ﺋﻪﺧﺘﻪﻡ ﺋﯚﻣﻪﺭ
ﺋﯘﻳﻐﯘﺭﻻﺭ ﺋﯘﺯﺍﻕ ﺋﻪﺳﯩﺮﻟﻪﺭ ﻳﺎﺷﺎﺵ ﺟﻪﺭﻳﺎﻧﯩﺪﺍ ﺋﻪﻗﯩﻞ- ﭘﺎﺭﺍﺳﯩﺘﻰ ﯞﻩ ﭼﯧﯟﻩﺭﻟﯩﻜﯩﮕﻪ ﺗﺎﻳﯩﻨﯩﭗ ، ﻣﻮﻝ- ﻣﻪﺩﻩﻧﯩﻴﻪﺕ ﯞﻩ ﺋﺎﺟﺎﻳﯩﭗ ﻛﻪﺷﭙﯩﻴﺎﺗﻼﺭﻧﻰ ﻳﺎﺭﺍﺗﻘﺎﻥ . ﺩﻩﯞﺭﻟﻪﺭﻧﯩﯔ ﺋﺎﻟﻤﯩﺸﯩﺸﻰ ، ﺯﺍﻣﺎﻧﻨﯩﯔ ﺗﻪﺭﻩﻗﻘﻰ ﻗﯩﻠﯩﺸﻰ ﺑﯩﻠﻪﻥ ﺑﯘ ﻛﻪﺷﭙﯩﻴﺎﺗﻼﺭﻧﯩﯔ ﻧﯘﺭﻏﯘﻧﻠﯩﺮﻯ ﺯﺍﻣﺎﻧﯩﯟﻯ ﺳﺎﻧﺎﺋﻪﺕ ﺗﻪﺭﯨﭙﯩﺪﯨﻦ ﻗﻮﺑﯘﻝ ﻗﯩﻠﯩﻨﺪﻯ ، ﺑﯩﺮ ﻗﯩﺴﯩﻤﻠﯩﺮﻯ ﺗﻪﺭﻩﻗﻘﯩﻴﺎﺕ ﺗﻪﺭﯨﭙﯩﺪﯨﻦ ﺷﺎﻟﻠﯩﻨﯩﭗ ﻳﻮﻗﺎﭖ ﻛﻪﺗﺘﻰ .
ﺩﻭﭘﭙﺎ -- ﺋﺎﺷﯘ ﻛﻪﺷﭙﯩﻴﺎﺗﻼﺭ ﺋﯩﭽﯩﺪﯨﻜﻰ ﮬﺎﺯﯨﺮﻏﯩﭽﻪ ﻳﺎﺷﻠﯩﻘﯩﻨﻰ ، ﮬﺎﻳﺎﺗﯩﻲ ﻛﯜﭼﯩﻨﻰ ﻳﻮﻗﺎﺗﻤﺎﻱ ﻛﯧﻠﯩﯟﺍﺗﻘﺎﻥ ﮬﻪﻡ ﺑﯘﻧﺪﯨﻦ ﻛﯧﻴﯩﻨﻤﯘ ﺋﯘﻳﻐﯘﺭ ﻣﯩﻠﻠﯩﺘﯩﻨﯩﯔ ﻣﯩﻠﻠﻪﺕ ﺑﻪﻟﮕﯩﺴﻰ ﺳﯜﭘﯩﺘﯩﺪﻩ ﺋﯚﺯﯨﻨﻰ ﻧﺎﻣﺎﻳﻪﻥ ﻗﯩﻠﯩﭗ ﺗﯘﺭﯨﺪﯨﻐﺎﻥ ، ﻣﯩﻠﻠﻪﺗﻨﯩﯔ ﻏﯘﺭﯗﺭﯨﻐﺎ ﺳﯩﻤﻮﯞﯗﻝ ﺑﻮﻟﯘﺵ ﻻﻳﺎﻗﯩﺘﯩﮕﻪ ﺋﯩﮕﻪ ﻗﯩﻤﻤﻪﺗﻠﯩﻚ ﮔﯚﮬﻪﺭ . ﺗﯧﺨﯩﻤﯘ ﻣﯘﮬﯩﻤﻰ ، ﺋﯘ ﺋﯘﻳﻐﯘﺭ ﺧﻮﺗﯘﻥ - ﻗﯩﺰﻟﯩﺮﯨﻨﯩﯔ ﻣﯘﺳﺘﻪﻗﯩﻞ ﻛﻪﺷﭙﯩﻴﺎﺗﻰ . ﺋﯘ ﺋﻪﻗﯩﻠﻠﯩﻖ ، ﻻﺗﺎﭘﻪﺗﻠﯩﻚ ﺋﯘﻳﻐﯘﺭ ﺧﻮﺗﯘﻥ- ﻗﯩﺰﻟﯩﺮﯨﻨﯩﯔ ﺋﯘﻳﻐﯘﺭ ﻳﯩﮕﯩﺖ - ﺋﻪﺭﻟﯩﺮﯨﮕﻪ ، ﺋﯘﻳﻐﯘﺭ ﺋﺎﻧﯩﻨﯩﯔ ﺋﯚﺯ ﺋﻮﻏﯘﻟﻠﯩﺮﯨﻐﺎ ﻣﻪﯕﮕﯜﻟﯜﻙ ﺳﻪﻣﯩﻤﯩﻲ ، ﺳﺎﭖ ﻣﯘﮬﻪﺑﺒﻪﺕ ﻳﺎﻟﺪﺍﻣﯩﺴﻰ ﺳﯜﭘﯩﺘﯩﺪﻩ ﺗﻪﻗﺪﯨﻢ ﻗﯩﻠﻐﺎﻥ ﻛﻪﺷﭙﯩﻴﺎﺗﻰ . ﺋﯘ ﺋﻮﻣﯘﻣﻨﯩﯔ ﺋﻪﻣﻪﺱ ، ﺧﺎﺱ ﺋﯩﮕﯩﻨﯩﯔ ﺑﻮﻟﯩﺪﯗ . ﺋﯘ ﮬﻪﻣﻤﻪ ﺋﺎﺩﻩﻡ ﺋﻮﻣﯘﻣﯩﻲ ﺟﺎﻣﺎﺋﻪﺕ ﺗﻪﯓ ﭘﺎﻳﺪﯨﻼﻧﺴﺎ ﺑﻮﻟﯩﯟﯦﺮﯨﺪﯨﻐﺎﻥ ﻧﻪﺭﺳﻪ ﺋﻪﻣﻪﺱ .
ﺩﻭﭘﭙﺎ ﺗﻪﻗﺪﯨﻢ ﻗﯩﻠﯩﺶ ﻗﺎﻧﺪﺍﻕ ﻛﯧﻠﯩﭗ ﭼﯩﻘﻘﺎﻥ ؟
ﺑﻮﯞﯨﻠﯩﺮﯨﻤﯩﺰ ﻣﻮﻣﯩﻠﯩﺮﯨﻤﯩﺰ ﺑﯩﻠﻪﻥ ﺑﺎﻻﻏﻪﺕ ﻳﯧﺸﯩﺪﺍ ﺋﯘﭼﺮﺍﺷﻘﺎﻧﺪﺍ ، ﺋﻪﮔﻪﺭ ﻳﯩﮕﯩﺘﻨﯩﯔ ﻗﯩﺰﻏﺎ ﻛﯚﯕﻠﻰ ﭼﯜﺷﯜﭖ ﻗﺎﻟﺴﺎ ، ﻣﯘﮬﻪﺑﺒﻪﺕ ﺋﯩﺰﮬﺎﺭ ﻗﯩﻠﯩﭗ ، ﺗﻮﻱ ﻗﯩﻠﯩﺶ ﺗﻪﻟﯩﭙﯩﻨﻰ ﻗﻮﻳﯩﺪﯗ ، ﺋﯘﻳﺎﺗﭽﺎﻥ ، ﺷﻪﺭﻡ - ﮬﺎﻳﺎﻟﯩﻖ ﺋﯘﻳﻐﯘﺭ ﻗﯩﺰﻯ ﺧﯩﺠﯩﻞ ﺑﻮﻟﯘﭖ ، ﻗﯧﭽﯩﭗ ﻛﯩﺮﯨﭗ ﻛﯧﺘﯩﺪﯗ . ﻳﯩﮕﯩﺖ ﺗﯜﻥ ﺑﻮﻳﻰ ﻗﯩﺰﻧﯩﯔ ﻣﻪﮬﻪﻟﻠﯩﺴﯩﻨﻰ ﺋﻪﮔﯩﭗ ، ﮬﻮﻳﻼ ﺗﯧﻤﯩﻨﻰ ﺋﺎﻳﻠﯩﻨﯩﭗ ، ﻧﺎﺧﺸﺎ ﺗﻮﯞﻻﭖ ، ﺑﺎﻍ ﺷﻮﺭﯨﺴﯩﺪﯨﻦ ﻛﯩﺮﯨﭗ ، ﻗﯩﺰﻧﯩﯔ ﺋﯚﮔﺰﯨﺴﯩﮕﻪ ﭼﺎﻟﻤﺎ ﺗﺎﺷﻼﻳﺪﯗ . ﻗﯩﺰ ﺑﯘﻻﺭﻧﯩﯔ ﮬﻪﻣﻤﯩﺴﯩﻨﻰ ﺋﯚﻳﯩﺪﻩ ﺗﯜﯕﻠﯜﻛﻜﻪ ﻗﺎﺭﺍﭖ ﻳﯧﺘﯩﭗ ﺑﯩﻠﯩﺪﯗ . ﺋﻪﮔﻪﺭ ﻗﯩﺰﻣﯘ ﻳﯩﮕﯩﺘﻨﻰ ﻛﯚﯕﻠﯩﮕﻪ ﺳﯩﻐﺪﯗﺭﺍﻟﯩﺴﺎ ﯞﻩ ﻳﯩﮕﯩﺘﻨﯩﯔ ﺋﯚﺯﯨﮕﻪ ﺑﻮﻟﻐﺎﻥ ﻣﯘﮬﻪﺑﺒﯩﺘﯩﮕﻪ ﺋﯩﺸﻪﭺ ﻗﯩﻼﻟﯩﺴﺎ ، ﻳﯩﮕﯩﺘﻜﻪ ﺋﺎﺗﺎﭖ ﺗﺎﻣﺎﻛﺎ ﺧﺎﻟﺘﯩﺴﻰ ، ﻛﺎﻧﯟﺍﻱ ﻛﯚﯕﻠﻪﻙ ، ﺋﯩﺸﺘﺎﻧﺒﺎﻍ ، ﺑﻪﻟﯟﺍﻍ ، ﻗﻮﻝ ﻳﺎﻏﻠﯩﻖ ﯞﻩ ﺩﻭﭘﭙﺎ ﺗﯩﻜﯩﭗ ، ﺋﯘﻻﺭﻧﻰ ﻛﯚﯕﯜﻝ ﻗﻮﻳﯘﭖ ﻛﻪﺷﺘﯩﻠﻪﭖ ، ﻛﯧﭽﯩﺪﻩ ﺑﺎﻏﻘﺎ ﭼﯩﻘﯩﭗ ﻳﯩﮕﯩﺖ ﺑﯩﻠﻪﻥ ﺋﯘﭼﺮﯨﺸﯩﭗ ، ﺋﯘ ﻧﻪﺭﺳﯩﻠﻪﺭﻧﻰ ﻳﯩﮕﯩﺘﻜﻪ ﺗﻪﻗﺪﯨﻢ ﻗﯩﻠﯩﺪﯗ . ﻣﯘﺷﯘ ﭼﺎﻏﺪﺍ ﻧﺎﺯﯗﻙ ﺑﯩﺮ ﺋﯩﺶ ﺑﺎﺭ ، ﺋﯘ ﺩﻭﭘﭙﯩﺪﯨﻦ ﺋﯩﺒﺎﺭﻩﺕ ﻣﻪﺭﻛﻪﺯ ﺋﺎﺭﻗﯩﻠﯩﻖ ﺋﯩﭙﺎﺩﯨﻠﯩﻨﯩﺪﯗ . ﺋﻪﮔﻪﺭ ﻗﯩﺰ ﻳﯩﮕﯩﺘﻨﯩﯔ ﺋﯚﺯﯨﻨﻰ ﻳﺎﺧﺸﻰ ﻛﯚﺭﮔﯩﻨﯩﮕﻪ ﺭﻩﮬﻤﻪﺕ ﺋﯧﻴﺘﯩﺶ ﮬﻪﻡ ﺋﯚﺯﺭﻩ ﺋﯧﻴﺘﯩﺶ ﺋﺎﺭﻗﯩﻠﯩﻖ ﻳﯩﮕﯩﺘﻨﻰ ﭼﯩﺮﺍﻳﻠﯩﻖ ﺭﻩﺕ ﻗﯩﻠﻤﺎﻗﭽﻰ ﺑﻮﻟﺴﺎ ، ﺩﻭﭘﭙﯩﻨﻰ ﻳﯘﻗﯘﺭﻗﻰ ﺳﻮﯞﻏﯩﻼﺭﻧﯩﯔ ﺋﯜﺳﺘﯩﮕﻪ ﻗﻮﻳﯘﭖ ، ﻗﻮﻟﯩﻐﺎ ﺑﯧﺮﯨﭙﻼ ﻗﺎﻳﺘﯩﭗ ﻛﯧﺘﯩﺪﯗ . ﺑﯘ ﻗﯩﺰﻧﯩﯔ ﻛﯚﯕﻠﯩﺪﻩ ﺑﺎﺷﻘﺎ ﭘﯜﺗﯜﺷﻜﯩﻨﻰ ﺑﺎﺭﻟﯩﻘﯩﻨﻰ ، ﻳﯩﮕﯩﺘﻜﻪ ﺋﯚﺯﺭﻩ ﻗﻮﻳﻐﯩﻨﯩﻨﻰ ﺑﯩﻠﺪﯛﺭﯨﺪﯗ . ﺋﻪﮔﻪﺭ ﻳﯩﮕﯩﺘﻜﻪ ﺭﺍﺯﯨﻠﯩﻘﻰ ﺑﻮﻟﺴﺎ ، ﮬﻪﻣﻤﻪ ﻧﻪﺭﺳﯩﻨﻰ ﺋﯩﻜﻜﻰ ﻗﻮﻟﻼﭖ ﺗﯘﺗﯘﭖ ، ﺩﻭﭘﭙﯩﻨﻰ ﺋﯚﺯ ﻗﻮﻟﻰ ﺑﯩﻠﻪﻥ ﻳﯩﮕﯩﺘﻨﯩﯔ ﺑﯧﺸﯩﻐﺎ ﻛﯩﻴﺪﯛﺭﯛﭖ ﻗﻮﻳﯘﭘﻼ ﻛﯩﺮﯨﭗ ﻛﯧﺘﯩﺪﯗ . ﺑﯘ ﻗﯩﺰﻧﯩﯔ ﻳﯩﮕﯩﺘﻜﻪ ﺭﺍﺯﯨﻠﯩﻖ ﺑﻪﺭﮔﯩﻨﯩﻨﻰ ، ﻣﯘﮬﻪﺑﺒﯩﺘﯩﻨﻰ ﺗﻪﻗﺪﯨﻢ ﻗﯩﻠﻐﺎﻧﻠﯩﻘﯩﻨﻰ ﺑﯩﻠﺪﯛﺭﯨﺪﯨﻐﺎﻥ ﺳﯩﻤﯟﻭﻟﻠﯘﻕ ﺟﺎﯞﺍﭖ . ﻳﯩﮕﯩﺖ ﺋﯘﻧﯩﯖﺪﯨﻦ ﻗﯩﺰﻧﯩﯔ ﻣﯘﮬﻪﺑﺒﻪﺕ ﺗﻪﻟﯩﭙﯩﻨﻰ ﻗﻮﺑﯘﻝ ﻗﯩﻠﻐﺎﻧﻠﯩﻘﯩﻨﻰ ﺑﯩﻠﯩﺪﯗ . ﺑﯘ-- ﮔﯜﺯﻩﻝ ﺭﯨﯟﺍﻳﻪﺕ ﺗﯜﺳﯩﮕﻪ ﺋﯩﮕﻪ ﺋﯘﻟﯘﻍ ﻣﻪﺩﻩﻧﯩﻴﻪﺕ . ﺋﻪﺟﺪﺍﺩﻟﯩﺮﯨﻤﯩﺰ ﻣﺎﻧﺎ ﻣﯘﺷﯘﻧﺪﺍﻕ ﺋﯘﺳﯘﻟﻼﺭ ﺑﯩﻠﻪﻥ ﻣﯘﮬﻪﺑﺒﻪﺕ ﺋﯩﺰﮬﺎﺭ ﻗﯩﻠﯩﺸﯩﭗ ، ﺗﻮﻳﻠﯩﺸﯩﭗ ﺑﯩﺰﻟﻪﺭﻧﻰ ﺗﺎﭘﻘﺎﻥ .
ﻗﯩﺰﻧﯩﯔ ﻛﯚﯕﻠﯩﻨﻰ ﺋﯩﭙﺎﺩﯨﻠﻪﻳﺪﯨﻐﺎﻥ ﭼﯩﺮﺍﻳﻠﯩﻖ ﺩﻭﭘﭙﺎ ﻧﺎﺯﯗﻙ ﻗﻮﻟﻼﺭ ﺑﯩﻠﻪﻥ ﺳﯚﻳﮕﻪﻥ ﻳﯩﮕﯩﺘﻨﯩﯔ ﺑﯧﺸﯩﻐﺎ ﻛﯩﻴﺪﯛﺭﯛﻟﯩﺪﯨﻐﺎﻥ ﺑﯘ ﺋﯩﺴﯩﻞ ﺋﺎﺩﻩﺕ ﺑﯜﮔﯜﻧﻜﻰ ﻛﯜﻧﺪﻩ ﺗﻪﺭﻩﻗﻘﯩﻴﺎﺕ ﯞﻩ ﺯﺍﻣﺎﻧﯩﯟﯨﻠﯩﺸﯩﺶ ﺗﯜﺳﯩﻨﻰ ﺋﯧﻠﯩﭗ ، ﺑﯩﺮ ﺋﻪﺭ ﻳﻪﻧﻪ ﺑﯩﺮ ﺋﻪﺭﻧﯩﯔ ﺑﯧﺸﯩﻐﺎ ﺩﻭﭘﭙﺎ ﻛﯩﻴﺪﯛﺭﯛﭖ ﻗﻮﻳﯩﺪﯨﻐﺎﻥ ﺋﺎﺩﻩﺗﻜﻪ ﺋﺎﻳﻠﯩﻨﯩﭗ ﻗﺎﻟﺪﻯ . ﺋﻪﺟﺪﺍﺩﻟﯩﺮﯨﻤﯩﺰ ﺋﻪﺭ ﻣﯧﮭﻤﺎﻧﻨﻰ ﺋﻪﺯﯨﺰﻟﯩﺴﻪ ، ﺋﻪﺗﯩﯟﺍﺭﻟﯩﺴﺎ ، ﭼﯩﺮﺍﻳﻠﯩﻖ ﺧﻪﻧﺠﻪﺭ ، ﭘﯩﭽﺎﻕ ﺳﻮﯞﻏﺎ ﻗﯩﻠﻐﺎﻥ، ﮬﻪﺭﮔﯩﺰﻣﯘ ﺳﯚﻳﯜﻣﻠﯜﻙ ﺋﺎﻳﺎﻟﻰ ، ﻣﯧﮭﺮﯨﺒﺎﻥ ﺋﺎﻧﯩﺴﻰ ، ﯞﺍﭘﺎﺩﺍﺭ ﺳﯚﻳﮕﯩﻨﻰ ﺋﯚﺯﻟﯩﺮﻯ ﺋﯜﭼﯜﻥ ﻛﯧﭽﯩﻠﯩﺮﻯ ﭼﯩﺮﺍﻕ ﻳﻮﺭﯗﻗﯩﺪﺍ ﺷﯧﺮﯨﻦ ﺋﯘﻳﻘﯩﺴﯩﺪﯨﻦ ﻛﯧﭽﯩﭗ ، ﻗﻮﻟﻠﯩﺮﯨﻨﻰ ﻳﯩﯖﻨﯩﺪﻩ ﺯﯦﺪﻩ ﻗﯩﻠﯩﭗ ، ﭘﯜﺗﯜﻥ ﺋﻪﻗﯩﻞ ، ﻣﯘﮬﻪﺑﺒﯩﺘﯩﻨﻰ ﻣﯘﺟﻪﺳﺴﻪﻣﻠﻪﭖ ﺗﯩﻜﯩﭗ ﺑﻪﺭﮔﻪﻥ ﺩﻭﭘﭙﯩﻨﻰ ﺗﻪﻗﺪﯨﻢ ﻗﯩﻠﻐﺎﻥ ﻳﺎﻛﻰ ﺋﻪﺭ ﺗﯘﺭﯗﭖ ﺋﻪﺭﮔﻪ ﺭﺍﺯﯨﻠﯩﻖ ﺑﻪﺭﮔﻪﻧﺪﻩﻙ ﺋﻪﺭﻧﯩﯔ ﺑﯧﺸﯩﻐﺎ ﻛﯩﻴﺪﯛﺭﯛﭖ ﻗﻮﻳﻐﺎﻥ ﺋﻪﻣﻪﺱ . ﭼﯜﻧﻜﻰ ﺋﯘﻻﺭ ﺋﯚﺯ ﺋﺎﻧﯩﺴﯩﻨﯩﯔ ، ﺋﯚﺯ ﻳﺎﺭﯨﻨﯩﯔ ﻣﯘﮬﻪﺑﺒﯩﺘﯩﻨﻰ ﺑﺎﺷﻘﯩﻼﺭﻏﺎ ﺋﯚﺗﯜﻧﯜﭖ ﺑﻪﺭﮔﻪﻥ ﺋﻪﻣﻪﺱ . ﺋﻪﺭ ﺗﯘﺭﯗﭖ ﺋﻪﺭﻧﯩﯔ ﺑﯧﺸﯩﻐﺎ ﻳﺎﻛﻰ ﻳﺎﺕ ﻛﯩﺸﯩﻠﻪﺭﻧﯩﯔ ﺑﯧﺸﯩﻐﺎ ﺩﻭﭘﭙﺎ ﻛﯩﻴﺪﯛﺭﯛﭖ ﻗﻮﻳﯘﺵ ، ﺑﯘ ﺋﯘﻟﯘﻍ ﻣﯘﮬﻪﺑﺒﻪﺗﻨﻰ ، ﺋﯘﻟﯘﻍ ﻛﻪﺷﭙﯩﻴﺎﺗﻨﻰ ﺩﻩﭘﺴﻪﻧﺪﻩ ﻗﯩﻠﻐﺎﻧﻠﯩﻖ ، ﺧﻮﺭﻟﯩﻐﺎﻧﻠﯩﻖ ، ﺋﺎﺧﯩﺮﻗﻰ ﮬﯧﺴﺎﺑﺘﺎ ﺋﯚﺯﯨﻨﻰ ﺋﯚﺯﻯ ﺧﻮﺭﻟﯩﻐﺎﻧﻠﯩﻖ . ﺋﯘﻳﻐﯘﺭ ﺋﻪﺭﻟﯩﺮﻯ ﺋﻪﺯﻩﻟﺪﯨﻦ ﺑﺎﺭﻟﯩﻘﯩﺪﯨﻦ ، ﮬﻪﺗﺘﺎ ﮬﺎﻳﺎﺗﯩﺪﯨﻦ ﻛﯧﭽﯩﺸﻜﻪ ﺭﺍﺯﻯ ﺑﻮﻟﯩﺪﯗﻛﻰ ، ﮬﻪﺭﮔﯩﺰﻣﯘ ﻣﯘﮬﻪﺑﺒﯩﺘﯩﻨﯩﯔ ﺑﺎﺷﻘﯩﻼﺭ ﺗﻪﺭﯨﭙﯩﺪﯨﻦ ﺩﻩﭘﺴﻪﻧﺪﻩ ﻗﯩﻠﯩﻨﯩﺸﯩﻐﺎ ﻳﻮﻝ ﻗﻮﻳﻤﺎﻳﺪﯗ . ﻟﯧﻜﯩﻦ ﺑﯘ ﺷﻪﻛﻠﻰ ﺋﯚﺯﮔﻪﺭﮔﻪﻥ ﺧﻮﺭﻟﯘﻗﻨﻰ ﻳﻪﻧﯩﻼ ﺑﻪﺯﻯ ﺋﯘﻳﻐﯘﺭ ﺋﻪﺭﻟﯩﺮﻯ ﻛﻪﻟﺘﯜﺭﯛﭖ ﭼﯩﻘﯩﺮﯨﯟﺍﺗﯩﺪﯗ . ﻣﻪﻥ ﺋﻪﺭﻛﻪﻙ ﺩﻩﭖ ﺋﻮﻳﻼﻳﺪﯨﻐﺎﻥ ﮬﻪﺭ ﺑﯩﺮ ﻛﯩﺸﯩﻨﻰ ﺑﯘ ﻣﻪﺳﯩﻠﯩﻨﻰ ﭼﻮﯕﻘﯘﺭ ﺋﻮﻳﻼﭖ ﻛﯚﺭﯛﺷﻜﻪ ﺗﻪﯞﺳﯩﻴﻪ ﻗﯩﻠﯩﻤﻪﻥ .
