كەچكۈزدىكى ئايال
(نەسىر)
ئاخشامقى كۆڭۈلسىزلىك ئىچىمنى سىقىپ،مىنى بىئارام قىلماقتا ئىدى.شۇ تاپتا دۇنيادا گۈزەل،قىممەتلىك نەرسىلەرنىڭ بارلىقىدىن گۇمانلانماقتا ئىدىم.ئېرىمنىڭ ئاخشامقى سوغۇق چىرايى،تىلغا ئالغىلى بولمايدىغان ھاقارەتلىرى يۈرىكىمنى ئۆرتىمەكتە ئىدى.ئۇنىمىشقا شۇنداق قىلىدۇ؟ئۇنىڭ يۈرىكىگە تۇنجى ئوتنى ياققان شۇ گۈزەل مەن ئەمەسمىدىم؟ئۇنىڭ ئوتىدا كۆيۈپ ،سۈيىدە ئېقىپ بارلىقىمنى ئۇنىڭغا بەرگەن پەرىزات مەن ئىدىمغۇ؟ئۇزۇن يىللاردىن بىرى چىچىمنى سۈپۈرگە قولۇمنى كۆسەي قىلىپ جاھان تۇتۇپ،بىرنى ئىككى قىلغان جاپاكەش ئايال مەن ئىدىمغۇ؟ھالبۇكى،زىلۋا قامىتىم ئۆزگىرىپ،يۈزلىرىمگە قورۇق چۈشۈپ،چاچلىرىمغا ئاق ئارىلىغاندا مەن كىم بولۇپ قالدىم؟توۋا دەيمەن،يۈگۈرۇپ كىلىپ ئىشىك ئاچالمىغىنىمغا شۈنچە تىل ھاقارەتلەرگە قالدىم-ھە؟مەن بۇ ئىشلارنىڭ نىمە ئۈچۈنلىكىنى بىلمەيدىغان ئايال ئەمەسمەن.بۇ پەقەت بىر باھانە،ئۇمەندىن زىرىككەن گەپ.ئۇنىڭ كۆزلىرىنىڭ بەزىدە نىمە ئۈچۈن چاقناپ قالغانلىقىنىمۇ،بەزىدە ئۆزىچە كۈلۈپ كىتىدىغانلىقىنىڭ سەۋەبىنىمۇ بىلىمەن.ئاھ يۈرىكىمنى غاجىلىغان رەشك مىنى چەكسىز ئازاپلايدۇ.مەن نەقەدەر يارامسىز،كۆرۈمسىز،ئۆلۈپلا تۈگەشسەم بولمامدۇ؟ياق، كىتىپ بارغان سانسىز كىشىلەرگە قاراپ مەستلىگىم كەلدى.قارىماققا ئۇلار شۇنچە قەيسەر،بەختلىكتەك كۆرۈنەتتى.ياق،ئۇلارمۇ دەردىنى ئۆزى بىلىدۇ.يۈرەكتىكى دەرد ۋە خۇشاللىق شۇ قەدەر پىنھان بولىدۇ.تۇرۇپلا ئۇلارغا يەنە ئىچىم ئاغرىپ قالدى.شۇتاپتا نۇرغۇن كىشىلەر ماڭا تولىمۇيىقىن يەردە تۇرغاندەك ھىس قىلدىم.ئاۋۇ ئىگىز كىشى خۇددى ئۆزىگە پىچىرلاپ گەپ قىلىۋاتقاندەك قىلىدۇ.ئىھتىمال ئۇكەسپتىكى مەلۇم بىر مەسلە ئۈستىدە پىكىر يۈرگۈزىۋاتقاندۇ ياكى ئۆيىگە ئالدىراپ ماڭغاندۇ،ياكى خوتۇنى تاشلىۋەتكەن بىر بويتاقتۇ؟! شۇئەر مىنىڭ ئېرىم بولغان بولسا بۇ ئازاپلارغا قالماس ئىدىم.توۋا،مەن ساراڭ بولدۇممۇ؟ بۇخىيالىمدىن كۈلگۈم كەلدى.
تۇيۇقسىز بىر يوپۇرماق قۇلىقىمغا چۈشتى.ئۇنى قولۇمغا ئىلىپ ئۇزاق قارىدىم.سارغايغان بولسىمۇ سولاشمىغانىدى.ئۇنى دەرەخ شاخلىرىنىڭ ئارىسىغا ئىلىپ قوياي،دەسسىلىپ كەتمىسۇن.ئۇقويۇپ قويغان يېرىدىن يەنە چۈشۈپ كەتتى.
مەن بۇ ياپراقنىڭ شاختا تۇرۇشىنى بەكمۇ خالايتتىم.ئۇنى يەنە يەردىن ئېلىپ شاخقا يىرىپ تۇرغۇزدۇم.كۆزۈمگە مۆللىدە ياش كەلدى.يوپۇرماقنىڭ شاختا يىرىلىپ تۇرغان ھالىتى بەك بىچارە ئىدى.
ئاۋۇ ئايال يىتىلەپ كېتىپ بارغان بالا يىغلاپ ئەتراپنى بىشىغا كىيدى.ئايال بالىنىڭ يانپىشىغا بىر نەچچىنى ئۇردى.مىنىڭچە،شۇتاپتا شۇئايالنىڭ تازابىر يىغلىۋالغۇسى بار،لىكىن ئۇنداق قىلالمايدۇ.بالىسىنى پەسلىتىپ بولۇپ ئاندىن چوقۇم ئۆزى يىغلايدۇ.توۋا،مېنىڭمۇ بالىلىرىم مۇشۇ تاپتايىغلاۋاتقاندۇ؟!"ئانا،ئانا"دەپ چاقىرىۋاتقاندۇ؟!تېز بېرىپ ئۇلارنى بەزلەي...
مەنبە:شىنجاڭ ياشلىرى ژورنىلى 2002-يىللىق 9-سان(ئاپتورى راھىلە كامال)
باشقۇرغۇچىلار خاپا بولماي نەسىرى ئەسەرلەر سەھىپىسىگە يۆتكەپ قويساڭلار بوپتىكەن
بۇ يازمىنى ئاخىرىدا ferdawishan تەھرىرلىگەن. ۋاقتى 2012-1-9 12:23 AM
يوللىغان ۋاقتى 2012-1-8 11:37:14 PM
