لوقمان ھېكىمنىڭ كۈيئوغلى ھەققىدىكى رىۋايەت.

ئېيتىشلارغا قارىغاندا، لوقمان ھېكىم تېۋىپلىق قىلىپ يۈرگەن كۈنلەردە پۈتۈن ئىقلىمدىكى بارلىق ئادەملەرنىڭ بەزىلىرى بىرنەچچە قېتىمدىن، يەنە بەزىلىرى ھېچبولمىغاندا بىرەر قېتىمدىن بولسىمۇ لوقمان ھېكىمنىڭ ئالدىغا كېلىپ، كېسىلىنى كۆرسىتىپ كېتىشىپتۇ. بىراق، لوقمان ھېكىمنىڭ كۈيئوغلى كېسەل كۆرسەتكىلى بىرەر قېتىممۇ كەلمەپتۇ. شۇنىڭ بىلەن لوقمان ھېكىم بۇنىڭدىكى سىرنى بىلىپ بېقىشقا قىزىقىپ، قىزى كەلگەندە قىزىدىن: « مەن تېۋىپلىق قىلغىلى خېلى زامانلار بولدى. ھەممە ئادەم دېگۈدەك مېنىڭ سەۋەبىمدىن كېسىلى شىپا تېپىپ ساقايدى. بىراق، ئېرىڭ بىرەر قېتىممۇ كەلمىدى. ئۇمۇ ئىنسان، ئۇنىڭمۇ ئاغرىماسلىقى زادى مۇمكىن ئەمەس. ئۇ، ياكى ئاغرىققا ئۆزى ئامال قىلىدۇ، ياكى كېسەل بولۇشنىڭ ئالدىنى ئالالايدىغان ئامالى بار. شۇڭا سەن ئۇنىڭ بارلىق ھەرىكەتلىرىگە دىققەت قىلىپ قوي » دېگەنمىش. شۇنىڭدىن ئېتىبارەن، لوقمان ھېكىمنىڭ قىزى ئېرىنىڭ ھەرىكىتىگە دىققەت قىلىشقا باشلىغانمىش. لوقمان ھېكىمنىڭ كۈيئوغلى ئەتىگىنى ئورنىدىن تۇرۇپلا، سېۋەتتىكى ناندىن كىچىك بىر پارچە يېۋىتىپ، يەنە ئۆز ئىشى بىلەن مەشغۇل بولۇپتۇ. لوقمان ھېكىمنىڭ قىزى بۇ ئەھۋالنى دادىسىغا ئېيتىپ بېرىپتۇ. لوقمان ھېكىمنىڭ قىزى دادىسىنىڭ ئېيتىقىنى بويىچە ناننى يوشۇرۇپ قويۇپتۇ. لوقمان ھېكىمنىڭ كۈيئوغلى ئەتىگىنى ئورنىدىن تۇرۇپ قارىسا نان يوق، شۇنىڭ بىلەن بېرىپ خالتىدىكى ئۇننى ئېلىپ كاپ ئېتىپتۇ. لوقمان ھېكىنىڭ قىزى بۇ ئەھۋالنى دادىسىغا ئېيتىپتۇ. لوقمان ھېكىم ئۇننىمۇ يوشۇرۇپ قويۇشنى بۇيرۇپتۇ. لوقمان ھېكىمنىڭ كۈيئوغلى ئورنىدىن تۇرۇپ قارىسا ئۇن خالتسى ئورنىدا يوق ئىكەن. ئۇ، بۇنىڭغا نىسبەتەن ھېچقانداق ئىنكاس بىلدۈرمەي سىرتقا مېڭىپتۇ. لوقمان ھېكىمنىڭ قىزى داداسىنىڭ بۇيرۇقى بويىچە ئېرىنىڭ ھەر بىر ھەرىكىتىگە دىققەت قىلىپ يۈرۈپتۇ. شۇڭا ئېرىنىڭ ئارقىسىدىن سىرتقا ئاستا چىقىپتۇ. قارىغۇدەك بولسا، لوقمان ھېكىمنىڭ كۈيئوغلى ھارۋا يولىغا بېرىپ، سۇيۇق توپىدىن بىر سىقىم ئېلىپ كاپ ئېتىپتۇ. لوقمان ھېكىمنىڭ قىزى ئېرىنىڭ بىرمۇ - بىر ھەرىكىتىنى دادىسىغا ئېيتىپتۇ. شۇنىڭدىن كېيىن لوقمان ھېكىم كۈيئوغلىنى چاقىرتىپتۇ. ئۇ كۈيئوغلىغا باشقىلارنىڭ كېسىلىنى كۆرسەتكىلى بىر قانچە قېتىمدىن كەلگەنلىكىنى، ئۇنىڭ بىر قېتىممۇ كېسەل كۆرسەتكىلى كەلمىگەنلىكىنى ھەمدە بۇنىڭدا زادى نېمە سىر بارلىقىنى سوراپتۇ. لوقمان ھېكىمنىڭ كۈيئوغلى قېيناتىسىغا، ئتىگەندە تۇرۇپلا بىر بۇردا نان يېيشنىڭ خاسىيىتىنى سۆزلەپ كېلىپ، مۇبادا بۇنى ئىزچىل داۋاملاشتۇرۇپ كېتەلىسەم، تاكى ئۆمرۈمنىڭ ئاخىرىغىچە سىلىنىڭ ئالدىلىرىغا كەلمەيمەن، دەپتۇ. لوقمان ھېكىم گەرچە ناھايىتى ئۇستا تېۋىپ بولسىمۇ، كۈيئوغلىدىن سالامەتلىكنى ئاسراش، كېسەللىكنىڭ ئالدىنى ئېلىش تەدبىرلىرىنى ئۆگىنىپ ئاپتۇ. ئەتىگەندە، ئەتىگەنلىك تاماقتىن بۇرۇن يېيىلىدىغان بىر بۇردا ناننى « ناشتىلىق » دېيىش ۋە « ناشتا قىلىش » شۇنىڭدىن باشلانغانمىش. 2J&XNV^tJ  

مەنبە:http://www.diyanat.com/show_news.php?mid=200

[ بۇ يازما پىغانىم تەرىپىدىن قايتا تەھرىرلەندى ]