ئوقۇغۇچۇمنىڭ خېتى）ھېكايە（

toltap

	‏‏‏                ئوقۇغۇچۇمنىڭ خېتى                        مۇھەممەد ئەمىن ئابدۇلئەزىز    غەمكىن ھالدا ئۈستىلىمگە ئېڭىشتىم . بىر تەرەپ قىلىشقا تىگىشلىك نۇرغۇن ئىشلار مېنى كۈتۈپ تۇراتتى . ‏   راست گەپنى قىلسام ئوقۇتقۇچىلىق دېگەندىن شۇنداق رايىم ياندى . رايىمنى ياندۇرغىنى باشقا بىر نەرسە ئەمەس بەلكى ئوقۇغۇچىلار ئىدى . ‏   كۆڭۈللۈك دەمسىز ؟ نېمىسى كۆڭۈللۈك ؟ كۈندە غوۋغا ، كۈندە جىدەل . گاھى ئۆزۈمنى مەن سىنىپ مۇدىرىمۇ ياكى مەھكىمە شەرئىنىڭ قازىسىمۇ دەپ قالىمەن . ‏   بالىلار ھازىر قاشاڭلىقتا شۇ دەرىجىگە بېرىپ يەتتىكى ، مېنىڭ قاپاق تۈرۈشلۈرۈم ، ھومىيىشلىرىم ، ئالىيىشلىرىم ، ھەتتا سېسىق گەپ بىلەن تىللاشلىرىممۇ ئۇلارغا تەسىر قىلمايدىغان بولۇپ قالدى . ‏   نېمىشقىمۇ سەدىردىننىڭ يۆتكىلىپ كېتىشىگە قۇشۇلغاندىمەن ؟ ھەي سەدىردىن ! ھەي سىەدىردىن ، سىنىپنى قانداقمۇ سىنىپ قىلغان بولغىيتىڭ ؟ سەندەك قابىل بىر سىنىپ باشلىقىدىن ئايرىلىپ قالغىنىمغا تولىمۇ ئېچىنىمەن . قارا ، سىنىپنىڭ ھازىرقى ھالىغا . بالىلارنى بۇنچىلىك قىلىپ كېتەر دەپ ئويلىماپتىكەنمەن . مانا كۆپچىلىكنىڭ قارارىسىز ئۆگىنىشتە ئەلا ، قۇلىقى يۇمشاق ، ھەممە ئىشتا پىرىنسىپچان ، مۇلايىم قىز گۈلنەزەرنى سېنىڭ ئورنۇڭغا دەسسەتكىنىم بېشىمغا بالا بولدى . جىمى خاپىلىق مۇشۇ قېتىمقى سىنىپ كادىرلىرىنى قايتا بىكىتىشتىن كىلىپ چىقتى . ‏   يەلكەمگە خۇددى يوغان بىر تاغنى ئارتىۋالغاندەك بولۇپ قالدىم . ئايالىم ئاغرىق . ئاخشام ئەلياتقۇ ۋاقتىدا تېلفونۇم سايراپ كەتتى . ئايالىمنىڭ ئەتراپىدا پەرۋانىدەك پايپىتەك بولۇپ ، قويغان - تۇتقىنىمنى بىلەلمەي يۈرگىنىمدە تېلفوننىڭ ئارقىمۇ - ئارقا سەت چىرقىراشلىرى كەيپىمنى ئۇچۇردى . ‏   - ئەسسالامۇ ئەلەيكۇم ،- دېدىم زەردە بىلەن . ‏   - ۋەئەلەيكۇم ئەسسالام ، ئۆمەر مۇئەللىممۇ ؟ ‏   - مەن شۇ ، نېمە ئىش ؟ ‏   - مەن مىجىت مۇئەللىم ، ھېلىقى ئوغۇل ئوقۇغۇچىلارنىڭ ياتاق تۇرمۇشىغا مەسئۇل ..... ‏   -ھە ، مىجىت مۇئەللىم ، بۇنچە كەچتە تېلفون قىلىپ قاپسىز ، بىرە ئىش يۈز بەرمىگەندۇ ؟ ‏   - ئوقۇغۇچىلىرىڭىز نېمە بولۇپ كەتتى ھە ؟ قارىسام ئۈچ ياتاقتىكى ئوقۇغۇچىلارنىڭ ھەممىسى قويدەك بىر ياتاققا تىقىلىۋاپتۇ . پۈتكۈل ياتاق بىناسىدا مىڭغا يېقىن ئوقۇغۇچى جىمجىت ئۇيقۇغا كەتكەن ، پەقەت سىزنىڭ ئەشۇ يىگىرمە نەچچە ئوقۇغۇچىڭىزلا ۋاراڭ - چۇرۇڭ قىلىپ ، ئالەمنى مالەم قىلىۋەتتى . نېمىش بولغاندۇ دەپ كىرسەم ، گېپى تېخى مېنىڭكىدىن يوغان . يىغىن ئېچىۋاتىمىز دەپ گۈركىرەيدۇ . سىزنى ئۇقۇپ قالسۇن دەپ تېلفون قىلىشىم . ‏   غەزەپتىن چىشلىرىم كىرىشىپ كەتتى . نەچچە ۋاقنىڭياقى بالىلار چوڭۇپ قالدى ، ئۆزىنىڭ يولىنى ئۆزى تاپىدۇ دەپ مەيلىگە قۇيۇۋەتكەن گۇناھ مەندە . بىر مۇنچە ئۆزىرخاھلىقلار بىلەن تېلفوننى قويىۋەتتىم . ئەسلى شۇ ئاچچىقىمدا ئىچ كىيىمىم بىلەنلا ماشىنامنى ھەيدەپ بېرىپ ، بىر - ئىككىسىنىڭ كۆرگۈلۈكۈنى كۆرسىتىپ قويماقچىدىم ، يەنىلا ئۆزۈمنى بېسىۋالدىم . كىم قويۇپتۇ ئۇلارغا يىغىن ئېچىشنى ، يىغىن دېگەننى مۇئەللىم ئاچمامدۇ ؟ ئۇلارنىڭ كۆڭلىدە نېمە چوتلارنى سوقۇۋاتقىنىنى مەن بىلمەمدىم ؟ خەپ !..... ‏   يانچۇقۇمدىن تاماكامنى ئالدىمدە ، يۈز مۇسكۇللۇرۇمنىڭ تارتىشىشى بىلەن لىپىلداپ كەتكەن كالپۇكۇمغا قىستۇردۇم . بىراق چاقماقنى تاپالماي رەللە بولۇپ كەتتىم . ئۇ يانچۇقۇمدىمۇ يوق ، بۇ يانچۇقۇمدىمۇ يوق . تارتمامنى ئەلەم بىلەن كۈچەپ تارتىۋىدىم ، تويۇقسىز بىر نەچچە ۋاراق قەغەز كۆككە بىر ئۆرلىۋېتىپ ، ئاندىن كەچكۈزدىكى دەرەخ غازىڭىدەك ئالدىرىماي لەيلىگىنىچە قۇچۇقۇمغا چۈشتى . نېمە قەغەزلەردۇر دەپ قارىغانىدىم ، قوناق پاسىرىنىڭ يىلتىزىدەك ئىرماش - چىرماش خەتلەر كۆزۈمگە چېلىقتى . ھەرپلەرنىڭ قۇيرۇقىغا قاراپ ئېھتىمال سول قولدا يېزىلغان بولسا كېرەك دەپ پەرەز قىلدىم . خەتتە مۇنداق دېيىلگەن ئىدى .              ‏************* ‏   قانداق ئەھۋالدىسىز ؟ ھۆرمەتلىك ئۇستاز ! تىنىڭىزنىڭ سالامەت ئىكەنلىكىگە ئىشىنىمەن . ئۆزۈمنى تونۇشتۇرۇپ ئولتۇرمىساممۇ بولار . مېنى كۆرسىڭىز چوقۇم تونۇيسىز . نۆۋەتتە پىكىر ئالماشتۇرىشىمىزنىڭ ئەركىن - ئازادە ۋە تەبىئىي بولۇشنى كۆزدە تۇتۇپ نام - شەرىپىمنى مەخپى تۇتماقچىمەن . چۈشىنەرسىز ! مېنى بىر ھىسابتا 11 - يىللىق 5 - سىنىپتىكى بارلىق يۈرىكى دەرت - ئەلەمدىن لەختە - لەختە قان بولغان قەيسەر ئوغۇل ئوقۇغۇچىلارنىڭ ۋەكىلى دەپ بىلسىڭىزمۇ بولىدۇ . ‏   بەرىبىر كىم ئىكەنلىكىمنى بىلمىگەندىن كىيىن قورقماي دەۋىرەي . داپتەك ئادەمكەنسىز ! داڭ قېتىپ قالدىڭىزمۇ ؟ دەماللىققا چۈشىنەلمىدىڭىز ھە ؟ يەنە بىر دەپ بىرەي . داپشاق ئادەمكەنسىز ، يۈزىڭىز ئىشەك تېرىسىدىنمۇ قېلىن ئىكەن . سۈرۈشتۈرۈپ يۈرۈپ سىزدە قان بېسىم كېسىلى يوق ئىكەنلىكىنى جەزملەشتۈردۈمدە ، بۇ گەپلەرنى قىلدىم . ئەگەر خاتالاشقان بولسام دەرھال جىددى قۇتقۇزۇشقا تېلفون قىلارسىز ، يا بولمىسا جامائەت خەۋپسىزلىكىگە . لېكىن ئوت ئۆچۈرۈشكە مەلۇم قىلىمەن دەپ ئاۋارە بولماڭ ، چۈنكى سىزنىڭ يۈزىڭىز ئازراقمۇ قىزىشمايدۇ . ‏   بىلىمەن . بۇ گەپلەر بىر ئوقۇغۇچىنىڭ بىر ئوقۇتقىچىغا دەيدىغان گەپلىرى ئەمەس ، مەندە ۋىجدان يوق . ھازىر بىزنىڭ سىنىپنىڭ ئوقۇغۇچىلىرىدا ۋىجدان يوق . سىنىپنىڭ ھازىرقىدەك كەيپىياتى ئىچىدە كىمدىمۇ ۋىجدان بار دەيسىز . بۇ ۋىجدانسىزلىقلارنى كەلتۈرۈپ چىقارغان كىشىنىڭ دەل ئۆزىڭىز ئىكەنلىكىڭىزنى ھېس قىلىپ باقتىڭىزمۇ ؟ ‏   سىز نېمىشقا گۈلنەزەرنى سىنىپ باشلىقى قىلىپ قويىسىز ؟ ئېيتىڭە ، زادى نېمقشقا ؟ قىزلار ھوقۇق تۇتقان ئىش نەدە باركەن ؟ گۈلنەزەرنىڭ ئەمەل بېشىغا مىنىشى سىنىپنى ئاستىن - ئۈستۈن قىلىۋەتتى . ياقىلار ئىتەك بولدى ، ئىتەكلەر ياقا . قىزلار يىلاندۇركى بىز مىسال پاقا . قانداق ؟ ئەمدى بۇنىڭغا نېمە دەيسىز ؟ زۇلۇم جاندىن ئۆتتى ، پىچاق سۆڭەككە يەتتى . شۇنىڭ ئۈچۈن بىز ئوغۇللار ئاخشام كېڭەش قىلىش ئارقىلىق قىزلارغا تاقابىل تۇرىدىغان بىر قاتار تەدبىرلەرنى تۈزۈپ چىقتۇق . قانداق دەڭ ؟ مانا مۇنداق ، قايسىكى قىز ئۆز ھوقۇقدارىنىڭ ھەيۋىسىنى ئارقا تىرەك قىلىپ بىزگە نوچىلىق قىلىدىكەن ، قىز بالا دەپ ئاياپ ئولتۇرماي يەتكۈچە دۇمبالايمىز . ھەرقانداق ئاقىۋەتكە ئەلۋەتتە سىز مەسئۇل . ‏   نېمە ئۈچۈن ؟ ھە ؟ زادى نېمە ئۈچۈن ؟ بىزنىڭ سىنىپتا سىنىپ باشلىقى بولغۇدەك ئوغۇل بالا يوقمىكەن ؟ دەپتىكەن دەرسىز ، مۇشۇ تاپنىڭ ئۆزىدە قايسىكى ئوغۇل بالىغا سىنىپنى تاشلاپ بەرسىڭىز گۈلدەك تۇتۇپ كېتەلەيدۇ . ئۆتەپ - تېشىپ ئەمدى قىز خەقنىڭ قولىغا قالدۇقمۇ ؟ بۇ بىر ھاقارەت ، بەلكى ئېغىر ھاقارەت . سىز ۋە جۈملىدىن 11 - يىللىق 5 - سىنىپتىكى 23 نەپەر سوقا سەندەلدەك ، يىگەن - ئىچكەندەك مەرد ئەركەكلەرنىڭ يۈزىگە سۈركەلگەن قارا . بىز قارا يۈز بولدۇقمۇ ئەمدى ؟ ‏   قىزلار تويۇقسىز ھەددىدىن ئېشىپ كەتتى . توغرا ، ئۇلار ئېشىۋالدى . ئەمەل ئۆلۈكنىمۇ تىرىلدۈرىدۇ دېگەن گەپ راست ئوخشايدۇ . گۈلنەزەرمۇ بېشىغا ئەمەلنىڭ تاجىنى كىيۋېلىپلا ئوغۇللارنى كۆزگە ئىلماس بولۇۋالدى . قىزلارنىڭ زورلۇق - زومبۇلۇق ۋە ئۆكتەملىكلىرىنى باشتا چاقچاق دەپ چۈشەنگەن ئىدۇق . بىراق بىز خاتالىشىپتىمىز . ئۇلار تېخى باشقا سىنىپتىكىلەرگە ماختىنىپ يۈرگىدەك . ئەجەب يامان نېمىكەن قىز بالا دېگەن . ئادەمنى تىللايدىكەن . زەھەردەك گەپلىرى بىلەن چېقىۋالىدىكەن . ئۇرۇپ قويسا نامەردلىك بولىدۇ ، تەڭ تىللاشسا تېخى سەت تۇرىدۇ . قانداق قىلىمىز ؟ گاس - گاچا بولۇۋالىمىز ، ئاقساق - چولاق بولۇۋالىمىز . يېقىندا بىر دوستۇم ئاجايىپ كاتتا ئامالدىن بىرنى ئويلاپ چىققانىكەن ئەمىلىلەشتۈرۈپ باقتۇق . ئەمما ، ئۈنۈمى تازا ياخشى بولمىدى . قانداق ئىش دەمسىز ؟ قانداق ئىشتى ؟ مەجۈن يەۋالىدىغان ئىش . مۇشۇ مەجۈن دېگەنمۇ قالتىس نەرسىكەن قاراڭ . قوناقتەك يەۋالسىلا ئەۋلىياغا ئايلىنىدىغان ئىشكەن . راست ، سىزنى ئالدىمىدىم . قايسى كۈنى ئازراق يەۋىلىپ قايناق سۇنى بولۇشىغا ئىچكەنتىم بېشىم كۆككە يەتتى . قۇلاق تۈۋىمدە شامال چىقىۋاتىدۇ . نېمە ئىشتۇ دەپ قارىسام بولۇتلارنىڭ ئارىسىدا ئۈزۈپ كىتىۋاتقۇدەكمەن . كۈپكۈندۈزدىلا يۇلتۇز كۆرگىنىمچۇ تېخى . شۇنىڭغا قاراپ ئەۋلىيالىق مەقامىغا يەتكەن ئوخشايمەن دەپ ئويلاپ قالدىم . شۇ ئەمەسمۇ ؟ قىزلارنىڭ سېسىق گەپلىرى ۋە بىھايا قىلىقلىرىدىن قۇتۇلسا مۇشۇنداق ئەۋلىيا بولىدىغان ئىشكەن . ‏   ئۆزىمىزنىڭ كىملىكىنىمۇ ئاڭقىىرالماي كۈننى كەچ قىلىپ ياتاققا كەپتىمز . بىر ۋاقىتتا ئۇخلاپ ئويغاندىممكىن تاڭ ، كۆزۈمنى ئاچسام باشقا بىر ياتاقتا يېتىپتىمەن . دوستلارنى ئىزدەپ - ئارىلاپ پاختا تەرگەندەك تىرىپ چىقتىم . قىزىق يېرى ئۇلارنىڭ يۈزى كۈپتەك ئىششىپ ، ئاجايىپ ئىسكەتكە كىرىپ قاپتۇ . شۇنداق قاتتىق كۈلۈپتىمەن . ئۇلارمۇ ماڭا قاراپ كۈلىدۇ . ئەينەككە قارىسام ئۇلاردىن بەتتەرراق ھالغا چۈشۈپ قاپتىمەن . يۈزۈمنى سىلىسام شۇنداق سىلىق بولۇپ كېتىپتۇ . قولۇمغا مايلىق بىر نەرسىلەر ئورۇنغاندەك قىلىۋىدى ، پۇراپ باقسام ساپلا قىزلارنىڭ قولىغا سۇۋايدىغان قول مېيى ئىكەن . باشقا دوستلارنىڭمۇ ھەم شۇنداق . دەرغەزەب بولدۇقتە ، بۆرىدەك ھۇۋلاپ نەرە تارتقىنىمىزچە سىرتقا تاشلاندۇق . شۇنچە