查看完整版本: [-- قۇرئان ئايەتلىرى يېزىلغان كۆرۈنۈشلەرنى تامغا ئېسىشقا بولامدۇ؟ --]

كەڭ ساي مۇنازىرە مۇنبىرى -> پەندى نەسھەت -> قۇرئان ئايەتلىرى يېزىلغان كۆرۈنۈشلەرنى تامغا ئېسىشقا بولامدۇ؟ [打印本页] 登录 -> 注册 -> 回复主题 -> 发表主题

nida0998 2011-12-04 17:09
                                               بىسمىللەھىرراھمانىرراھيم
 
 
بارلىق ھەمدۇ-سانا جانابى ئاللاھقا بولسۇن، پەيغەمبىرىمىزگە، ئائىلە-تاۋابىئاتىغا ۋە ئۇنىڭغا تاكى قىيامەتكە قەدەر ياخشى ئەگەشكەنلەرگە دۇرۇت-سالاملار بولسۇن .
 
قۇرئان ئايەتلىرىنى شۇنداقلا ئاللاھ تائالانىڭ ئىسىملىرىنى يېزىپ تاملارغا ئېسىش ھازىرقى زامان ئالىملىرى ئوخشاشمىغان قاراشلاردا بولغان مەسىلە بولۇپ، بەزىلەر بۇ ئىشنى مەكروھ دەپ قارايدۇ. يەنە بەزىلەر بىدئەت دەپ قارايدۇ. يەنە بەزىلەر جائىز دەپ قارايدۇ. دېمەك بۇ مەسىلە ئىختىلاپى مەسىلە بولغانلىقى ئۈچۈن بۇ ئىشتا كەڭچىلىك بار .
ئىسلامنىڭ دەسلەپكى دەۋرلىرىدە ئەرەبلەرنىڭ ئاددى-ساددا جەمئىيىتىدە بۇ تۈرلۈك جازىلارنى ئېسىش ئادىتى بولمىغاچقا ئەسرى سائادەتتە ساھابە-كىراملار ھازىرقى زامانىمىزدا كۆرگىنىمىزدەك ئايەتلەرنى تاملارغا ئېسىپ باقمىغان. كېيىنچە رەسىم ياكى بەزى ھۆسنىخەتلەرنى تامغا ئېسىش ئادەتلىرى شەكىللەنگەن.
ھازىرقى ئەمەلىي ئەھۋالغا قارايدىغان بولساق، پۈتۈن دۇنيا مىقياسى بويىچە تاملارغا جازىلاردا رەسىم ياكى ھۆسنىخەتلەرنى ئېسىش ئومۇملاشقان بىر ئادەت. يېقىندىن بۇيان ماشىنىلارغىمۇ ئېسىش ئومۇملىشىۋاتىدۇ .
مەسىلىنىڭ ماھىيتىنى نەزەرگە ئالغىنىمىزدا تامغا ئېسىلغان رەسىم ياكى ھۆسنىخەت مەزمۇنى مەلۇم جەھەتتە بىر ئەلدە ياشاۋاتقان كىشىنىڭ كىملىكى، قىممەت قارىشى، ۋە دۇنيا قارىشى قاتارلىق تەرەپلەرنى، شۇنداقلا دىنىي ھەم ئەدەبىي تەۋەججۇھىنى ۋە كەلگۈسىگە قارىتا ئىنتىلىشىنى ئىپادىلەپ بېرىدىغان رەمزىلەرگە ئايلىنىپ قالدى ۋە شۇ ئاساستا ھەر مىللەت ئۆزىنىڭ ئېتىقادى، تارىخى، ئەنئەنىسىگە ماس نەرسىلەرنى ئاسىدىغان بولدى.
ئەمدى ئالىملارنىڭ بۇ ھەقتە بەرگەن شەرئى جەھەتتىكى قاراشلىرىغا قاراپ باقايلى :
ئۇلارغا بېرىلىدىغان جاۋاب شۇكى، بۇنىڭ ئۈچۈن ئۆي كۆچكەندە ياكى بۇ نەرسىلەرنى يۆتكىگەندە ئۆز لايىقىدا ئورۇندا قويۇپ يۆتكەش، گۇناھ-مەسىيەتلەر بولىدىغان جايلارغا قويماسلىققا دىققەت قىلىش تەبىئىيلا مەسىلىنىڭ مەكروھلۇق ھۆكمىنى ئېلىپ تاشلاپ ئەسلىدىكى مۇباھلىق ھۆكمىنى كۈچكە ئېگە قىلىۋېرىدۇ .
2. بىدئەت دەپ قارىغان ئالىملار: بۇ ئىشنى رەسۇلۇللاھ ساللەللاھۇ ئەلەيھى ۋەسەللەم قىلمىغان، قۇرئان بولسا تاملارغا ئېسىپ قويۇش ئۈچۈن ئەمەس، ئوقۇپ ئەمەل قىلىش ئۈچۈن نازىل قىلىنغان، قۇرئان ئايەتلىرىنى زىبۇ-زىننەت قاتارىدا ئۆي بېزەشكە ئىشلىتىشكە بولمايدۇ، ئايەتلەر ئېسىلغان جايلاردا گۇناھ-مەسىيەتلەر قىلىنىسا، ئاللاھنىڭ ئايەتلىرىنى مەسخىرە قىلغانلىق بولىدۇ، بۇ تۈرلۈك جازىلارنىڭ باھاسى يۇقىرى بولسا، بۇ ئىسراپ دائىرىسىگە كىرىدۇ، دەپ قارايدۇ.
بۇلارغىمۇ ئالدىنقى قاراشتىكىلەرگە بېرىلگەن جاۋابنى بىرىش بىلەن بىرگە قوشۇمچە بېرىلىدىغان جاۋاب شۇكى، پەيغەمبەر دەۋرىدە بولمىغانلىكى ھەر قانداق ئىشنىڭ كىيىنكى دەۋىردە قىلىنىشىنىڭ ھەممىسى مۇتلەق ھالدا مەسىلىنىڭ بىدئەتلىكىنى ئۇقتۇرۇپ بەرمەيدۇ: مىسالغا ئالساق: مەسىلەن پەيغەمبەر سەللاللاھۇ ئەلەيھى ۋەسەللەم بىر كىتاب قىلىپ توپلىمىغان قۇرئاننى ساھابىلەر توپلىغان، پەيغەمبەر سەللاللاھۇ ئەلەيھى ۋەسەللەم يېزىپ قالدۇرمىغان ھەم توپلىمىغان ھەدىسلەرنى ساھابىلەر توپلىغان ۋە يېزىپ قالدۇرغان، جۈمە كۈنى بىرىنچى ئەزاننى ئارتۇق پەيدا قىلغان، بۇلار بىدئەت ھېسابلانمىغان، چۈنكى بۇ ئايرىم بىر ئىبادەت پەيدا قىلغانلىق بولماستىن ئەسلى بار ئىبادەتنى تېخىمۇ جانلاندۇرۇشقا پايدىلىق ئىشلار دەپ قارالغان، ھەمدە بۇ ئىشلار قۇرئاننىڭ زايا بولماسلىقى ۋە ئاۋامنىڭ جۈمەگە ئۈلگۈرەلىشى ئۈچۈن قىلىنغان ۋەسىلە خاراكتىرلىك ئىشلار. ئەگەردە تاملارغا ئايەتلەرنى ئېسىشنى پەيغەمبەر سەللاللاھۇ ئەلەيھى ۋە سەللەم قىلمىغان دەپلا چەكلەيدىغان بولساق، ئۇنداقتا بىر كىتاب قىلىپ جەملەنگەن قۇرئاننى ئوقۇشىمىز، بېسىپ تارقىتىشىمىز، يېنىمىزدا كۆتۈرۈپ مېڭىشىمىزمۇ بىدئەت بولسا بولاتتى، چۈنكى پەيغەمبەر سەللاللاھۇ ئەلەيھى ۋە سەللەم قۇرئاننى ئۇنداق توپلاپ جەملىمىگەن، يېنىدا بىللە ئېلىپ يۈرمىگەن.
 