ﻣﻪﻥ ﺩﻭﭘﭙﺎ ﻛﯩﻴﯩﺸﻨﻰ ﺋﺎﺩﻩﺕ ﻗﯩﻠﻤﯩﻐﺎﻥ ﺋﺎﺩﻩﻣﮕﻪ " ﺑﻪﻙ ﻳﺎﺭﺍﺷﺘﻰ " ﺩﻩﭖ ﺩﻭﭘﭙﺎ ﻛﯩﻴﺪﯛﺭﯛﭖ ﻗﻮﻳﺴﺎﻡ ، ﺋﯘ ﻣﯧﻨﯩﯔ ﻛﯚﯕﻠﯜﻣﻨﻰ ﺋﺎﻳﺎﭖ ﻛﯩﻴﯩﭗ ﻗﻮﻳﻐﯩﻨﻰ ﺑﯩﻠﻪﻥ ﻛﯚﯕﻠﯩﺪﻩ ﺋﯚﺯﯨﮕﻪ ﻳﯜﻙ ﮬﯧﺴﺎﺑﻼﭖ ، ﺑﯩﺮ ﺩﻩﻣﺪﯨﻦ ﻛﯧﻴﯩﻦ ﺑﯧﺸﯩﺪﯨﻦ ﺋﯧﻠﯩﯟﯦﺘﯩﺪﯗ ، ﻛﯩﻴﻤﻪﻳﺪﯗ ﻳﺎﻛﻰ ﺗﺎﺷﻠﯩﯟﯦﺘﯩﺪﯗ . ﺑﯘ ﺋﯚﺯﯨﻤﯩﺰﻧﻰ ، ﺋﯚﺯ ﺋﻪﻣﮕﻪﻛﯩﻤﯩﺰﻧﻰ ، ﺋﯚﺯ ﺧﻮﺗﯘﻥ- ﻗﯩﺰﻟﯩﺮﯨﻤﯩﺰﻧﻰ ، ﺋﯩﻨﺴﺎﻧﯩﻲ ﻏﯘﺭﯗﺭﻟﯩﺮﯨﻤﯩﺰﻧﻰ ﺧﻮﺭﻟﯩﻐﺎﻧﻠﯩﻖ ﺑﻮﻟﻤﺎﻱ ﻧﯧﻤﻪ ؟
ﺑﯩﺰ ﺩﻭﺳﺘﻠﯩﺮﯨﻤﯩﺰﻏﺎ، ﺋﻪﺗﯩﯟﺍﺭﻟﯩﻖ ﻣﯧﮭﻤﺎﻧﻠﯩﺮﯨﻤﯩﺰﻏﺎ ﺑﻮﯞﯨﻠﯩﺮﯨﻤﯩﺰﻏﺎ ﺋﻮﺧﺸﺎﺵ ﺧﻪﻧﺠﻪﺭ ، ﭘﯩﭽﺎﻕ ﺗﻪﻗﺪﯨﻢ ﻗﯩﻼﻳﻠﻰ . ﺋﯘﻳﻐﯘﺭﻻﺭﻧﯩﯔ ﻧﻪﻗﯩﺸﻠﻪﻧﮕﻪﻥ ﻛﯚﺭﻛﻪﻡ، ﺭﻩﯕﺪﺍﺭ ﺩﻩﺳﺘﯩﻠﯩﻚ ﭘﯩﭽﺎﻗﻠﯩﺮﯨﻤﯘ ﺩﻭﺳﺘﻠﯘﻕ ﺑﻪﻟﮕﯩﺴﻰ ﺑﻮﻻﻻﻳﺪﯨﻐﯘ ؟ ﺩﻭﭘﭙﺎ ﻛﯩﻴﯩﺶ ﺋﺎﺩﯨﺘﻰ ﻳﻮﻕ ﺋﺎﺩﻩﻡ ﺑﺎﺯﺍﺭﺩﯨﻦ ﺋﯚﺯﻯ ﺳﯧﺘﯩﯟﯦﻠﯩﭗ ﻛﯩﻴﺴﻪ ، ﺑﯘ ﺋﯘﻧﯩﯔ ﻗﯩﺰﯨﻘﯩﺸﻰ ﺑﻮﻟﯩﺪﯗ . ﺋﯘﻣﯘ ﻣﻪﻟﯘﻡ ﯞﺍﻗﯩﺖ ﻛﯩﻴﯩﭗ ﺑﺎﻗﯩﺪﯗ . ﺑﯘ ﺋﯚﺯﯨﻨﯩﯔ ﺋﯩﺸﻰ .
