غەزەپتىن چاچرىغان بەزى سۆزلەر ئاڭلىغۇچىنىڭ يۈرىكىگە ئوقيا بولۇپ سانجىلىدۇ . غەزەپلەنگەن كىشىنىڭ قايناپ چەينەكتىن تېشىپ چىقىۋاتقان سۇغا ئوخشاش ، ئېغىزىدىن ئىختىيارسىز ئېتىلىپ چىققان قاتتىق سۆزلىرى  غەزەپلەنگەن كىشىگە بىردەملىك روھى ئارامچىلىق ئاتا قىلغان بىلەن ، ئاڭلىغۇچىغا ئۇزاق مۇددەتلىك روھى ئازاب ئېلىپ كېلىدۇ . سەن باشقىلارنى ئەيىبلەپ ،تىللاۋاتقىنىڭدا نېمىشقا قارشى تەرەپنى ئويلاپ قويمايسەن ؟ گەرچە سەن باشقىلارنى تىللىۋالغىنىڭ ، سۆكۈۋالغىنىڭ بىلەن سېنى غەزەبلەندۈرگەن ئىش ئەسلىگە قايتمايدۇ . سەن نېمىشقا غەزەپلەنگەن ۋاقتىڭدا بۇنى ئويلاپ قويمايسەن؟ بەلكىم غەزەپلەنگۈچى تولىمۇ شەخسىيەتچى بولسا كېرەك ؟ شەخسىيەتچى كىشىلەرلا بارچە ئىشتا ئۆزىنىلا ئويلاپ باشقىلارغا پەرۋا قىلمايدۇ . ئۇنداق كىشىلەرگە نىسبەتەن باشقىلارنىڭ خاتالىقى مۇتلەق قۇبۇل قىلىنمايدۇ ، ھەم ئۇلارنىڭ خاتالىق ئۆتكۈزۈش ھوقوقى يوق . بىراق خاتالىق ئۆتكۈزۈش نۆۋىتى ئۆزىگە كەلگەندە بولسا ، بۇ بىر "تاساددىبىلىق " .  نېمە دېگەن شەخسىيەتچى سەن ! باشقىلارنى قاتتىق ئەيىبلەۋاتقىنىڭدا ، قارشى تەرەپنىڭ قانچىلىك ئازابلىنىدىغانلىقىنى ئويلاپ باقمامسەن ؟ بەلكىم ئويلايدىغانسەن ، ئويلىساڭمۇ پەرۋا قىلمايسەن . باشقىلار بىلەن نېمە چاتىقىڭ ؟ ئۆزۈڭ خوشال بولساڭلا بولدى ئەمەسمۇ ؟ بىراق شۇنى بىلىپ قويغىنكى ، ئىنسان ئۆزىنى ئۆزى خوشال قىلالمايدۇ .ھەم ئۆزى يالغۇز ئېرىشكەن خوشاللىقنىڭمۇ لەززىتى بولمايدۇ . گەرچە ئىنسان تەبىيتىدە شەخسىيەتچىلىك ئىلمىنتى بولسىمۇ ، ئۇ ئۆز مەۋجۇتلۇقىنى پەقەت كوللىكتىپ ئارىسىدىلا ساقلاپ قالالايدۇ ،شۇنى بىلىپ قالغىنكى كوللىپتىپ شەخسىيەتچى كىشىلەرنى ئارىغا ئالمايدۇ . دەرەخ شېخىدىن تۆكۈلۈپ چۈشكەن يوپۇرماققا قارىغىنكى ، ئۇنىڭ بىرقانچە كۈنگە قالمايلا قۇرۇپ كەتكىنىنى كۆرىسەن . غەزىپىڭ پەسكويغا چۈشۈپ ، ئۆزۈڭنىڭ ئاشۇرۋەتكەنلىكىڭنى ئويلىغىنىڭدا ، قارشى تەرەپنىڭ قەلبىگە مەنىۋى خەنجەردىن بىرقانچىنى سانجىۋەتكەن بولىسەن . گەرچە ئۇنى كەچۈرۈم سوراش ئارقىلىق ئېلىۋەتسەڭمۇ ، ئۇنىڭ قەلبىدە جاراھەت ئىزىنىڭ قېلىشى تەبىئىي . شۇنى ھېس قىلدىمكىن ، غەزەپنى بېسىشنىڭ ئۆزىمۇ ۋاقتى كەلگەندە سەن ئۈچۈن غەلبە بولىدىكەن . شۇڭا ،غەزەپلەنگەن ۋاقتىڭدا ئۆزۈڭگە شۇنداق پىچىرلىغىن : ئاچچىقىڭنى بېسىۋال !