ماڭا ئەمدى كىملىك كېرەك ئەمەس

maymah

	-ئاپا بۇ راستلا مەن....سىز ماڭا 3ياش ۋاقتىمدىن تارتىپ ھېيتلىق بەرگەن..يەنە مىنى 4ياشقىچە يۇيۇپ قوياتتىڭىز..بۇ راستلا مەن.... -ئەمىسە بېرىپ كىملىكىڭنى تاپ. ھازىر ئوخشىشىپ كېتىدىغانلار كۆپ. ئۇنىڭ ئۈستىگە ئوغلۇم بۇ نەرسىلەرنىڭ ھەممىنى بىلوگىغا يېزىپ قويغان سەن ئوقۇۋالغان بولىشىڭ مۇمكىن. ئەگەر كىملىكىڭ بولمىسا مەن سىنىڭ سەن ئىكەنلىكىڭنى قانداق بىلىمەن؟ -مەن سىزگە دېدىمغۇ ئاپا، مەن كىملىكىمنى يۈتتۈرۈپ قويدۇم، ئاخشام مەكتەپ ياتاق بىناسىنىڭ ئۆگزىسىدە ئۇخلاپ قاپتىمەن، ئەتىگەن قارىسام يوق تۇرىدۇ..... -ھەممەيلەن كىملىكنى پىشانىمىزغا چاپلاپ يۈرىدىغان تۇرساق، پىشانەڭدىكى كىملىك قانداقسىغا يۈتتۈپ كەتكۈدەك؟؟؟؟ دەرھال كىملىكنى تاپ، ھېچ بولمىسا كىملىكىڭنى تېپىپ بولغىچە، ساقچىخانىدىن بىر ئىسپات كەستۈرۈپ كەل. -ئاپا...سىز ماڭا ئىشەنمىگەن يەردە ساقچىلار ئىشىنەتتىمۇ؟... -ئىشقىلىپ سىنىڭ مېنىڭ ئوغلۇم ئىكەنلىكىڭگە ئۆزەڭنىڭ گېپىدىن باشقا ھېچقانداق ئىسپات يوق. ئەمدى ئۆيدىن چىقمىساڭ ساقچى چاقىرىمەن.!!! ئاپامغا ئۆزەمنىڭ مەن ئىكەنلىكىنى ئىسپاتلاشتىن ۋاز كېچىپ، نىشاننى ئاكامغا بۇرىدىم. -ئاكا سەنغۇ ماڭا ئىشىنەرسەن؟، سەن بەشىنچى سىنىپ ۋاقتىڭدىلا تاماكىغا ئۆگىنىۋالغان، مەن ۋاقتى-ۋاقتىدا ئاپامغا سىنى چېقىشتۇرۇپ تۇرغاچقا سەن تاماكىنى تاشلىغان......بۇ ئىشلار ئېسىڭدە باردۇ؟ بۇغۇ بۇرۇنقى ئىشلار سەن تولۇق ئۈچىنچى سىنىپ ۋاقتىڭدا مۇھەببەتلەشكەندىمۇ ئاپامغا مەن دەپ قويۇپ، سەن تۇتىگۈل بىلەن ئايرىلىپ كەتكەن..بۇغۇ ئېسىڭدە باردۇ؟ - سەن تىلغا ئالغان ئىشلارنىڭ ھەممىسىنى مەن ئاغىنىلىرىمگە ئىنىمنىڭ قانچىلىك ئادەمنى بىزار قىلىدىغانلىقىنى چۈشەندۈرگەندە دەپ بەرگەن....سەن چوقۇم شۇلاردىن ئاڭلىۋالدىڭ!.... ئاكامدىنمۇ ئۈمىد ئۈزۈپ، قانداق قىلارىمنى بىلەلمەي تۇرغىنىمدا ئاكامنىڭ بىر يېرىم ياشلىق بالىسى،ئۆمىلەپ چىقىپ كەلدى. ئۇنى كۆرۈپ شۇنچىلىك خوش بولۇپ كەتتىمكى، دەرھاەل بېرىپ ئۇنى كۆتۈرۈشكە يۈگۈردۈم.....ئاكامنىڭ بالىسى ماڭا قەۋەتلا ئامراق، ئۇنىڭ بىلەن ئوينايدىغان تۈگىمەس ئويۇنلىرىم بار ئەمەسمۇ؟.....ئەمدىغۇ مېنىڭ مەن ئىكەنلىكىمگە ئىشىنەرسىلەر؟..شۇلارنى ئويلاپ بالىنى قولۇمغا ئالدىم....