ئۆز خەۋىرىمىز : ‹‹ ھاۋاگۈل ئابلېز شىنجاڭ ج خ سېپىدىكى بىر بايراق ، مەن ئۇنىڭ ئۈچۈن بىر بېلەت تاشلايمەن ›› . بۇ ، 2–ئاپرېل قومۇلدا خىزمەتلەرنى كۆزدىن كەچۈرۈۋاتقان ئاپتونوم رايونلۇق پارتكومنىڭ مۇئاۋىن شۇجىسى ، ئاپتونوم رايوننىڭ رەئىسى نۇر بەكرىنىڭ ئېيتقان سۆزى .
قومۇل شەھەرلىك جامائەت خەۋپسىزلىكى ئىدارىسى قاتناش ساقچى چوڭ ئەترىتىنىڭ مۇئاۋىن باشلىقى ھاۋاگۈل ئابلىز يېقىندا مەملىكەتلىك ‹‹مەن ئەڭ ياخشى كۆرىدىغان خەلق ساقچىسى›› نى تاللاش نامزاتلار قاتارىغا كىرگەن بولۇپ ، نۇر بەكرى ھاۋاگۈل توغرۇلۇق مۇنۇلارنى بىلدۈردى : ‹‹ ھاۋاگۈل ئابلېزنىڭ ئۆز كەسپىگە سادىق بولۇپ ، پۈتۈن ۋۇجۇدى بىلەن خەلق ئۈچۈن خىزمەت قىلىشى مېنى تەسىرلەندۈردى ، ئۇنىڭ مەملىكەتلىك ‹ مەن ئەڭ ياخشى كۆرىدىغان خەلق ساقچىسى › نامزاتىبولۇپ سايلىنىشى ، شىنجاڭ خەلقى پەخىرلىنىدىغان بىر ئىش ›› .
مۇخبىرنىڭ قومۇل ھۆكۈمەت تورىدىن ئىگىلىشىچە ، 1–ئاپرېل ، قومۇل ۋىلايەتلىك پارتكومنىڭ شۇجىسى گو ليەنشەن ۋە مەمۇرىي مەھكىمىنىڭ ۋالىيسى گۈلشات ئابدۇقادىر قومۇل ھۆكۈمەت تورىدا ‹‹ بىز ھاۋاگۈل ئابلېز ئۈچۈن تەنتەنە قىلىمىز ›› نامىدىكى ئوچۇق خەتنى ئېلان قىلغان بولۇپ ، خەتتە ھاۋاگۈل ئابلېزنى ‹‹ قومۇللۇقلارنىڭ ياخشى قىزى ›› دەپ تەرىپلىگەن . خەتتە يەنە ‹‹ ھاۋاگۈل ئابلېز پۈتۈن مەملىكەتتىكى نامزاتلار ئىچىدە بىردىنبىر شىنجاڭلىق ساقچى . بۇ خەۋىرى يېتىپ كەلگەندە ، پۈتۈن يۇرتداشلار ئىچ ــ ئىچىدىن سۆيۈندى . ئۇ ساقچى فورمىسى كىيگەن 24 يىلدىن بۇيان ، ئۆزىنىڭ ئاددىيغىنە خىزمەت ئورنىدا ئۆز كەسپىگە سادىق بولۇپ ، پۈتۈن ۋۇجۇدى بىلەن خەلق ئۈچۈن خىزمەت قىلىپ ، قومۇلدىكى ھەر مىللەت خەلقلەرنىڭ كەڭ ئالقىشىغا سازاۋەر بولدى . ئۇ يەنە شىنجاڭدىكى ھەر مىللەت خەلقىنىڭ ئىتتىپاقلىشىش ، ئۆز ئارا مېھر ــ مۇھەببەت يەتكۈزۈشتەك ئىناق كەيپىياتنى نامايان قىلدى ، بىز ئۇنىڭ ئۈچۈن بېلەت تاشلايلى ، ھاۋاگۈل ئابلېز ئۈچۈن تەنتەنە قىلايلى ! ›› دەپ يېزىلغان .
شۇ كۈنى قومۇل ۋىلايەتلىك پارتكوم تەشۋىقات بۆلۈمى ، ۋىلايەتلىك ج خ ئىدارىسى ھاۋاگۈل ئابلېزغا بېلەت تاشلاشنى تەشەببۇس قىلىش پائالىيىتى ئۆتكۈزگەن .
