باشئەگىم دىيارىدا ‹‹ئەدىب ئابدۇرىشىت سابىت ئەسەرلىرى ئىلمىي مۇھاكىمە يىغىنى››ئۆتكۈزۈلدى
مائارىپنىڭ تەرەقىياتى بىر مىللەتنىڭ مەۋجۇد بولۇپ تۇرۇشتىكى ئەڭ مۇھىم ئامىل.دۆلىتىمىز قۇرۇلۇپ تاكى بۈگۈنكى كۈنگە كەلگۈچە شىنجاڭ ئۇيغۇر ئاپتۇنۇم رايۇنىمىزنىڭ ھەر قايسى جايلىرىدىن يېتىشىپ چىققان پىداگۇكلار بىر ئۆمۈر دەرس مۇنبىرىدە مىللەتنىڭ ئۈممەتلىرىنى تەربىيلەپ قاتارغا قوشۇش جەريانىدا نۇرغۇن رىيازەتلەرنى چەككەن.ئۇيغۇر پىداگۇكلىرى پۈتۈن بارلىقىنى كەلگۈسىدىكى ئەۋلادلارغا بېغىشلاپ مىللىتىمىزنىڭ يۈكسىلىشى،تەرەقىي قىلىشى ئۈچۈن تارىخ ئالدىدا ئۆزىنىڭ ئۆتەشكە تېگىشلىك مەسئۇلىيىتىنى تۇلۇق ئادا قىلىپ كەلگەن.ھازىرقى رىقابەت،تەرەقىيات،خىرىسقا ئۇچراپ تۇرۋاتقان مۇشۇنداق بىر دەۋردە پىشقەدەملەرنىڭ ھايات مۇساپىسىنى خۇلاسىلاش،ئۇلارنىڭ ئۇيغۇر مائارىپى ئۈچۈن قوشقان تۆھپىلىرىنى ياد ئېتىش ھەمدە ئەجدادلار ئېچىپ بەرگەن يولدا تەۋرەنمەي مېڭىش ئەۋلادلارنىڭ ئۆتەشكە تېگىشلىك مەجبۇرىيىتىدۇر.
دىيارىمز باشئەگىم ۋادىسىدا بىر ئۆمۈر خەلقنىڭ ئوتىدا كۆيۈپ،سۈيىدە ئېقىپ ئۇيغۇر مائارىپىنىڭ تەرەقىياتى ئۈچۈن ئۆچمەس تۆھپىلەرنى قوشقان نۇرغۇن پىشقەدەم ئۇيغۇر زىيالىيلىرى ئۆتكەن.مويدۇن سايىت بوستانى،ئابلىز ھەسەن،ئابلىمىت مۇھەممىدى ئاقيولى،ئابدۇمىجىت ھەسەن قۇربانى،مەمتىمىن ھامىد،ئابدۇرېھىم ئەيسا،ئابدۇرېشىد سابىت...قاتارلىقلار ئەزىز كىشىلەر كورلىنىڭ بۈگۈنكى كۈنگە كېلىشى ئۈچۈن خەلق ئۈچۈن بىر ئۆمۈر خىزمەت قىلىپ كەلگەن.
شۇ ۋەجىدىن پىشقەدەم مائارىپچى،مەسئۇلىيەتچان يازغۇچى،ھارماس پىداگۇك،ئەستايىدىل ئوقۇرمەن ئابدۇرېشىد سابىت ئاكىنىڭ 71ياشقا كىرگەن مەۋلۇد كۈنىنى خاتىرلەش،ئۇستازنىڭ يازغان ئەسەرلىرى ۋە شانلىق ھاياتىنى ئەسلەش يۈزىسىدىن 2014-يىلى 22-ئىيۇن ‹‹كىرۇران››ژۇرنىلىنىڭ باش بولۇپ يېتەكلىشى بىلەن بايىنغولىن ئوبلاستىدىكى قەلەمكەشلەر،ئۇستازنىڭ پەرزەنتلىرى،ئۇرۇق-تۇققانلىرى،جەمىيەتنىڭ ھەر ساھەسىدىكى يۈزدىن كۆپرەك كىشى كورلا شەھىرى ئالتۇن بۇلاق رېستۇرانىغا يىغىلىپ ‹‹ئەدىب ئابدۇرىشىد سابىت ئەسەرلىرى ئىلمىي مۇھاكىمە يىغىنى ››ئۆتكۈزدى.