ئويلىمىغان يەردىن بالا ‹‹ھۈ.... با››دېگىنىچە پىشانەمنى كۆرسىتىپ پاڭڭىدە يىغلاپ تاشلىدى....ئەستا...ئۇ مېنىڭ پىشانەمدە كىملىك يۇق ۋاقتىمنى كۆرمىگەن ئەمەسمۇ...ئەستا...... بۇنى كۆرگەن ئاكام بالىنى قولۇمدىن يۇلۇپ تارتىۋالدىدە: -ھەم...ئەمدىغۇ چاۋاڭ چىتقا يېيىلغاندۇ؟؟.....بىلىپ قوي!...بوۋاق دىگەننىڭ كۆڭلى ئادەم تونۇيدۇ! بالام ئىنم كۆتەرسە قەتئى يىغلىمايدۇ....كۆزەمدىن يوقال بولمىسا ساقچى چاقىرىمەن.!!! ئۆزەمنى ئىسپاتلايمەن دەپ ئۆزەمنى مات قىلىپ قويۇپ، ئامالسىز بۇرىلىپ ئىشىكتىن چىقتىم. ئاچچىقتىن غالىلداپ تىترەيتتىم. ئاچچىقىمنى ئازراق بولسىمۇ باسارمىكىن دەپ يادىمغا تاماكا كەلدى. گەېچە ئۆزەم چەكمىسەممۇ تاماكا ئاچچىقنى باسىدۇ دىگەن سۆزنى بەڭگىلەردىن كۆپ ئىشتكەن ئىدىم. -ئەجدىرھا ماركىلىق تاماكىدىن بىر قاپ بېرىڭ....،-دىدىم بەش يۈەن پۇلنى دۇكاندارغا ئۇزارتىپ. -ھى...ھى..ئاۋال كىملىكىڭىزنى بىر كۆرۈپ باقسام،-دىدى دۇكاندار ھىجىيىپ. -بىر قاپ تاماكا ئالغىلىمۇ كىملىك كېتەمدۇ؟؟؟؟؟ -سىز بىلمەيسىز....بىر قاپ تاماكىنىڭ بۇلۇتىدا ، بىر ئادەمنىڭ ئېغىز بۇرنىنى ھىملەپ تۇنجۇقتۇرۇپ ئۆلتۈرگىلى بولىدۇ.شۇڭا بىز دېھقەت قىلمىساق بولمايدۇ....ۋاقتانى ۋاق كېلىپ، راس شۇنداق ئىش يۈز بەرسە، سىزنىڭ كىملىكىڭىزنى مەن كۆرمىگەن تۇرسام، بار چاتاخ ماڭا كېلىپ قالمامدۇ؟ -ئەمىسە كولادىن بىرنى ئېلىپ بېرىڭ،-دىدىم ئۇنىڭغا گەپ قىلىشتىن يالتىيىپ. ئويلاپ باقسام ئەتىگەننىڭ ياقى ئۆزەمنىڭ ئۆزەم ئىكەنلىكىنى ئىسپاتلاتلايمەن دەپ ئۇسساپ كىتىپتىمەن. -ھە...ھە...كىملىك؟،-دىدى دۇكاندار يەنە سەت ھىجىيىپ. -بۇنىڭمۇ خەتىرى بارمۇ،-دىدىم مەن جىلىچىلىكتە ئۇنىڭغا چەكچىيىپ. -كولا دىگەن يۇقىرى تېخنىكىلىق نەرسە....شۇڭا.... -بۇنىڭ نەرى يۇقىرى تېخنىكىلىك؟ -ئەمىسە ئۆزىڭىز ياساپ ئىچىپ باقمامسىز..ھى...ھى...ھى -ئەمىسە بولكا ئالاي!!!،-مەن يانچۇقۇمدا ھالال ئىشلەپ تاپقان پۇلۇم تۇرۇپ،خەجلىيەلمىگىنىمگە جىلە بولاتتىم. -بولكىنى بىرەرسىگە بەرسىڭىز،ئۇنىڭ گېلىغا تۇرۇپ قېلىپ بىرەر ۋەقە چىقسا مەن ئىگە بولالمايمەن...شۇڭا ..ھى..ھى،.،،ھى،،،.. -مەن ھېچكىمگە بەرمەيمەن...كۆز ئالدىڭىزدا يەپ تۈگىتىۋېتىمەن... -ھىم.....سەن ئۆلىۋېلىپ مېنى بالادا قويماقچىمۇ؟؟؟؟؟؟يوقال.!!!! شۇنداق قىلىپ دۇكاندىن ھەيدىلىپ ئىلاجسىز ساقچىخانىغا قاراپ ماڭدىم. -كىرىڭ،كىرىڭ....