ئارزۇيۇم
(كاتالىنا گىمەيىس)
(نۇرگۈل ھېيت تەرجىمىسى)
مەن سىزنىڭ ھايات ۋاقتىمدا ماڭا كۆپرەك ھەمرا بولىشىڭىزنى خالايمەنكى، ئۆلگەندىن كېيىن يېنىمدا نەچچە كېچە- كۈندۈز ماتەم تۇتۇپ تۇرىشىڭىزنى خالىمايمەن.
مەن ھايات ۋاقتىمدا قولۇمنى ئىللىق قولىڭىز بىلەن تۇتۇپ تۇرىشىڭىزنى خالايمەنكى، ئۆلگىنىمدە مېنى قۇچاقلاپ زار-زار يىغلىشىڭىزنى خالىمايمەن.
مەن سىزنىڭ ھايات ۋاقتىمدا بىرەر قېتىم بولسىمۇ تېلېفون بېرىپ ئەھۋالىمنى سوراپ قويىشىڭىزنى ئارزۇ قىلىمەن.ئۆلگىنىمدىن كېيىن قەبرەمنى دائىم يوقلاپ تۇرىشىڭىزنى خالىمايمەن.
مەن سىزنىڭ ئۆلگەن چېغىمدا ناھايىتى گۈزەل گۈللەردىن گۈلدەستە تىزىپ قايغۇلۇق ھىسياتىڭىزنى ئىپادىلىگىنىڭىزدىن ھايات ۋاقتىمدا بىر تال گۈل تەقدىم قىلىشىڭىزنى شۇنداق ئارزۇ قىلىمەن.
مەن سىزنىڭ ئۆلگەن چېغىمدا دەپنىمە مۇراسىمىدا كىشلەرنىڭ يۈرەك- بارىنى ئېزىۋىتىدىغان مەرسىيەلەرنى ئوقۇغاندىن كۆرە، ھايات ۋاقتىمدا ماڭا ئىلھام مەدەت بېرىدىغان سۆزلەرنى قىلىشىڭىزنى شۇنداق ئارزۇ قىلىمەن.
مەن سىزنىڭ ئۆلۈمۈمدىن كېيىن قەبرە تېشىمغا شېئىر بىلەن قەبرە تەزكىرىسى يېزىپ يۈرمەستىن، ھايات ۋاقتىمدا ماڭا پىچىرلاپ تۇرۇپ دۇئا-تىلاۋەت قىلىشىڭىزنى تولىمۇ ئارزۇ قىلىمەن.
مەن سىزنىڭ مەن ئۆلگەندىن كېيىن داستان- دەستۇرلارنى يېزىپ مېنى خاتىرلىگىنىڭىزدىن مەن ھايات ۋاقتىمدا يېقىن ئولتۇرۇپ مۇڭدىششىڭىزنى تولىمۇ خالايمەن.
مەن سىزنىڭ ھايات چېغىمدا تارتىنىپ تۇرۇپ كۆڭۈل ئىزھارى قىلىشىڭىزنى شۇنداق خالايمەن، لېكىن سىزنىڭ مەن ئۆلگەندىن كېيىن نىمىشقا ئېغىز ئاچمىغان بولغىيدىم دەپ پۇشايمان قىلىشىڭىزنى خالىمايمەن.
مەن ھايات چېغىمدا سىزنىڭ ئىنتىزارلىققا تولغان كۆزىڭىزنى كۆرۈشنى خالايمەن، ئۆلگىنىمدىن كېيىن سىزنىڭ نىمىشقا بىللە ياشاش پۇرسىتىنى قولدىن بېرىپ قويغان بولغىيدىم دەپ پۇشايمان ئوتىدا ئازابلىنىشىڭىزنى خالىمايمەن.
ھازىرنى قەدىرلەيلى!!! بىز ۋە ئەتراپىمىزدىكىلەر تېخى ھايات چېغىمىزدا ئارمانلىرىمىزغا يېتەيلى!!!!
«تەرمىلەر» ژورنىلىدىن