پائالىيەت باشلىنىشتىن بۇرۇن بايىنغولىن ئوبلاستلىق يازغۇچىلار جەمىيتىنىڭ مۇئاۋىن رەئىسى،‹‹كىرۇران››ژۇرنىلىنىڭ باش مۇھەرىرى،شائىر ئۆمەر مۇھەممەتئىمىن كىرۇران بۈگۈنكى يىغىننىڭ باشلىنىش سۆزىنى قىلىپ بولغاندىن كېيىن يىغىنغا قاتناشقان ئەزىز مېھمانلارنى تۇنۇشتۇرۇپ ئۆتتى.كەينىدىن ئۆمەر مۇھەممەتئىمىن كىرۇران ئابدۇرىشىد سابىتقا ئاتاپ يازغان ‹‹ھۆرمەت كۈيى،ئالقىشلارغا بولدى ئەل شاھىد››غەزىلىنى ھەمدە ئابدۇرىشىد سابىتنىڭ قىسقىچە تەرجىمىھالىنى سۆزلەپ ئۆتتى.
جان كۆيدۈرگۈچى قەلەم ئۈچۈن ئابدۇرىشىد سابىت
ھۆرمەت كۈيى،ئالقىشلارغا بولدى ئەل شاھىد
ئۆمەر مۇھەمتئىمىن كىرۇران
ئەسسالامۇ ئەلەيكۇم ھۆرمەتلىك ئۇستازلار،جاپاكەش قەلەمكەشلەر،ھەممىڭلارنىڭ گۈزەل يەكشەنبىسى قۇتلۇق بولغاي!!(چاۋاك)
چوققىنى دەسسەر پۇتۇڭ ماڭغان يولۇڭدىن يانمىساڭ،
يىلتىزىڭدىن ئۆكسىمەس سۇ،غول،شېخڭدىن تانمىساڭ.
سەن بېشىڭچە شۇڭغىساڭ،باسقاي خۇمارىڭنى نىشان،
شان-زەپەر قۇتلار ۋۇجۇدىڭنى،قاتاردىن چانمىساڭ.
پۇت-قولۇڭ كاللاڭغا ماسلاسشا،قولۇڭدا لىقلا گۈل،
كەلمىگەي سۇ،تاغ تامان گۈرجەك تۇتۇپ ئاتلانمىساڭ.
ئۆتتى نى‹‹مەن!مەن!››دېگەنلەر،قالمىدى باغ،قالدى داغ،
ئەل قاراپ قويماس،چاپاننى ئەل ئۈچۈن بىر سالمىساڭ.
پۈتتى تارىخ كىم بارالايدۇ كېلەچەككە ئامان،
نە يارالغاي قىممىتىڭ،تۆھپەڭ بىلەن قۇتلانمىساڭ.
ئەر بولامسەن،يەر بولامسەن،بەلگىلەر ئىزگۈ ئىشىڭ،
نە مۇقام ئىشىتكەي قۇلاق،سازىڭنى مۇڭلۇق چالمىساڭ.
ئەل بىلەر ئەر قەدرىنى،قەد كەرسە خىسلەت كۆڭلىدە،
ئەرمۇ سەن ئۆمرۈڭدە خەلقىڭدىن شاھادەت ئالمىساڭ؟...!
كەينىدىن بايىنغولىن گېزىتى ئۇيغۇر مۇخبىرلار بۆلىمىنىڭ مۇدىرى،يازغۇچى پەخرىدىن موسا ‹‹ئەدىب ئابدۇرىشىت سابىتنىڭ كىتاب ئوقۇش مەدەنىيىتى ھەققىدە››دېگەن تېمىدىكى ماقالىسىنى ئوقۇپ ئۆتتى.
كورلا شەھەرلىك 1-ئوتتۇرا مەكتەپنىڭ تىل-ئەدەبىيات ئوقۇتقۇچىسى،يازغۇچى ھۆرلىقا ئابدۇرىشىد دادىسىنىڭ تۇغۇلغان كۈنىگە ئاتاپ يازغان ماقالىسىنى ئوقۇپ ئۆتتى.
