 |
 |
 |
 |
ئۇيغۇر ماكانى- ئەزىزانە قەشقەر
(چاتما سۈرەتلەر - 3 )
قەشقەر شەھرىنىڭ شىمالى قىسمىدىكى ئىگىز يار ئۈستىگە جايلاشقان قەدىمىي شەھەر ساياھەت رايونى قەشقەرنىڭ تارىخىي ئۆزگىرىشلىرىنى، مىللى مەدەنىيەت ئاساسلىرىنى، ئۇيغۇرلارنىڭ مىللى ئۆرپ-ئادەت ئالاھىدىلىكلىرىنى چۈشىنىدىغان بىر ياخشى جاي ھىسابلىنىدىكەن.
بىزنى باشلاپ ماڭغان ساياھەت يېتەكچىمىزنىڭ تونۇشتۇرۇشىدىن قارىغاندا، بۇ يەر ئەسلىدە غەربى يۇرتتىكى 36 بەگلىك ئىچىدىكى سۇلى خاندانلىقىنىڭ خانلىق مەركىزى بولغان، شۇنداقلا قاراخانىيلار خاندانلىقىدىكى ئوردىنىڭ ئىزناسى بولغان جاي ئىكەن. مىلادى 10-ئەسىردە قاراخانىيلار خاندانلىقى مۇشۇ جايدا ئوردا بەرپا قىلغان بولۇپ، خاندانلىقنىڭ ئۇرۇغ-ئەۋلادلىرى بۇ يەردە تا ھازىرغىچە ياشاپ كەلگەن. نۇپۇسنىڭ كۆپىيىشىگە ئەگىشىپ، ئولار ئوردىنىڭ ئىزناسى ئورنىغا بىر-بىرىگە تۇتاش كەتكەن خالتا كوچىلارنى تەدرىجى شەكىللەندۈرگەن. بەئەينى ئۆمۈچۈك تورىغا ئوخشايدىغان بۇ ئەگرى-بۈگرى خالتا كوچىلاردا سىرتتىن كەلگەن ئادەم يۆنىلىشنى ئاڭقىرالماي ئوڭايلا ئېزىپ قالىدىكەن.
ئىگىز يار ئۈستىگە جايلاشقان، ئىككى مىڭ يىللىق تارىخقا ئىگە بۇ قەدىمىي شەھەرنىڭ ئىگىلىگەن يەر كۆلىمى ئىككى كىۋادىرات كىلومېتىر بولۇپ، دۆلەت ئىچىدىكى بىردىنبىر مۇكەممەل ساقلانغان، ئىسلام مەدەنىيىتىنىڭ ئالاھىدىلىكى گەۋدىلەنگەن شەھەر كوچا رايونى ھىسابلىنىدىكەن. ئون مىڭدىن ئارتۇق ئاھالە ياشايدىغان بۇ قەدىمىي شەھەردە 20دىن كۆپرەك خالتا كوچا ۋە بۇ كوچىلارغا تارقاق جايلاشقان 12 نۇقتىلىق قوغدىلىدىغان ئورۇن بار ئىكەن. كېسەكتىن قوپۇرۇلغان كونا ئۆيلەرنىڭ تارىخى ئۇزۇن بولسىمۇ، پۈتۈنلەي مۇكەممەل ساقلانغانلىق ھالىتىنى ھەر قانداق ۋاقىتتا كۆرۈۋالغىلى بولىدىكەن. بۇ يەردە يەنە نۇقتىلىق ئىكىسكۇرسىيە قىلىنىدىغان 20 دىن ئارتۇق ئائىلە بولۇپ، جوڭگولۇق، چەتئەللىك ساياھەتچىلەر بۇ ئائىلىلەرنى ئىكىسكۇرسىيە قىلىش ئارقىلىق، ئۇيغۇرلارنىڭ ئائىلە تۇرمۇشىنى، قويۇق مىللى ئۆرپ-ئادەتلىرىنى، ئەنئەنىۋىي قول ھۈنەر سەنئېتىنى چۈشىنىش ئىمكانىيىتىگە ئىگە بولىدىكەن. شۇڭا بۇجاي قەشقەردىكى ھاياتلىق بولغان مىللى ئۆرپ-ئادەت مۇزىيخانىسى، دەپمۇ ئاتىلىدىكەن.
ئەندى تۆۋەندىكى سۈرەتلەر ئارقىلىق بۇ قەدىمىي شەھەرنى ساياھەت قىلىپ چىقايلى.
|
 |
 |
 |
 |
|
يوللىغان ۋاقتى 2014-9-4 12:01:37 AM
