رۇبائىيلار

باشتۇغ

	رۇبائىيلار باشتۇغ 1 سەن مەيلى ئالىم بول ياجاھان شاھى ، ئىچەرسەن بىر كۈنى ئەجەل شارابى . ئىلىمنىڭ ئىزلىرى ئۆچمەس مەڭگۈگە ، گۇۋاھتۇر بۇنىڭغا مەھمۇد ، فارابى . 2 ھۆرمەتكە سازاۋەر ھەقنى-ھەق دىگەن ، رىسقىنى ئەجىردىن ھالاللاپ يېگەن . تەشنالىق ئىچىدە ئۆلىدۇ بىر كۈن ، سۈيىنى ئىچىپلا قۇدۇققا سىيگەن . 3 قۇياش ئۇ زىمىنغا تۆككەچكە زەرنۇر ، جىمىكى كائىنات ئالىدۇ ھۇزۇر . شۇنداقمۇ ئادەملەر باردۇر ئارىدا ، ھەتتاكى قۇياشتىن ئىزدەيدۇ قۇسۇر . 4 بولمىغاچ ناداننىڭ مەيدانى ، ئېپى ، خۇشياقارنىڭ دۈشمەننىڭ نەغمىسى دېپى . بۇنداقلار بۇلۇشقا يارايدۇ پەقەت - يىلتىزنى چانىغان پالتىنىڭ سېپى . 5 بار بولسا قەلىپتە ئۇلۇغ ئىرادە ، ئەمەلگە ئاشقۇسى ھەر قانداق غايە . غايىسىز، نىشانسىز ياشاپ يۈرگەندىن ، مىڭ ياخشى چۆللەردە چالسا ساپايە . 2014-يىل12-ئاي ئاۋات

korlaayxamsadir

	باشتۇغ، شېئىرىڭىز بەك ياخشى يىزىلىپتۇ، مەن ياقتۇرۇپ ئوقۇدۇم.

Janbar

	3- رۇبائىينى بىر ژۇرنالدا ئوقۇغاندەك قىلىمەن. سىز بۇ رۇبائىيلارنى مەتبۇئاتلارغا بەرگەنمىتىڭىز؟ ياكى بىرەر مىسراسى ئوخشىشىپ قالدىمۇ- قەيەردە كۆرگىنىمنى ئەسكە ئالالمىدىم.

باشتۇغ

	Janbar يوللىغان ۋاقتى  2014-12-15 02:15 PM 3- رۇبائىينى بىر ژۇرنالدا ئوقۇغاندەك قىلىمەن. سىز بۇ رۇ ... بۇلار مېنىڭ ئىجادىيىتىم . بەلكى 3-رۇبائىي ناھايتى ياخشى چىققان ئوخشايدۇ . بىر ھەۋەسكار قەلەمكەش بۇلۇش سۈپىتىڭىز بىلەن بۇنداق (مۆجىمەل) ئىنكاسنى ئالدىراپ يېزىشىڭىز توغرا ئەمەسقۇ دەيمەن ؟. ژۇرنالغا يەنىمۇ تەپسىلى قاراپ باققايسىز ، راستىنلا بار بولسا ئاندىن يازسىڭىزمۇ كېچىكىپ قالمايسىز؟.

axek13999649893

	ھەر بىر جان ئۆلۈمنىڭ تەمىنى تىتييدۇ

Janbar

	يۇقارقى ئىنكاسىمدىن خىجىلمەن. مەن ئېنىق تەكشۈرۈپ كۆرمەيلا يېزىلغان بۇ ئىنكاسىم ھەقىقەتەن توغرا بولماپتۇ. مەن مۇشۇ مۇناسىۋەت بىلەن قېرىندىشىم باشتۇغدىن ۋە مۇنبەردىكى بارلىق قېرىنداشلاردىن ئەپۇ سورايمەن. يالقۇن روزى: «پاكىت ۋە ئاساسسىز گەپ قىلىدىغان ئوبزۇرچى قۇرۇق گەپ قىلىدىغان ئوبزۇرچى» (مۇشۇنداقراق ئېسىمدە قاپتىكەن) دېگەن ئىدى. مەن بۇ تېمىدا پاكىتسىزلا گەپ قىلىپ قۇرۇق گەپ قىلغانلىقىمدىن ھەممەيلەندىن ئۆزرىلىك سورايمەن. ھەم بۇنىڭدىن كېيىنمۇ مۇشۇنداق ئىشلاردا پاكىتسىز ھالدا سۆزلەشتىن ئۆزۈمنى تارتىمەن. باشتۇغدىن يەنە بىر قېتىم كەچۈرۈم سورايمەن. ئىجادىيەتلىرىڭىزگە تېخىمۇ زور ئۇتۇقلار يار بولسۇن!