ﺑﯩﺰﻧﯩﯔ ﺑﯩﺮ - ﺑﯩﺮﯨﻤﯩﺰﻧﯩﯔ ﺑﺎﺵ ﻛﯩﻴﯩﻤﯩﻨﻰ ﺑﯧﺸﯩﻤﯩﺰﻏﺎ ﺩﻭﻣﯩﻼﭖ ﺑﺎﻗﯩﺪﯨﻐﺎﻥ ، ﻛﯩﻴﯩﭗ ﺑﺎﻗﯩﺪﯨﻐﺎﻥ ، ﮬﻪﺗﺘﺎ ﺋﺎﺭﯨﻴﻪﺕ ﺋﺎﻟﯩﺪﯨﻐﺎﻥ ﺋﯩﻠﯩﺮﯨﻤﯩﺰﻣﯘ ﺑﺎﺭ . ﺑﯘ ﺑﯩﺰﻧﯩﯔ ﻣﻪﺩﯨﻨﯩﻴﻪﺕ ﺋﻪﺧﻼﻗﯩﻤﯩﺰﺩﺍ ﺋﯩﻨﺘﺎﻳﯩﻦ ﻳﺎﻣﺎﻥ ﺋﺎﻟﯩﺪﯨﻐﺎﻥ ﻛﺎﻟﯟﺍ ﻗﯩﻠﯩﻖ .
ﮬﺎﺯﯨﺮ ﺑﻪﺯﻯ ﻛﯩﺸﯩﻠﻪﺭ ﺋﯚﺯﻟﯩﺮﯨﻨﯩﯔ ﺋﯘﻟﯘﻍ ﻛﻪﺷﭙﯩﻴﺎﺗﯩﻨﻰ ﺑﯜﻳﯜﻙ ﺳﯩﻤﯟﻭﻝ ، ﺋﯚﻟﻤﻪﺱ ﻳﺎﻟﺪﺍﻣﺎ ﺳﯜﭘﯩﺘﯩﺪﻩ ﺋﯚﻳﻠﯩﺮﯨﻨﯩﯔ ﺗﯚﺭﯨﺪﻩ ، ﺳﺎﻧﺪﯗﻗﻠﻘﺮﻗﺪﻩ ﺋﻪﺗﯩﯟﺍﺭﻻﭖ ﺳﺎﻗﻼﯞﺍﺗﯩﺪﯗ . ﺑﯘ ﺩﻭﭘﭙﯩﻼﺭ ﮬﯧﻴﺖ ﻧﺎﻣﯩﺰﻯ ﺋﻮﻗﯘﻟﻐﺎﻥ ﻛﯜﻧﻠﻪﺭﺩﻩ ﺋﯘﻳﻐﯘﺭ ﺋﻪﺭﻟﯩﺮﯨﻨﯩﯔ ﺑﯧﺸﯩﺪﺍ ، ﭼﺎﭼﻠﯩﺮﯨﻨﻰ ﻗﯩﺮﯨﻖ ﺗﺎﻝ ﻗﯩﻠﯩﭗ ﺋﯚﺭﯛﯞﯨﻠﻐﺎﻥ ﺋﯘﻳﻐﯘﺭ ﻗﯩﺰﻟﯩﺮﯨﻨﯩﯔ ﺑﯧﺸﯩﺪﺍ ﺟﻪﯞﻻﻥ ﻗﯩﻠﯩﺪﯗ . " ﺑﺎﺩﺍﻡ ﺩﻭﭘﭙﺎ، ﭼﯩﻤﻪﻥ ﺩﻭﭘﭙﺎ ، ﺋﺎﻗﺎﺭ ﻳﻮﻟﺪﺍ ﺗﯜﻣﻪﻥ ﺩﻭﭘﭙﺎ " ﺑﻮﻟﯩﺪﯗ .
