇر ئىچىدە ئۆتكەن بولار ئىدى،.ئەلۋەتتە شۇنىڭغا لايىق ئەرلىرىمىزمۇ كۆپەيسىكەن..!!!

شاتئاي

	قايتا يوللانسىمۇ ئەسەرنىڭ قىممىتى مەڭگۈ ئۆچمەيدۇ.ئەجىرىڭىزگە تەشەككۈر.