ھىكايىغا ئوخشايدىغان راست ئىشلار
(فېليەتون)
مەن قارابەگ ئەرىش لەشكەرلىرى قاتارىدا تۆۋەنگە چۈشۈپ، تۇنجى قىلغان ئىشىمىز، ئارىمىزدىكى 3 نەپەر خەنزۇ يولداشنىڭ ئامانلىقى، تۇرمۇشى، تاماقلىنىشى دىگەندەك ئىشلىرىنى ياخشى ئورۇنلاشتۇرۇش ئۈچۈن ياتاق قىلىنىدىغان ئىشخانىلارنى بىر تۇتاش رېمۇنت قىلىپ، دەرىزىلەرنى ئالماشتۇرۇش، سىمتورلاشتۇرۇش، ئىشىكلەرگە بىخەتەر ئىشىك بېكىتىش خىزمىتى بولدى.
بىخەتەر ئىشىكلەرنى بېكىتىش جەريانىدا ئىلچى شىركىتىنىڭ ئاينىڭ سۈرىتى ئويما نەقىش قىلىپ ئىشلەنگەن بىر ئىشىكى بېكىتىلىپ قاپتۇ. بىر چاغ بولغاندا يېزىلىق پارتىكومنىڭ سېكرىتارى ئەلپازىنى بۇزغان ھالەتتە كەنىتكە كىردى ۋە چالا ئۇيغۇرچە تەلەپپۇزدا:
- قېنى، ئۇ ئىشىك؟- دەپ سورىدى.
- قايسى ئىشىك؟- جاۋاپ بەردى قۇرلۇشچى ئۇستام.
- ئاينىڭ سۈرىتى بار ئىشىكچۇ؟
- ھە، ئۇ ئىشىك ئەنە.
- ئاۋۇ ئۇيغۇرچە خەت نىمە دىگەن گەپ؟
- ئىلچى دىگەن گەپ.
- ئىلچى دىگەن نىمە گەپ؟
- ئىشىكنى ياسىغان شىركەتنىڭ ئىسمى.
- بۇ ئىشىكنى ئېلىۋەت
- نىمىشقا ئېلىۋېتىمىز، سىكرىتار؟
- ئۈستىدە ئاينىڭ بەلگىسى بار ئىكەن، شۇڭا ئېلىۋەت.
- ئاينىڭ بەلگىسى بولسا نىمە بولىدۇ، بىر ئوبدان پۈتۈپ بولغان تامنى يەنە چاقامدى.....
- بولدى قۇرۇق گېپىڭنى قوي، ئاينىڭ سۈرىتى بار ئىكەن، بولمايدۇ. ئىشىكنى ئېلىۋەت. مەن دىدىممۇ چوقۇم ئېلىۋېتىسەن. باشقىلار بۇ ئىشنى تېلىپۇن قىپتىكەن، مەن ناھىيىدىكى موھىم يىغىننىمۇ قويۇپ، بۇ يەرگە كەلدىم، كەچتە يەنە تەكشۈرىمەن، بۇ ئىشىكنى يەنە كۆرۈپ قالىدىغان بولسام........
شۇنىڭ بىلەن قۇرۇلۇشچى ئۇستام قولىغا بازغاننى ئېلىپ، پۇتۇپ بولغان تامنى يەنە چېقىشقا باشلىدى....
كۆرۈپ تۇرغۇچىلاردىن بىرسى دىدى:-تۆۋۋە، كادىر دىگەن ئەجەپ قىززىق خەقكىنا، ئاينىڭ سۈرىتى نەقىشلەنگەن ئىشىكنى ئېلىۋېتىدىكەن، ئەجەپ ئاسماندىكى ئاينى ئېلىۋەتمەيدىكەن.
*** *** ***
مەن قارابەگ خىزمەت ئەترىتىدىكى ئىشلار تۈگەپ، بوش ۋاقىتلىرىمدا ياتاقتىكى كومپىيوتىردا قەرت ئوينىسام، مەسئۇل باشلىقىمىز "يوۇۋشى بۇشىڭ" دەپ ئوينىغىلى قويمىدى. قەرتنى ئېتىۋېتىپ ناخشا-مۇزىكا ئاڭلاۋاتسام، مەسئۇل باشلىق ياتاققا كىرىپ:
- ناخشىنى ئۆچىرىۋەت-دىدى
- نىمشقا؟
- ئۆچىرىۋەت دىگەندىن كېيىن، ئۆچىرىۋەت.
باشلىق شۇنداق دىگىنىچە، ھومۇيۇپ قويۇپ، چىقىپ كەتتى. بەزىدە دىڭلىجۈننىڭ ناخشىلىرىنى قويۇپ بەرسەم، باشلىق "ناخشا ئاڭلاپسەن" دىيىش تۈگۈل، ئۆزىمۇ تۇيماستىن ناخشىغا غىڭشىپ كېتىدۇ. يات تېلدىكى ناخشىلارنى ئاڭلاۋېرىشكە رايىمىز بولمىغاچقا، كومپىيوتىرنى ئېتىۋېتىپ، بىكارچىلىقتا ئىچىمىز تىتىلداپ يۈرگەن كۈنلەرنىڭ بىرىدە، ئارىمىزدىكى ھەييارى بىرەيلەن كەنتنىڭ ئاڭلىتىش ئۈسكۈنىلىرىنى ياتاققىلام ئەكىردى-دە، بارماق دىسكىسىدىكى ناخشا مۇزىكىلىرىنى چوڭ كانايدا بىۋاستىلا خەلىقنىڭ ئاڭلىشىغا قويۇپ بەردى. بۇنىڭغا باشلىق باشقا گەپ قىلمىدى.