نېمە ئىشىڭىز بار ئىدى؟،- دېدى ساقچى خادىمى ئىللىق كۈلۈمسىرەپ مېنى ئورۇندۇققا باشلاپ. -باشقا مۇھىم ئىشمۇ يوق...شۇ مەن كىملىكىمنى يۈتتۈرۈپ قويغانىدىم. -مۇھىم ئىش يوق دەڭ تېخى.....كىملىك قانچىلىك مۇھىم، سىز بۇنى بىلمەمسىز؟ توۋا..مەن ئىشلىگىلى توپتوغرا 20 يىل بوپتۇ كىملىكنى يۈتتۈرىۋەتتىم دېگەننى تۇنجى قېتىم ئاڭلىشىم. ھەي...توختاڭ مەن يۇقىرىدىن سۈرۈشتۈرۈپ باقاي.،-ئۇ شۇنداق دېگىنىچە تېلىفۇننى ئېلىپ باشلىقىدىن مۇشۇنداق ئىشنى قانداق ھەل قىلىش توغرىسىدا تولۇق پاراڭلاشقاندىن كېيىن، تېلىفۇننى قويۇپ كۈلۈمسىرەپ تۇرۇپ: -كەچۈرۈڭ ئەسلى بۇ ئىش ئۇنچىۋالامۇ تەس ئەمەسكەن.....سىز دوختۇرخانىغا بېرىپ، dnaتەكشۈرتۈپ، كەلسىڭىز، بىز ئارخىپ بىلەن سېلىشتۇرۇپ كۆرسەكلا بولىدىكەن. مەن ساقچىخانىدىن يېنىپ چىقىپ، دوختۇرخانىغا كىرىپ، ئۇزۇن ئۆچىرەتتىن كېيىن، كارتا بىجىرىش مۇلازىمەت مەركىزىنىڭ ئالدىغا كەلدىم. -نېمە بۆلۈمگە كۆرۈنمەكچىتىڭىز؟،-دىدى كارتا بىجىرىدىغان خادىم كومپىيوتۇردىن بېشىنى كۆتۈرمەي. -مەن dna تەكشۈرتمەكچىدىم. -500 كوي تۆلىسىڭىز يېتىدۇ. -مەڭ. -كىملىك. -كىملىكىم يۈتۈپ كەتكەنىدى،شۇڭا dna ئىسپاتى ئالغىلى كەلگەنىدىم. -بۇنىڭغا مېنىڭ ئامالىم يوق. ياكى بولمىسا ،باشقىلارنىڭكىنى ئارىيەت ئېلىپ تۇرۇڭ. -مەن كەينىمدىكى ئۇزۇن ئۆچىرەتتىكى كىشىلەرگە يېلىنىش نەزىرى بىلەن قارىۋىدىم، ئىشنى چۈشەنگەن ئۇلار پىشانىسىدىكى كىملىكنى قولى بىلەن ئەتكىنىچە بېشىنى باشقا ياقلارغا بۇرىۋالدى. ئامالسىز بۇ يەردىن ئايرىلىپ ئۇدۇل دوختۇرنىڭ قېشىغا كىرمەكچى بولدۇم. تەلىيىمگە بۇ يەردە ئادەم ئاز ئىكەن. ئۇدۇل كىرىپ، دوختۇرنىڭ ئۇدۇلىدىكى ئورۇندۇقتا ئولتۇردۇم. -دوختۇر مەن dna تەكشۈرتمەكچى ئىدىم. -بولىدۇ..بولىدۇ...كارتىڭىز قېنى؟ -كىملىكىڭ يوقكەن دەپ بىجىرىپ بەرمىدى. -ئۇنداقتا سىزنىڭ كارتىڭىز يوقكەندە؟ -شۇنداق. -ئەمىسە مەن سىزگە ياردەم قىلالمىغۇدەكمەن. -جېنىم ئاكا ئۇنداق قىلماي مېنى قۇتقۇزىۋېلىڭ...مەن سىزدىن ئۆتۈنەي،-دىدىم ئىختىيارسىز كۆزلىرىمگە ياش ئېلىپ. -مېنىڭ سىزگە ياردەم قىلغۇم يوقمۇ ئۇكام؟ لېكىن dna دىگەن بىر ئادەمنىڭ ئە مۇھىم بەلگىسى، يىغلاپ كىرىۋەرگەنلەرگە تەكشۈرۈپ بېرىۋەرسەك...