|
ئامما نەزەربايېفنىڭ تەختتىن چۈشۈشىنى تەلەپ قىلدى قازاقىستاننىڭ غەربىي جەنۇبىدىكى جاناۋزېن شەھىرىدە قالايمىقانچىلىق يۈز بەردى. نۇرغۇن ئامما ھۆكۈمەت تارماقلىرىغا نارازىلىقىنى ئىپادىلەپ، 20 يىلغا يېقىن ھوقۇق تۇتقان قازاقىستان پرىزدېنتى نەزەربايېفنى ھوقۇقىدىن ئېلىپ تاشلاشنى تەلەپ قىلدى. ھۆكۈمەتنىڭ ئاشكارىلىشىچە، بۇ قېتىمقى قالايمىقانچىلىقتا ئاز دېگەندىمۇ ئون ئادەم قازا قىلغان. قازاقىستاننىڭ غەربىي جەنۇبىغا جايلاشقان جاناۋزېن شەھىرى مۇھىم نېفىت ئىشلەپچىقىرىش رايونى بولۇپ، جۈمە كۈنىدىكى قازاقىستاننىڭ مۇستەقىل بولغانلىقى ۋە روسىيە بىلەن بولغان ئىتتىپاقداشلىق مۇناسىۋىتى تىكلەنگەنلىكىنىڭ 20 يىللىق خاتىرە كۈنىدە، مىڭغا يېقىن ئامما بىلەن ساقچىلار ئوتتۇرىسىدا توقۇنۇش يۈز بېرىپ، قارشىلىق ئاخىرى قۇراللىق ھەرىكەتكە ئايلىنىپ كەتكەن. ئېنىق بولمىغان مەلۇماتلارغا ئاساسلانغاندا، بۇ قېتىمقى قالايمىقانچىلىقتا ئاز دېگەندىمۇ ئون كىشى ئۇرۇپ ئۆلتۈرۈۋېتىلگەن. نېفىت ئىشچىلىرى تاياق-توقماق ۋە كۆيدۈرگۈچ بومبا بىلەن ساقچىلارغا ھۇجۇم قىلغان. ئامما يۇقىرى ئاۋازدا ‹نەزەربايېف تەختتىن چۈشسۇن!› دەپ ۋارقىراشقان، نامايىشچى ئامما كوچا ئاپتوبۇسلىرىغا ئوت قويۇپ كۆيدۈرگەن، روژېستىۋا دەرەخلىرىنى ئۆرۈپ تاشلىغان، كېيىن ساقچى دائىرىلىرىنىڭ ئوق چىقىرىپ تىنجىتىشى بىلەن توپىلاڭ بېسىققان. خەۋەر ئېلان قىلىنغۇچە بولغان ئارىلىقتا، قازاقىستاندا تېلېگرامما ۋە ئالاقىلەر پۈتۈنلەي توختىغان.  روسىيە مۇتەخەسسىسلىرىنىڭ قارىشىچە، نەزەربايېفنىڭ ھوقۇق تۇتقىنىغا 20 يىل بولۇپ قالغان بولۇپ، ئۇ ئۇدا ھوقۇق تۇتۇش ئۈچۈن، ئاساسىي قانۇننى كۆپ قېتىم ئۆزگەرتىپ، ئۆكتىچىلەر پارتىيىسىنى ھەدەپ باسقان. بۇنىڭ بىلەن مەملىكەت ئىچىدىكى سىياسىي ۋەزىيەت ناھايىتى مۇرەككەپلىشىپ كەتكەن. (خالىسە ئەھمەد)
مەنبە.ئوكيان تورى
|
