مېيىپلىقنىڭ ئالدىنى ئېلىش ساۋاتلىرى (كۆز)

قۇددۇس

	كۆرۈش قۇۋۋىتى مېيىپلىقىنىڭ ئالدىنى ئېلىش 1. كۆزىمىز نىمە ئۈچۈن بىر نەرسىلەرنى كۆرەلەيدۇ؟ كۆزنىڭ شەيئىلەرنى كۆرىشى خۇددى رەسىم تارتىش ئاپپاراتىنىڭ رەسىم تارتقىنىغا  ئوخشاش. كۆز قارچۇغى خۇددى نۇر چەمبىرىكىگە ئوخشايدۇ، نۇر سۇندۇرۇش سېستىمىسى (كېرىستال تەنچە، ئەينەك تەنچە، دالەنچە سۇيى، مۇڭگۈز پەردە) كامىرا لېنزىسىغا ئوخشايدۇ، كۆرۈش تور پەردىسى بولسا نىگاتىپقا ئوخشايدۇ. كۆزنىڭ ھەر قانداق بىر بۆلىگىدىن مەسىلە چىقسا كۆرۈش قۇۋۋىتى تەسىرگە ئۇچرايدۇ. 2. كۆرۈش ئىقتىدارى دىگەن نىمە؟ كۆرۈش ئىقتىدارى دىگىنىمىز تەسۋىر ئىقتىدارى (كۆرۈش قۇۋۋىتى، كۆرۈش دائىرىسى، سېلىشتۇرما سەزگۈرلۈك)، نۇر سەزگۈرلىگى (قاراڭغۇغا ماسلىشىشچانلىق) ۋە رەڭ سەزگۈسىنى ئۆز ئىچىگە ئالىدۇ. 3. نورمال كۆرۈش قۇۋۋىتىنىڭ يېتىلىش سېلىشتۇرما قىممىتى قانچىلىك؟ كۆز ئالمىسى ۋە كۆرۈش قۇۋۋىتى تەدىرىجى ھالدا ئۆسۈپ يېتىلىدۇ. نورمالنى كۆرۈش قۇۋۋىتىنىڭ پايدىلىنىش قىممىتى: 1 ئايلىق بولغاندا پەقەت كۆز ئالدىدىكى قولنىڭ ھەركىتىنى كۆرەلەيدىغان بولۇپ، يورۇقلۇقنى ئىزدەيدۇ. ئالتە ئايلىق بولغان ۋاقىتتا 0.06 بولىدۇ؛ 1 ياشقا كىرگەندە 0.1 بولىدۇ؛ 2 ياشقا كىرگەندە 0.5 بولىدۇ؛ 3 ياشقا كىرگەندە 0.6 بولىدۇ. 4 ياش ئەتراپىدا 0.8 بولىدۇ؛ 5 ياشقا كىرگەندىن كېيىن 1.0 گە يېتىدۇ. 4.كۆرۈش سەزگۈسى مېيىپلىقى دىگەن نىمە؟ كۆرۈش سەزگۈسى مېيىپلىقى _ تۈرلۈك سەۋەپتىن ئىككى كۆزىنىڭ كۆرۈش قۇۋۋىتى توسالغۇغا ئۇچرىغان ياكى كۆرۈش دائىرىسى  تارىيىپ كەتكەن، دورا ئارقىلىق داۋالاش ۋە  ئوپراتسىيە قىلىنغان ھەمدە ئۆلچەملىك نۇر سۇندۇرۇش سېستىمىسى تۈزىتىلگەن تەقدىردىمۇ يەنىلا كۆرۈش قۇۋۋىتى زىيانغا ئۇچرىغان، كۆرۈش قۇۋۋىتى ئەڭ ياخشى بولغان كۆزنىڭ تۈزىتىلگەن قىممىتى (مۇۋاپىق كېلىدىغان كۆزئەينەك تاقىغاندىن كېيىنكى كۆرۈش قۇۋۋىتى) 0.3 دىن تۆۋەن ياكى كۆرۈش دائىرىسى 10 گىرادۇستىن تۆۋەن بولغان، ھەمدە ئادەتتىكى ئۇسۇلدا نورمال ئادەملەر قىلالايدىغان خىزمەت، ئۈگىنىش ۋە باشقا پائالىيەت بىلەن شۇغۇللىنالمايدىغانلار كۆرسىتىدۇ.  كۆرۈش قۇۋۋىتى مېيىپلىرى ئادەتتە كۆرۈش قۇۋۋىتى تۆۋەنلەر بىلەن ئەمالارنى ئۆز ئىچىگە ئالىدۇ. 5. كۆرۈش قۇۋۋىتى تۆۋەن بىلەن ئەمالىقنىڭ ئۆلچىمى نىمە؟ ئىككى كۆزدىن كۆرۈش قۇۋۋىتى ياخشىراق بولغان كۆزنىڭ تۈزىتىلگەندىن كېيىنكى كۆرۈش قۇۋۋىتى 0.05~0.3 ئارىسىدا بولسا كۆرۈش قۇۋۋىتى تۆۋەن بولىدۇ، 0.05 دىن تۆۋەن، نۇر سەزگۈسى يوق بولسا ئەما ھېساپلىنىدۇ. 6. كۆرۈش قۇۋۋىتى مېيىپلىقىنى كەلتۈرۈپ چىقىرىدىغان ئاساسلىق ئامىللار قايسىلار؟ 2006- يىلى مەملىكىتىمىزنىڭ 2- قېتىملىق مېيىپلاردىن نۇسخا ئېلىپ تەكشۈرۈشتىكى سانلىق مەلۇماتتىن كۆرسىتىلىشىچە، ئېلىمىزدىكى كۆرۈش قۇۋۋىتى مېيىپلىقىدا ئالدىنقى بەش ئورۇندا تۇرىدىغان كېسەللىك كاتاراكتا (كۆزگە ئاق چۈشۈش)، كۆرۈش تور پەردىسى رەڭدار پەردە كېسەللىكى، مۈڭگۈز پەردە كېسەللىكى، ئامېتروپىيە (كۆزنىڭ نۇر سۇندۇرۇشىنىڭ نورمال بولماسلىق ھادىسىسى) ۋە گلاۋكومادىن ئىبارەت. لېكىن بالىلار بىلەن ياشانغانلارنىڭ كۆرۈش قۇۋۋىتى مېيىپلىقىنى كەلتۈرۈپ چىقىرىدىغان ئامىل بىلەن كېسەللىك قوزغىلىش نىسبىتىدە پەرق ئىنتايىن زور. بالىلاردىكى ئەمالىق ياكى كۆرۈش قۇۋۋىتى تۆۋەن بولۇشنى كەلتۈرۈپ چىقىرىدىغان ئاساسلىق كۆز كېسەللىكى تۇغما ئىرسىي خارەكتىرلىك كۆز كېسەللىكى (٪60 دىن كۆپرەكنى ئىگىلەيدۇ)، ئۇنىڭدىن قالسا ئامېتروپىيە، كۆرۈش قۇۋۋىتى ئاجىزلىق، كاتاراكتا، مۈڭگۈز پەردە كېسىلى، كۆرۈش تور پەردىسى پېگىمنىت پەرقىنىڭ ئۆزگىرىشى، كۆزنىڭ تاشقى زەخمىسى قاتارلىقلار؛ ياشانغانلاردىكى ئەمالىق ۋە كۆرۈش قۇۋۋىتىنىڭ ئاجىزلىشىشىنى كەلتۈرۈپ چىقىرىدىغان ئاساسلىق كېسەللىك كاتاراكتا، مۈڭگۈز پەردە كېسىلى، گلاۋكوما، ياشانغانلاردىكى سېرىق داغلىق كېسەللىك ئۆزگىرىشى، دىئابىتتىن كېلىپ چىققان كۆرۈش تور پەردىسى كېسەللىك ئۆزگىرىشى قاتارلىقلاردىن ئىبارەت. 7. نىمە ئۈچۈن كاتاراكتا ئەمالىقنى كەلتۈرۈپ چىقىرىدۇ دەيمىز؟ كاتاراكتا __ كرىستال تەنچىنىڭ دۇغلىشىشىدىن كېلىپ چىقىدىغان كۆرۈش قۇۋۋىتىنىڭ تۆۋەنلىشى بولۇپ،  ئېغىرلاشقاندا ئەما بولۇپ قالىدۇ، ئۇ تۇغما كاتاراكتا ۋە تۇغۇلغاندىن كېيىنكى كاتاراكتا دەپ ئىككىگە ئايرىلىدۇ. ئىرسىيەت ياكى نورمالسىز ئامىللار مەسىلەن: ھامىلدارلىق مەزگىلىدە ئوزۇقلۇق ياكى مېتابولىزىمنىڭ تەڭپۇڭسىزلىقى، ھامىلدارلىقنىڭ دەسلەپكى مەزگىلىدە ۋىروستىن يۇقۇملىنىش، ھاراق ئىچىش، رىنتىگىن نۇرى بىلەن زىيادە كۆپ ئۇچرىشىش قاتارلىقلارنىڭ ھەممىسى تۇغما كاتاراكتانى كەلتۈرۈپ چىقىرىدۇ، يېڭى تۇغۇلغان بوۋاقلاردا كېسەللىك كۆرىلىش نىسبىتى ‰4 بولىدۇ. تۇغۇلغاندىن كېيىنكى كاتاراكتانىڭ كۆرۈلىشى ياش بىلەن مۇناسىۋەتلىك بولۇپ، ياش قانچە چوڭايغانسىرى كۆرۈلۈش نىسبىتى شۇنچە چوڭ بولىدۇ. 65 ياشتىن 74 ياشلىقلار توپى ئىچىدە ٪20 ئادەملەرنىڭ كۆرۈش قۇۋۋىتى كاتاراكتانىڭ تەسىرىگە ئۇچرايدۇ، 75 ياشتىن يۇقىرى كىشىلەر توپى ئىچىدە كاتاراكتانىڭ كۆرۇلۇش نىسبىتى ٪50 ئەتراپىدا بولىدۇ. 8. كاتاراكتانى داۋالاشنىڭ ئۈنۈمى قانچىلىك؟ تۇغما كاتاراكتانى بالدۇر بايقاپ ئوپراتسىيە قىلغاندا (1 ياش ئىچىدە)، ئوپراتسىيەدىن كېيىنكى ئوپتىكىلىق تۈزەش ۋە كۆرۈش قۇۋۋىتى ئاجىزلىقىغا داۋالاش ئېلىپ بارغاندا، كۆرۈش قۇۋۋىتىنى بىر قەدەر ياخشى ئەسلىگە كەلتۈرگىلى ھەتتا مېيىپلىقنى تۈگەتكىلى بولىدۇ. ياشقا مۇناسىۋەتلىك كاتاراكتا ئوپىراتسىيىسى خېلىلا پىشىپ يېتىلگەن بولۇپ، مۇۋاپىق ۋاقىتتا ئوپىراتسىيە قىلغاندا كۆرۈش قۇۋۋىتىنى ئەسلىگە كەلتۈرگىلى بولىدۇ. 9. قايسى تۈردىكى ئىرسىيەت خارەكتىرلىك ياكى تۇغما كۆز كېسەللىكلىرى ئەمالىقنى كەلتۈرۈپ چىقىرىدۇ؟ ئەمالىقنى كەلتۈرۈپ چىقىرىدىغان تۇغما ياكى ئىرسىي خارەكتىرلىك كۆز كېسەللىكلىرىنىڭ تۈرى ئىنتايىن كۆپ، دائىم كۆرىلىدىغانلىرى كاتاراكتا، تۇغما گلاۋكوما، تۇغما كۆز قارچۇقى كىچىك بولۇش، رەڭدار پەردە قان تومۇر پەردىسىنىڭ تۇغما كەمتۈكلىكى، ئىرسىيەت خارەكتىرلىك مۈڭگۈز پەردە غەيرىلىكى قاتارلىقلار؛ 10. نىمە ئۈچۈن سۈپەتلىك تۇغۇپ سۈپەتلىك تەربىيىلەش كۆرۈش قۇۋۋىتى مېيىپلىقىنىڭ ئالدىنى ئېلىشتا ئىنتايىن موھىم دەيمىز؟ نۆۋەتتە كۆپلىگەن ئىرسىيەت خارەكتىرلىك كۆز كېسەللكلىرىنى  داۋالىغىلى بولمايدۇ. پەقەت ئىنتايىن ئاز ساندىكى ئىرسىي كۆز كېسەللىكلىرىنى مەسىلەن: كاتاراكتا، كۆز مۈڭگۈز پەردىسىنىڭ ئىرسىي خارەكتىرلىك كېسەللىك ئۆزگىرىشى قاتارلىقلارنى ئوپراتسىيە ئارقىلىق داۋالىغىلى بولىدۇ. شۇڭىلاشقا، تويدىن ئىلگىرىكى تەكشۈرتۈش ۋە سۈپەتلىك تۇغۇش ئىرسىيەتشۇناسلىق بويىچە مەسلىھەت سوراش، ھامىلدارلىق مەزگىلى ۋە يەڭگىشتىن بۇرۇنقى ساقلىقنى ساقلاش ئىرسىيەت خارەكتىرىلىك ۋە تۇغما كۆز كېسەللىكلىرىنىڭ يۈز بېرىشىدىن ساقلىنىشتىكى ئەڭ ياخشى چارە.

قۇددۇس

	11. مۈڭگۈز پەردە كېسەللىكىدىن ئەما بولۇپ قېلىشىنڭ ئالدىنى ئېلىش ئۇسۇلى قانداق؟ ئېلىمىزدە تەخمىنەن 4 مىليۇن (تاق كۆز بىمارلىرىنىمۇ ئۆز ئىچىگە ئالىدۇ) كىشى مۈڭگۈر پەردە كېسىلى سەۋەبىدىن مېيىپ بولۇپ قالغان. يۇقۇملىنىش ۋە تاشقى زەخمە مۇڭگۇز پەردە كېسەللىكىنىڭ  ئاساسلىق سەۋەبى. ئالدىنى ئېلىشتا چوقۇم كۆز تازلىقىغا ئەھمىيەت بېرىش، كۆزنىڭ تۈرلۈك سىرتقى زەخمىلىنىشىدىن  ساقلىنىشتىن باشلاپ قول سېلىش كېرەك. مۈڭگۈز پەردە كېسەللىكىنى بالدۇر بايقاپ ئۆز ۋاقتىدا توغرا داۋالاتقاندا ساقايتقىلى بولىدۇ. ناۋادا كېسەللىك ئۆزگىرىشى ئېغىر بولسا ياكى تەكرار قوزغالسا مۈڭگۈز پەردىدە يارا ئىزى قالىدۇ ياكى تېشىلىپ كېتىشنى كەلتۈرۈپ چىقىرىدۇ. بۇنى پەقەت مۈڭگۈز پەردە ئالماشتۇرۇش ئوپراتسىيىسىدىن ئىبارەت بىرلا داۋالاش ئۇسۇلى بار. 12. نىمە ئۈچۈن مۈڭگۈز پەردىسىنى تەقدىم قىلىش تەشەببۇس قىلىنىدۇ؟ مۈڭگۈز پەردە ئالماشتۇرۇش ئوپراتسىيىسى نۆۋەتتىكى ئەزا كۆچۇرۇش ئوپراتسىيىسىدىكى ئۈنۈمى ئەڭ ياخشى ئوپراتسىيە بولۇپ، ٪75 دىن كۆپرەك بىمار مۈڭگۈز پەردىنى كۆچۇرۇش ئوپراتسىيىسى ئارقىلىق قايتا يورۇقلۇققا ئېرىشىدۇ. لېكىن ئەزا بىلەن تەمىنلەش يېتەرسىز بولغانلىقتىن، ئېلىمىزدە ھەر يىلى مۈڭگۈز پەردە كۆچۈرۈش ئوپراتسىيىسى قىلدۇرالايدىغان بىمارلار 5 مىڭغىمۇ يەتمەيدۇ، شۇڭىلاشقا مۈڭگۈز پەردىنى تەقدىم قىلىش تەشەببۇس قىلىنىدۇ. 13. ئامېتورپىيە (كۆزنىڭ نۇر سۇندۇرىشىنىڭ بىنورماللىقى) مۇ مېيىپلىقنى كەلتۈرۈپ چىقىرىدىغان كېسەللىكمۇ؟ ئامېتورپىيەنى تەڭشىمىگەندە كۆزگە گورزىنتال كىرگەن نۇر سۇنمايدۇ –دە، بۇنىڭ بىلەن كۆرۈش تور پەردىسىدە جىسىمنىڭ ئېنىق بولغان تەسۋىرى ھاسىل بولمايدۇ. بۇ يېقىننى كۆرەلمەسلىك، يىراقنى كۆرەلمەسلىك ۋە نۇر يىغالماسلىق دەپ ئۈچكە بۆلىنىدۇ. ئەينەك سەپلەش كۆرۈش قۇۋۋىتىنى ئۆستۈرۈشتىكى دائىم قوللىنىدىغان ئۇسۇل. لېكىن ئېغىر دەرىجىدىكى ئامېتورپىيە (يىراقنى كۆرەلمەسلىك ياكى يېقىننى كۆرەلمەسلىك) D6.00  دىن چوڭ بولغاندا نۇر يىغالماسلىق D3.00 دىن چوڭ بولغاندا،  كۆرۈش قۇۋۋىتىنى تۈزەشنىڭ ناچار بولىشىنى كەلتۈرۈپ چىقىرىدۇ.  ئېغىر دەرىجىدىكى يىراقنى كۆرەلمەسلىك كۆز ئالدى غۇۋالىشىش، كۆرۈش تور پەردىسىنىڭ چۈشۈپ كېتىشى، گىلاۋكوما، كاتاراكتا قاتارلىق ئەگەشمە كېسەللىكلەرنى كەلتۈرۈپ چىقىرىدۇ. شۇڭىلاشقا ئامېتىروپىيەمۇ كۆرۈش مېيىپلىقىنى كەلتۈرۈپ چىقىرىدىغان ئاساسلىق ئامىللارنىڭ بىرى. 14. لازىرنۇر ئوپراتسىيەسىنىڭ يىراقنى كۆرەلمەسلىكنى داۋالاش پىرىنسىپى نىمە؟ نۆۋەتتە لازىرنۇر ئوپراتسىيىسى بىلەن يىراقنى كۆرەلمەسلىكنى داۋالاش بىر قەدەر كۆپ قوللىنىلماقتا، ئوپراتسىيە مۇۋاپىقىيەتلىك بولغاندىن كېيىن كۆزئەينەكنى ئېلىۋەتسە بولىدۇ. لېكىن لازىرنۇر ئوپراتسىيىسى ئارقىلىق پەقەت مۈڭگۈز پەردىنىڭ ئەگرىلىك نىسبىتى تۈزىتىلىدۇ، يىراقنى كۆرەلمەسلىك كەلتۈرۈپ چىقارغان كۆز ئوقى ئۇزۇنلىقىنىڭ ئېشىپ كېتىشى بىلەن كۆز ئاستىدىكى يىراقنى كۆرەلمەسلىكتىن كېلىپ چىققان كېسەللىك ئۆزگىرىشى يەنىلا مەۋجۈت بولۇپ تۇرىدۇ. شۇڭىلاشقا، لازىر نۇر ئوپراتسىيىسى  يىراقنى كۆرەلمەسلىكنى تۈپ يىلتىزىدىن داۋالاپ ساقايتالمايدۇ. 15. ئامېتورپىيەدىن كېلىپ چىقىدىغان مېيىپلىقنىڭ ئالدىنى قانداق ئالىمىز؟ يېقىننى كۆرەلمەسلىك بىلەن نۇر يىغالماسلىق تۇغما ئامىللار بىلەن مۇناسىۋەتلىك. پەقەت سۈپەتلىك تۇغۇپ سۈپەتلىك تەربىيلەش ئارقىلىقلا ئالدىنى ئالغىلى بولىدۇ. يىراقنى كۆرەلمەسلىك بولسا ئىرسىيەت ۋە موھىتتىن ئىبارەت ئىككى تۈرلۈك ئامىل بىلەن مۇناسىۋەتلىك بولۇپ، ئالدىنى ئېلىپ داۋالاشنىڭ موھىم نوقتىسى كۆرۈش سەزگۈسى موھىتىنى ياخشىلاش (مۇۋاپىق يورۇقلۇق، سېلىشتۇرما قىممەتنى يۇقىرى كۆتۈرۈش) ۋە ياخشى بولغان كۆز ئىشلىتىش ئاسراش ئادىتىنى شەكىللەندۇرۇش (ئۇزۇن مۇددەت يېقىن ئارلىقتا تۇرۇپ نەرسە كۆرمەسلىك؛ يېتىپ تۇرۇپ، ماشىنىدا ماڭغاندا، پىيادە ماڭغاندا كىتاپ ئوقۇماسلىق؛ ئۈگىنىش قىلغاندا بەدەن بىلەن ئۇستەلنىڭ ئارلىقى بىر مۇشىت ئارلىقىدا بولۇش، خەت يازغاندا كۆرسەتكۈچ بارماق بىلەن قەلەم ئۇچىنىڭ ئارلىقى بىر سۇڭ بولۇش، كۆز بىلەن كىتاپنىڭ ئارلىقى 30 سانتىمىتىر بولۇش قاتارلىقلار)؛ ئېغىر دەرىجىدىكى يىراقنى كۆرەلمەيدىغان بىمارلار قەرەللىك تۈردە تەكشۈرتۈپ تۇرۇش، كۈچلۈك ھەرىكەت، ئېغىر جىسمانىي ئەمگەك ۋە سىرتقى زەخمىدىن ساقلىنىش، كۆرۈش تور پەردىسىنىڭ تۆۋەنلەپ چۇشۇپ كېتىشىنىڭ ئالدىنى ئېلىش كېرەك. 16. نىمە ئۈچۈن گلاۋكوما مېيىپلىقنى كەلتۈرۈپ چىقىرىدۇ دەيمىز؟ گلاۋكوما __ كۆز بېسىمىنىڭ ئارتىپ كېتىشى سەۋەبىدىن كۆرۈش نېرۋىلىرىنىڭ يىگىلىشى ۋە كۆرۈش دائىرىسىنىڭ كەمتۈكلىكى سەۋەبىدىن كېلىپ چىقىدىغان تۈزىگىلى بولمايدىغان ئەمالىق كېسىلى. گىلاۋكومادىن كېلىپ چىقىدىغان ئەمالىقنىڭ ئالدىنى ئېلىشتا بالدۇر بايقاش، بالدۇر دىئاگونوز قويۇش، بالدۇر داۋالاش تەشەببۇس قىلىنىدۇ. كېسەل ئەھۋالى يوشۇرۇن ھالەتتە بولغانلىقتىن، گلاۋكومىنى "يورۇقلۇقنىڭ ئوغرىسى" دەپ سۈپەتلەيمىز. 17. نىمە ئۈچۈن گىلاۋكومىنى تەكشۈرۈپ ئايرىش كېرەك دەيمىز؟ كۆپ ساندىكى گلاۋكوما بىمارلىرى جىددى قوزغالغاندا ياكى ئاخىرقى مەزگىلىگە بارغاندا ئاندىن بايقىلىدىغان بولۇپ، ناھايىتى ئاسانلا مېيىپلىقنى كەلتۈرۈپ چىقىرىدۇ. شۇڭىلاشقا گلاۋكوما خەتىرى يۇقىرى كىشىلەر (40 ياشتىن ئاشقانلار، نەسەب كېسەللىك تارىخى بارلار، ئۇزۇن مۇددەت ھورمۇن ئىشلەتكەنلەر، دائىم بېئېنىق سەۋەپ بىلەن كۆزى تالىدىغان، كۆزى كۆپجۈپ قالىدىغانلار، دىئابىتلار، ئېغىر دەرىجىدىكى يىراقنى ياكى يېقىننى كۆرەلمەيدىغانلار)نى تەكشۈرۈپ ئايرىش تولىمۇ زۆرۈر. بۇنىڭ سەۋەبى ئاساسلىقى بالدۇر بايقاپ، بالدۇر داۋالاشتىن ئىبارەت. بۇ ئۆمۈرلۈك كېسەل بولۇپ، داۋالاپ ساقايتقىلى بولمايدۇ، لېكىن بالدۇر بايقاپ كونتىرول قىلىنغاندا ئۆمۇرنىڭ ئاخىرىغىچە بىر قەدەر ياخشى بولغان كۆرۈش قۇۋۋىتىنى ساقلاپ قالغىلى بولىدۇ. 18. كۆزنىڭ تاشقى زەخمە بىلەن مېيىپلىنىشىدىن قانداق ساقلىنىش كېرەك؟ كۆزىنىڭ تاشقى زەخمىسى مىخانىكىلىق زەخمە (سۇركىلىپ زەخمىلىنىش، تېشىپ ئۆتۈپ زەخمىلىنىش، كۆزگە غەيرى نەرسە كىرىپ كېتىپ زەخمىلىنىش)، فىزىكلىق زەخمە (يۇقىرى – تۆۋەن تىمپىراتورى، ئۇلتىرا بىنەپشە نۇر، ئىنفىرا قىزىل نۇر، قىسقا دولقۇن، لازىرنۇر، ئىئونلىشىش، رادىئاتسىيە قاتارلىقلار) ياكى خېمىيىلىك زەخمىلىشتىن كېلىپ چىقىدۇ. يۇقارقى ئامىللار كۆز قۇرۇلمىسى ۋە ئىقتىدارىنىڭ زىيانغا ئۇچرىشىنى كەلتۈرۈپ چىقىرىدۇ. زور كۆپ ساندىكى كۆز سىرتقى زەخمىسىنىڭ ئالدىنى ئالغىلى ۋە ساقلانغىلى بولىدۇ. تەشۋىق تەربىيە كۈچەيتىش ئارقىلىق سانائەت، يېزا ئىگىلىك