ئەسسالامۇ ئەلەيكۇم مىسرانىم مۇنبىرىدىكى بارلىق قېرىنداشلار،ھەممىڭلارغا مەندىن ئوتلۇق سالام.پەرۋەردىگارىمىز ھەر بىرىڭلارنىڭ تېنىنى سالامەت،ئىشلىرىڭلارنى ئۇتۇقلۇق قىلسۇن.
ھەمدۇسانالار بولسۇنكى،بۈگۈن ئاللاھنىڭ مۇۋەپپەق قىلىشى بىلەن ئۇيغۇر خەتتاتلىقىمىز توغرسىدا ئىككى ئېغىز سۆز قىلماقچى بولۇۋاتىمەن.
مەلۇمكى مەتبەئە كەشىپ قىلىنمىغان دەۋىرلەردە،مەيلى بۇرۇنقى ئەدىب_شائىرلىرىمىزنىڭ تۈرلۈك ئەسەرلىرى بولسۇن،ياكى مۇقەددەس دىنىمىزغا ئائىت خىلمۇخىل كىتابلار بولسۇن. . . ئەيتاۋۇر مۇشۇ يېزىقىمىز ئىشتىلىدىغانلىكى ھەر قانداق ساھە، خەتتاتلىق ۋە خەتتاتلار ئارقىلىق ئۆز زامانىسىدا يۈرۈشۈپ تۇرغان ۋە زاماندىن زامانغا ئۇلىنىپ،داۋام ئېتىلىپ كەلگەن.بۇ گەپلەرنى دەپ ئولتۇرمىساقمۇ،خەتتاتلىقنىڭ ۋە خەتتاتلارنىڭ پارلاق تارىخىي مەدەنىيىتىمىز ۋە تەرەققىياتىمىزغا كۆرسەتكەن تۆھپىسىنىڭ مىسلىسىز ئىكەنلىكى كۆپىنچىمىزگە ئايدىڭ.
ئەمدى ھازىرقى زامانىمىزغا نەزەر سالىدىغان بولساق،بۇ خەتتاتلىق سەنئىتىمىز شۇ قەدەر يۈكسەك ، يۇقرى دەرىجىدىن بىراقلا ئادەمنىڭ نەزىرى چۈشمەيدىغان،كۆپ قىسىم خەلق ئېتىبارسىز قارايدىغان ئەھۋالغا چۈشۈپ قىلىشى،ئادەمنىڭ ئىچىنى ئاچچىق قىلىدۇ .
زامانىۋىي باسمىچىلىق كەشىپ قىلىنىپ،تەرەققى قىلىپ،يۇقرى سەۋىيىگە يەتكەن بۈگۈنكى كۈندە خەتتاتلىق ئۆزىنىڭ مۇھىم ئورنىدىن .ئايرىلدى،ۋە بىراقلا <تۆردىن پەگاغا چۆرىۋىتىلدى>.چۈنكى ئەمدى كىتاب ۋە باشقا ماترىياللارنى يېزىش ۋە كۆپەيتىشتە خەتتاتلىقىمىزغا بۇرۇنقىدەك ئېھتىياج قالمىغان ئىدى.شۇنىڭ بىلەن <سەن ئۆزەڭنىڭ تارىخىي ۋەزىپەڭنى ئورۇنداپ بولدۇڭ،ئەمدى سېنىڭ كېرىكىڭ قالمىدى،يوقال>دېگەن تۇزكورلۇق بىلەن،بۇ بۈيۈك سەنئەتكە بىپەرۋالىق بىلەن مۇئامىلە قىلىنىدىغان بولۇپ قېلىندى. . .
خەتتاتلىق سۆزىمىزنىڭ بېشىدا دىيىلگىنىدەك،ئۆزىنىڭ تارىختىكى بۈيۈك تۆھپىسىسىزمۇ ، زامانىمىزدىكى تۆھپىسى ۋە ئىشلىتىش ئورنى بۇرۇنقىغا سىلىشتۇرغاندا يوق دىيەرلىك بولسىمۇ،لىكىن قەدىلىنىشكە ۋە تەرەققىي قىلدۇرۇشقا تامامەن ھەقلىق.مىسالەن:
ئالدى بىلەن، مۇقەددەس شەرىئىتىمىزدە خەتتاتلىق_باشقا سەنئەتلەرگە (ناخشا،مۇزىكا،ئۇسسۇل،رەسساملىق،فوتوگىرافلىق<جانلىقنىڭ سۈرىتىنى سىزىش ۋە غەيرىي سۈرەتلەرگە چۈشۈش كۆزدە تۇتۇلىدۇ> سېھىرگەرلىك<ئاتالمىش بۇمۇ بىر خىل سەنئەتمىش>)ئوخشاش چەكلەنگەن (ياكى مەلۇم مىقداردا چەك قويۇلغان) بولماستىن ئەكسىچە،ئۇنى ئۆگىنىش ۋە تەرەققىي قىلدۇرۇشقا چاقىرىلغان. مۇقەددەس كىتابىمىزدا خەتتاتلىق،قەلەم،يېزىش خېلى كۆپ يەردە تىلغا ئېلىنغان.(باشقا باھانە تاپمىساقمۇ ، مۇشۇ بىر سەۋەب بىزنىڭ خەتتاتلىقنى ھەر قانداق سەنئەتتىن ئۈستۈن قويۇپ،بېشىمىزدا كۆتۈرۈشىمىزگە تامامەن يېتىپ ئاشىدۇ. )
ئىككىنەنچىدىن،بايا دەپ ئۆتۈلگەندەك ، بىزنىڭ شانلىق تارىخمىزدا،خەتتاتلىق _ ئانا تىلىمىز بىلەن بىرگە بىزدەك بىر ئۇلۇغ مىللەتنىڭ مەۋجۇدىيىتىنى دۇنيا ئەللىرىگە جاكارلاپ كەلگەن. تارىخىمىزنى،مەدەنىيىتىمىزنى ۋەتەققىياتىمىزنى،قىسقىسى مىللىتىمىزنىڭ بارلىقىنى ئانا تىلىمىزسىز تەسەۋۋۇر قىلغىلى بولمىغىنىدەك، خەتتاتلىقمىزسىز،خەتتاتلىرىمىزسىزمۇ تەسەۋۋۇر قىلىش مۇمكىن ئەمەس.بۇ _ ئەجدادلىرىمىز ، ئانا تىلىمىز بىلەن بىرگە بىزگە قالدۇرغان قىممەتلىك مىراسى. بۇنى قەدىرلەش،ۋە كىيىنكى ئەۋلادلارغا يەتكۈزۈش_بىزنىڭ قەرزىمىز. مۇشۇ تەرەپتى ئېيتقاندىمۇ خەتتاتلىقىمىزنى قەدىرلەش مەجبورىيتىمىز بار.