قېدىرىپمۇ ئۇلارنى ھېچيەردىن تاپالمىدۇق . ئەسلى ئۇلارنىڭ ھەممىسى ياتاقلىرىغا مۆكۈۋېلىشقان ئىكەن . ‏   مانا قاراڭ ، ئۇلارنىڭ ھازىر توپلىشىپ گۇروھۋازلىق قىلىشىپ كەتكىنىنى . جىدەل مۇشۇنداق تەرەققى قىلىشقا باشلىدى . ئەتىسى سۈرلۈك ھالدا گۈس - گۈس قەدەملەر بىلەن سىنىپقا كىردىمدە ، نەخ ئالدىمغا ئۇچراپ قالغان ئادىلەنىڭ ياقىسىدىن ئالدىم . ‏   - ھۇ پاسكىنا ! كەيىپلىكتە بىزنى ئەخمەق قىلىشىپسەنا ! ‏   - پاسكىنا ؟ مېنى پاسكىنا دەۋاتامسەن ھوي لەقۋا ، قاراپ باقە ئۆزۈڭگە ، كىم پاسكىنىكەن ؟ سەت قاسماق ! ‏   - ئوچۇقتىن ئوچۇق قىلىنغان بۇ ھاقارەتلەر ئەرلىك غورۇرۇمغا ئۇدۇل بېرىپ تەسىر قىلدى دە ، قەلب دېڭىزىمنى لەززىگە سېلىپ قاتتىق دولقۇنلىتىۋەتتى . ‏   - ئانناڭنى رەسۋا ! ،- شۇنداق دېگىنىمنى بىلىمەن ، چاڭڭىدە بىر ئاۋاز چىقتى . ئويلاپ باقسام ئېيىق تاپىنىدەك ئوڭ ئالقىنىم ئۇنىڭ سول مەڭزىگە قاپقارا بەش بارماقنىڭ ئىزىنى چۈشۈرۈپ قويۇپتۇ . توۋا دەپ قالدىم . باشقا بىر رەڭدىمۇ ئەمەس دەل قارا بولۇپ قالغىنى نېمىسى ؟ قانداق قارا دېمەمسىز ؟ قازاننىڭ قارىسىدەك قارا. مېنىڭ قولۇم شۇنچىۋالا قارىمىدۇ ؟ تېخى ئەتتىگەندىلا يۈزۈم بىلەن قوشۇپ يۇيغىنىم ئىنىق ئىسىمدە تۇرسا ، قاراپ تۇرۇپ پاسكىنا مەن بولدۇممۇ ئەمدى ؟ قورقۇپ كەتتىمدە قولۇمنى قولتۇقۇمغا تىقىۋالدىم . ئاندىن كۆزىدىن ئوت چاقنىتىپ تۇرغان ئادىلەگە قاراپ ھېچ ئىش بولمىغاندەك قېلىنلىق بىلەن ھىجايدىم . ‏   - مېنى ئۇرغۇدەك بولدۇڭمۇ پاسكىنا ؟ ،- ئۇنىڭ شۇنداق دېگىنىنى بىلىمەن ، چاڭڭىدە بىر ئاۋاز چىقتى . چاقماق سوقىۋەتتىمىكىن دەپتىمەن . ئەسلىدە ئادىلەنىڭ شاپىلىقى ئىكەن ئەمەسمۇ ؟ ئاچچىقتىن يېرىلاي دېدىم . نېمە خورلۇق بۇ ماڭا ؟ سىنىپقا باشقا ئوغۇللاردىن بالدۇر كىلىۋالغاندىكىن ماڭىمۇ خوپ بولدى تازا . ئۇنىڭ بىلەن يەنە سوقۇشسام ئاقىۋىتىنىڭ ئۇنچە ياخشى بولمايدىغانلىقىنى ئويلاپ ئاستا تازلىق ئۆيىگە قاراپ تىكىۋەتتىم . ‏   - ئەجەب ئىش ھە ؟ ،- دېدىم ئۆز - ئۆزۈمگە ،- قولۇم شۇنچىۋالا قارىمۇ مېنىڭ ؟ بىلىپ - بىلمەي بىرەر قارا نەرسىنى تۇتۇپ سالدىممۇ يا ؟ ‏   قولۇمنى قولتۇقۇمدىن ئاۋايلاپقىنا سوغۇردۇم ، ئەندىككەندەك ئالقىنىمغا قارىدىم . نەدىكىنى ؟ ئالقىنىم ئەتتىگەنكىدىنمۇ ئاق تۇرىدۇ . ئاق بولغاندىمۇ سۈتتەك ئاپئاق . سول قولۇمدىنمۇ ئاقىرىپ كەتكەن بۇ ئوڭ قولۇمنى سول قولۇم بىلەن سىلاپ بېقىۋىدىم ناھايىتىمۇ مايلاش تۇيۇلدى . پۇراپ باقسام ئەسلى قىزلارنىڭ يۈز مېيى ئىكەن ئەمەسمۇ ؟ ‏   ئەخمەق بوپتىمەندە . ئەڭ قىزىق يېرى شۇكى ، قولۇمنى يۇيۇۋاتقاچ ئالدىمدىكى ئەينەككە قارىسام مېنىڭمۇ يۈزۈمگە قاپقارا بەش بارماقنىڭ ئىزى چۈشۈپ قاپتۇ . ‏   - ھىم ، ئەسلى مۇنداقكەندە ، ھەقىقى پاسكىنا سەنكەنسە ،- دېدىم . ‏   قايتىدىن جەڭگىۋار ھالەتكە ئۆتتۈمدە ، سىنىپقا بوراندەك ئۈسۈپ كىردىم . ئەييۇھانناس ! نەدىن كەلدى بۇ كاساپەتلەر ؟ قىزلارنىڭ ھەممىسى قوللىرىغا سۈپۈرگە ، چىلەكلەرنى ئېلىپ ئوغۇللارنى ساقلاۋاتقانىكەن . قاراملىق بىلەن يولۋاسنىڭ ئۇۋىسىغا كىرىپ قالغىنىمنى ھېس قىلدىمدە ، پارتلا قاچتىم .....   ‏   مۇشۇنداق ئىش مۇئەللىم ، قىز بالا دېسە ھازىر كۆزۈمگە ئالۋاستى كۆرۈنىدىغان بولۇپ قالدى . ئۇلار ھەقىقەتەن بۇزۇلۇشقا باشلىدى . غورا ئۆرۈكنى كۆرسە ئالا بوپتۇ دېگەندەك يۇۋاش قىزلارمۇ تۇرۇپلا قىلىق چىقارغىلى تۇردى . بىلىسىزغۇ ؟ ئى پەرىدەنى . شۇنداق ئېسىل قىز بالىتى . كەڭ - كەڭرى كىيىملەرنى كىيىپ ، ياغلىقىنى چىرايلىق چىگىپ ماڭغىنىنى كۆرسەم بىر خىل مەستلىكىم كىلىپ كېتەتتى . دىققەت قىلغانسىز ؟ يېقىننىڭياقى ئۇ بىچارە ھېسىپتەك ئىشتانلارنى كىيىۋېلىپ ، قەدەمنىمۇ قىينلىپ دېگۈدەك ئارانلا بىر غېرىچ ئالالايدىغان بولۇپ قاپتۇ . سىرتتىغۇ شۇنداق قىلسۇن بوپتۇ ، مەكتەپتىمۇ شۇنداق قىلامدۇ دەيمەن ؟ مەكتەپ فورمىسىنىڭ ئىشتىنىنى تارلاشتۇرۇپ ، پۇچقىقىنى ئاياغنىڭ بوغقۇچى بىلەن بوغۇپ ، بەئەينى 8 - ئارمىيەنىڭ ئەسكەرلىرى گوجەي يۆگىگەندەك قىلىۋاپتۇ . پەرىدە شۇنداق قىلغان يەردە باشقىلىرى قانداق قىلماقچىدى دەيسىز ؟ سىزمۇ بولمايدىغان ئادەمكەنسىز . شۇنچە ئىشلارنى كۆرۈپ تۇرۇپمۇ كۆرمەسكە سالىدىغان . ‏   بىز ئوغۇللار ھازىر پارتلاي دەپ قالغان بومبىغا ئايلىنىپ قالدۇق . ئەمدى چىدىمىدۇق . ئۇلارنى زادى پومىداقلاپ ئاپىرىپ پاتقاق گازى كۆلچىكىگە خام ئەشيا قىلىپ تاشلىۋەتكۈدەك بولۇپ كەتتۇق . سىزمۇ ئەمدى ئېھتىيات قىلىڭ . يالاڭ ئاياغ سۇدىن قورقماپتۇ دەيدىغان گەپ بار . ھەر قانچە قىلساقمۇ بىز ئوغۇللار قىزلارنىڭ بۇنداق بىھايا بولۇپ كېتىشىگە كۆز يۇمۇپ تۇرالمايمىز . نېمە ئۇ ؟ بىر يەردە چاپاننى ئىشتاننىڭ ئىچىگە تىقىۋېلىپ كىيىدىغان ئىش بارمىكەن ؟ ئۇلار بىزگە نېمىسىنى كۆز - كۆز قىلماقچى ؟ ئەمدى بىز قىزلارنى باستۇرىمىز ، ئۇلارنى ئېزىمىز ، ئىلگىركى ئادەم قېلىپىغا سالىمىز . قايسى بىرى غىڭ قىلىدىكەن ئۆزىنى دوزىخى ۋەيلۇندا كۆرسۇن ! ‏   ھە راست ! بايا بىر ئىشنى دېيىشنى ئۇنتۇپ قاپتىمەن . سىنىپ باشلىقى چوقۇم ئوغۇل بالا بولۇشى كېرەك . بولمىسا قىزلار تاپتىن چىقىدىكەن . سىزمۇ بىزنىڭ پىكرىمىزنى ئالمايلا ئۆزىڭىز بىلگەن سەنەمگە دەسسەپسىز ، بىزمۇ دەسسەيمىز . ياقۇپنىڭ بېشىدىكى ھۈررەكلەر تېخى جىمىققىنى يوق . نېمە ھۈررەك ؟ ھېلىقى ئاشخانىدا گۆش تالىشىپ گۈلنىسا تەرىپىدىن چۆمۈچ بىلەن بېشىغا يەپ پەيدا بولۇپ قالغان ھۈررەك . گەپنى قىلسام - قىلسام پىغانىم ئۆرلەيدۇ . قىز بالا زادى قىز بالىغا ئوخشىماي قالدى ..... ‏   پىكرىمنى ئوبدان ئويلىنپ كۆرۈپ بىر قارار چىقىرىشىڭىزنى پۈتۈن سىنىپ ئوغۇللىرىغا ۋاكالىتەن ئۈمىد قىلىمەن . جاۋابىڭىزنى خەت قىلىپ يېزىڭدە ، سىنىپتىكى ئەخلەت چېلىكىنىڭ ئىچىگە  تاشلاپ قويۇڭ ، بىز ئېلىۋالىمىز . ‏   پەرىشەپ ۋە ۋىجداننى بىر چەتكە قايرىپ قويۇپ سىزگە خەت يازغان يارامسىز ئوقۇغۇچىڭىز :xx               ‏********** ‏گاھ ئاچچىقلىنىپ ، گاھ كۈلۈپ ئولتۇرۇپ ئوقۇغان بۇ خەتكە زادى نېمە دەپ جاۋاب يېزىشنى بىلەلمەيلا قالدىم . بىر ھازا ئويلىنىپ چىقتىمدە ، قەلەمنى قولۇمغا ئالدىم ، ۋە مۇنۇ قۇرلارنى كىچىك بىر قەغەز پارچىسىغا يېزىپ چىقتىم . ‏   «ئەرلىرى زەيپانىلەشكەن ئەلنىڭ ئاياللىرى رەسۋالىشىدۇ . سىنىپ باشلىقى ئالماشمايدۇ . مەن ھېلى ئالدىغا ، ھېلى ئارقىغا ماڭىدىغانلاردىن ئەمەس . بۇ ئىشلار پەقەت ئۆزۈڭلارنىڭ ھەددىدىن زىيادە گۇمانخورلۇقۇڭلاردىن كىلىپ چىققان . قىزلارنى قېلىپقا سېلىش سىلەرنىڭ زىممەڭلاردىكى ۋەزىپە . بىراق ، شۇنى ئاگاھلاندۇرۇپ قويايكى ، ھېچكىمنىڭ ھېچكىمنى تاك ئىتىپ چىكىشىگە رۇخسەت يوق . بولمايدىكەن مەكتەپتىن ھەيدىلىدۇ . تەكلىپىم شۇكى ، ھەقىقى ئوغۇل بالىدەك ياشاپ بېقىڭلار ! قىزلارمۇ قىزلارغا ئوخشايدۇ». ‏   ئېغىر گەۋدەمنى تەستە يۆتكىدىمدە ، خەتنى ئېلىپ چىقىپ ھېلىقى ئەخلەت چېلىكىگە تاشلاپ قويدۇم . ‏ ‏   2014 - يىلى 15 - ماي .           ‏خوتەندە يېزىلدى .