ئىشلەپچىقىرىشى، كۈندىلىك تۇرمۇش ۋە تەنتەربىيە ھەرىكەتلىرىدە كېلىپ چىقىدىغان  كۆزنىڭ تاشقى زەخمىسىدىكى خەتەرلىك ئامىللاردىن ساقلانغىلى بولىدۇ. مەسلەن: ئېلىكتىرلىق كەپشەرلەشتە كۆزىنى ئاسراش ئەينىكى (قالپىقى) تاقاش؛ ئۇرۇشماسلىق، قالايمىقان رەگەتكە ئاتماسلىق، تاش ئاتماسلىق، پوجاڭزا ئاتماسلىق كېرەك. مۇمكىن قەدەر بالىلارغا ئۇچلۇق، بىسلىق ئويۇنچۇق ئېلىپ بەرمەسلىك ياكى خەتەرلىك بويۇملار بىلەن ئۇچراشتۇرماسلىق كېرەك. 19. كۆرۈش قۇۋۋىتىنىڭ ئاجىزلىقىدىن كېلىپ چىقىدىغان مېيىپلىقتىن قانداق ساقلىنىمىز؟ كۆرۈش قۇۋۋىتىنىڭ ئاجىزلىقىنىڭ ئەڭ يېڭى ئېنىقلىمىسى: _ كۆرۈش قۇۋۋىتى يېتىلىۋاتقان مەزگىلدە تاق كۆز بىلەن قىيپاش قاراش، تۈزىتىلمىگەن ئانئىزومېتروپىيە ۋە ئېغىر دەرىجىدىكى ئامېتروپىيە ھەمدە تەسۋىر ھاسىل قىلىشتىن مەھرۇم قېلىش كەلتۈرۈپ چىقارغان يەككە كۆز ياكى جۇپ كۆزنىڭ ئەڭ ياخشى كۆرۈش قۇۋۋىتىنى تۈزىتىش قىممىتى قۇرداشلىرىنىڭ كۆرۈش قۇۋۋىتىدىن تۆۋەن بولغانلار (ئوخشىمىغان ياشلىقلارنىڭ كۆرۈش قۇۋۋىتى پايدىلىنىش قىممىتىنىڭ تۆۋەن چېكى: 3 ياشتىن تۆۋەن بالىلارنىڭ 0.5، 4-5 ياشلىق بالىلارنىڭ 0.6، 6-7 ياشلىق بالىلارنىڭ 0.7) ياكى  جۇپ كۆزنىڭ كۆرۈش قۇۋۋىتى پەرقى ئىككى سىزىق ياكى ئۇنىڭدىن يۇقىرى بولغانلار. كۆرۈش قۇۋۋىتى ئاجىزلىقىنى داۋالاشتا قانچە بالدۇر بولسا شۇنچە ياخشى، ئىنچىكە تاپشۇرۇق ئارقىلىق كېسەللەنگەن كۆزنى چېنىقتۇرۇپ، ساغلام كۆزنى مۇۋاپىق تىزگىنلەپ كۆزنى ئاسراش؛ كونكىرىتنى داۋالاش لاھىيىسى كۆرۈش قۇۋۋىتى ئاجىزلىقىنىڭ دەرىجىسىگە، ياش قۇرامىغا قاراپ بېكىتىلىدۇ. 20. بالدۇر تۇغۇلغان بوۋاقلاردىكى كۆرۈش تور پەردىسىنىڭ كېسەللىك ئۆزگىرىشىدىن كېلىپ چىقىدىغان مېيىپلىقنىڭ ئالدى قانداق ئېلىنىدۇ؟ بالدۇر تۇغۇلغان بوۋاقلاردىكى كۆرۈش تور پەردىسى كېسەللىك ئۆزگىرىش بالدۇر تۇغۇلغان زىيادە يېنىك بوۋاقلاردا كۆرىلىدۇ، بولۇپمۇ نەپەس يولى سېتسىمىسىدا توسالغۇ بار ھەمدە زور مىقداردا ئۆكسىگىن سۇمۇرگەن بالدۇر تۇغۇلغان بوۋاقلاردا بىرلىكتە كۆرىلىدۇ. بۇ ئەمالىقنى كەلتۈرۈپ چىقىرىدىغان كۆز كېسەللىكى. ھامىلدارلىق مەزگىلى قانچىكى قىسقا بولسا، تۇغۇلۇش تەن ئېغىرلىقى شۇنچىكى تۆۋەن، كېسەللىك يۈز بېرىش مۇمكىنچىلىكى شۇنچىكى يۇقىرى بولىدۇ. مەزكۈر كېسەللىكتە موھىمى بالدۇر بايقاش، بالدۇر تەكشۇرۇپ ئايرىش ۋە بالدۇر ئارلىشىشتۇر. داۋالاشقا تەسىر يەتمىگەن شارائىتتا بالدۇر تۇغۇلغان بوۋاقنىڭ ئۆكسىگىن سۇمۇرۇش ۋاقتىنى مۇمكىن قەدەر قىسقارتىش، ھەمدە بالدۇر تۇغۇلغان بوۋاقنىڭ كۆز تەكتىنى مۇمكىن قەدەر تەكشۈرۈتۈش كېرەك. 34 ھەپتىدىن بالدۇر تۇغۇلۇپ قالغان ياكى تۇغۇلغاندىكى تەن ئېغىرلىقى 2000 گىرامدىن تۆۋەن بولغان ياكى ئېغىر كېسەلگە گىرىپتار بولغان بالدۇر تۇغۇلۇپ قالغان بوۋاقلار تۇغۇلۇپ توت ھەپتىلىك بولغاندىن كېيىن ياكى تۇزىتىلگەندىن كېيىنكى ھامىلدارلىق ۋاقتى 32 ھەپتىدىن ئاشقان بوۋاقلار تۇنجى قېتىملىق كۆز تەكتىنى تەكشۈرۈتۈشنى قوبۇل قىلىش ھەمدە تەلەپ بويىچە قەرەللىك تۈردە دىئاگونوز قويغۇزۇش شۇ ئارقىلىق بالدۇر بايقاش ھەمدە ئۆز ۋاقتىدا توڭلىتىپ قاتۇرۇش، نۇر يىغىش، ئوپراتسىيە قاتارلىق ئۇسۇللارنى قوللىنىپ ئېغىر تىپتىكى كېسەللىك ئاسارىتىنى ئازايتىپ، مۇئەييەن كۆرۈش قۇۋۋىتىنى ساقلاپ قېلىش كېرەك.