3. قۇرئان ئايەتلىرىنى شۇنداقلا ئاللاھ تائالانىڭ ئىسىملىرىنى يېزىپ تاملارغا ئېسىش جائىز دەپ قارىغان ئالىملار بۇ ھەقتە چەكلەنگەن بىر ئەھۋال بولمىغاچقا، جائىز دەپ قارايدۇ.
بۇلارنىڭ دەلىلى كۆپ تەرەپلەردىن ئەتراپلىق مۇلاھىزە قىلىپ، مەسىلىنىڭ يۈزەكى تەرىپىگىلا قارىماستىن بەلكى مەسىلىنى ماھىيەتلىك كۈزىتىم ئاساسىدا تەھلىل قىلغان بولۇپ بۇلار تۆۋەندىكىچە:
مەسىلەن پەيغەمبەر ھاياتىغا نەزەر سالىدىغان بولساق، رەسۇلۇللاھ ساللەللاھۇ ئەلەيھى ۋەسەللەم مۇسۇلمانلارنىڭ ئۆزگىچە كۆرۈنۈشىگە ھېرىسمەن ئىدى، تەققى-تۇرقى، تاشقى قىياپىتىدە مۇسۇلمان شەخس باشقا مۇشرىك، بۇتپەرەس ياكى ئاتەشپەرەسلەردىن ئايرىلىپ تۇرۇشىغا ئالاھىدە ئەھمىيەت بېرەتتى. مەسىلەن:
نافىئ ئابدۇللاھ ئىبنى ئۆمەر رەزىيەللاھۇ ئەنھۇمادىن رىۋايەت قىلىدۇكى، رەسۇلۇللاھ ساللەللاھۇ ئەلەيھى ۋەسەللەم: «مۇشرىكلارغا خىلاپ ئىش قىلىڭلار! ساقاللارنى قويۇۋېتىپ، بۇرۇتلارنى چۈشۈرۈۋېتىڭلار» دېگەن.(سەھىھەين: بۇخارى: 5892-ھەدىس. مۇسلىم: 259-ھەدىس) سەھىھى مۇسلىمدا ئەبۇ ھۇرەيرە رەزىيەللاھۇ ئەنھۇدىن كەلگەن بىر رىۋايەتتە: «بۇرۇتلارنى چۈشۈرىۋېتىپ، ساقاللارنى قويۇۋېتىڭلار، مەجۇسىلارغا خىلاپ ئىش قىلىڭلار!» دېگەن.
يەنە: شەدداد ئىبنى ئەۋس رەزىيەللاھۇ ئەنھۇ رىۋايەت قىلىدۇكى، رەسۇلۇللاھ ساللەللاھۇ ئەلەيھى ۋەسەللەم مۇنداق دېگەن: «يەھۇدىيلارغا خىلاپ ئىش قىلىڭلار! چۈنكى ئۇلار كەشلىرىدە ۋە ئۆتۈكلىرىدە ناماز ئوقۇمايدۇ» دېگەن.(ئەبۇ داۋۇد: 652-ھەدىس). ئىبنى ھىببان رىۋايىتىدە: «ناسارالارغىمۇ» دەپ ئارتۇق كەلگەن. بۇ ھەدىسنى ئەبۇ داۋۇد ئاجىز دەپ قارىمىغان. ئىبنى ھىببان سەھىھ دېگەن.
ئابدۇرراھمان ئىبنى ئەۋف رەزىيەللاھۇ ئەنھۇنىڭ ئوغلى ئەبۇ سەلەمە بىلەن سۇلايمان ئىبنى يەسار ئىككىيلەن ئەبۇ ھۇرەيرە رەزىيەللاھۇ ئەنھۇدىن رىۋايەت قىلىدۇكى، رەسۇلۇللاھ ساللەللاھۇ ئەلەيھى ۋەسەللەم: «يەھۇد-ناسارالار (چاچ-ساقاللىرىنى) بويىمايدۇ، سىلەر ئۇلارغا خىلاپ ئىش قىلىڭلار» دېگەن.(سەھىھەين: بۇخارى: 5899-ھەدىس. مۇسلىم: 2103-ھەدىس)
بۇنىڭدىن باشقا: ئاشۇرا روزىسىنى تۇتۇشتا يەھۇدىيلارغا ئوخشاپ قالماسلىق ئۈچۈن بىر كۈن قېتىپ روزا تۇتۇشقا بۇيرۇغان.
ئومۇمەن رەسۇلۇللاھ ساللەللاھۇ ئەلەيھى ۋەسەللەمنىڭ ئىش-ئىزلىرىدا مانا مۇشۇنىڭدەك غەيرى مۇسۇلمانلارغا ئوخشاپ قالماسلىق ئۈچۈن ئىبادەتتە بولسۇن، تەققى-تۇرقى ۋە قىياپەتتە بولسۇن ئۆزگىچە ئىش تۇتقان ئەھۋاللار كۆپ.
 