ھاۋاگۈل ئابلېز نۇر بەكرىنىڭ ئۆزى ئۈچۈن بىر بېلەت تاشلىغانلىقىنى ئۇققاندىن كېيىن ناھايىتى ھاياجانلانغانلىقىنى بىلدۈردى . ئۇ تېلېفون ئارقىلىق مۇخبىرغا : ‹‹ مەن رەئىس نۇر بەكرى بىلەن گو ليەنشەن شۇجىنىڭ ، گۈلشات ۋالىينىڭ ماڭا مەدەت بەرگەنلىكىدىن بەك تەسىرلەندىم ، بۇ ئەڭ يېقىن كىشىلىرىمنىڭ مېنىڭ كەينىمدە تۇرۇپ ماڭا يۆلەك بولۇۋاتقاندىكى بەخت تۇيغۇسى ›› دېدى .
ھاۋاگۈل ئابلىز ، ئۇيغۇر ، ئايال، 1967–يىلى 11–ئاپرېل تۇغۇلغان ، شىنجاڭنىڭ قومۇل ۋىلايىتىدىن . شىنجاڭ ئۇنىۋېرسىتېتىنىڭ قانۇن كەسپىنى پۈتكۈزگەن . 1986–يىلى خىزمەتكە قاتناشقان ، 1989–يىلى 5–ئايدا جۇڭگو كوممۇنىستىك پارتىيەسىگە كىرگەن . ھازىر قومۇل ۋىلايىتى قومۇل شەھەرلىك جامائەت خەۋپسىزلىكى ئىدارىسى قاتناش ساقچى چوڭ ئەترىتىنىڭ مۇئاۋىن باشلىقىلىق ۋەزىپىسىنى ئۆتەۋاتىدۇ . ئۇ مەملىكەتلىك ‹‹8–مارت قىزىل بايراقدار›› ، ئاپتونوم رايونلۇق ‹‹تۆھپىكار ئايال قاراۋۇل›› ، ئاپتونوم رايون بويىچە ئىلغار خىزمەتچى ، قومۇل ۋىلايەتلىك ‹‹ 8–مارت قىزىل بايراقدار ›› ، مۇنەۋۋەر پارتىيە ئەزاسى قاتارلىق شەرەپلەرگە نائىل بولغان . بۇرۇن ئامانلىق ساقچىسى ، جىنايى ئىشلار ساقچىسى ، مەھەللە ساقچىسى ، قاتناش ساقچىسى بولغان . ئىلگىرى–كېيىن ساقچىخانىنىڭ مۇئاۋىن باشلىقى ، يېتەكچى ، جىنايى ئىشلار چوڭ ئەترىتىنىڭ مۇئاۋىن باشلىقى ، قاتناش ساقچى چوڭ ئەترىتىنىڭ مۇئاۋىن باشلىقى قاتارلىق ئاساسىي قاتلام رەھبەرلىك ۋەزىپىسىنى ئۆتىگەن.
4–نۆۋەتلىك ‹‹مەن ئەڭ ياخشى كۆرىدىغان خەلق ساقچىسى›› سايلام پائالىيىتى پۈتۈن مەملىكەتتىكى جامائەت خەۋپسىزلىكى ئورگانلىرى ‹‹چوڭ يوقلاش›› پائالىيىتىنى چوڭقۇر قانات يايدۇرۇۋاتقان ۋاقىتتا ئېلىپ بېرىلغان بولۇپ ، تەشكىللەر تەۋسىيە قىلىش ، ئامما كۆرسىتىش ، ۋاستىلەر تەۋسىيە قىلىش قاتارلىق ئۈچ خىل ئۇسۇل ئارقىلىق 60 نەپەر نامزات رەسمىي ھالدا بارلىققا كەلدى . پائالىيەت باھالاش كومىتېتى ئاممىنىڭ بىلەت تاشلىشى ، رايون ، ساقچى تۈرى قاتارلىق تەرەپلەرنى ھەر تەرەپلىمە ئويلىشىپ ، ئەڭ ئاخىرىدا بۇ قېتىمقى ‹‹مەن ئەڭ ياخشى كۆرىدىغان خەلق ساقچىسى›› نى باھالاپ چىقىدۇ ھەم داغدۇغىلىق مۇكاپاتلاش مۇراسىمى ئۆتكۈزىدۇ.
نۆۋەتتە ، ھاۋاگۈل ئابلېز باشقا 39 نامزات بىلەن بىرلىكتە توردا بېلەت تاشلاش پائالىيىتىگە قاتنىشىۋاتقان بولۇپ ، ئەگەردە سىز بۇ شىنجاڭلىق ساقچى ئۈچۈن بېلەت تاشلىماقچى بولسىڭىز http://www.mps.gov.cn/n16/template/2701147/template.htm تورىغا كىرىپ بېلەت تاشلاشقا قاتناشسىڭىزبولىدۇ . مەنبە:http://www.nur.cn/html/news/20056.shtml
