داڭلىق مەدەنىيەت شەھىرى، دۇنيانىڭ مودا مەركىزى بولۇش سۈپىتى بىلەن، پارىژ دۇنيانىڭ ھەر قايسى جايلىرىدىكى ساياھەتچىلەر ئىنتىلىدىغان جاي. ئۈزلۈكسىز ھەرىكەتلىنىپ تۇرىدىغان، راۋان، تەرتىپلىك ئىستىرىئولۇق قاتنىشى ئۇنى تېخىمۇ سېھرىي كۈچكە ئىگە قىلغان ئىدى. پارىژنىڭ قاتنىشىنى ھەشەمەتلىك ۋە زامانىۋى دەپ كەتكىلى بولمىسىمۇ، ئورۇنلاشتۇرۇلۇشى ئىنتايىن مۇۋاپىق.

نۆۋەتتە، چوڭ پارىژ رايونىنىڭ نوپۇسى 12 مىليون بولۇپ، ئاپتوموبىل سانى 5 مىليونغا يېتىدۇ، كۈندە پارىژ كوچىلىرىدا 3 مىليون ئاپتوموبىل قاينايدۇ. پارىژدىكى چوڭ-كىچىك كوچىلارنىڭ ئىككى يېنىغا لىق ئاپتوموبىل توختىتىلغان بولىدۇ، يەر ئاستى 5، 6 قەۋەتلىك ئاپتوموبىل توختىتىش مەيدانلىرى ھەممە يەردە ئۇچرايدۇ. بۇنداق ساياھەتچىگە تولغان، قايناق شەھەردە،  بەزى ئالاھىدە ئەھۋال بولمىسا، چامپىس ئېلىيسىس كوچىسىغا ئوخشاش ئاۋات يول بۆلىكىدىمۇ قاتناش توسۇلۇپ قېلىش ئەھۋالى ئىنتايىن ئاز ئۇچىرايدۇ.

پارىژدىكى نۇرغۇن كوچىلار ناپاليۇن دەۋرىدە ياسالغان، شۇڭا يوللىرى بىر قەدەر تار. مۇشۇنداق بولسىمۇ، پارىژدا قوش، تاق نومۇر قاتارلىق يۈرۈشنى چەكلەش تەدبىرى قوللىنىلمىغان. كوچىلار ھەممە ئاپتوموبىللارغا ئېچىۋېتىلگەن، بىراق پارىژ شەھەر رايونىدا ئاپتوموبىللارنىڭ سائەتلىك يۈرۈش سۈرئىتى 30 كىلومېتردىن 50 كىلومېترغىچە چەكلىنىدۇ، رېيىن دەرياسىنىڭ ئىككى يېنىدىكى تېز سۈرئەتلىك يولدىمۇ سائەتلىك يۈرۈش سۈرئىتى50 كىلومېتردىن ئاشمايدۇ.

پارىژدا قاتناشنىڭ راۋان بولۇشىدا كۆپ تەرەپنىڭ ئورتاق رولى بار. پارىژنىڭ قاتناش قائىدىسى ئىنتايىن قاتتىق، شوپۇرلار بىلەن يولۇچىلارمۇ قاتناش قائىدىسىنى قاتتىق ئىجرا قىلىدۇ. ئاپتوموبىل بىلەن پىيادىلەر قاتناش قائىدىسى بويىچە ئىش قىلىدۇ، يول تالاشمايدۇ، سۈرئەت قوغلاشمايدۇ، بىر بىرىگە يول بېرىدۇ، يول ئوتتۇرىسىدا تۇرۇپ قېلىپ، ھىچكىم ماڭالماسلىقتەك بىرنىڭ كاساپىتى مىڭغا بولىدىغان ئىش مەۋجۈت ئەمەس.

