يىرتىلغان نىقاپ (ھېكايە)

توغراق-

	يىرتىلغان نىقاپ (ھېكايە) مامۇتاخۇن نۇرغۇن ئادەملەردىن سوراپ يۈرۈپ سادىق موللامنىڭ ئۆيىنى ئاخىر تاپتى، مەھەللىنىڭ چېتىگە جايلاشقان قويۇق جىگدىلەر بىلەن قورشالغان بۇ ھويلا سادىق موللامنىڭ ئۆيى بولۇپ، ھويلىدىكى ئۈزۈم بارىڭى ئاستىدىكى كارىۋاتقا سېلىنغان خوتەن گىلىمى ئۈستىدە سادىق موللام يانپاشلاپ ياتاتتى.         -ئەسسالامۇ ئەلەيكۇم، مامۇتاخۇن ئايالى ھېپىزەم بىلەن قولىدىكى بىر ئوغلاقنىڭ گۆشى سېلىنغان سۇلىياۋ خالتىنى يەرگە قويۇپ سادىق موللام بىلەن قول ئېلىشىپ كۆرۈشتى.         -ۋەئەلەيكۇم ئەسسالام، سادىق موللام بۇلارنى كۆرپىگە تەكلىپ قىلغاچ ئورنىدىن تۇردى.         -تېنىچ-ئامان تۇرلىمۇ؟ ئۆزلىرىگە ھاجىتىم چۈشۈپ كېلىپ قالدىم دېدى مامۇتاخۇن يۈكۈنۈپ ئولتۇرۇپ .         -ھەي ئايىمخان! قېنى داستىخان سېلىڭلا، مېھمان كەلدى !         ئۆيدىن 50 ياشلاردىكى سادىق موللامنىڭ ئايالى بولغان ئايىمخان نان-توقاچلارنى ئېلىپ چىقىپ داستىخان سېلىپ چاي قۇيغاندىن كېيىن مامۇتاخۇن گېلىنى قىرىپ سۆز باشلىدى.         -بۇ يىل 2-ئايدا 11 ياشقا كىرگەن ئوغلۇم تۇيۇقسىز يوقاپ كەتتى، ساقچىغا مەلۇم قىلغىلىمۇ 6 ئايدىن ئاشتى، ھېچبىر خەۋىرى يوق، كېچە-كۈندۈز بالا دەردىدە يىغلاپ كۆزىمىزنىڭ يېشى قۇرۇمىدى، ئۆزلىرىنى «سەۋەپ» قىلىپ تېپىپ بېرەلەيدۇ دەپ ئاڭلاپ كېلىۋىدۇق.         -ھە شۇنداقمىدى، كەلگەنلىرى ياخشى بوپتۇ، بۇرۇنلا كەلگەن بولسىلا بالدۇرراق بالىنى تاپاتتۇق ئەمەسمۇ، مەن «ئوقۇپ» غەيبنى بىلەلەيمەن، يوقاپ كەتكەن بالا بولامدۇ، كالا بولامدۇ كىم ئېلىپ كەتكىنىنى، نەدە ئىكەنلىكىنى بىلەلەيمەن، مۇشۇ كەمگىچە نۇرغۇن ئادەملەرنىڭ ھاجىتىدىن چىقتىم دېدى سادىق موللام ئۆزىنى ماختاپ.         -قىلغانلىرىنى ھەرگىز ئۇنتۇپ قالمايتتۇق، بالىمىز نەلەردە ، كىمنىڭ قولىدا خارلىنىپ نىمە كۈنلەرنى كۆرۈۋاتقاندۇ، مۇشۇلارنى ئويلىسام يۈرۈكۈمنى بىرسى پىچاق بىلەن تىلغاندەك ئازاپلىنىپ كىتىمەن دېدى ھېپىزەم دەردىنى تۆكۈپ.         -ئەسلىدە ساۋاپلىق ئىش بولغاندىكىن بىكارغا «ئوقۇپ» بەرسەك بولاتتى، لېكىنزە قۇرۇق تاغار ئۆرە تۇرمىغاندەك باشقا ھۈنەر – كەسپىمىز بولمىغاندىن كېيىن ئالتە بالىنىڭ قوسىقى ماڭا قاراشلىق دېسىلە، ئۇنىڭ ئۈستىگە يەنە ئىككى شاگىرتىم بىلەن كېچە-كۈندۈز جەينامازدا ئولتۇرۇپ توپ-توغرا يىگىرمە كۈن «ئوقۇيمىز» ئەمەسمۇ! ئاللا نېسىپ قىلسا بالا ئۈچ ھەپتىدە تېپىلىدۇ. -دېگەنلىرى كەلسۇن موللام، مەنمۇ سىلىنىڭ كۆڭۈللىرىنى ھەرگىز يەردە قويمايمەن، ھازىرچە مۇنۇ 10 مىڭ يۈەننى ئېلىپ تۇرسىلا، بالام تېپىلغاندا يەنە بەش مىڭنى بەرسەم بولارمۇ؟ دېدى مامۇتاخۇن ئىچ يانچۇقىدىن بىر كاللەك پۇلنى ئېلىپ. -بولىدۇ، سىلى خاتىرجەم بولسىلا، مەن ھازىردىن باشلاپ شاگىرتلىرىم بىلەن كېچە-كۈندۈز «ئوقۇپ» بالىلىرىنىڭ دېرىكىنى قىلاي ئەمىسە، ئامىن ! سادىق موللام دۇئاغا قول كۆتىرىپ گەپنىڭ تۈگىگەنلىكىنى ئىپادىلىدى. موللام ئىككى شاگىرتى بىلەن جەينامازدا يۈكۈنۈپ ئولتۇرۇپ ئىچىدە ئايەت ئوقۇغاچ «شەيدا قىلغىن يائاللا، رەسۋا قىلغىن يائاللا، پەيدا قىلغىن يائاللا» دەپ توۋلاپ «ئوقۇش»نى باشلىدى. مامۇتاخۇن موللامنىڭ ئوقۇغىنىنى كۆرگەندىن كېيىن ئايالى بىلەن موللامغا ئىخلاسمەنلىك بىلەن رەھمەت ھەشقاللا ئېيتقاچ قايتىپ كەتتى. قاچان خەۋىرى بولدىكىن دەپ ھەپتىدە بىر نەرسە-كېرەك ئېلىپ سادىق موللامنىڭ ئاغزىدىن «خوش خەۋەر» ئېلىشنى تۆت كۆزى بىلەن كۈتكىنىگىمۇ ئىككى ئايدىن ئاشتى. ھەر قېتىم بارغىنىدا ئېرى «تالاغا قاراپ قالغان» ئاياللار، ئاغزى مايماق كەتكەنلەر يەنە ئاللىقانداق ھاجەتلەر بىلەن كەلگەن كىشىلەرنى ئۇچرىتاتتى. مامۇتاخۇننىڭ بۈگۈن سەھەردىلا ئاخىرى سەۋر قاچىسى تاشتىمۇ قانداق ئاخىرى موللامنى ئىزدەپ بېرىپ ئېغىز ئاچتى. -ھۆرمەتلىك موللام، مانا سىلىنىڭ خەۋەرلىرىنى كۈتكىنىمگە ئۈچ ئاي بولاي دەپتۇ، بالامنىڭ خەۋىرىنى قاچان ئالالايمەنكىن؟ -بەك بىتاقەت ئادەمكەنلا ! دېدى سادىق موللام ئاچچىقى كېلىپ، مانا مەن شاگىرتلىرىم بىلەن بالىلىرىنىڭ خەۋىرىنى ئېلىش ئۈچۈن توختىماي ئوقۇۋاتىمىزغۇ! بالىنى بەك يىراق يەرگە ئېلىپ كېتىپتۇ، بولمىسا ئوقۇغان ئايەتلىرىمىزنىڭ كۈچى بىلەن بۇ كەمگىچە ئېلىپ قاچقان ئوغرىلار ئۆز قولى بىلەن ئەكىلىپ بەرگەن بولتتى، سەۋر قىلسىلا، ئاللا نېسىپ قىلسا بالىلرى ھامان تېپىلىدۇ. مامۇتاخۇن يەنە دەردىنى ئىچىگە يۈتۈپ، ئېغىر قەدەملىرىنى سۆرىگىنىچە قايتتى. ئۆيىگە كېلىپ ئىشىكى ئالدىدا تۇرغان ساقچى ماشىنىسىنى كۆرۈپ كۆڭلى بىر ئىشنى تۇيغاندەك ھويلىغا يۈگۈردى. ھويلىدا ئىككى ساقچى بىلەن ئايالى ھېپىزەم سۆزلىشىپ تۇرۇشقان ئىدى. -دادىسى، بالىمىز تېپىلىپتۇ! دېدى ھېپىزەم كۆزلىرىدىن ياش تۆككىنىچە . -مامۇتكا، بالىڭىزنى بالا ئوغرىلىرى ئالداپ ئىچكىرىگە ئېلىپ بېرىپ ئوغرىلىققا ساپتۇ، ھازىر سەرگەردان بالىلارنى قۇتقۇزۇش مەركىزىدىن قۇتقۇزۇپ كېلىپ ئۈرۈمچىدە بېقىپ تۇرۇۋېتىپتۇ، بىزگە ئۇقتۇرۇش قىلدى، بۈگۈنلا يولغا چىقىپ بالىڭىزنى قايتۇرۇپ كەلمەكچى دېدى ياش ساقچى تەمكىنلىك بىلەن. رەھمەت سىلەرگە، ھەر نېمە بولسا بالام تېپىلىپتۇ، يىغلىغان يىغىمىزدىن تەڭرىمۇ تەسىرلىنىپ بالىمىزنى يەنە بىز بىلەن كۆرۈشۈشكە نېسىپ قىپتۇ، ھازىرلا يولغا چىقسام بولامدۇ؟ دېدى مامۇتاخۇن ياش ساقچىنىڭ قولىنى چىڭ سىقىپ تۇرۇپ. -ناھىيەمىزدىن ئالداپ كېتىلگەن بالىلاردىن بۇ قېتىم قايتۇرۇپ كېلىنىدىغان 4 بالىنى قايتۇرۇپ كېلىشكە ئىدارىدىن ئىككىمىزنى ئورۇنلاشتۇردى، سىز تەييارلىقىڭىزنى پۈتكۈزۈپ تۇرۇڭ، چۈشتىن كېيىن يولغا چىقىمىز دېدى ياشقا چوڭراق ساقچى مامۇتاخۇن بىلەن خوشلىشىپ. مانا ، مامۇقتاخۇن ئۈرۈمچىدىن ئوغلىنى قايتۇرۇپ كەلگىلى بىر ھەپتە بولدى، ئوغلى خېلى جۈدەپ كەتكەن بولۇپ، دۈمبە، يوتىلىرىدىكى يارا ئىزلىرى ئۇنىڭ قانچىلىك دەرت تارتقانلىقىنى ئەسلىتىپ تۇراتتى. مامۇتاخۇن كۆپ ئويلىنىپ بۈگۈن سادىق موللامنىڭ ئۆيىگە بېرىپ پۇلىنى ئېلىۋېلىشنى نىيەت قىلىپ كېلىشىگە سادىق موللام ئۆزى ئېغىز ئېچىپ : -نېمانداق تولا كېلىۋېرىدىلا، مەن دېدىمغۇ، بالىلىرىنىڭ خەۋىرى بولسىلا شاگىرتىمنى ئۆيلىرىگە ئەۋەتىمەن دەپ، بۈگۈن ئوقۇيدىغان ھاجەتمەنلىرىم كۆپ، سىلى بىلەن ئارتۇق سۆزلەشكىلى ۋاقتىم يوق، قايتىپ كەتسىلە! -تولا كوتۇلدىماي پۇلۇمنى قايتۇرۇپ بەرسىلە، بالامنى ساقچىلار ئاللىقاچان تېپىپ بەردى دېدى مامۇتاخۇن ئاچچىقىنى باسالماي. -نېمە، مانا بالىلىرى تېپىلىپتىغۇ، مەن دېگەنتىمغۇ بالىلىرى بىز ئوقۇغان ئايەتنىڭ سېھرى بىلەن ھامان تېپىلىدۇ دەپ، لېكىنزە يەنە ماڭا ۋەدە قىلغان قالدى پۇلنى بەرمەي تۇرۇپ پۇلۇمنى قايتۇرسىلا دېگەنلىرى توغرا بولمىدى. -بىز خەقنىڭ نادانلىقىدىن سىلىگە ئوخشاش چالا موللاملارنى ئەلا بىلىپ خۇداغا ئىشەنگەندەك ئىشىنىپ يۈرۈۋەرگەن بولساق كۈنىمىز قانداق بولۇپ كىتەر ھە! ھىلىمۇ ماڭا ئوخشاش نۇرغۇن ئادەملەرنى ئەخمەق قىلىپ يۈرگەنلىرىنى ئاخىرى تونۇپ يەتتىم، پۇلۇمنى قايتۇرمىسىلا قانۇن ئالدىدا كۆرۈشەيلى! دېدى مامۇتاخۇن پۇلىنى ئالالمايدىغانلىقىغا كۆزى يېتىپ. مامۇتاخۇننىڭ دېلو مەلۇم قىلىشى بىلەن سادىق موللام بىلەن ئىككى شاگىرتى ئالدامچىلىق جىنايىتى بىلەن قاماقخانىغا سولىنىپ بۈگۈن سوتلاندى، مامۇتاخۇنغا ئوخشاش ئالدانغۇچىلارنىڭ بىر قىسىم زىيىنى تۆلىتىپ بېرىلدى، ئوغلىنى ئالداپ كەتكەن بالا ئوغرىلىرىمۇ قولغا ئېلىنغانىدى. -قانۇن مۇقەددەس، قانۇن بولمىسا بىز پۇقرالار قاچانغىچە بوزەك بولۇپ ياشايتتۇق ھە ! دېدى مامۇتاخۇن ئايالى بىلەن سوت مەھكىمسىنىڭ خىزمەت بىناسىدىن چىقىۋېىتىپ. -شۇنداق دادىسى، قانۇن بىزگە ھەقىقەتەن يۆلەك ئىكەن، بىز بۇنىڭدىن كېيىن دۆلەتنىڭ قانۇنىنى تېخىمۇ ھىمايە قىلىپ قانۇنغا تايىنىشىمىز كېرەككەن! مامۇتاخۇن ئايالى بىلەن ئارقىسىغا بۇرۇلۇپ ھەيۋەت بىلەن قەد كۆتۈرۈپ تۇرغان سوت مەھكىمە بىناسىنىڭ ئەڭ ئۈستىگە ئورنىتىلغان دۆلەت بەلگىسى ۋە دۆلەت بايرىقىغا تولىمۇ مىننەتدارلىق تۇيغۇسى بىلەن كۆزلىرىگە ياش ئالغان ھالدا قاراپ تۇرۇپ قېلىشقان ئىدى. شايار ناھىيەلىك خەلق سوت مەھكىمسىىدىن ئەمەر ھىمىت