قۇددۇس

	21. ياشانغانلاردىكى سېرىق داغ كېسەللىك ئۆزگىرىشى قانداق ئىش؟ ياشانغانلاردىكى سېرىق داغ كېسەللىك ئۆزگىرىشى كۆز تەكتىدىكى سېرىق داغنىڭ زەئىپلىشىش تىپىدىكى ئۆزگىرىشى بولۇپ، ئاساسلىق ئىپادىسى مەركىزى كۆرۈش قۇۋۋىتى چېكىنىپ كېتىش، جىسىملارنى كۆرىشى غۇۋالىشىش ياكى شەكلى ئۆزگىرىپ كېتىش قاتارلىقلار.  بۇ كېسەللىك ياشانغانلار توپىنىڭ كۆر بولۇپ قېلىشىدكى قارشى تۇرغىلى بولمايدىغان ئاساسلىق ئامىللارنىڭ بىرى، كۆپۇنچە 50 ياشتىن ئاشقانلاردا كۆرىلىدۇ، ياش قۇرامى قانچە ئاشقانسىرى كېسەللىكنىڭ يۈز بېرىش نىسبىتى شۇنچە يۇقىرى بولىدۇ. كېسەل قوزغىلىش سەۋەبى ئېنىق  ئەمەس. ئىرسىيەت، ئاستا خارەكتىرلىك نۇردىن زەخمىلىنىش، قۇۋۋەت توسالغۇسى، زەھەرلىنىش، ئىممونىت خارەكتىرلىك كېسەللىك، يۈرەك قان تومۇر سېستىمىسى كېسەللىگى، شۇنداقلا نەپەس يولى سېستىمىسى قاتارلىق ئومومى بەدەنلىك كېسەللىكلەر بىلەن مۇناسىۋەتلىك بولىشى مۇمكىن. نۆۋەتتە مۇۋاپىق داۋالاش ئۇسۇلى ۋە تۈپتىن ئالدىنى ئېلىش تەدبىرى يوق. 22. ياشانغانلاردىكى سېرىق داغلىق كېسەللىك ئۆزگىرىشىنىڭ خەۋىپىنى ئازايتىدىغان تەدبىرلەر قايسىلار؟ كۈچلۈك نۇردا نۇر توسقۇچى كۆز ئەينەك تاقاپ نۇرنىڭ كۆزنى زەخمىلەندۇرىشىدىن ساقلىنىش، تاماكا چەكمەسلىك، ھاراققا چەكلىمە قويۇش، قان بېسىمى، قان شېكىرى، قاندىكى ماينى كونتىرول قىلىش قاتارلىق ئۇسۇللار ياشانغانلاردىكى سېرىق داغ كېسەللىك ئۆزگىرىشىنىڭ خەتىرىنى ئازايتالايدۇ. 23. دىئابىت كېسىلىمۇ ئەمالىقنى كەلتۈرۈپ چىقىرامدۇ؟ دىئابىت خارەكتىرلىك كۆرۈش تور پەردىسى كېسەللىك ئۆزگىرىشى دىئابىت بىمارلىرىنىڭ كۆزىدە كۆرىلىدىغان ئېغىر دەرىجىدىكى ئەگەشمە كېسەللىگى، قاندىكى شىكەرنىڭ يۇقىرى بولۇش ۋاقتىنىڭ ئۇزۇن بولىشى كېسەللىك قوزغىلىشىنىڭ ئاساسلىق سەۋەبى، دىئابىتنىڭ كېسەللىك دەرىجىسى قانچىكى يۇقىرى بولسا كېسەللىكنىڭ قوزغىلىش نىسبىتىمۇ شۇنچە يۇقىرى بولىدۇ؛ كېسەللىك ئەھۋالىنىڭ تەرەققىي قىلىشىنىڭ تىز – ئاستىلىقى قان شىكىرى سەۋىيىسى، قان شېكىرىنى كونتىرول قىلىش ئەھۋالى، قوشۇمچە يۇقىرى قان بېسىمى، قاندىكى ماينىڭ يۇقىرى – تۆۋەنلىگى قاتارلىق ئومومىي بەدەنلىك باشقا كېسەللىكلەر بىلەن شۇنداقلا دىئابىت بىمارلىرىنىڭ تەن ساپاسى قاتارلىقلار بىلەن زىچ مۇناسىۋەتلىك. دىئابىت خارەكتىرلىك كۆرۈش تور پەردىسى كېسەللىك ئۆزگىرىشىنىڭ ئاخىرقى مەزگىلىدە كۆرۈش قۇۋۋىتىگە ئېغىر دەرىجىدە زىيان يەتكۇزىدۇ ھەتتا كۆر بولۇش قېلىشنى كەلتۈرۈپ چىقىرىدۇ. شۇڭىلاشقا ئۆز ۋاقتىدا ئالدىنى ئېلىپ داۋالىتىش تولىمۇ زۆرۈر. 24. دىئابىت كەلتۈرۈپ چىقىرىدىغان ئەمالىقنىڭ ئالدىنى قانداق ئېلىش كېرەك؟ دىئابىتنى بايقىغاندىن كىيىن تىزدىن ئىچكى كېسەللىكلەر دوختۇرىنىڭ يېتەكچىلىگىدە قان شىكىرىنى قاتتىق كونتىرول قىلىش ھەمدە قەرەللىك تۈردە كۆز بۆلىمىگە بېرىپ، كۆز تەكتىنى تەكشۈرتۈپ تۇرۇش، ناۋادا كۆپۇيۇشچان كېسەللىك كۆرۇلگەندە تىزدىن لازىرنۇردا نۇر ئۇيۇشتۈرۈپ داۋالاشنى قوبۇل قىلىپ، كېسەللىكنىڭ تەرەققىي قىلىپ ئەمالىقنى كەلتۈرۈپ چىقىرىشنىڭ ئالدىنى ئېلىش كېرەك. 25. ئەتراپىمىزدىكى كۆرۈش سەزگۈسى توسالغۇغا ئۇچرىغانلارغا قانداق ياردەم قىلىمىز؟ 