مېدال مەركىزى
سىز مەيلى كىم بولۇشىڭىزدىن قەتئىينەزەر، ئەسىرىمنى رۇخستىمسىز كۆچۈرۈپ ئىشلەتمەڭ!
خارلانغان سۆيگۈ
ھېكايە
ئابابەكرى ئابدۇقادىر
تەبىئەت دۇنياسىدىكى جىمىي مەۋجۇداتقا يېڭى ھايات، يېڭى تۇيغۇ، يېڭى ئۈمىد ئاتا قىلىدىغان گۈزەل ئەتىياز پەسلى كىرىپ پۈتكۈل ئەتراپ ياپيېشىل ھېسلارغا تۇيۇنۇشقا باشلىغان ئىدى. تۆت ئەتراپتىن شۇنداق تېتىملىق ھايات ناخشىسى ئاڭلىنىپ تۇراتتى... سەن ناھىيىلىك دوختۇرخانىدا ئىشلەيدىغان ئاكاڭنىڭ دوختۇرخانا دەرۋازىسى ئالدىدا ئاچقان تۈرلۈك ماللار ماگىزىنىغا ياردەملىشىپ بىرىۋاتاتتىڭ. كەچتە ماگىزىننى تاقاپ بولغاندىن كېيىن ئاكاڭنىڭ دوختۇرخانا ئىچىدىكى ياتىقىدا قوناتتىڭ... شۇ كۈنلەردە نەۋرە سىڭلىڭ تولۇق ئوتتۇرىدىن ئالىي مەكتەپكە ئىمتاھان بىرىدىغان بىر نەچچە ساۋاقدىشى بىلەن سەن ياتقان ياتاققا يانداش ياتاقتا يېتىپ ئىمتاھانغا تەييارلىق قىلىشقا باشلىدى. تاغاڭ دوختۇرخانا باشلىقى ئىدى. سەن بەزى ئاخشاملىرى نەۋرە سىڭلىڭنىڭ ياتىقىغا كىرىپ قىزلار بىلەن بىردەم - يېرىمدەم پاراڭلىشىپ ئولتۇراتتىڭ. بەزى چاغلاردا زېرىكىپ قالساڭلار ئانچە - مۇنچە قارت ئوينايتتىڭلار... كۈنلەرنىڭ ئۆتۈشى بىلەن نەۋرە سىڭلىڭنىڭ قوشنا يېزىدىن كىرىپ ئوقۇۋاتقان تۇرسۇنگۈل ئىسىملىك ساۋاقدىشىنى ياقتۇرۇپ قالدىڭ. قىز ھەقىقەتەن چىرايلىق ئىدى. سەن ئۇنىڭ ئىشقىدا كۆيۈۋاتقان بولساڭمۇ ئەمما ئۇنىڭ سېنىڭ ئوتۇڭدا كېچىلىرى ساۋاقداشلىرىغا بىلدۈرمەي يۇشۇرۇنچە ئۇھسىنىدىغانلىقىنى بىلمەيتتىڭ... بىر كۈنى ياتاقتىكى قىزلارنىڭ ھەممىسى ئۆيىگە قايتتى. ئەمما تۇرسۇنگۈل نېمىشقىدۇر قايتمىدى. سەن شۇ ھامان قىزلار ياتىقىغا كىردىڭ. تۇرسۇنگۈل ئوت - كاۋاپ بولۇپ ياتاتتى. سەن دەرھال دورا ئەكىرىپ ئۇنىڭغا ئىچۈردۈڭ. ئۇنىڭ قىزىتمىسى يانغاندىن كېيىن چىقىپ ماگىزىننى تاقاپ قىزنىڭ يېنىغا كىرىپ ئۇنىڭ ھالىدىن خەۋەر ئالدىڭ. ئىككىڭلار ئۇياق - بۇياقتىن پاراڭلىشىپ ئاخىرى بىر - بىرىڭلارغا قەلب سىرلىرىڭلارنى ئاشكارىلىدىڭلار... بىر - بىرىگە تەشنا ئىككى ۋۇجۇد مۇھەببەتنىڭ سېھرىي كۈچى بىلەن بىرلىشىپ، بىر كېچە ئۇخلىماي سىرداشتى ۋە لەۋلەر سۆيگۈ شارابىغا ئېغىز تەككۈزۈشتى... ئەتىسى ئەتتىگەن تۇرسۇنگۈل ئورنىدىن تۇرۇپلا چېچىنى يۇيدى. سەنمۇ زىڭىلداپ ئاغرىپ تۇرغان بېشىڭنى يەڭگىللىتىش ئۈچۈن چېچىڭنى يۇيدۇڭ. سىلەر چېچىڭلارنى قۇرۇتۇۋاتقاننىڭ ئۈستىگە ياتاققا قىزلار كىرىپ قېلىشتى. نەۋرە سىڭلىڭ ئىككىڭلارنى بىر مۇنچە ئەيىبلەپ كەتتى. دېمىسىمۇ سىلەر ھەر قانچە پاك بولغان تەقدىردىمۇ ھۆل چېچىڭلار مانا مەن دەپ تۇرسا باشقىلار سىلەردىن گۇمانلانماي تۇرالايتتىمۇ؟ تۇرسۇنگۈل نەۋرە سىڭلىڭنىڭ ئەيىبلىشىگە ۋە باشقا قىزلارنىڭ شۈبھىلىك قاراشلىرىغا چىدىيالماي باشقا ياتاققا كۆچتى ۋە ساڭا قارىماي قويدى. سەن تۇرسۇنگۈلنىڭ پىراقىدا ئۆرتىنەتتىڭ. ھەر كۈنى كەچ ماگىزىننى تاقاپ بولغاندىن كېيىن تۇرسۇنگۈلنىڭ ياتىقى ئەتراپىدا پەرۋانە ئىدىڭ... ئىككىڭلارنىڭ مۇناسىۋىتى ئىككى ھەپتىدىن كېيىن ئەسلىگە كەلدى. شېرىن مىنۇتلار قەلبلەرنى بەخت قوينىدا ئەللەيلىتىۋاتقان شۇ كۈنلەردە تۇرسۇنگۈل تۇيۇقسىز ئۆزىنى سەندىن قاچۇرۇشقا باشلىدى. سەن ئۇنىڭ نېمىشقا ئۇنداق قىلىدىغانلىقىنىڭ سەۋەبىنى بىلەلمەي يۈرگىنىڭدە تۇرسۇنگۈلنىڭ ساۋاقدىشى ھەم يېقىن دوستى زەينەپ سەندىن سورىدى: - ئەكبەر، تۇرسۇنگۈلنى ھەقىقىي ياخشى كۆرەمسىز؟ - ھەئە. - ھەي، دەي دېسەم تېخى، دېمەي دېسەم... - يۈرىكىڭ قورقۇنچلۇق تۇيغۇ ئىچىدە شۈركىنىپ كەتتى. ئۆزۈڭنى بېسىۋېلىپ تۇرۇپ ئۇنىڭدىن سورىدىڭ: - دەڭە، زادى نېمە ئىش بولدى؟ - سىزگە راست گەپنى دەي. تۇرسۇنگۈل بۇلتۇر ئۆزى بىلەن بىللە ئالىي مەكتەپ ئىمتاھانىغا قاتناشقان ئوبۇل ئىسىملىك بىر بالىنى ياخشى كۆرىدىكەن. ئەمما ئوبۇل تۇرسۇنگۈلنى ياراتمايدىكەن. قېرىشقاندەك تۇرسۇنگۈل بۇلتۇر ئىمتاھاندىن ئۆتەلمەپتۇ. بۇ ئۇنىڭ قايتا ئوقۇشى. ئوبۇل ھازىر ئۈرۈمچىدە ئوقۇيدىكەن. ئۇ يېقىندا تۇرسۇنگۈلگە تەلەپ قويۇپ خەت يېزىپتۇ. تۇرسۇنگۈل ھازىر شۇڭا ئۆزىنى سىزدىن قاچۇرۇۋاتىدۇ... - نېمە؟... - بۇ گەپلەرنى ئاڭلاپ مېڭەڭ چىڭقىلىپ، زىڭىلداپ ئاغرىشقا باشلىدى. يۈرىكىڭنى قانداقتۇر بىر نەرسە تاتىلاپ ئويناۋاتقاندەك بەكلا ئازابلىنىپ كەتتىڭ. - سىزگە ئىچىم ئاغرىپ بۇ گەپنى دەپ قوياي دېدىم. مېنى دېدى دېمەڭ. بولامدۇ؟ - خاتىرجەم بولۇڭ! ئارىدىن ھەپتە ئۆتۈپ تۇرسۇنگۈلنىڭ ياتىقىدا ئۇنىڭ بىلەن كۆرۈشتۈڭ. ئۇ ساڭا پەرۋاسىز ئىدى. ئىككى ئوتتۇرىدىكى بۇرۇختۇملۇق جېنىڭغا تېگەتتى... - ئوبۇل دېگەن كىم؟ - ... - ئۆزىڭىزنى بۇنداق قىينىغۇچە باشتىلا راست گېپىڭىزنى دېسىڭىز بولماسمىدى؟ - ... - گەپ قىلىڭە، ئۇنى راستلا ياخشى كۆرەمسىز؟ - ھە... ئە... - بوپتۇ، سىزگە بەخت تىلەيمەن. خوش! - ئەكبەر، ... مې...نى... كە... چۈرۈڭ... ئورنۇڭدىن تۇرۇپ ھېچنېمە دېمەستىن سىرتقا ماڭدىڭ. ئەقىدەڭنىڭ خارلانغانغىنىغا ئۆكۈنۈپ ئەلەم ئىچىدە ئۇھسىناتتىڭ. شۇ تاپتا پۈتكۈل ئەتراپتىن ياڭراۋاتقان بىر مۇڭ مۇزىكا لەيلەپ كەلگىنىچە يۈرىكىڭنى تاتىلايتتى. يۈرەك - باغرىڭ خۇددى سېرىق ھەرە چېقىۋالغاندەك تىنىمسىز ئېچىشاتتى...
قاراقاش - كۇيا
ئەسكەرتىش: (سەھرا ئوغلى) ئىملاغا دىققەت قىلىڭ ، (2010-09-08 03:25 PM)