خەنجىرى

	بۇ ئەسەرنى ئوقۇپ ئوقۇغۇچىلىق ۋاقىتلرىم  ئىسمگە كەلدى

turmux.net

	ماۋۇ ھېكايە ئۆزگىچە چىقىپتۇ، يەنە بىر قېتىم ئوقۇپ باقسام بولغۇدەك...

talat125

	راس   بەك  ياخشى  چىقىپتۇ  ما  ھىكايە

feruq

	ھەقىقەتەن بەك ياخشى يېزىلىپتۇ

يولتۇز

	بىزنىڭ سىنىپ باشلىقى قىزلارنى يىغىۋېلىپ  دائىم يىغىن ئاچاتتى  ، مىللىي غۇرۇر ، ھايا يەنە نۇرغۇن نەرسە توغرۇلۇق ، يەنە تېخى «باشقا سىنىپتىكى يىگىتلەر بلىەن مۇھەببەتلىشىشكە بولمايدۇ سىنىپىمىزدا شۇنچە قاملاشقان ياخشى يىگىتلەر تۇرسا بۇنداق قىلساڭلا قانداق بۇلىدۇ » دەپ كايىپ كەتكەنتى بىر قېتىم ، بۇ ھىكايىنى ئۇقۇپ شۇ ئىشلار يادىمغا يىتىپ قالدى

fatih0304

	بۇ ھېكايىنى ئۇقۇپ ئوقۇغۇچىلىق ۋاقىتلىرىمنى ئەسلەپ قالدىم،ھېكايىڭىز ياخشى چىقىپتۇ

musilina

	قاپ يۈرەك ئوقۇغۇچىكەن ماۋۇ،ۋىجدان-غورۇر  دېگەنلەرنى خېلى چۈشىنىدىكەن بولمىسا..... راسا كۈلۈپتىكەن ما خەتنى ئوقۇۋېتىپ،تىلى قىزىقارلىق چىقىپتۇ...

tumaris01

	دېمىسىمۇ ئوغۇللار ئاز - تولا باشقۇرۇپ تۇرسا ، قىزلارمۇ قىزلارغا خاس ئېسىل پەزىلىتى بىلەن يۈرۈيدۇ . ئەمدى سىنىپىدىكى قىزلارنى باشقا ئوغۇللار يېتىلەپ يۈرسە ، قىزلار قىزلاردەك كىيىنىپ يۈرمىسە ئەلۋەتتە ئوغۇللارنىڭ ئاچچىقى كېلىدۇ - دە ، ئەگەر ئوغۇللارمۇ شۇ قىزلارنىڭ كۆزىچە باشقا سىنىپتىكى قىزلارنى يېتىلەپ ، پېچەت ياسىنىپ يۈرسە  ، سىنىپتىكى قىزلارنىڭ ئەلۋەتتە ئاچچىقى كېلىدۇ ئەمەسمۇ .

qaxmazulal

	بىز ھازا ئويلاندىم ...ئوقۇغۇچىنىڭ گېپىنىڭ ئىچىدە گەپ با... بۇ بىر سىنىپ ئەمەس، بۇ بىر جەمىئەت،بۇ بىر مىللەت. سىنىپنىڭ ئىشىنى سىنىپ باشلىقىنى ئالماشتۇرمايمۇ ھەل قىلغىلى بولار،ئەمما جەمىئەتنى،مىللەتتىكى ئىللەتنىچۇ؟