1) ئازغىنە كۆرۈش قۇۋۋىتىدىن ئىمكان قەدەر تولۇق پايدىلىنىش ئېڭىنى تۇرغۇزۇش، كۆرۈش قۇۋۋىتى توسالغۇ ئۇچرىغانلاردا ئازغىنە نۇر ئىنكاسى بولسىلا، ئۇلارنى ئۆزىنىڭ كۆزىنى ئىشلىتىشىگە ئىلھام بېرىش؛ 2) ياخشى بولغان كۆرۈش سەزگۈسى توسالغۇسىز موھىت بەرپا قىلىش _ يورۇقلۇقىنى كۆپەيتىش، كۆزنىڭ چاڭقىشىدىن ساقلىنىش (چىراق نۇرى، قۇياش نۇرىنىڭ بىۋاستە كۆزگە كىرىشىدىن ساقلىنىش، ئۇستەل يۈزىنى تۇتۇق سىر بىلەن سىرلاش)؛ ئائىلە سايمانلىرى بىلەن تام – تورۇس، يەرنىڭ رەڭ پەرقىنى ئاشۇرۇش، تام بىلەن ئىشىكنىڭ رەڭ پەرقىنى ئاشۇرۇش، ئىشىك تۇتقۇچلىرىغا رەڭدار بەلگىلەرنى قوشۇپ قويۇش، پەللەمپەي تۇتقۇچىنى باشتىن – بويىغا رەڭ پەرقى زور بولغان سىر بىلەن سىرلاش، رەڭگى سۇس قاچا- قۇچىلارنىڭ ئاستىغا رەڭگى قېنىق تەگلىك قويۇپ تەخسە بىلەن قورمىنىڭ رەڭ پەرقىنى كۈچەيتىش؛ 26. سىرتقى ئىپادىسىگە قاراپ كۆرۈش سەزگۈسىنىڭ توسالغۇغا ئۇچىرغانلىقىنى قانداق پەرىقلەندۇرگىلى بولىدۇ؟ كۆرۈش قۇۋۋىتىنىڭ توسالغۇغا ئۇچىرغانلىقىنىڭ سىرتقى ئىپادىسى تۆۋەندىكىچە: بوۋاق، ئۆسمۈرلۇك ۋاقتىدا شەيئىلەرگە تىكىلىپ قاراش، كۆرۈش؛ جىسىمنىڭ يۆتكىلىشى بىلەن دىققەت نەزىرىنى تەڭ يۆتكىمەسلىك؛ بالىلىق مەزگىلىدە تۆۋەندىكىدەك ئالامەتلەر كۆرىلىدۇ: تۇرغۇن نەرسىلەرنى كۆرگەندە نەزەر دائىرىسىنى ئالماشتۇرالماسلىق، كۆز قارچۇغى تىتىرەش، يانتۇ قاراش، كۆز قارچۇغى زىيادە چوڭ ياكى زىيادە كىچىك بولۇش؛ كۆز قارچۇغى ئاقىرىپ كېتىش، يورۇقلۇقتىن كۆزىنى قاچۇرۇش، كۆزىدىن ياش ئېقىش؛ دائىم كۆزىنى ئۇۋلاش، كۆزىنى چىمچىقلىتىش، كۆزىنى بېسىش؛ نەرسىلەرنى كۆرگەندە بەك يېقىن كۆرۈش، خۇددى «بۇرنى بىلەن كۆرىۋاتقاندەك» كىتاپ ئوقۇش؛ بېشىنى قىيسايتىپ قاراش، پەقەت بىرلا كۆزىنى مۇقىم تۇتۇپ تۇرۇپ نەرسىلەرنى كۆرۈش؛ 27. قانداق قىلىپ بىنورمال كۆرۈش ئادىتىدىن كۆرۈش قۇۋۋىتىنىڭ توسالغۇغا ئۇچىرغانلىقىنى پەرق ئەتكىلى بولىدۇ؟ كۆرۈش قۇۋۋىتى توسالغۇسىنىڭ دائىم كۆرىلىدىغان بىنورمال ھالىتى:  مېڭىۋاتقاندا توسالغۇلارنى «كۆرمەي قېلىش»، تەشەببۇسكارلىق بىلەن يول بەرمەسلىك؛ دائىم سوقىلىپ كېتىش، يىقىلىپ چۇشۇش. مەسىلەن: بىنا پەللەمپىيىدىن چىقىۋاتقاندا دائىم خاتا دەسسەپ قېلىپ يىقىلىپ چۈشۈش؛ يورۇقلۇق ئۆزگىرىشى بولغاندا ھودوقۇش، دىلغول بولۇش؛ شاۋقۇن سۇرەن دەخلى قىلغاندا ياكى ناتونوش موھىتتا ئۆزىگە ئىشەنچ قىلالماسلىق؛ 28. ئۆزىمىزنىڭ كۆرۈش قۇۋۋىتىنىڭ توسالغۇغا ئۇچىرغانلىقىنى قانداق بايقايمىز؟ شەيئىلەر غۇۋا كۆرىنىش، يىراقتىكى نەرسىنى كۆرۈشتە قىينىلىش، شەيئىلەرنىڭ ئىنچىكە ھالقىلىرىنى كۈزىتىش ياكى كىچىك خەتنى ئوقۇشتا قىينىلىش؛ كۆزنى قاماشتۇردىغان نۇرغا بولغان سىزىمچانلىق ئېشىپ كېتىش، كۈچلۈك نۇردىن قورقۇش؛ نەرسىلەرنى كۆرگەندە تېخىمۇ كۆپ يورۇقلۇققا مۇھتاج بولۇش، بولمىسا ئېنىق كۆرەلمەسلىك؛ كۆزنى جىق ئىشلىتىدىغان ئىشنى قىلغاندا قىزىقىشى قىسقا مۇددەتلىك بولۇش ياكى ئاسانلا بېشى ئاغرىپ ھارغىنلىق ھېس قىلىش؛ تۇتۇش تىگىش سەزگۈسى ياكى ئاڭلاش سەزگۈسىگە تايىنىپ يېڭى شەيئىلەرنى پەرق ئېتىش؛ 29. نىمە ئۈچۈن كۆرۈش قۇۋۋىتى مېيىپ بالىلارغا تېخىمۇ كۆڭۇل بولۇش كېرەك دەيمىز؟ كۆرۈش قۇۋۋىتى مېيىپ بالىلار باشقا ياش قۇرامىدىكىلەرگە قارىغاندا تېخىمۇ كۆپ غەمخورلىققا ئېرىشىشى كېرەك، چۇنكى: 1) كېسەلگە گىرىپتار بولۇش يېشى بويىچە ھېساپلىغاندا 5 ياشتا كېسەلگە گىرىپتار بولسا 80 ياش ئۆمۈر كۆرىدۇ دىسەك، كېسەلگە گىرىپتار بولۇش ۋاقتى 75 يىل بولىدۇ. 70 ياشتا كېسەلگە گىرىپتار بولسا 80 ياش ئۆمۈر كۆرسە، كېسەلگە گىرىپتار بولۇش ۋاقتى 10 يىل بولىدۇ. بۇنىڭدىن كۆرىۋېلىشقا بولىدىكى كۆرۈش سەزگۈسى مېيىپ بالىلارنىڭ كۆرۈش قۇۋۋىتى مېيىپلىق ۋاقتى باشقا ياش قۇرامىدىكىلەرگە سېلىشتۇرغاندا ئىنتايىن ئۇزۇن، ئۆزىگە، ئائىلىسىگە ۋە جەمئىيەتكە بولغان تەسىرى ئىنتايىن چوڭ. 2) بالىلار ئۆسۇپ يېتىلىش باسقۇچىدا تۇرىۋاتقاچقا، كۆرۈش قۇۋۋىتى مېيىپلىقى ئۇنىڭ جىسمانىيىتى ۋە پىسخىكىنىڭ تەرەققى قىلىشىغا غايەت زور تەسىر كۆرسىتىدۇ، چوقۇم كونتىرول قىلىش ۋە مەشىقلەندۇرۇش كېرەك. 3) بىر قىسىم كۆز كېسەللىكلىرى مەسىلەن: تۇغما كاتاراكتانى بالدۇر داۋالاتقاندا مۇئەييەن كۆرۈش قۇۋۋىتىگە ئېرىشكىلى بولىدۇ، شۇڭىلاشقا تېخىمۇ ئېتىۋار بېرىش كېرەك. 30. بالىلارنىڭ كۆرۈش قۇۋۋىتى مېيىپلىقىنى بىلگەندىن كېيىن قانداق قىلىش كېرەك؟ كۆرۈش قۇۋۋىتى مېيىپ بالىلارغا ئۆز ۋاقتىدا دىئاگونوز قويغۇزۇپ كېسىلىنى داۋالاتقاندىن سىرت يەنە دەسلەپكى مەزگىللىك كۆرۈش قۇۋۋىتىنى ئېچىش ۋە كۆرۈش ئىقتىدار مەشىقىنى ئېلىپ بېرىش كېرەك. بولۇپمۇ ھازىرچە تىببى داۋالاش مۇمكىن بولمايدىغان كۆز كېسەللىكلىرىگە قارىتا موھىم نوقتىنى دورا، دوختۇرغا ئىلتىجا قىلىشتىن كۆرۈش ئىقتىدارىنى ئىلمى، مۇۋاپىق مەشىقلەندۇرۇشكە يۆتكەش لازىم. ئەگەر تەرەققىي قىلىشى داۋاملاشما خارەكتىرلىك بولمىسىلا، ئىنسانلارنىڭ كۆرۈش قۇۋۋىتى «ئىشلەتسە ئىلگىرلەيدىغان، ئىشلەتمىسە چېكىنىدىغان» پىرىنسىپقا ماس كېلىد. «كۆزنى ئاياش» ياكى مۇۋاپىق بولمىغان قوغداش، ئاتا – ئانىلار ئۇستىگە ئېلىش قاتارلىق كۆز قاراش ۋە ئۇسۇللارنى چۆرۈپ تاشلاپ، كىشىلىك ئالاقە، نىشانلىق يول مېڭىش ۋە پائالىيەت، كۈندىلىك تۇرمۇشتا ئۆزى مۇستەققىل بولۇش، دائىم كىتاپ ئوقۇپ بېرىش ياكى يېقىن ئارلىقتا كىتاپ ئوقۇش قاتارلىق توت جەھەتتىن كۆرۈش قۇۋۋىتى ئىقتىدارى كۈچەيتىپ، ئۆزى مۇستەققىل بولۇش ۋە جەمئىيەتكە ئارلىشىشىنى ئىلگىرى سۈرۈش كېرەك.

Ay.sadap

	بەك ياخشى تىما يوللاپسىز، مەن تولىمۇ ئېھتىياجلىق بولغان ساۋاتلار ئىدى، كۆپ رەھمەت! ئەسلىدە كۆز قارچۇقىمىز كۆرگەن نەرسىلەرنى نۇر سۇندۇرۇش سېستىمىسى سۇندۇرۇپ بەرسە كۆرۈش تور پەردىمىز ساقلاش ئارقىلىق بىز نەرسىلەرنى كۆرەلەيدىكەنمىزدە.....

umdi

	كۆزنى ئاسىراپ كومپىيۇتىرىغا ئاز قاراش كىرەك

nurjahan0997

	ئەمما ما تېمىنى ئوقۇپ شۇنداق خۇش بولدۇميۇ.....بىراق كۆڭلۈم دەھشەت يېرىم بولۇپ كەتتى...................

Ay.sadap

	nurjahan0997 يوللىغان ۋاقتى  2014-12-24 06:33 PM ئەمما ما تېمىنى ئوقۇپ شۇنداق خۇش بولدۇميۇ.....بىراق كۆڭل ... بارىغا شۈكۈر قىلايلى قېرىندىشىم،  ئەگەر پۈتۈنلەي يۇرۇق دۇنيانى كۆرەلمەيدىغان بولۇپ قالساقمۇ ھېچبىر ئامالسىز ئىدۇق، ھېلىمۇ ياخشى ئازراق ئاجىزلىق بولسىمۇ يۇرۇق دۇنيانى كۆرەلەيمىز، شۇنىڭغا رەببىمىزدىن كۆپ مىننەتدار بولۇشىمىز كېرەك!