بىرەرسى يەنە بىرەرسىنىڭ سالاھىيىتىگە كىرىۋالسا، چاتاق بولىدۇ ئەمەسمۇ..... مەن بېشىمنى ساڭگىلاتقانچە،يەنە ساقچىخانىغا بېرىپ، بولغان ئىشلارنى ساقچىغا دېدىم. ئۇ يەنە يۇقىرىدىن بىردەم يول يورۇق سورىغاندىن كىيىن، 2 ئادەم مېنىقڭ ئېنىق مەن ئىكەنلىكىمگە كېپىل بولسا ماڭا dna تەكشۈرۈش ئىسپاتى چىقىرىپ بېرىدىغانلىقىنى ئېيتتى. بۇنى ئاڭلاپ ئىشنىڭ ئاسانلاشقانلىقىنى پەملەپ تېلىفۇننى ئېلىپ ئىشەنچ بىلەن ساقچىنىڭ ئالدىدىلا تېلىفۇن ئۇرۇشقا باشلىدىم. -ۋەي..نازى...ياخشىما؟ -ۋاي بارما سەن جېنىم؟....سەن ماڭا تېلىفۇن ئۇرمىغىلى توپتوغرا 10 سائەت بولدى جۇمۇ...سېنى بەك سېغىندىم. -باشقا گەپلەرنى كىيىن قىلىشىۋالايلى....مېنىڭ كىملىكىم يوقاپ كەتكەنىدى. ئىككى ئادەم كېپىل بولمىسا بولمايدىكەن... شۇڭا ساڭا تېلىفۇن قىلىشىم. -نېمە ؟؟؟ دېمەك سېنىڭ ھازىر كىملىكىڭ يوقكەندە؟؟؟؟ -شۇنداق.... -تۈفى...تۈفى...جېنىم دەپ كىتىپتىمەن تېخى.....،- ئۇ شۇنداق دېگىنىچە تېلىفۇننى قويۇۋەتتى. ئوڭايسىزلىنىپ ساقچى خادىمىغا قارىشىمغا ئۇنىڭ ئۈستىلىدىكى تېلىفۇن سايراشقا باشلىدى. ئۇ تېلىفۇننى ئېلىپ گەپنى ئاڭلاپ، قەغەزگە خاتىرىلىگەندىن كېيىن، قارشى تەرەپنى خاتىرجەم قىلىپ تېلىفۇننى قويۇۋەتتى. -قىز دوستىڭىز...بىرى ئوغۇل دوستۇمنىڭ نامىدا ماڭا تېلىفۇن قىلىدى دەپ دېلو مەلۇم قىپتۇ....،سىز قېشىمدا بولمىغان بولسىڭىز  چوقۇم سىزدىن گۇمان قىلاتتىم.،-دېدى ساقچى مۆرىسىنى قىسىپ قويۇپ. يەنە تېلىفۇن ئۇرۇشقا باشلىدىم. كىمگىلا تېلىفۇن قىلسام، قىز دوستۇمدىن ئېرىشكەنگە ئوخشاش نەتىجىگە ئېرىشتىم. ساقچى ئەمەلدارىنىڭ دېلو دەپتىرىمۇ ئۇلار مەلۇم قىلغان دېلولار بىلەن موللىشىشقا باشلىدى. ئاخىرى مەن ساقچى خادىمىغا يېلىنىشقا باشلىدىم. -ساقچى ئاكا....ماڭا سىز بىر گۇۋاھچى بولۇپ بېرىڭ....بىرەيلەن ئاۋۋال گۇۋاھچى بولۇپ بەرسە، چوقۇم يەنە گۇۋاھچى بولىدىغان بىرەرسى چىقىدۇ. -بۇ قائىدىگە سىغمايدۇ...مەن يا سىزنىڭ سىز ئىكەنلىكىڭىزنى بىلمىسەم...،-دىدى ساقچى مۆرىسىنى قىسىپ. ئىلاجسىز يەنە ساقچىخانىدىن چىقىپ، كىچىدىن ئۇخلاپ قالغان، مەكتەپنىڭ بەش قەۋەتلىك ياتاق بىناسىنىڭ ئۆگزىسىگە چىقتىم.(ئەمەلىيەتتە ئۆگزىنى مەن ئەتىگەنلا ئاختۇرۇپ قېزىۋەتكەنىدىم) ئۈمىد بىلەن ھەممە يەرگە قارىدىم. كىملىك ھېچ يەردە يوق ئىدى. شۇنىڭ بىلەن مېنى شۇنداق بىر ئۈمىدسىزلىك قاپلىۋالدىكى، ئاستا بىنانىڭ قىرىغا كېلىپ، يىراقلارغا بىر قارىۋەتكەندىن كېيىنم كۆزۈمنى يۇمۇپ ئۆزەمنى پەسكە ئاتتىم. ‹‹گۇپ››!!!!!! بېشىم ئېغىر، ھەممە يېرىم چېقىلىپ كەتكەندەك ئاغرىيتتى.