تەنھا ئىدىم كۈلبەمدە، گويا تىنغان كۆل كەبى ،
سەن ئېچىلدىڭ قەلبىمدە، گويا لالە گۈل كەبى.
چىراي غەمناك پىراقتىن،گويا ئۆچكەن كۈل كەبى،
پىغانىمدىن پۈتكۈل زېمىن ھەيرانە - ھەيرانە.
كۈلەر ئىدىم كۈلكەڭدىن مەن ۋىسالغا يەتكەندە،
كۈلەر ئىدىڭ كۈلكەمدىن مەن بېلىڭنى ئەگكەندە.
ئايلىناتتۇق خەنجەرگە يامان كۆزلەر تەگكەندە،
پاك سۆيگۈلا بولار ئىدى غەمخانە - غەمخانە.
مەغرۇر ئىدۇق پاكلىقتىن كۆڭۈلدىكى ئاقلىقتىن،
تىلەر ئىدۇق پەقەتلا تېنىمىزگە ساقلىقتىن .
بېزەر ئىدۇق سۆيگۈنى چىن-يۈرەكتىن ساپلىقتىن،
ئۇشبۇ ھالدىن ھەسەتخورلار ۋەيرانە-ۋەيرانە.
مىڭ سىناققا باش ئەگمەي ئەقىدىنى تەرك ئەتمەي،
تىغ تەڭلىسە ياۋ ھەتتا ئايرىلىپ كەتمەي .
تەغدىر ئاخىرى خازان قىلدى ھالىمىز يەتمەي،
داغدا قالدى بىر جۈپ يۈرەك پەيخانە-پەيخانە.
بۇ غەم بىرلە ئۆلۈپ كەتمىدىم شۇنداقراق بولدۇم،
بىر ئۆزۈمگە ئاياندۇر قۇمدەك دەرتلەرگە تولدۇم.
زېمىستانغا بارماي توزغان ئاجىز گۈلدەك سولدۇم،
يا چۈشكۈنلىشىپ يۈرمىدىم مەيخانە - مەيخانە.
ئۆزۈم ھەر جايدا بولسام كۆڭلۈم پەقەت بىر سەندە،
سەن كۈلسەڭ جېنىم ، نېمە كەتسە مەيلىتى مەندە .
مەن ئۈچۈن سۈرتكىن ياشنى ھىجران قالمىسۇن تەندە،
ئاداققىچە كۈيلەي سۆيگۈم داستانە - داستانە .
----------------------------------------------------------------------
مەنبە ئۆزۈم،ياش ۋاقىتلاردا يازغان شېئىرىم ئىدى .
...