ئەمدى نۆۋەتتە مۇشۇ قاراشنى تۇتقا قىلغىنىمىزدا بىزنىڭ تەھلىلىمىز تۆۋەندىكىچە:
 ئۈچىنچى قاراشىتىكىلەرنىڭ جاۋابىغا ئاساسەن ئادەتتىكى ئىسلام ئەللىرىگە نىسبەتەن جائىز دېگەن قاراش مۇۋاپىق بولسىمۇ، بىز ئۇيغۇر مۇسۇلمانلىرىغا نىسبەتەن بۇنى مۇستەھەب ھەم پايدىلىق ئىش دېيىشكە بولىدۇ. چۈنكى بىز باشقا مىللەتلەر بىلەن بىللە ياشايمىز، ئۆي بېزەكچىلىكتە، يۈرۈش-تۇرۇشىمىزدا، ھېيت-ئايەملىرىمىزدە شۇنداقلا ئايرىلىپ تۇرۇش مۇمكىن بولغان ھەر ساھەدە بىز ئايرىم، ئۆزگىچە، مۇسۇلمانلارغا خاس ئەنئەنە، پۇراق بىلەن كىملىكىمىزنى ئىپادىلەپ تۇرۇشىمىز لازىم.
شۇنىڭدەك يۇقىرىقىلارغا ئاساسەن قۇرئان ئايەتلىرىنى شۇنداقلا ئاللاھ تائالانىڭ ئىسىملىرىنى يېزىپ تاملارغا ئېسىش بىدئەت ھېسابلانمايدۇ، بۇ ئاللاھنىڭ سۆزىنى ۋە ئىسمىنى ئۇلۇغلاش شۇنداقلا ئەسلىتىش ھېسابلنىدۇ، يەنە بىر تەرەپتىن بۇ ئىسلام تەشۋىقاتى، ئىسلام شوئارى ھەم ئىسلام بەلگىسىدۇر، بۇلۇپمۇ يات مىللەتلەر ئارىسىدا ياشايدىغان مۇسۇلمانلارغا نىسبەتەن ئېيتقاندا ئۆز كىملىكىنىڭ نىشانىسىدۇر.
شۇنداقلا يەنە بۇ ئىسلام بۇيرۇغان ئېنىق بىر كۆرسەتمىگە زىت كەلمەيدۇ، قۇرئان ئايەتلىرىنى قەغەزگە بولسۇن ياكى ئۇنىڭدىن باشقا تام ۋە باشقا نەرسىلەرگە بولسۇن ئومۇمەن يېزىش، ئوقۇش ۋە ئەسلىتىش بۇيرۇلغان ئىش، ئىسلام روھىغا زىت كەلمەيدىكەن، ئەكسىچە ئىسلام بۇيرۇقىغا مۇۋاپىق كېلىدىكەن بۇ بىدئەت ھېسابلانمايدۇ، ساھابىلارمۇ شۇنداق چۈشىنىپ ئىش قىلغان.
دېمەك ئايەتلەرنى ئائىلىلەرگە ئېسىش قاتارلىق بۇ تۈرلۈك ئىشلاردا مۇسۇلمانلارنىڭ مەنپەئىتى كۆزدە تۇتىلىدىغان بولۇپ، ئۇنىڭ ئۈستىگە تاملارغا ئايەت ئېسىش ئىشلىرى دىنى ماھىيەتتىن ئىشىپ ئادەت دائىرىسىگە كىرىدۇ، ئۇنداق بولىدىكەن بۇنى بىدئەت دېيىشكە بولمايدۇ.
قۇرئاننى ئېسىشنى بىدئەت دەپ چەكلىسەك تاملارغا غەيرى مۇسۇلمانلارنىڭ نەرسىلىرىنىڭ ئورنىنى ئىگىلەيدىغانلىقى ئېنىق، شۇنداقلا ئۆيلىرىمىز ياتلارنىڭ ئۆيلىرىدىن، ئىشخانىلىرىمىز ياتلارنىڭ ئىشخانىلىرىدىن، دۇكانلىرىمىز ياتلارنىڭ دۇكانلىرىدىن پەرقلەنمەيدۇ، بۇنداق قىلغاندا بىز مۇسۇلمانلارنىڭ ئۆزگىچە خاراكتىرى يوقۇلۇپ كىملىكى يوق تەمسىز، پۇراقسىز مىللەتكە ئايلىنىپ قالىمىز، پەرزەنتلىرىمىزمۇ قۇرئان ئايەتلىرىنى كۆرۈپ چوڭ بولمايدۇ، تونۇمايدىغان بولىدۇ، چوڭ بولغاندا قۇرئان ئايىتىنى بىر يەردە كۆرسە ياكى قۇرئاننىڭ ئۆزىنى كۆرسە بۇ باشقا بىر مىللەتنىڭ ئادەتتىكى بىر كىتابى ئوخشايدۇ، دەپ چۈشىنىدىغان بولىدۇ.