ئۈچنەنچىدىن،ئانا تىلىمىز يوقىلىش خىرىسىغا دۇچ كەلگەنلىكىنى سەزگەندىن بۇيان،بۇنىڭغا جان تىكىپ قارشى تۇرۇش دولقۇنى قوزغالدى.ئانا تىلىمىزنى قوغداش تەرەققى قىلدۇرۇش ۋە دۇنياغا يۈزلەندۈرۈشتە، خەتتاتلىقىمزنى تەرەققى قىلدۇرۇش ئەلۋەتتە مۇھىم ۋە تەخىرسىز مەسىلە بولۇپ قالدى.
خوشاللىنارلىق يېرى يىقىنقى يىللاردىن بۇيان خەتتاتلىقىمىز گۈللىنىش ۋە تەرەققى قىلىش دەۋرىگە قەدەم قويدى. ئىلگىرىكى يىللىرى ئابدۇلھەق ئوشۇرى،نىياز كېرىم شەرقى . . . قاتارلىق بىر قىسىم پېشقەدەم خەتتاتلىرىمىز خەتتاتلىقنى يوقىلىش گىردابىدىن قۇتۇلدۇرىۋالغان بولسا،قۇربانجان روزى شەيدائىي،قاينام جاببار قاتارلىق ئۇستاز خەتتاتلىرىمىز ئىلگىرىكىلەرنىڭ ئۇسلۇبىنى ئۆگىنىش بىلەن بىرگە يەنە يىڭى ئۇسلۇب يارىتىپ،خەتتاتلىقىمزنى بىر قەدەم ئىلگىرلەشكە ئىگە قىلدى.
ھازىر مۇشۇ ئۇستازلارنىڭ كۆڭۈل قويۇپ پەرۋىش قىلىشى ۋە يىتەكچىكى ئاستىدا،يەنە ياسىن كېرىم،ئەرشىدىن راشىد،يۇنۇس قۇددۇس،مۇھەممەدجان ئەبەيدۇللا ...قاتارلىق ياش خەتتاتلار يىتىشىپ چىقىپ،خەتتاتلىقىمزنى تەرەققىي قىلدۇرۇش ۋە خەلقئارا سەۋىيىگەيەتكۈزۈش ئۈچۈن تىنىم تاپماي خىزمەت قىلماقتا.ئەلۋەتتە بىز بۇ ئۇستازلىرىمىزنىڭ تىنىگە سالامەتلىك،ئىشلىرىغا ئۇتۇق،قەلىمىگە بەرىكەت تىلەيمىز.
يىڭىياچى،گۆدەك بىر خەتتاتلىق ھەۋەسكارى بولۇش سۈپىتىم بىلەن قېرىنداشلىرىمىزدىن ئۆتۈنىدىغىنىم،خەتتاتلىقىمزغا كۆڭۈل بۆلۈپ قويايلى.ئانا تىلىمىزنى ساقلاپ قىلىشتا ، ۋە تەرەققىي قىلدۇۇرۇشتا،ھەربىر ئۇيغۇرنىڭ مەسئولىيىتى بار.
ئاخىرىدا سۆزلىرىمنىڭ تېخىمۇ چۈشىنىشلىك بولمىقى ئۈچۈن ، ئۆزۈمنىڭ بىر قانچە پارچە مەشىق ئەسەرلىرىمنى قېرىنداشلارنىڭ ھوزورىغا سۇنماقچىمەن.مۇشۇ گۆدەكلەرچە بىلجىرلاشلىرىمنىڭ ، كەڭ قېرىنداشلىرىمىزنىڭ خەتتاتلىقنى ئاز تولا چۈشىنىشىكەئىگە قىلغان بولسا،ئۆزۈمنى ئالەمچە بەختلىك ھېس قىلغان بولاتتىم.
كامالى ئھتىرام بېرلە:رۇسۇل ئۆمەر قىرانى
يوللىغان ۋاقتى 2013-6-18 10:23:28 AM
.gif)