bulaksu2

	Janbar يوللىغان ۋاقتى  2014-12-15 05:14 PM يۇقارقى ئىنكاسىمدىن خىجىلمەن. مەن ئېنىق تەكشۈرۈپ كۆرم ...          قۇسۇر ۋە ئۇچۇر    ئۇ مۇنداقكەن، بۇ ئۇنداقكەن دەپ،    قۇياشتىنمۇ ئىزدەيمىز قۇسۇر.    قۇسۇر ئىزدەش بىلەن ھەلەك بىز،    ئۆتۈپ كېتەر پۇرسەت ۋە ئۇچۇر.     بۇ «بۇلاققا سىرداش خىياللار» (2000- يىلى نەشىر قىلىنغان) ناملىق شېئىرلار توپلامىمنىڭ 144- بېتىدىكى بىر پارچە. بۇ پارچە قەشقەر ئۇيغۇر نەشرىياتى ئىشلىگەن «رۇبائىيلىق كالېندار» ناملىق كالېندارغىمۇ بېسىلغان. ئالىمجاننىڭ دېگەن گېپىنىڭ ئاساسى مۇشۇ بولسا كېرەك!     ئىككىنچى مىسرا ئاساسەن ئوخشايدىكەن، ئىزنا بار. ئەمما مەن مېنىڭ شېئىرىمنى كۆچۈرگەن دېمەيمەن، ئوخشاپ قالغان بولىشى مۇمكىن. دېمەكچى بولغىنىم: ئالىمجاننى ئەيىپلەشكىمۇ بولمايدۇ. مۇشۇنى تۇتقا قىلىپ، تىرناق ئاستىدىن كىر ئىزدەشكە ۋە سوقۇشۇشقا بولمايدۇ. ھەممىڭلەرگە رەھمەت!

نىلۇفەر

	ياقتۇردۇم، داۋاملىق يېزىپ تۇرغايسىز!

باشتۇغ

	ئەستايىدىل چۈشەنچە بەرگەنلىرىگە رەھمەت ئۇستاز . مەن سىلىنىڭ ئۇ شېئىرلىرىنى كۆرمىگىنىم راست ، مەن سىلىنىمۇ يېقىندىلا تۇنۇدۇم . توردا سىلىنىڭ شېئىرلىرى بىلەن تۇنۇشۇش ئارقىلىق سىلىنىڭ شېئىرلىرىدا بىر خىل تەشنالىققا مەلھەم بولغىدەك ھىسياتنىڭ بارلىغىنى ھىس قىلدىم ، شۇنىڭ بىلەن ئىككى ئايدەك بولدى ماتىرياللاردىن سىلىنىڭ شېئىرلىرىنى ئىزدەپ كۆرىدىغان بولدۇم . ئەگەر بۇ رۇبائىينى(رۇبائىي دەپ كەتكىلىمۇ بولمايدۇ)يېزىشتىن بۇرۇن سىلىنىڭ ئۇ شېئىرلىرىنى كۆرگەن بولسام بۇ مىسرانى بەلكىم باشقىچە ئېلىشىممۇ مۈمكىنتۇلا . لېكىن : قۇياش ئۇ زىمىنغا تۆككەچكە زەرنۇر ، جىمىكى كائىنات ئالىدۇ ھۇزۇر ، شۇنداقمۇ ئادەملەر باردۇر ئارىدا ، دىگەنلەرنى يازغان ھەرقانداق قەلەمكەشنىڭ كاللىسىغا : ‹‹ھەتتاكى قۇياشتىن ئىزدەيدۇ قۇسۇر ›› دىگەندىن ياخشىراق مىسرا كەلمىسە كېرەك . سىلىگە ئۇتۇق يار بولسۇن .