 |
 |
 |
 |
يۇمشاق دېتال ساھەسىدىكى داڭدار شەخىس بېل گايتىس ھەممىمىزگە ئىنتايىن تونۇشلۇق. مۇشۇنداق مەشھۇر شەخىسنىڭ قانداق تەربىيە ئاستىدا چوڭ بولغانلىقىغا قىزىقامسىز؟ بېل گايتىسنىڭ دادىسى ۋېليام ھېنرى گايتىس يېقىندا نەشردىن چىققان بىر كىتابىدا ئامېرىكىدىكى ئادەتتىكى بىر ئوتتۇرا بۇرژۇئا ئائىلىسىدىن چىققان دۇنيا بويىچە ئەڭ باي كىشىنىڭ ئۆسمۈرلۈك دەۋرى ھەمدە شۇ مەزگىلدە قوبۇل قىلغان ئائىلە تەربىيەسىنى تەسۋىرلىگەن.
گايتىس ئەپەندى كىتابىدا ئەڭ ئاۋۋال كىشىلىك ھاياتتا نېمە ئەڭ مۇھىم؟ دېگەن سوئالنى ئوتتۇرىغا قويۇپ، ئۇنىڭغا مۇنداق جاۋاب بەرگەن: كىشىلىك ھاياتتا ئەڭ مۇھىم بولغىنى ئائىلە ئەزالىرى، دوستلار ھەمدە ئاممىۋى مۇلازىمەت. ئۇنىڭ قارىشىچە، بىر ئائىلىنىڭ چوقۇم مۇنتىزىم باشقۇرۇش مىزانى بولۇشى كېرەك ئىكەن. ئۇ كىتابىدا ئۆزلىرىنىڭ ئەڭ مۇھىم ۋە ئەڭ مۇنتىزىم بولغان ئۆزگەرمەس ئائىلە تۈزۈمى «يەكشەنبىلىك كەچلىك غىزا» نى تىلغا ئېلىپ مۇنداق يازغان:«بۇ بارلىق ئائىلە ئەزالىرى شەرتسىز بويسۇنىدىغان تۈزۈم، شۇنداقلا ھەر كىمنىڭ ھەر قانداق سەۋەب بىلەن قاتناشماسلىقىغا يول قويۇلمايدىغان ئائىلە ئەزالىرى يىغىلىشى. ئەمەلىيەتتە ياخشى كۆرگەن ئادەملىرىڭىز ئۈچۈن مۇنداق «كەچلىك غىزا»غا ئۇلار بىلەن بىللە داخىل بولۇش ئىنتايىن مۇھىم ئىش. «يەكشەنبىلىك كەچلىك غىزا»دا بىز پەرزەنتلىرىمىز بىلەن بىر ھەپتىدىن بۇيان كۆرگەن، ئاڭلىغانلىرىمىز توغرىسىدا پىكىر ئالماشتۇرىمىز. بۇ بىر ئائىلە كىشىلىرى ئۈچۈن ئىنتايىن مۇھىم. نەسىھىتىم شۇكى، مەيلى قانچە پەرزەنتىڭىز بولۇشىدىن قەتئىينەزەر، ئۇلارغا باشقىلار بىلەن قانداق مۇناسىۋەت باغلاشنى، قانداق پىكىر ئالماشتۇرۇشنى ئۆگىتىڭ ۋە بۇنى ئائىلىدىن باشلاڭ. مانا بۇ ھەر بىر ئاتا-ئانىنىڭ ئەڭ ئاۋۋال ئورۇنداشقا تېگىشلىك ئىشى. ھەرقانداق ئائىلىنىڭ ئۆز ئالدىغا بىر ئالاھىدىلىكى بولىدۇ، ھەر بىر ئائىلە ئەزاسىمۇ دەل شۇ ئالاھىدىلىكىدىن پايدىلىنىپ، ئۆزلىرىنىڭ قابىلىيىتىنى ۋە خاسلىقىنى نامايەن قىلىدۇ ھەم باشقىلارنىڭ ئارتۇقچىلىقىنى ئۆگىنىدۇ. ئۆز ئارا ئۆگىنىش جەريانىدا شەكىللەنگەن ئائىلە ئەزالىرى ئارىسىدىكى بۇ خىل دوستلۇق ئۆز نۆۋىتىدە پەرزەنتىڭىزنى دائىم يالغۇزسىراش، باشقىلارغا، تۇرمۇشقا ۋە ھاياتقا سوغۇق مۇئامىلىدە بولۇشتىن ساقلاپ، ئۇلارنى ئەڭ مۇھىم ياشاش ئىقتىدارىغا، يەنى باشقىلار بىلەن ھەمكارلىشىش ۋە ماسلىشىش ئىقتىدارىغا ئىگە قىلىدۇ».
گايتىس ئەپەندى كىتابىدا يەنە بالىلارنى ئىجتىمائىي پائالىيەتلەرگە كۆپرەك قاتناشتۇرۇشنىڭ مۇھىملىقى ھەققىدە توختالغان بولۇپ، شۇنداق قىلغاندىلا بالىلاردا كىچىكىدىن تارتىپ «ھەر قانداق بىر ئادەم جەمئىيەتتىن ئىبارەت بۇ مۇنبەت تۇپراقتىن ئوزۇق ئالىدىغان مايسا، شۇڭا ھەر ۋاقىت جەمئىيەتكە مىننەتدارلىق بىلدۈرۈشى كېرەك» دېگەن ئىدىيەنى يېتىلدۈرگىلى ھەمدە ئۇلاردا ئىنسانىيەت ئۈچۈن تۆھپە قوشۇش، جۈملىدىن جەمئىيەتكە جاۋاب قايتۇرۇش ئىرادىسىنى تىكلىگىلى بولىدىكەن.
مەنبە؛ نۇرتورى
|
 |
 |
 |
 |
|
يوللىغان ۋاقتى 2015-1-22 04:31:43 PM
.gif)