شىددەتلىك ياغقان ھۆل – يېغىن ئاسىيا قىتئەسىدىكى كۆپلىگەن دۆلەتلەردە كۈندىلىك تۇرمۇشنى پالەچ ھالغا چۈشۈرۈپ قويماقتا.

جۇڭگودا نورمال سەۋىيەنىڭ ئۈستىدە ياغقان مەۋسۇملۇق ھۆل – يېغىن ھاياتنى پالەچ ھالغا كەلتۈرۈشنى داۋاملاشتۇرماقتا. ئولتۇراق جايلىرىنى خەرىتىدىن ئۆچۈرۈپ تاشلىغان ۋە بىر قىسىم سۇ ئامبارلىرىنىڭ توغانلىرىنى ئۆرۈپ تاشلىغان سەل ئاپىتىدە، رەسمىي مەلۇماتلارغا كۆرە 928 كىشى ھاياتىدىن ئايرىلغان، 447 كىشى ئىز – دېرەكسىز يۇقاپ كەتكەن بولۇپ، جەمئىي زىيان 26 مىليارد دوللاردىن ئېشىپ كەتكەن. شەرقىي شىمالدىكى جىلىن ئۆلكىسىدە سەل ئاپىتى، مۇھىت پالاكىتى بىلەن بىرلىشىپ كەتتى. سۇڭخۇاجياڭ دەرياسى بويىدىكى بىر زاۋۇتتىن مىڭلارچە ۋارىل زەھەرلىك خېمىيىلىك ماددىنىڭ سۇغا ئارىلىشىپ كەتكەنلىكى بىلدۈرۈلمەكتە. تەخمىنەن 500 توننىلىق زەھەرلىك ماددىنىڭ سۇغا ئارىلىشىپ كەتكەنلىكى تەخمىن قىلىنماقتا. بۇ ئەھۋال ئېنىقلانغاندىن كېيىن، 4 يېرىم مىليون كىشى ياشايدىغان جىلىن رايونىنىڭ سۇيى توختىتىلدى.

پاكىستاندا بولسا، دۆلەتنىڭ غەربىي شىمالىدىكى خەيبەر – پاكتۇنۋا ئۆلكىسىدە مۇسون يامغۇرلىرى كەلتۈرۈپ چىقارغان سەل ئاپىتىدە ھاياتىدىن ئايرىلغانلارنىڭ سانى 267 گە چىقتى.

سەل ئاپىتىدە يۈزلەرچە ئۆي ۋە ئىش ئورنىنىڭ سۇ ئاستىدا قالغانلىقى، كۆپ ساندا يول ۋە كۆۋرۈكنىڭ زىيانغا ئۇچرىغانلىقى بىلدۈرۈلدى.

100 مىڭدىن ئارتۇق كىشىنىڭ زىيانغا ئۇچرىشىغا سەۋەب بولغان ئاپەت رايونىدىكى ياردەم بېرىش ۋە قۇتقۇزۇش خىزمەتلىرى داۋاملاشماقتا.

شىددەتلىك ھۆل – يېغىننىڭ دۆلەتنىڭ جەنۇب ۋە ئوتتۇرا قىسىملىرىغا تەسىر كۆرسىتىشنى داۋاملاشتۇرىدىغانلىقى قەيت قىلىنماقتا.

ھەر يىلى ئىيۇل ئېيىنىڭ ئوتتۇرىلىرىدىن ئاۋغۇست ئېيىنىڭ ئاخىرىغىچە داۋاملىشىدىغان مۇسون يامغۇرلىرى، جەنۇبىي ئاسىيا دۆلەتلىرىدە مىڭلارچە كىشىنىڭ ھاياتىدىن ئايرىلىشى ۋە ئۆي – ماكانسىز قېلىشىغا سەۋەب بولىدۇ.