بىر كۈنى چۈشلۈك تاماق ۋاقتىدا مەسئۇل باشلىق مەكتەپ بالىلىرىنىڭ چوڭ كانايدا چىقىۋاتقان ناخشىغا كەلتۈرۈپ، ئۇسسۇلغا دەسسىگەچ ئۆيلىرىگە قايتىۋاتقانلىقىنى كۆرۈپ:
-مۇشۇنداق تەشۋىق قىلساڭلار ياخشى بولىدىكەن، بۇنىڭدىن كېيىن ئەتىگەندە، چۈشتە، كەچتە ناخشا قويۇپ بېرىڭلار.- دىدى.
بۇ ئىشتىن خەۋەر تاپقانلاردىن بىرسى دىدى: تۆۋۋە، بۇ خەقنىڭ تۈگمىدەك ئىشلارغا ئېسىلىۋېلىپ، تۈگىدەك ئىشلار بىلەن كارى بولمايدىغا خۇي-پەيلى قاچانمۇ تۈگەر؟
*** *** ***
بۈگۈنمۇ ئادىتىمىز بويىنچە ئائىلە زىيارىتىنى داۋاملاشتۇرىۋاتاتتۇق. بۇنى ئائىلە زىيارىتى دىگەندىن كۆرە، نوپۇس تىزىملاش دىسەك ياخشى بولاتتى. قىزىق يېرى مائارىپ، پىلانلىق تۇغۇت، ساقچى، ئىگىلىك باشقۇرۇش قاتارلىق ئورۇنلارنىڭ كەنت نوپۇسىنى تىزىملىغان، ئەمما بىر-بىرىگە ئوخشىمايدىغان، توم-توم نوپۇس دەپتەرلىرى بار بولسىمۇ، بىز يەنىلا نوپۇس تىزىملاۋاتاتتۇق. بىر ئائىلە نوپۇسىنى تىزىملاشقا ئادەتتە يېرىم سائەتتىن بىر سائەتكىچە ۋاقىت كېتەتتى. نوپۇسى ئازراق ئائىلىگە ئازراق ۋاقىت كەتسە، نوپۇسى كۆپرەك ئائىلىگە كۆپرەك ۋاقىت كېتەتتى. شۇنداق بولغاچقىمۇ ياكى ۋاقىت سەۋەپلىكمۇ كۆپىنچە ئائىلىلەرنىڭ نوپۇسىنى تىزىملاپلا يېنىپ چىقاتتۇق. بۇگۈن مەن قارابەگنىڭ ئىلھامى تۇتۇپ، سىياسەتتىن ئازىراق دەرس سۆزلىگۈم كەلدى.
دەرس سۆزلەۋېتىپ، يەرنى 30 يىللىق ھۆددىگە بەرگەنلىك توغرىسىدىكى مەزمۇنغا كەلگەندە دىخانلاردىن بىرسى پىكىر بەردى.
- مۇشۇ جەھەتتە مەن ئازىراق پىكىر بېرىپ باقسام،-دىدى دىخان، بىزگە قاراپ تۇرۇپ،-ھۆكۈمىتىمىز يەرنى 30 يىللىق ھۆددىگە بەرگەنلىكى ئۈچۈنغۇ بىز ئىنتايىن خۇش بولدۇق. بىراق يەرلەرنى ھۆددىگە بېرىپ بولغاندىن كېيىن تۇغۇلغان بالىلارنىڭ ئالدى ئۆيلۈك-ئوچاقلىق بولۇپ بولدى، بۇ باللىلارغا يەر بېرىلمىدى، بۇلار تېرىي دىسە يەر يوق، ئۆي سالاي دىسە يەر يوق، ئۆز يۇرتىدا مۇساپىر بولىۋاتىدۇ، بۇلارنىڭ كۈن ئالمىقىمۇ تەسلىشىپ كەتتى، شۇڭا ھۆكۈمەت دىخانلارنىڭ مۇشۇ قىيىنچىلىقىنى ئويلاپ كۆرگەن بولسا.
- بۇ جەھەتتىن خاتىرجەم بولۇڭ،-دىدىم، جاۋاپ بېرىپ- ھۆكۈمىتىمىز خەلىقنىڭ غېمىنى يەيدۇ، دىخانلارنىڭ بۇ قىيىنچىلىقىنى ھەل قىلىپ بېرىدۇ.
- يەرلەرنى ھۆددىگە بېرىپ بولغان تۇرسا، يەرنى نەدىن تېپىپ بېرىدۇ؟
- ھۆكۈمەتكە ئىشىنىڭلار، ھۆكۈمەت چوقۇم يەر مەسىلىسىنى ھەل قىلىدۇ.
ياندا تۇرغان دىخاندىن بىرسى دىدى:- ھە بىلدىم، ھۆكۈمەت بىكاردىن ئاي بىلەن مارىسنىڭ گېپىنى قىلمايدىكەندە، دەنا ھۆكۈمەت دىخانلارغا ئاي بىلەن مارىستىن يەر ئىزلەۋېتىپتۇ ئەمەسمۇ؟
مەنبە: ئۆز قەلىمىم
بۇ يازمىنى ئاخىرىدا katran تەھرىرلىگەن. ۋاقتى 2014-3-23 12:34 PM
يوللىغان ۋاقتى 2014-3-23 11:55:42 AM
.gif)