‹‹كىرۇران››ژۇرنىلى تەھرىر بۆلۈمى ئۇستاز،ئەدىب ئابدۇرىشىد سابىتنىڭ 71يىللىق مەۋلۇد كۈنىگە ھەمدە بىر ئۆمۈر ئۇيغۇر مائارىپى ئۈچۈن قوشقان تۆھپىسىگە ئاتاپ تون كەيدۈردى.تون كەيدۈرۈلۈپ بولۇنغاندىن كېيىن ئابدۇرىشىد سابىتنىڭ پەرزەنتلىرى،كەسىپداشلىرى،ئوقۇغۇچىلىرى ئۆزى تەييارلاپ كەلگەن كۆڭۈل سوۋغىلىرىنى تەقدىم ئەتتى.
ئەدىب ئابدۇرىشىد سابىتقا تون ۋە سوۋغا -سالاملار تەقدىم قىلىنىپ بولغاندىن كېيىن پائالىيەتنىڭ داۋامىنى بايىنغولىن ئوبلاستلىق يازغۇچىلار جەمىيتىنىڭ مۇئاۋىن باش كاتىپى ئامانگۈل ئېزىز باش بولۇپ رىياسەتچىلىك قىلدى.ئامانگۈل ئېزىز سورۇنغا چىقىپ بارلىق سورۇن ئەھلىگە ئوتلۇق سالام يوللىغاندىن كېيىن ئابدۇرىشىد سابىتنىڭ مىجەز-خۇلقى،كەسىپ جەھەتتىكى تاللاشتا بىردىنبىر ۋارىسى،دادىسىنىڭ ئىزىنى باسقان كورلا شەھەرلىك 6-ئوتتۇرا مەكتەپنىڭ تىل-ئەدەبىيات ئوقۇتقۇچىسى نىجات ئابدۇرىشىدنى خوتەن خەلق ناخشىلىرىدىن ‹‹ساراي مەشرىپى››نى ئېيتىپ بېرىشكە تەكلىپ قىلدى.بىر جەمەت ئىناق ئائىلە سورۇنغا چىقىپ خوشال،قىزغىن كەيپىيات بىلەن ئۇسۇل ئوينىدى.
بۈگۈر كەسپىي ئوتتۇرا مەكتىپىنىڭ ئوقۇتقۇچىسى،ئابدۇرىشىت سابىتنىڭ پەخىرلىك ئوقۇغۇچىلىرىنىڭ بىرى شائىر سېتىۋالدى قادىر يېڭسارى‹‹ئۇستاز روھى››ناملىق شېئىرىنى ئوقۇپ بەردى.
رىياسەتچىلىك قىلىۋاتقان ئامانگۈل ئېزىز ئەدىب ئابدۇرىشىد سابىتنىڭ ئوقۇغۇچىسى بولۇپ،ئامانگۈل ئېزىز ئۆزىنىڭ قولىدا تەربىيلەنگەن ئوقۇغۇچىسى غەيرەتجان زۇنۇننى ئابدۇرېشىد ئاكامنىڭ نەۋرە ئوقۇغۇچىسى دېگەندەك چوڭقۇر مەنىلىك سۆزلەر بىلەن ئىزاھلاپ غەيرەتجان زۇنۇننى بىر پەدە دۇتتار چېلىپ بېرىشكە تەكلىپ قىلدى.
بۈگۈنكى يىغىلىشقا كەلگەن باشئەگىم دىيارىنىڭ زۆھرەسى،خۇشۇت ناھىيلىك سەنئەت ئۆمىكىنىڭ ئۇسۇلچىسى زۆھرە قىز يۇقۇرى ماھارەت بىلەن سورۇن ئەھلىگە بىر پەدە ئۇسۇل ئويناپ بەردى.
ئەدىب ئابدۇرېشىت سابىتنىڭ ئوماق نەۋرىسى دىلناۋا چوڭ دادىسىنىڭ 71ياشلىق مەۋلۇد كۈنىگە ئاتاپ ‹‹ئوتۇڭ يامان››ناملىق خەلق ناخشىسىغا ئۇسۇل ئويناپ بەردى.
ياش تۇرۇپ ئۆزى ئىگىلىك تىكلىگەن،كورلىنىڭ ئاۋات بازارلىرىدىن بىرى بولغان بوستان سودا بازىرىدا تىجارەت قىلىۋاتقان ياش قەلەمكەش ھەسەنجان ئۆزى يېزىپ تەييارلىغان ‹‹ئاتام باردۇر››دېگەن شېئىرىنى ئوقۇپ بەردى.