ﻧﯘﺭﻏﯘﻥ ﺗﻪﺭﻩﻗﻘﻰ ﺗﺎﭘﻘﺎﻥ ﺋﻪﻟﻠﻪﺭﺩﻩ ﺋﯚﺯﻟﯩﺮﯨﻨﯩﯔ ﻛﯩﻼﺳﺴﯩﻚ ﻧﻪﺭﺳﯩﻠﯩﺮﯨﻨﻰ ، ﮬﻪﺗﺘﺎ ﺋﺎﺩﺩﯨﻲ ﺑﯩﺮﻩﺭ ﭘﺎﺭﭼﻪ ﺭﻩﺳﯩﻤﻠﯩﺮﯨﻨﯩﻤﯘ ﻗﻪﺩﯨﺮﻟﻪﭖ ﺋﯧﺴﯩﭗ ﻗﻮﻳﯩﺪﯨﻜﻪﻥ . ﺑﯩﺰ ﺋﯚﺯ ﺧﻮﺗﯘﻥ - ﻗﯩﺰﻟﯩﺮﯨﻤﯩﺰﻧﯩﯔ ﻳﯜﺭﻩﻙ ﻗﯧﻨﻰ ﺳﯩﯖﮕﻪﻥ ﺑﯘ ﺋﯘﻟﯘﻍ ﻛﻪﺷﭙﯩﻴﺎﺗﻨﻰ ﺋﻪﺯﯨﺰﻟﯩﺴﻪﻙ ، ﺋﻪﯓ ﻳﯘﻗﯘﺭﻯ ﺋﻮﺭﯗﻧﺪﺍ ﺳﺎﻗﻠﯩﺴﺎﻕ ، ﺋﯚﻳﯩﻤﯩﺰﻧﯩﯔ ﺗﯚﺭﯨﮕﻪ ﺋﯧﺴﯩﭗ ﻗﻮﻳﺴﺎﻕ ﻧﯩﻤﯩﺸﻘﺎ ﺑﻮﻟﻤﺎﻳﺪﯨﻜﻪﻥ ؟ ﺑﯩﺰ ﺩﻭﭘﭙﯩﻤﯩﺰﻧﻰ ﻗﺎﻧﭽﻪ ﻗﻪﺩﯨﺮﻟﯩﺴﻪﻙ ﺋﯚﺯﯨﻤﯩﺰﻧﻰ ﺷﯘﻧﭽﻪ ﻗﻪﺩﯨﺮﻟﯩﮕﻪﻥ ﺑﻮﻟﯩﻤﯩﺰ .
ﭼﯜﻧﻜﻰ ، ﺑﯘ ﺑﯩﺰﺩﻩ ﮬﺎﺯﯨﺮﻏﯩﭽﻪ ﺋﯚﻟﻤﻪﻱ ، ﺩﻩﯞﺭﻟﻪﺭﻧﯩﯔ ﺋﺎﻟﻤﯩﺸﯩﺸﯩﻐﺎ ﺑﻮﺭﺍﻥ - ﭼﺎﭘﻘﯘﻧﻼﺭﻏﺎ ﺑﻪﺭﺩﺍﺷﻠﯩﻖ ﺑﯧﺮﯨﭗ ﺑﯩﺰ ﺑﯩﻠﻪﻥ ﺗﻪﯓ ﻳﺎﺷﺎﭖ ، ﮬﺎﻳﺎﺗﯩﻲ ﻛﯜﭼﯩﻨﻰ ، ﻳﺎﺷﻠﯩﻘﯩﻨﻰ ، ﮔﯜﺯﻩﻟﻠﯩﻜﯩﻨﻰ ، ﻧﻪﭘﯩﺴﻠﯩﻜﯩﻨﻰ ﻳﻮﻗﺎﺗﻤﺎﻱ ﻛﯧﻠﯩﯟﺍﺗﻘﺎﻥ ﺑﯩﺮﺩﯨﻨﺒﯩﺮ ﺑﻪﻟﮕﯩﺪﯗﺭ . ﺋﻪﮔﻪﺭ ﺑﯘﻧﯩﻤﯘ ﻳﻮﻗﯩﺘﯩﭗ ﻗﻮﻳﺴﺎﻕ ﻳﻪﻧﻪ 50 ﻳﯩﻠﺪﯨﻦ ﻛﯧﻴﯩﻦ ﺑﺎﺵ ﻛﯩﻴﯩﻤﺴﯩﺰ ، ﮬﯧﭽﻘﺎﻧﺪﺍﻕ ﺧﺎﺳﻠﯩﻘﻰ ﻳﻮﻕ ﺑﯩﺮ ﻣﯩﻠﻠﻪﺕ ﺑﻮﻟﯘﭖ ، ﺑﯩﺮ ﺗﻮﭖ ﺋﺎﺩﻩﻡ ﺋﺎﺭﯨﺴﯩﺪﺍ ﻳﯩﺘﯜﭖ ﻛﻪﺗﺴﻪ ﺗﺎﭘﻘﯩﻠﻰ ﺑﻮﻟﻤﺎﻳﺪﯨﻐﺎﻥ ﺋﺎﺩﻩﻣﮕﻪ ﺋﺎﻳﻠﯩﻨﯩﭗ ﻗﺎﻟﯩﻤﯩﺰ .
ﺋﻪﺧﺘﻪﻡ ﺋﯚﻣﻪﺭﻧﯩﯔ <ﺋﯚﺯﯨﻤﯩﺰﻧﻰ ﯸﺘﯩﺮﺍﭖ ﻗﯩﻼﻳﻠﻰ> ﺩﯦﮕﻪﻥ ﻛﯩﺘﺎﯞﯨﺪﯨﻦ ﺋﯧﻠﯩﻨﺪﻯ
مەنزىل-http://reshid.blogbus.com/logs/62682148.html