ئىشەنچتىن يىراق دەۋىردە ياشاۋاتقان ئادەم كۆپۈنچە قايسىنىڭ راست ،قايسىنىڭ يالغان پەرىق ئېتەلمەي ئاسانلا قايمۇقۇپ قالىدۇ . يالغانچىلىقى مەلۇم بولغان كىشىنىڭ راست سۆزىنىمۇ يالغانغا چىقىرىپ تۇرۇپ قۇبۇل قىلىمەن . باشقىلار تەرپىدىن ئالدانغانلىقىمنى بىلگىنىمدە تولىمۇ ئازابلىنىمەن ... ئەخمەق بايقۇش ! ئۆزۈڭنىڭ يالغان ئېيتقان ھالىڭغا نىمىشقا ئازابلانمايسەن ؟ يالغاننى خالىغانچە ئېيتىپ تۇرۇپ باشقىلاردىن راستچىللىقنى تەلەپ قىلىش تولىمۇ كۈلكىلىك ئەمەسمۇ ؟ راستنى يالغان بىلەن پەردازلىغىنىمدا ، ھەقىقەتكە چاپان كەيدۈرگىنىمنى ھېس قىلىمەندە ، ئۆچەي دەپقالغان نۇمۇس تۇيغۇم ئازراقلا يالقۇنجاپ قويىدۇ خالاس ، ئەمما مەنپەئەت نۇمۇس ئۇچقۇنىنى بىر پۈۋلەپلا ئۆچۈرۋېتىدۇ . ھەقىقەت ئەسلىدىنلا يالىڭاچ نەرسە، خۇددى قۇياشقا ئوخشاش توسۇلۇپ قالسا ئۆز جۇلاسىنى يوقۇتىدۇ ، مەيلى ئۇ ئىگىز تاغنىڭ كەينىگە مۆكۈنسۇن ، ياكى بۇلۇتلار ئۇنىڭ ئالدىنى توسۇۋالسۇن ھامىنى ئۆزىنى نامايەن قىلىدۇ . يالغان قانداقلا پەردازلانمىسۇن ھامىنى يالغان ئەمەسمۇ ؟  كۆزىنى يۇمۇۋېلىپلا ئۆي قاراڭغۇ دەيدىغان كىشىلەرنىڭ كۆپلىكىدىن ھەيران قالدىم، ئەمما ئۆزۈمنىڭمۇ شۇلارنىڭ قاتارىدىن ئىكەنلىكىمنى بىلگىنىمدە ئۆزۈمگە ئاچچىق كۈلۈپ قويدۇم خالاس. نېمىشقا ئۆزۈمنى باشقىلارنى ئەيىبلىگەندەك ئەيىبلىمەيمەن ؟ ئىنساننىڭ شەخسىيەتچىلىك تەبىيتىنىڭ تولىمۇ پەسكەش بولىدىغانلىقىنى ھېس قىلىۋاتىمەن . مېنىڭچە ئىنسان ئومومىيلىق ئىچىدىلا ئىنسان بولالىسا كېرەك . مۇھەببەت ئاتلىق گۈزەل بىر ئۇقۇم تەرپىدىن ئالدانغىنىمنى بىلگىنىمدە ، ئۇنىمۇ ئۆزۈمگە ئوخشاش ئەرزىمەس نەرسە قاتارىغا چىقىرۋەتكەن ئىدىم . ئۇ راستلا ئەرزىمەس نەرسىمۇ ياكى يالغاندىن ئىبارەت كەڭ تارقالغان ئىبارە ئۇنى شۇنداق قىلىپ قويدىمۇ ؟ CSq4x5!_7>  
  دەۋىر ئۆزگەردى ، بۇرۇنقى ئىشەك ھارۋىسى ھەيدىگەن كىشىلەر ، بۈگۈنكى كۈندە ماشىنا ھەيدەۋاتىدۇ . قۇشلارنىڭ ئۇچۇشىغا ھەيران بولغان كىشىلەر ، بۈگۈنكى كۈندە قۇشلارنى ھەيرانلىقتا قالدۇرۇپ ئۇچۇۋاتىدۇ . ھەقىقەتەن دەۋىر ئۆزگەردى . ئابدۇقادىر جالالىدىن :كىشىلەرنىڭ بىلىمى ئاشتى ، ياشاش قىيىنلاشتى ... دېگەن ئىكەن . يۈز يىل ئىلگىرى ياشىغان كىشىنى ھازىرقى دەۋىرگە ئەكەلسە قانداق ھېسىياتقا كېلەركىن تاڭ ؟ ئەمما قانداقلا بولمىسۇن ، ئىنسان تەبىيتىدە ھېچقانداق ئۆزگۈرۈش بولغىنى يوق . ھەسەتخور يەنىلا ھەسەتخورلىقىنى قىلىۋاتىدۇ ، يالغانچى يەنىلا ئالدامچىلىقىنى قىلىۋاتىدۇ ،ئەلۋەتتە ئاق كۆڭۈل كىشىلەرمۇ بار . سەن بىراۋنىڭ ساڭا ئاق كۈڭۈللۈك بىلەن كۈلۈمسىرگىنىنى كۆرگىنىڭدە ئۆزۈڭنى بەخىتلىك ھېس قىلىشىڭ كېرەك ... بىراق سەن باشقىلارغا غەرەزسىز كۈلۈمسىرەپ باقتىڭمۇ ؟