rahmansaykin

faruh193

mastana888

	ياخشى تىما بوپتۇ مەن تىخى ئەختەم ئۆمەر نىڭ ھىكايىسى ئوخشايدۇ دەپتىمەن تىما ماۋزۇسىنى كۆرۇپلا.............

چراق

	ياخشى چىقىپتۇ بۇ ھېكايە، يەنىمۇ تىرىشىڭ.

nasif

	نىمانداق تەسىرلىك...... دىمىسىمىغۇ بار مۇشۇنداق قوساق باقتى ساختىپەزلەر... سېن كەيلۇننىڭ بىر رومانى بولىدىغان(يىرتىلغان نىقاب) دەيدىغان، شۇ يادىمدىن كەچتى ماۋزۇغا قاراپلا.....

turmux.net

	ياخشى چىقىپتۇ،  ياخشى تېمىلىرىڭىز ئۈزۈلۈپ قالمىغاي...

Gvlmisal

	nasif يوللىغان ۋاقتى  2015-2-10 07:44 PM نىمانداق تەسىرلىك...... دىمىسىمىغۇ بار مۇشۇنداق قوساق با ... ئوخشاش تەسىرات ...........

kaysar123

	ئىسىل تىما.....................

samitursun

	بەك بىتاقەت ئادەمكەنلا ! دېدى سادىق موللام ئاچچىقى كېلىپ، مانا مەن شاگىرتلىرىم بىلەن بالىلىرىنىڭ خەۋىرىنى ئېلىش ئۈچۈن توختىماي ئوقۇۋاتىمىزغۇ! بالىنى بەك يىراق يەرگە ئېلىپ كېتىپتۇ، بولمىسا ئوقۇغان ئايەتلىرىمىزنىڭ كۈچى بىلەن بۇ كەمگىچە ئېلىپ قاچقان ئوغرىلار ئۆز قولى بىلەن ئەكىلىپ بەرگەن بولتتى، سەۋر قىلسىلا، ئاللا نېسىپ قىلسا بالىلرى ھامان تېپىلىدۇ................... سادىق موللا دىگەن ئادەم بىر ئالدامچى بولغاندىن كىيىن، 《ئايەت》دىگەن سۆزنىڭ ئورنىغا 《ئەپسۇن》دەپ ئېلىنسا ياخشىراق بولامدۇ قانداق؟