نەۋرە ئاكام ھەم دوستۇم "بەختىيار"نىڭ تويىغا ئاتاپ:
تــۇقــقانــلار
مۇخەممەس
نىيازئەلى ئادىل(تۈن لىرىكىسى)
بىز قېرىنداش، بىز قانداش تاشلاشمايلى تۇققانلار،
يالاڭاچنىڭ يېغرىنى تاتلاشمايلى تۇققانلار،
ئارقىمىزدىن گەپ تېپىپ داتلاشمايلى تۇققانلار،
شەيتانلارغا ئالدىنىپ چاچلاشمايلى تۇققانلار،
ياشانغاندا يامانلاپ ياتلاشمايلى تۇققانلار.
ئەسكى چاپان، ئەسكى ئۆي قىلالىغان بىزنى جەم،
روناق تاپتۇق تۇرمۇشمۇ بولۇپ قالدى خاتىرجەم،
ئەمما تۇققان ئارسىدا مىھرى-ۋاپا بولدى كەم،
ئۇزاتتۇق توي-ماتەمنى ئۇرۇق تۇققان بولماي جەم،
خۇشاللىقتا قايغۇدا تاشلاشمايلى تۇققانلار.
بىرسى ئوغۇل ئۆيلىدى، قىزلار بويىغا يەتتى،
بىرسى يىغلىتىپ زار-زار ئاردىن بىمەھەل كەتتى،
نەزىر بولدى توي بولدى شەرىپىگە ئاش ئەتتى،
جەم بولۇپ يىمەي بىر ئاش گاھىلار قېيدىشىپ كەتتى،
كىچىك ئىشقا يامانلاپ باتناشمايلى تۇققانلار.
كوچىلاردا سۆزلىدى ئۆيدە دېگىنى يەتمەي،
"دەستۇرخانغا چاي قۇيدى ئوخشۇتۇپ تاماق ئەتمەي،
شۇ تويدا مەن ئاچ قالدىم ئەتكەن تامىقى يەتمەي،"
ئۆتمەمدۇ بىرەر تويمۇ بىرى قېيدىشىپ كەتمەي؟
تاماق ئۈچۈن تويلاردا قېيداشمايلى تۇققانلار.
شەرىپىگە توي بەردۇق بويىغا يېتىپ ئۇچقاننىڭ،
رەھمەت ئېيتتۇق قەدىمىگە يىراق يەردىن چىققاننىڭ،
ئاسانمۇ كەلمىكى تويغا بۆلەك ئۆينى تۇتقاننىڭ،
ئاسان ئەمەس ھەم شۇنداق جەم بولمىقى تۇققاننىڭ،
يىراق يېقىن بولساقمۇ يوقلىشايلى تۇققانلار.
خۇدا بۇيرۇپ بۇ تويدا ئۇرۇق-تۇققان جەم بولدۇق،
كېلەلمىدى گاھىلار بەلكىم يەنە كەم بولدۇق،
كېلەلمىسە خەيىر دەپ بىزمۇ توغرا چۈشەندۇق،
چالە سازچى سازىڭنى ئۇسۇللارغا تەق بولدۇق،
"بەختىيار"نىڭ بەختىگە شوق ئوينايلى تۇققانلار.
2011-يىلى 18-ماي چارشەنبە
مۇڭغۇلكۈرە شوتا يېزىسى