قۇرئان ئېسىش، قۇرئاننى بايراقلارغا ۋە بەزى شۇئار خاراكتىرلىك لەۋھە قاتارلىق نەرسىلەرگە يېزىش ئىسلام ئەنئەنىسى، مۇسۇلمانلىقنىڭ بەلگىسى ۋە شوئارى، شۇڭا يات مىللەتلەر ئارىسىدا ياشايدىغان مۇسۇلمانلار ئۆزىگە تەۋە نەرسىلەردە داۋاملىق قۇرئان ۋە ئىسلام ئالامەتلىرىنى ئىزھار قىلىپ باشقىلاردىن ئايرىم تۇرۇشى لازىم، خەلىپىلەرمۇ دەسلەپ قىلىپ تىللا ۋە تەڭگە سوقتۇرغاندا تىللاغا سۈرە ئىخلاس ۋە كەلىمەتى شاھادەتنى يازدۇرغان. بەزى خەلىپىلەرنىڭ ئۈزۈكلىرىگە، مۆھۈر-تامغىلىرىغا ئايەتلەر يېزىلغان ئىدى، ھالبۇكى بۇ پەيغەمبەر سەللاللاھۇ ئەلەيھى ۋەسەللەم ئەينەن قىلمىغان ئىش ئىدى، لېكىن باشقا دۆلەتلەرنىڭ سوقتۇرغان پۇللىرى ئالدىدا ئىسلام دۆلىتىنىڭ پۇلى ئايرىم ئىسلام پۇرىقى بىلەن ئالاھىدە تۇرۇشى ئۈچۈن ئۇلار پەيغەمبەر سەللاللاھۇ ئەلەيھى ۋەسەللەم قىلمىغان ئىشنى قىلغان، بۇنى بىدئەت دەپ قارىمىغان، مۇسۇلمانلارنىڭ مۇشرىك ۋە كاپىرلاردىن يۈرۈش-تۇرۇش ۋە شەكىل-قىياپەتتە، ئولتۇرۇپ-قوپۇشتا، ئۆي تۇتۇش ۋە بېزەشتە، شۇنداقلا بارلىق ئىشلىرىدا ئۆزگىچە ۋە ئايرىم بولۇشى مۇسۇلمانلار كىملىكىنىڭ مەۋجۇت بولۇپ تۇرۇشى ئۈچۈن ئىنتايىن زۆرۈر.
ئەلۋەتتە قۇرئاننى خارلايدىغان شەكىلدە ئېسىشقا، دەسسىلىدىغان گىلەم ۋە پالاسلارغا يېزىپ ئۆيلەرگە سېلىشقا، ياستۇق، يوتقان-كۆرپىلەرگە يېزىشقا بولمايدۇ، چۈنكى بۇ قۇرئاننى ھاقارەتلەشكە ئېلىپ بارىدۇ، بۇنداق ئەھۋالنىڭ شەكسىز چەكلىنىدىغانلىقى ھەققىدەك ھېچكىم ئىختىلاپ قىلمايدۇ.
شۇڭا بۇ نۇقتىدىن تەكىتلەيدىغىنىمىز شۇكى، مۇسۇلمانلارنىڭ كىملىكىنى ۋە ئۆزگىچىلىكىنى ساقلاپ قېلىشقا پايدىسى بولىدىغان ئادەت ئىشلار بىدئەت بولماي بەلكى مۇستەھەب بولىدۇ، ھەر بىر ئىشقا بىدئەت دەپ ھۆكۈم چىقىرىشقا ئالدىرايدىغانلار مانا مۇشۇنداق ئەھۋاللاردا ئەتراپلىق ئىزدىنىپ قارار چىقىرىشى، ئىبادەت بىلەن ئادەتنى ئايرىشى، نەزەرىيەگىلا قارىماي، ئەتراپقا، ياشاۋاتقان مۇھىتقا، مۇسۇلمانلار دۇچ كېلىۋاتقان خىرىسلارغا، مۇسۇلمانلارنىڭ كىملىكىنى ساقلاپ قېلىش زۆرۈرلىكى قاتارلىقلارنىمۇ كۆزدە تۇتۇشى لازىم، چۈنكى پەتىۋا بىرىشتە ياشاۋاتقان مۇھىتنى چىقىش قىلىش پەتىۋا چىقىرىشنىڭ ئاساسلىق شەرتلىرىدىن بىرىدۇر.
ۋەللاھۇ ئەئلەم.
  
