ھازىر جەمئىيىتىمىزدە بالىلارنى تەربىيىلەش توغرۇلۇق نۇرغۇن كۆز قاراشلار بار . بۇلۇپمۇ ھازىرقىدەك زامانىۋىلىشقان، ئەركىن - باياشات، تۇرمۇش شارائىتىدا تېخىمۇ شۇنداق . ھازىرقى ئاتا-ئانىلار ئۆزلىرىنىڭ ئالدىراشلىغى سەۋەبى بالىلىرىنىڭ تەربىيەسىگە سەل قاراۋاتىدۇ . ئۇلارنىڭ تەربىيەسىنى پەقەت مەكتەپنىڭ تەربىيەسى بىلەنلە چەكلەپ قويىۋاتىدۇ . ئاتا-ئانىلار بالىلىرىنىڭ ئۆزلىرىدىن ئالغان تەربىيەنىڭ ھەقىقىي مۇھىم رول ئوينايدىغانلىغىنى ئېسىدىن چىقىرىپ قويىۋاتىدۇ .بىزگە لازىمى بالىلارنىڭ مەكتەپنى ئەلا نەتىجە بىلەن پۈتتۈرۈپ ، ئېسىل ئالى مەكتەپلەردە ئوقۇپ ياخشى خىزمەتلەرگە ئورۇنلىشىلا ئەمەس. بەلكى شۇ بالىلىرىمىزنىڭ ئىچكى دۇنياسىدىكى ھەقىقىي "ئۇ" نىڭ قانداق ئادەم بولۇپ يېتىلىشىدە، بۇ ھەرگىزمۇ سەل قارايدىغان ئىش ئەمەس . ئاتا-ئانىلارنىڭ بالىغا بەرگەن تەسىرى ۋە تەربىيەسى بالىنىڭ قانداق ئادەم بۇلۇپ يېتىلىشىگە چوڭ مۇھىم رول ئوينايدۇ . بالىلىرىمىزنىڭ رەھىمسىز ، شەخسيەتچى ئادەم بۇلۇپ قىلىشىدىن ئەنسىرىمەمدۇق؟
بۇنداق بالىلار ھازىرقى جەمىيىتىمىزدە ئاز ئەمەس . چوڭلارنى ھۆرمەت قىلمايدىغان ، ئاتا-ئانىسىنى سىلكىيدىغان ، گېپىنى ئاڭلىمايدىغان ئەھۋاللار ئىنتايىن نورمال ھالەت بولۇپ قالدى . بۇرۇنقىدەك چوڭلارنى كۆرسە سالام - سائەت قىلىدىغان ، ئاتا-ئانىسىدىن تەپ تارتىدىغان ، ئاتا-ئانىسىنىڭ دىگىنىنى قىلىدىغان بالىلارنى ھازىر تاپقىلى بولمايدۇ . بۇنىڭ سەۋەبىنى بەزى ئاتا-ئانىلار بولسا بالىلىرىنىڭ ئوقۇۋاتقان مەكتىۋىدىن ، جەمىيەتتىن كۆرىدۇ . لېكىن مۇشۇنداق مەسئۇلىيەتنى ئىتتىرىشتىن بۇرۇن ئۆز ئۈستىمىزدە ئوبدان ئويلىنىپ باقتۇقمۇ !؟ بالىلىرىمىزنىڭ نىمە خىيال قىلىۋاتقانلىغىنى ، نىمىگە مۇھتاج ، نىمىدىن يىرگىندىغانلىغىنى بىلەمدۇق ؟! مېنىڭچە بىلمەيمىز . سەۋەبى شۇكى :
بالىلىرىمىزغا بولغان ئاتا-ئانىلىق مىھىر - مۇھەببەتنىڭ ئورنى ئىقتىساد بىلەن تەمىنلەشكە ئۆزگەردى. بالىلىرىمىزنىڭ ئاغزىدىن چىققاننى ئامال
بار پۇلغا سېتىۋېلىپ رازى قىلىۋاتىمىز . مانا بۇ ھازىرقى زامان ئاتا -ئانىلارنىڭ ئاتالمىش مىھىر - مۇھەببىتى . بۇ مىھىر - مۇھەببەتنىڭ بالىلارنىڭ قەلبىلىرىنى زەئىپلەشتۇرۇپ ، كېيىن بەرمىسە بۇلاپ ئالىدىغان ، ئۆزىنىڭ دىگىنىگە ئېرىشمىسە ھەرگىز بولدى قىلمايدىغان رەزىل ئادەم بولۇپ قىلىشىدىن ئەنسىرمەمدۇق . بۇنداق ئەھۋاللارنى كۈندۈلۈك قانۇن خەۋەرلىرىدە كۆرۈپ تۇرۇپتىمىز .
بالىلىرىمىز بىلەن مۇڭدۇشۇپ ئاتا-ئانىلىق مىھىر-مۇھەببەت يەتكۇزىدىغان ۋاقىتلىرىمىزنى بولسا ، تۇگىمەس چايلىرىمىزغا ، تۇگىمەس دوستلار يىغىلىشىغا بېرىۋاتىمىز . بالىلىرىمىزغا بولسا كومپىيوتۇر ھەمرا بولىۋاتىدۇ . ئۇلارنىڭ نىمە ئىش قىلىۋاتقانلىغىنى ھەپتىلەپ ، ئايلاپ سوراپ قويمايمىز . ئەگەر دەرىسلەردىن چېكىنسە ، سەۋەبىنى سورىماستىن ئۇر توقماق قىلىمىز . بالىلىرىمىزنى قورقۇتۇپ جېنىنى ئالىمىز . بۇنداق قىلساق بالىلىرىمىزنىڭ كېيىنچە يالغانچى ، ئالدامچى نادان ئادەم بولۇپ قىلىشىدىن ئەنسىرىمەمسىلەر .