(ئەمەلىيەتتىمۇ چېىلىپ كەتكەن ئىدى) ئۆزەمنىڭ ئۆلگەن ياكى  ئۆلمىگەنلىكى ئېنىقلاپ بېقىش ئۈچۈن كۆزەمنى تەسلىكتە ئاچتىم. كۆزۈمنى ئېچىپ شۇنچىلىك ھەيران قالدىمكى قانغا تولۇپ كەتكەن ئېغىزىمنى ئاچالىغان بولسام، ئېغىزىم چوقۇم كالاچقىلا ئوخشاپ قېلىشى مۇمكىن ئىدى. مېنىڭ پىشانەمدىن بىر كۈن ئايرىلىپ كەتكەن سۆيۈملۈك كىملىكىم كۆز ئالدىمدىلا تۇراتتى. ئەسلى سەن بۇ يەرگە چۈشۈپ لېتىپتىكەنسەندە؟؟....كىملىككە قولۇمنى ئۇزارتتىم. ئەممد قولۇم مېنىڭ بۇيرۇقۇمغا پەقەتلا بوي سۇنمىدى. ئىككىلا قولۇمنىڭ سۆڭىكى ئاللىقاچان گۆشىدىن ئاجراپ نەچچە پارە بولۇپ كەتكەنىدى. بار كۈچۈم بىلەن ئالدىمغا ئۆمىلەپ كىملىكىمنى پىشانەمگە چاپلىماقچى بولدۇم. بەش سانتىمېتىر...تۆت سانتىمېتىر....ئۈچ سانتىمېتىر....ئىككى سانتىمېتىر....غەلىبە كۆز ئالدىمدىلا ئىدى. ئويلىمىغان يەردىن مەكتىپىمىزدە لالمىلىق قىلىپ، قىزلارنى قورقۇتۇپ يۈرىدىغان قارا مۈشۈك ئىتتىك قەسەملىرى بىلەن كەلگىنىچە كىملىكىمنى چىشلىگىنىچە ئالدىرىماي كەينىگە چېكىندى.....لەختە قان ئىچىدە ھاياتتىن ئۈمىد ئۈزۈپ تۇرۇشۇمغا، ئەتراپىمغا بىرمۇنچە ئوقۇغۇچىلار يىغىلىشىپ، مېنى ۋە مۈشۈكنى ئارىغا ئېلىۋالدى. -قاراڭلار بۇ يەردە بىرى ئۆزىنى ئېتىۋاپتۇ.....دەرھال دوختۇرغا تېلىفۇن قىلايلى.....،- ئارىدىن بىر بالا تېلىفۇننى چىقارغاچە كېلىپ يېنىمغا زوڭزايدى... -كىملىكىڭ نەدە؟..... مەن ئېغىزىمنىمۇ ئاچالمايتتىم، قولۇمنىمۇ سۇنالمايتتىم. شۇنىڭ بىلەن بار كۈچۈم بىلەن مۈشۈكنى ئىما قىلىشقا باشلىدىم. ھېلىقى بالا ئاخرى ئۈنسىز ئىمانىڭ مەنىسىگە يەتكەندەك بولۇپ قارىۋىدى. مۈشۈكنى بىر قىز كۆتۈرىۋالغانىدى. بۇ قىز باشقا بىرى  ئەمەس دەل نازى ئىدى. -ۋاي ئەكرەم....ھەممەيلەن سىزدىن بەك ئەنسىرەپ كەتتۇق.،...ئاباي تېخى بىرىر سىزنى مەن دەپ ماڭا تېلىفۇن قىلىپتۇ قاراڭ....،-ئۇ شۇنداق دەپ مۈشۈكنى ئەركىلەتكىنىچە كېتىپ قالدى. مەن كۈلۈمسىرىدىم.... مەن خوشال ئىدىم....چۈنكى ئۆزەمگە بۇ ئالەمدىن خوشلاشماقچى ئىكەنلىكىم مەلۇم بولغانىدى،........ ئەمدى ماڭا كىملىك كېرەك ئەمەس. مايماق ئىجادىيىتى