پارىژ كوچىسىدىكى ئايلانما يوللاردا چىقىش ئېغىزى كۆپ، قاتناش توسۇلۇپ قالسا، تاللاشمۇ كۆپ، ھەممىسى بىر يەرگە قىسىلىپ قالىدىغان ئەھۋال بولمايدۇ، ھەممە يوللار تۇتاش. 2 كىلومېتر كەلمەيدىغان چامپىس ئېلىسىس كوچىسىدىلا ئىككى چوڭ ئايلانما ۋە نەچچە كىچىك ئايلانما يول بار، كونكوردى مەيدانىدىكى ئايلانما يولنىڭ 6 چىقىش ئېغىزى بار، زەپەر دەرۋازىسىدىكى ئايلانما يولدا فرانسىيىدىكى ھەر قايسى جايلارغا تۇتىشىدىغان 12 چىقىش ئېغىزى بار. ئايلانما يولدىكى چىقىش ئېغىزى بەك زىچ بولغانلىقتىن، ھەر قانداق ۋاقىتتا كىرىپ-چىقسا بولىدۇ، ئىنتايىن قولايلىق. بولۇپمۇ ئايلانما يولغا كىرىشتە، ئاپتوموبىللار ئۆز ئارا بىر بىرىگە يول بېرىپ، ئادەم سەۋەبلىك قاتناش قىستاڭچىلىقى كېلىپ چىقىشنىڭ ئالدىنى ئالىدۇ، شۇڭا شوپۇرلارنىڭمۇ كۆڭلى خاتىرجەم.

پارىژنىڭ مىتورسى ئىنتايىن تەرەققىي قىلغان، 50 مېتر ئارىلىقتا بىر مىترو ئېغىزى تاپقىلى بولىدۇ. نۇرغۇن مىترولارنىڭ مەركىزىي بېكىتى يېنىك رېلىسلىق تۆمۈريول، شەھەرلەرنى تۇتاشتۇرۇش سىستېمىسى، كوچا ئاپتوبوس بېكىتى ۋە تاكسى بېكىتى بىلەن تۇتاشتۇرۇلغان، شۇنداقلا ئەتىراپىدا چوڭ تىپتىكى يەر ئاستى ئاپتوموبىل توختىتىش مەيدانلىرى بار. بۇنداق ئىستىرىئولۇق قاتناش تورى زور مىقدارىدىكى ئادەملەر ئېقىمىنىڭ بۆلۈنۈشىنى كاپالەتلەندۈرىدۇ، شۇنداقلا شوپۇرلار ئۈچۈن ئېيتقاندىمۇ، ئەينى چاغدىكى قاتناش ئەھۋالىغا قاراپ يۈرۈش نىشانىنى ئۆزگەرتىدىغان تاللاش ئىمكانىيىتى بىلەن تەمىنلەپ، قاتناش توسىلىپ قېلىشنىڭ تەسىرىنى تۈگىتىپ، مەنزىلىگە ۋاقتىدا يېتىپ بېرىش مۈمكىنچىلىكنى  قۇرۇلما جەھەتتىن ھەل قىلغان.

پارىژدا قاتناش قىستاڭچىلىقى بولماسلىقىدىكى يەنە بىر سەۋەب ئۇنىڭ قاتناش چوڭ ئىستراتېگىيىسىنى يولغا قويغانلىقىدا. پارىژ ھېسابنى چوڭ قىلىپ، كىچىك پايدىنى كۆزلىمەيدۇ. تەرەققىي قىلغان قاتنىشى بولسىمۇ پارىژ بىر ئىزىدە توختاپ قالمىدى. يېڭىدىن 6  مىترو قۇرۇش پىلانى تۈر تۇرغۇزۇلۇپ ئىش باشلاش ئالدىدا. پارىژنىڭ قاتناش سېلىنمىسىنى زورايتىشى شەھەر ئىقتىدارىنى كۈچەيتىپ، تىجارەت تەننەرخىنى كېمەيتىش، شۇنداقلا ئادەمنى ئاساس قىلىشتىن ئىبارەت. فرانسىيىدە يۇقىرى سۈرئەتلىك تاشيولدا ئەزەلدىن ھەق ئېلىنىدۇ، بىراق پارىژنىڭ سىرتىدىكى 60 كىلومېتر دائىرىدىكى يۇقىرى سۈرئەتلىك تاشيول ھەقسىز، بېسىق ئايرودروم يولىدا تېخىمۇ ھەق ئېلىنمايدۇ، بۇ پارىژ قاتنىشىنىڭ ئايلىنىش بوشلۇقىنى ئۈنۈملۈك كېڭەيتكەن.

مۇۋاپىق پىلانلاش، ئىزچىل ياخشىلاش-- پارىژ قاتنىشىنىڭ راۋان بولۇشىدىكى "سىر" ھېسابلىنىدۇ. شۇڭا پارىژنىڭ تەجرىبىسىنى قاتناش قىستاڭچىلىقىدىن بېشى قېتىۋاتقان نۇرغۇن چوڭ شەھەرلەر ئۆرنەك ئالسا بولىدۇ.