بالىلارغا بولغان تەربىيەنى ، دادا ئاپىغا ئىتتىرىپ قويغان ، ئاپا دادىغا ئىتتىرىپ قويغان .ھەر ئىككى تەرەپ ئۆزىنىڭ خىزمىتىنىڭ ئالدىراشلىغىنى سەۋەپ قىلىپ بىر-بىرى بىلەن جىدەل قىلىۋاتقان، نارىسىدە بالىلارنىڭ قەلبى ئىگە - چاقىسىز قالغان . بۇنداق بالىلارنىڭ چوڭ بولغاندا ، قەلب كۆزلىرى قاراڭغۇ ،مېھىر-مۇھەببەتسىز،رەھىمسىز ئادەم بولۇپ قىلىشىدىن ئەنسىرمەمسىلەر .
بالىلارنىڭ كەلگۈسى بىز ئۈچۈن شۈنچە ئەرزىمەس ئىشمۇ ؟! كونىلارنىڭ بىر گېپى بار :
<<قوغۇن تېرىغان يەردىن تاۋۇز ئۈنۈپ چىقمايدۇ ، بۇغداي تېرىغان يەردىن ئارپا ئۈنۈپ چىقمايدۇ >>. << ئاشلىقنى تېرىپ ، ئۇنى ئوغۇتلاپ ، ياۋا ئوتلارنى تازىلاپ ، كۇندە نەچچە ۋاق سۇ باشلاپ ، ئالدىرىماي پىشۇرۇپ ، خاماندا سامىنىنى بىر ياققا ، دېنىنى بىر ياققا قىلىپ ، تۇگمەندە تارتقاندىن كېيىن ئاندىن بىر تەخسە لەغمەن پىشىدۇ >> . مۇشۇنداق ئاددىي بىر ئەقەللى ساۋاتنى ھەممىمىز چۈشىنىمىز يۇ . بالىلىرىمىزنىڭ تەربىيەسىدەك ئۈلۈغ ۋەزىپىنى چۇشەنمەيمىز . بالىلىرىمىز ياخشى ئادەم بولمىسا ، دوڭگىمىگەن يېرىمىز قالمايدۇ . ئەزەلدىن ئۆز ئۈستىمىزدە ئويلىنىپ ، خاتالىقىمىزنى تۇنىمايمىز .
بالىلىرىمىزغا ئاللاھ توغرۈلۈق ئېغىز ئاچمايمىز . نىمنىڭ ھالال ، نىمىنىڭ ھاراملىغىدىن چۇشەنچە بەرمەيمىز . بالىلىرىمىزنىڭ ئىمانسىز بولۇپ قىلىشىدىن ئەنسىرمەيمىز .
ئاللاھ سىلەردىن رازى بولسۇن !
ئازراق ۋاقتىڭلارنى بالىلارغا ئاتاڭلار . بالىلار سىلەر ئېلىپ بەرگەن قىممەت باھالىق ئېسىل ھەدىيەلەرگە مۇھتاج ئەمەس. ئۇلار سىلەرنىڭ ئاتا-ئانىلىق مېھىر - مۇھەببىتىڭلار ، باشلىرىنى سىلاپ پىشانىلىرىگە سۆيۇشىڭلار ، ئۇلارنىڭ سورىغان سەبى سوئاللىرىغا كۆيۇمچانلىق بىلەن بەرگەن جاۋابىڭلار ، ئىللىق چىرايىڭلار بىلەن مۇڭدۇشۇپ قەلىبلىرىنى يورىتىدىغان ھەقىقىي مۇھەببەتكە مۇھتاج. ئاتا-ئانا بالىلارنىڭ ئۈگۈنىش ئۈلگىسى . بالىلارغا تەسىر كۆرسىتىدىغىنى با شقا نەرسە ئەمەس ، دەل ئاتا - ئانىنىڭ بالىنىڭ قەلبىگە كۆرسەتكەن تەسىر كۈچى ، بالىنىڭ كەلگۈسى قانداق ئادەم بولۇپ يېتىلىشى ئاتا-ئانىنىڭ بالىسىغا قانداق تەربىيە بېرىشى ۋە بالىنىڭ قەلبىدىكى ئوبرازىغا باغلىق ، ھەرگىزمۇ مەكتەپ ياكى جەمىيەت ئەمەس .
ئەپسۇس ! بالىلىرىمىزنى ئۆزىمىزنىڭ نابۇت قىلىۋاتقانلىغىمىزنى ھېس قىلمايۋاتىمىز .
ئۇلار بىزنىڭ كەلگۈسىمىز ، بىزنىڭ ئەۋلات چىراقلىرىمىز ، مىللىتىمىزنىڭ داۋامى . بالا تەربىيەسىگە سەل قارىمايلى !
قەلىمىم