ئاتام باردۇر
ھەسەنجان ياسىن
بۇ كۆزۈمدىن ياشلار ئاقسا سۈرتەر ئۈچۈن ئاتام باردۇر، دەرت-ئازاپقا تولسا قەلبىم يۈتەر ئۈچۈن ئاتام باردۇر. ئەجەل كېلىپ كەتسەم ئەگەر ئۇ دۇنياغا بىر كۈنى، بالام كەلسە قاشىمگە دەپ كۈتەر ئۈچۈن ئاتام باردۇر.
يولدا دۈشمەن توسسا ئەگەر باشلىرىمغا كۈن كېلىپ، قەھرى بىلەن تاغنى قالغان ئېتەر ئۈچۈن ئاتام باردۇر. يىقىلسام گەر قول سۇنارغا بولمىسا ھېچ بىر كىشىم، سەبىر تىلەپ مېھىر بېرىپ يۈدەر ئۈچۈن ئاتام باردۇر.
بالىلىققا تال چىۋىقنى مىنگەن بولسام ئات قىلىپ، ئازغان يولدا دۇلدۇل قىلىپ مىنەر ئۈچۈن ئاتام باردۇر. كېچە-كۈندۈز غېمىمنى يەپ جان بالام دەپ ئۇھسىنىپ، باشلىرىمدا ئۇخلىماي تۈنەر ئۈچۈن ئاتام باردۇر.
زىمىستاندا خازان بولسا ئۇشبۇ ھايات باغلىرىم، بىر مەن ئۈچۈن گۈل بولۇپ ئۈنەر ئۈچۈن ئاتام باردۇر. ھايات يولدا شان قۇچۇپ غەلبە قىلسام بىر كۈنى، سەن يىغلايسەن بىلىپ قال كۈلەر ئۈچۈن ئاتام باردۇر.
شۇنداق قىلىپ ئەدىب،پىشقەدەم مائارىپچى ئابدۇرىشىد سابىت ئەسەرلىرى ئىلمىي مۇھاكىمە يىغىنى غەلبىلىك ئاخىرلاشتى.پائالىيەت ئاخىرىدا يىغىنغا كەلگەن قەلەمكەشلەر،ئابدۇرىشىد سابىت جەمەتى قاتارلىقلار سۈرەتكە چۈشۈپ خاتىرە قالدۇردى.كورلىدا بىر ئۆمۈر ئۇيغۇر مائارىپى ئۈچۈن قان-تەر ئاققۇزغان ئۇستازنىڭ بۈگۈنكى كۈنگە كەلگۈچە بولغان ھايات مۇساپىسىدىكى مۇپەسسەل بايانلار،ئۇستازنىڭ پەرزەنتلىرى،ئوقۇغۇچى-شاگىرتلىرى،دوست-بۇرادەرلىرىنىڭ سوۋغىلىرى،پائالىيەتتە سۆزلىگەن يۈرەك سۆزلىرى،ئۇستازغا ئاتاپ ئورۇنلىغان نۇرمۇرلار پائالىيەتكە قاتناشقان ھەربىر كىشىنى چەكسىز ھاياجانغا چۆمدۈردى. دەۋرىمىز ياشلىرى ئابدۇرىشىد سابىت ئاكىنىڭ بىر ئۆمۈر ئۇيغۇر مائارىپى ئۈچۈن قوشقان تۆھپىلىرىنى ياد ئېتىش بىلەن بىرگە ھازىردىن باشلاپ ئالتۇندەك ۋاقىتنى قەدىرلەپ تىرىشىپ ئۆگىنىشى، ھارماي-تالماي ئىزدىنىپ ۋەتىنىمىزنىڭ تەرەقىياتى ئۈچۈن يېڭى-يېڭى تۆھپىلەرنى قوشۇشىمىز كېرەك ئەلۋەتتە. -مارشالنىڭ نەق مەيداندىن ئەۋەتكەن خەۋىرى 2014-يىلى 6-ئاينىڭ 22-كۈنى كەچتە يېزىلدى.
|
يوللىغان ۋاقتى 2014-6-23 08:12:32 AM