پەتىۋادا: دوكتور ئابدۇل ئەزىز رەھمەتۇللاھ.
2011-12-3

            مەنبە:ساجىيە ئىسلام بىلىملىرى تورى

alkan 2011-12-04 17:41
ناھايىتىمۇ ئېسىل تېما بوپتۇ! بەزىلەر نېمە ئۈچۈن ئاسقانلىقىنى بىلمەيلا ئاسىدۇ تېخى!
مەسچىت تاملىرىدىمۇ بۇ خىل ئاسقۇلار ئېسىپ قويۇلىدۇ، مۇسۇلمانلارمۇ ئۆزىنىڭ مۇسۇلمانلىقىنى ئىسپاتلاش شۇنداقلا ئىمانىنى كۈچلەندۈرۈش ئۈچۈن مېھمانخانا ۋە ناماز ئوقۇيدىغان ئۆيلىرىگە ئېسىپ قويىشىدۇ!
ماشىنىلارغا ئېسىشقا كەلسەك، بەزىلەر كۆز-كۆز قىلىش ئۈچۈن بەزىلەر شەھۋەتپەرەسلىك ئۈچۈن ئاسامدىكىن دەيمەن!

تاھىربەگ 2011-12-04 17:48
ئاللاھ رەھمەت قىلسۇن دوكتۇرغا...  ھەقىقەتەن ئىسىل كىشىدە.

بەگزات 2011-12-04 17:49
شەھۋەتپەرەس ئەمەس ، شۆھرەتپەرەس دەڭ !    بولمىسا سۆزىڭىزگە ماس كەلمەيدۇ .

