خىيال سۈرۈپ كېچىدە يانۋارغا يۆلەندىم

bahwanbiz

	خىيال سۈرۈپ كېچىدە يانۋارغا يۆلەندىم چاراسلايدۇ ئاسماندا يېڭى يىللىق تىلەكلەر ، سوزۇلماقتا قۇلىقىم خۇش خەۋەرنى سېغىنىپ . بېرەلمىدى جاۋاپنى پۈتۈن سانلىق ئىپادەم، قەبرىلەنگەن ئۆتمۈشۈم قايتىپ كېلەر تىرىلىپ . كىچىكلەيدۇ ھاۋادا خاسىيەتلىك  ئاھاڭلار  ، كېسىلمەكتە توساتتىن  ناخشىلارنىڭ ئۈچىيى . ھاياجىنىم مۇزلىدى ھارارىتىم يىراقلاپ ، قوروق چۈشتى ئاھىمغا قېنىقلىشىپ يىلسىرى . قىممىتىڭنى بىلمىدىم كەچۈر، مېنى كونا يىل ، ئېقىپ كەتكەن بىھۇدە كۈندۈزلەرگە يىغلايمەن . شەجەرەمگە قالدۇراي بىرەر جۈملە ۋەسىيەت ، پەسىللەردىن نائۈمۈد بىرەر مىنۇت سورايمەن . سۈكۈتلەرنى پارچىلاپ قار يىمەكتە خىيالىم ، ئەركىلىگەن سوغۇقلار قارچۇقىمنى چەنلىدى . ئەندىشەمگە رەڭ بېرىپ قاپاق تۈرەر ئىمتىھان ، ئويلاپ مۇزدەك ئەتىنى قىياپىتىم تەرلىدى . چۈشلىرىمنى چىمدىغان كېچىلىرىم قايتىڭلار ، رىئاللىقىم  پۈرلىگەن داستانلىرىم يىرتىلدى . دوقمۇشلاردا جان ئۈزگەن گۇگۇملارغا يىغلايمەن ، قوۋۇرغامدا مېھىر يوق ، ئەرزان پۇلغا سېتىلدى ! بۇلۇتلارغا پىچىرلاپ چاي ئىچىدۇ تولۇنئاي ، خىيال سۈرۈپ كېچىدە يانىۋارغا يۆلەندىم . قۇۋەت ئىزلەپ قەۋمىمنىڭ يىلتىزىغا چىرمىشاي ، تۇپرىقىمغا قايتىدىم سازاڭ بولۇپ تۆرەلدىم . ئاپتۇرى : ئابلەت مۇھەممەت باغۋەن

alhumar137

	يانىۋار  ئۆتۇپ كەتكىچە  سىزمۇ ئورنىڭىزدىن تۇرۇپ كىتىڭ

soygum

	ياخىشى يېزىپسىز،ھوزور ئالدۇق ،قۇۋرغامدا مېھىر يوق ئەرزان پۇلغا سېتىلدى دەڭ\ كونا يىل قانداقلا بولسۇن كەتتى،ئۇ مەڭگۈ كەلمەيدۇ،يېڭى يىل ھەققىدە ئۈمىدلىك ،پەيزى شېئىرلارنىمۇ يېزىپ بىزگە مەدەت،ئېلھام بەرگەيسىز

kadidin

	كەتكەن بىلەن كونا يىل، بار ئەمەسمۇ قەدىناس گۇلۇڭ. يېڭى يىلدا بەخىت سىنىڭكى، نۇرغا ئۇخشاش تۇز بولسا كۇڭلۇڭ.......

Janbar

	شېئىر ھەقىقەتەن ئېسىل يېزىلىپتۇ ئاكا، مۇمكىن بولسا ماۋزۇنى قىسقىراق قويۇشنى ئويلاشسىڭىز دېگەن ئۈمىدتە مەن. چۈنكى يانۋار سۆزى ئۈچ بوغۇم ئەمەس بەلكى ئىككى بوغۇم ئىدى .

0998janan

	شىئىرنى تولىمۇ ياخشى يىزىپسىز.تىخىمۇ تىرشىڭ.

tohuwaz

	مىنى ئالداپ قويغاندەك يىتىپ كەلدى يانىۋار قېرىپ قالدىم بۇگۇنلا بىزمۇ شۇنداق جانىۋار...

turmux.net

	ياخشى يېزىپسىز...