2010- يىللىق نوبېل ئىقتىسادشۇناسلىق مۇكاپاتى ئۈچ ئالىمغا بېرىلدى
2010- يىل 11- ئۆكتەبىر بېيجىڭ ۋاقتى سائەت 19:00 دا شۋېتسىيە پادىشاھلىق پەنلەر ئاكادېمىيىسى نوبېل مۇكاپاتىنى باھالاش كومىتېتى بايانات ئېلان قىلىپ، 2010- يىللىق نوبېل ئىقتىسادشۇناسلىق مۇكاپاتىنىڭ ئامېرىكىلىق ئىقتىسادشۇناس، ماسەچۇسىتس تەبىئىي پەن-سانائەت پەنلىرى ئىنستىتۇتى (Massachusetts Institute of Technology) نىڭ پروفېسسورى پېتېر ئا. دايئەموند (Peter A. Diamond، 1940-يىلى نيۇ يوركتا تۇغۇلغان)، ئامېرىكىلىق ئىقتىسادشۇناس، ئامېرىكا غەربىي شىمال ئۇنىۋېرسىتېتى (Northwestern University) نىڭ پروفېسسورى دېئىل ت. مورتېنسېن (Dale T. Mortensen، 1939-يىلى تۇغۇلغان) ۋە ئەنگلىيەلىك ئىقتىسادشۇناس، لوندون ئۇنىۋېرسىتېتى سىياسىي-ئىقتىساد ئىنستىتۇتى (London School of Economics and Political Science) نىڭ پروفېسسورى كرىستوف ئا. پىسسارىدېس (Christopher A. Pissarides، 1948-يىلى سىپرۇستا تۇغۇلغان) غا بېرىلىپ، ئۇلارنىڭ «بازار تەھلىلى ۋە ئىزدەش ئىختىلاپى» تېمىسىدىكى تەتقىقات نەتىجىسىنى تەقدىرلەش قارار قىلىنغانلىقىنى جاكارلىدى.
خەۋەرلەرگە قارىغاندا، ئىزچىل ئەنئەنە بويىچە بۇ يىل 10- دېكابىر (يەنى ئالفېرىد نوبېلنىڭ ۋاپات بولغان كۈنى) شۋېتسىيە نوبېل مۇكاپاتىنى باھالاش كومىتېتى پايتەخت ستوكھولمدا كاتتا مۇكاپاتلاش مۇراسىمى ئۆتكۈزۈپ، ئومۇمىي سوممىسى 10 مىليون شۋېتسىيە كروناسى (1 مىليون 460 مىڭ ئامېرىكا دوللىرىغا تەڭ) مۇكاپات پۇلى ۋە شەرەپ گۇۋاھنامىسىنى بۇ ئۈچ ئالىمغا بېرىدىكەن.
كورلا شەھەرلىك خەلق قۇرۇلتىيى دائىمىي كومىتېتى ئىشخانىسىدىن توختى مەھمۇت ئەلائى تەييارلىغان
پايدىلانغان ماتېرىياللار:
شۋېتسىيە پەنلەر ئاكادېمىيەسىنىڭ ئىنگلىزچە «نوبېل فوندى جەمئىيىتى تورى»، خەنزۇچە «شىنخۇا تورى» ۋە «Google» ئىزدەش تورى قاتارلىق تور بەتلىرىدىكى نۇرغۇن مۇناسىۋەتلىك ماتېرىياللار.
2010- يىل 11- ئۆكتەبىر، شەھىرى كورلا