بەگزات 2011-12-04 17:57
ئەمەلىيەتتە ھەر بىر ئىشىمىزنىڭ بىر ھۆكۈمى بار ئىكەن . ئەمما ئوخشىمىغان كۆز قاراشلار تۈپەيلى مۇسۇلمانلار ئۆز - ئارا توقۇنۇش پەيدا قىلىۋاتىدۇ ، ھەم بۇنى كۆرگەن كاپىرلار ، ئۇلارنىڭ ئوتتۇرىسىدا ئۇرۇش كاتالىزاتورى بولىۋاتىدۇ . مۇسۇلمانلار ئارىسىدىكى مەزھەپلەر توقۇنۇشى كاللامدىن پەقەتلا ئۆتمەيدۇ .

kaysarjan 2011-12-04 18:25
.اللا رەخمەت قسون

uygar 2011-12-04 19:22
    مېنىڭچە ئېسىش كېرەك بولۇپمۇ ئۇيغۇرلار ھەممە يەرگە ئېسىپ قويسىمۇ ئازلىق قىلىدۇ .
   شۇ تامغا ئېسىلغان ئايەتلەرنى كۆرگەندە قاندا ھېسياتتا بولىسىز ،قايسى ئىشلارنى ئۇنتۇپ قالغانلىقىڭىزنى ئويلامسىز -يوق؟يۇقارقى قاراشلار بۈگۈنكى دەۋىردە قانچىلىك ئەھمىيەتكە ئىگە ئىكەنلىگىنى تورداشلار ئۆزلىرى بىلىۋالسا بولىدۇ .

ئابدۇنۇر 2011-12-04 20:01
ئەسسالامۇ ئەلەيكۇم ئۇستاز:
بەزى يەرلەردە بۇرادەرلەر ھاراق ئىچىلىدىغان ماگزىنلاردىمۇ قۇرئان ئايەتلىرى ئېسىلغان نەرسىلەرنى كۆرگەنلىكىنى شىكايەت قىلىشقانىدى . بۇ  پەتىۋا بىلەن  ھازىرقى خاتا يول  ۋە بىدئەت ئاسان تارايدىغان جەمىئىتىمىزدە - قۇرئان خارلىقىغا چوڭ بىر ئىشىك ئېچىلمىسىلا بولاتتىغۇ ئۇستاز!
قۇرئاننى يېزىپ تاملارغا ئېسىۋالىدىغان تەقۋادارلار زادى قانچىلىك دەيسىز ھازىر؟ جەمىئىتىمىزدە بىز كۆرىۋاتقان ھالەت شۇكى - تامغا ئاسقانلارنىڭ كۆپىنچىسى نامازسىز ، پاسىق ۋە گەپ سۆزلىرىدە ئۆزىنى زىيالى ھىسابلاپ ، ئېغىر خاتا ۋە مۇدھىش گەپلەرنى تولا قىلىدىغانلار ئىدى. ئۇلارنىڭ بىر قىسمى نامازسىزلىقى ۋە ئەمەلسىزلىقىدىن كېلىپ چىقىۋاتقان روھى قورقۇنچنى مۇشۇنداق ئايەتلەرنى تاملارغا ئېسىش ئارقىلىق بېسىپ ، ئۆزىگە تەسەللى بېرىپ كېلىۋاتاتتى. چۈنكى ئۇلارنىڭ كۆپ قىسمى قۇرئان ئايەتلىرىنى ئېسىشنىڭ ئۆز ئۆيىگە بەرىكەت ،پۇل .مال دۇنيا ،ساقلىق ئېلىپ كېلىدىغانلىقىدىن ھېچ گۇمانلانمايدۇ. ئەپسۇس ....
بىر قىسمى بولسا بىدئەتلەرگە چىلانغان ھالەتتە يۈرىۋاتقان ،يەنە بىر قىسمى بولسا ، خۇددى بىز ۋە بۇرادەرلەر كۆرگەندەك ھاراق سورۇنلىرىغا ،رېستۇرانلارغا ئېسىۋاتقان ئىدى . ۋا دەرىخ ....
ئۇنىڭ ئۈستىگە بۇ ئايەتلەرنى بىزگە يېزىپ سېتىۋاتقانلارچۇ ؟ ئاڭلىشىمىزچە ئۇلارنىڭ بىر قىسمى  ئىماندىن يىراق تائىپە ئىكەن . ئۇلار پۇل تېپىش ئۈچۈن بىزگە ھەرخىل نۇسخىلاردا ،رەڭگارەڭ پوسۇندا ،ھەرخىل مەدەنىيەت تۈسىدە بېسىپ بېرىۋاتىدۇ . بېسىلىش جەريانىدا ۋە ئېسىلىش ،يۆتكىلىش جەريانىدا ئۇلۇغ ئاللاھنىڭ مۇشۇ ئايەتلىرى قانچىلىك ھۆرمەتلىنەر؟
ئەشۇ بۈيۈك كەلىمىلەر تۇرمۇش مەشىئەتلىرىمىزگە رەڭگارەڭ بېزىلىپ ،كۆز پەردىللىرمىزگە ئادەتتىكى خەت بوپ كۆرۈنۈپ قېلىۋاتقان  بولغاچقا دىللىرىمىزگە تەسىر قىلماس بولۇپ كەتمەكتە....
كىشىلەر سىز دېگەن بۇ پەتىۋانى بىلگەن ۋە كاتتا خاتىرجەم بولغان ھالدا ئۆزئارا يەتكۈزگەن بىلەن - ئەمما خارلانماسلىق ، خارلىماسلىق شەرتىنى قانچىلىك بىلەر؟ ئۇلار بۇ شەرتنىڭ تەقەززاسى ۋە مۇھىملىقىنى ئويلىيالارمۇ ياكى شۇنىڭغا پەرۋا قىلارمۇ؟ مېنىڭچە بۇ قەۋمدە پەرۋا قىلىدىغانلاردىن پەرۋاسىزلا ركۆپتەك ...چۈنكى شەخسەن ئۆزۈم كۆرگەن بارلىق ئەھۋاللار بۇنى ئىسپاتلاپ تۇرۇپتۇ. يېقىندا ئاتۇشقا بارغىنىمدا  قايسى يەردىندۇر يۆتكەلگەن  تامغا ئاسىدىغان ئايەتلەرنىڭ سۇغا چىلانغان ، داتلاشقان ،سېسىغان ،خارلانغان ھالەتتە كۆرۈپ تولىمۇ ئېچىندىم .
ئاسىدىغان نەرسىلەر ھامان كونىرايدۇ ، سەتلىشىدۇ ،داتلىشىدۇ ،توپا باسىدۇ - ئاخىرىدا ئەخلەتخانىغا بارماي قالامدۇ؟
ئۇيغۇردا زادى قانچىلىك ئادەم قۇرئان ئايەتلىرىنى كۆيدۈرۈش ياكى سۇدا ئېقىتىش بىلەن جائىز بولىدىغانلىقىنى بىلسۇن؟