123456789101112

	ھارماڭ .........راسلام ئۆزگىچە ئىجادىيەت بوپتۇ.................

gultaj

	、ئەمىليەتچىل بۇلۇپتۇ، ھارمىغايسىز.........

nurahmadjan

	ما     فىليەتون    دەل  جايىدا  چىقىپتۇ.

kakkuk11

	بۇ يەردە كىملىكنىڭ بارلىقى ئادەمنىڭ ھايات ياكى ئۈلۈكلىكىدىن مۇھىم. مەنمۇ پورتمالىمدىكى پۇلدىن بەكەرەك كىملىكىمنىڭ يۈتۈپ كېتىشىدىن ئەنسىرەيمەن.. ۋاقىت چىقرىپ ئۈرۈمچىدىن نوپۇسۇمنى ئەكىلۋالمىسام

teztez

	ناھايىتى  ئوبدان يېزىپسىز

barhan1700

	ياخشى يىزىپسىز، كىملىك بولمىسا ئۆز ئۆيگە پاتمايدۇ كىشى.

rixatka

	ھەي مايماق ياخشى يېزىپسىز،قولىڭىزغا دەرت بەرمىسۇن!   لىكىن قاراڭ كېلار قېتىم تېما يوللىغان ۋاختىڭىزدا قاراڭ كىملىك نومۇرىڭىزنى قوشۇپ يوللاسىز ،بومىسا بىز سىزنىڭ راس مايماق مۇ ئەمەسمۇ بۈلمەي قالىمزكەن....

mawlutjan

	سىزگە قايىل بولدۇم .شۇنداق ئىسىل مەزمۇنلار ئىكەن .ئوقۇپ كۈزمگە ياش كەلدى ...تىرىشىڭ