ئالغاچ باراي يارىمغا، ئاق نان
نىيازئەلى ئادىل(تۈن لىرىكىسى)
بايرىمىڭنى قۇتلاپ ئەزىزىم،
ئالغاچ باراي "بايراملىق" ئاق نان.
دەستە گۈللەر سۇنمايمەن. چۈنكى
ئانام نانغا گۈل چېكىپ ياققان.
خەق يارىغا بەرسە قىزىلگۈل،
سەن گۈللەرگە بولما ھېرىسمەن.
شۇ نانغىمۇ ئەزىز ئانامنىڭ،
قىزىلگۈلدەك ياشلىقى سىڭگەن.
نان بىلەن تەڭ كۆيەر تونۇردا،
مەڭزى ئانار سەھرا قىزلىرى.
تونۇرلاردا تاۋلىنىپ پىشقان،
سەھرالىقنىڭ ئەقىدە-مىھرى.
ئالغاچ كېتەي سەھراغا بىللە،
شۇ تونۇردا كۆيۈپ باق سەنمۇ.
قىزىلگۈلدەك نازۇك قىزچاقلار،
نان قەدىرىنى بىلمەي ئۆتەرمۇ؟
2011-يىلى 8-مارت سەيشەنبە
مۇڭغۇلكۈرە شوتا يېزىسى
مۇنبەردىكى بارىلىق خانىم-قىزلىرىمىزنىڭ بايرىمىنى تەبىرىكلەيمەن!
[ بۇ يازما tvnlirikisi تەرىپىدىن قايتا تەھرىرلەندى ]