ئۇستاز ،پەتىۋايىڭىزدىكى چىقىش نۇقتىڭىزنى چۈشۈنۈپ تۇرۇپتىمەن .ئەمما بۇ نۇقتا نەزىرىمدە قىلچە ئەتراپلىق ئويلانمىغان ،بىر تەرەپلىمە بولۇپ قاپتۇ .
چۈنكى تاماكىنى ۋە ھاراقنى ئۆلگىچە ئىچىدىغان  مەن كىرىپ قېلىۋاتقان ئۆيلەرنىڭ ھەممىسىدە دېگۈدەك مۇشۇ ئۇلۇغ قۇرئان ئايەتلىرىمىزنى كۆرۈپ تۇرىۋاتىمەن. ئەجەبا بۇنىڭ ھېچقىسى يوقمۇ؟  
قۇرئاندا مۇنداق دېيىلگەن ،پەيغەمبەر سەللاللاھۇ ئەلەيھى ۋەسەللەم مۇنداق دېگەن -- دېيىشىمىزگىلا ئۇ غۇ شۇنداق ،لېكىن...ھازىر....دەپ گەپ باشلايدىغان نادان كىشىلەرنىڭ ھەممىسىدە دېگۈدەك مۇشۇ قۇرئان ئايەتلىرىنىڭ ئېسىلغان ھالىتىنى كۆرۈپ تۇرۇپتىمەن.
سىزگە سوئال:
مۇسۇلمانلىق كىملىكىمىز - ئۆينى ئايەت قۇرئان بىلەن زىننەتلەش ئارقىلىق ساقلىنىپ قالارمۇ ياكى ئايەت ۋە قۇرئاننى قەلبگە زىننەتلەش بىلەن ساقلىنىپ قالامدۇ؟
بۇنداق دېسەم ،پەيغەمبەر سەللاللاھۇ ئەلەيھى ۋەسەللەمنىڭ ئاۋۇ ھەدىسلىرنى دەلىل كەلتۈرمەڭ ، بىز ھازىر پەيغەمبەر سەللاللاھۇ ئەلەيھى ۋەسەللەم قىپ باقمىغان نەرسە ھەققىدە ،دەپ باقمىغان نەرسە ھەققىدە پاراڭلىشىۋاتىمىز...
ئەگەر مەسىللەرگە ھەدىسلەرنىڭ ئۇدۇل بۇيرۇقى بىلەن ئەمەس بەلكى مۇشۇنداق زورۇقتۇرغان روھى بىلەن قارايدىغان بولساق ،نۇرغۇن نادۇرۇس ئىشلارنى دۇرۇس قىلىۋەتكىلى بولىدىغان ھەدىسلەر كۆپ ئىدىغۇ؟ بۇ ھەم سىزنىڭ پەتىۋالىرىڭىز ئىچىدىنمۇ چىقىشى مۈمكىنغۇ؟
====
ئەلۋەتتە قۇرئاننى خارلايدىغان شەكىلدە ئېسىشقا، دەسسىلىدىغان گىلەم ۋە پالاسلارغا يېزىپ ئۆيلەرگە سېلىشقا، ياستۇق، يوتقان-كۆرپىلەرگە يېزىشقا بولمايدۇ، چۈنكى بۇ قۇرئاننى ھاقارەتلەشكە ئېلىپ بارىدۇ، بۇنداق ئەھۋالنىڭ شەكسىز چەكلىنىدىغانلىقى ھەققىدەك ھېچكىم ئىختىلاپ قىلمايدۇ
-====
سىزنىڭ بۇ پەتىۋايىڭىزدىن راۋاجلانغان ئادەتنىڭ تەرەققىياتى - سىز بولمايدۇ دېگەن مۇشۇ ھاقارەتلىك ئادەتلەرنىڭ بارلىققا كېلىشىگە سەۋەب بولماسمۇ؟  ئۇيغۇردا گىلەملەر تاملارغىمۇ ئېىسىلىدىغۇ؟....تاملارغا ئېسىلغان گىلەم تۆۋەنگىمۇ چۈشۈپ قالىدىغۇ؟...قەدىمدىن تارتىپ ئۆز ئۆزىگە زۇلۇم قىلغۇچى ئىنسان بولمىش بىزلەر ئازراقلا يوچۇق تاپساق - ئېزىپ ،ئۆزگەرتىپ كېلىۋاتمامدۇق؟

