تىرنىقىم
تەنلىرىم بولغاچ كەيىپ ئۆستى خىيالدا تىرنىقىم ،
بارمىقىم شەرھى بولار ھەر خىل ئامالدا تىرنىقىم .
مىڭ غايە لەھزى ئۈچۈن سوزىلار ئامەت غايىپ
جان پىدا تەييار پىراقى رىزقى پىلاندا تىرنىقىم .
مەست ياتار بارماقلىرىم مەيزاپ خىيالنىڭ دەستىدە
ئۇھسىنار كىرپىك روھى قىممەت زىياندا تىرنىقىم .
ئوت كېتەر يەلكەنلىرىم ئون خىل پىلاننىڭ دەستىدە ،
تولغۇنۇپ خارت -خارت قىلار بىرلىك ئىماندا تىرنىقىم .
چاڭقىغان لەۋلەر يېرىق ئۆستەڭ تىلىدا ئاقتى قۇم ،
جىسمى سەت بولدى، كۆمەچ كۆيگەن ئارماندا تىرنىقىم .
مېھرى يوق يالغان سائەتنىڭ سوغ كېلەر قولقاپلىرى ،
شاھادەت ئالماي كېتەر ئەركىن زاماندا تىرنىقىم .
چارچىدى شەبنەملىرىم ئالقاندا بولغاچ كەم ھوسۇل ،
نەملىكى بولدى بوغاز يالغۇز خاماندا تىرنىقىم .
ئالدىدى شورى بىلەن يالغان شامالنى تۆت تېمىم ،
قىسمىتىم يازدى شەجەرە سۇنغان ساماندا تىرنىقىم .
جان پىدا ئەيلەپ كامارنىڭ چاشقىنى ئاشتى داۋان ،
جامالى نادىر سۈرەت بولدى ياماندا تىرنىقىم .
يىلتىزى بولغاچ قۇرۇق، نام ئالىدۇ ئەل __سازاڭ ،
روھىغا ئۈششۈك تېگەر مىسلى داۋاندا تىرنىقىم .
غەملىرىم رەختى ئۇزۇن ، قايچىسى گال ئەتىنىڭ ،
قاغجىراپ ئۆلدى تۆنۈگۈن ئاسىي شامالدا تىرنىقىم .
ئۇيقىسى قاچقان بۇلۇڭدا تەلمۈرەر ئوغرى تىكەن ،
ھېسلىرىم بىخلار ھامان ئىللىق جامالدا تىرنىقىم .
ئاپتۇرى : ئابلەت مۇھەممەت
يوللىغان ۋاقتى 2014-11-24 12:19:28 AM
.gif)