ئۇستاز ، بۇ پەتىۋايىڭىزنى  ئۇيغۇر جەمىئىتىدە ياشاۋاتقان ۋە مۇشۇ جەمئىەتنى خېلى ئەتراپلىق تەتقىق قىلغان ۋە ئۇيغۇر كىشىللىرمىزنىڭ پىسخىكىسى ھەققدە توختىماي ئويلىنىپ تۇرىدىغان پېقىرنىڭ قەلبىدىكى ئىمانى ھېچ كۆتۈرمىدى.
مۇسۇلمان كىملىكىمىز - تەقۋالىقىمىز ، ئىمانىمىز جاسارىتىمىز بىلەن ساقلىنىپ قالىدۇ .  تاشقى زىننەتلەر بىلەن ، دۇنيا ماتالىرى بىلەن گول بولۇش - باشقا تائىپىلەرنىڭ پەخىرلىنىدىغان ئىشى ئىدى...
خەير گېپىم مۇشۇ يەردە قالسۇن .
ئەلۋەتتە، سىز ئىلىم ئەھلىسىز، ئەمما بىر مۆئمىن بولۇش سۈپىتىم بىلەن سىزنى ئاگاھلاندۇرۇپ قويۇش مەجبۇرىيىتىم بار !
ئاللاھ ،ھەممىمىزنى بۇ دۇنيادىمۇ ،ئاخىرەتتىمۇ ئامان قىلسۇن ،ئامىن！

رەسسام 2011-12-04 20:48
ئىشلىتىش
بۇ مەزمۇن 7قەۋەتتىكى ئابدۇنۇر نىڭ 2011-12-04 20:01 يوللىغان يازمىسىغا نەقىل : 

ئۇنىڭ ئۈستىگە بۇ ئايەتلەرنى بىزگە يېزىپ سېتىۋاتقانلارچۇ ؟ ئاڭلىشىمىزچە ئۇلارنىڭ بىر قىسمى  ئىماندىن يىراق تائىپە ئىكەن . ئۇلار پۇل تېپىش ئۈچۈن بىزگە ھەرخىل نۇسخىلاردا ،رەڭگارەڭ پوسۇندا ،ھەرخىل مەدەنىيەت تۈسىدە بېسىپ بېرىۋاتىدۇ . بېسىلىش جەريانىدا ۋە ئېسىلىش ،يۆتكىلىش جەريانىدا ئۇلۇغ ئاللاھنىڭ مۇشۇ ئايەتلىرى قانچىلىك ھۆرمەتلىنەر؟
.......

---بەكمۇ ئۇرۇنلوق ،قايىل قىلارلىق ئىنكاس بۇپتۇ ،،ھەشقاللا،،،~~~~

ilim 2011-12-04 21:34
دۇكتۇر بۇ قېتىم بەكلا يىنىكلىك قىلىپتۇ. شىنجاڭ دىيارىدىكى مۇسۇلمانلارنىڭ ئەھۋالىدىن خەۋەرسىز قاپتۇ.....

sad~da 2011-12-04 21:37
ئۆز بېشىمدىن ئۆتكەن ئىككىم  ۋەقە
1- ئالدىنقى يىلى كۆرلىدىكى ۋاختىمدا بىردانە كىيىم مودىلى لازىم بۇلۇپ قېلىپ خۇلىڭغا بىرىپ  بىر خەنزۇنىڭ  دۇكانىغا كىرسەم پۇل ئالدىغان گۈتۈينىڭ بىر يېنغا بىر بۇتنىڭ رەسمىنى يانا بىر يېىنغا تېگى قارا خىتى سېرىق شاھادەت كەلىمىسنى ئېسىۋاپتۇ خەنزۇچىنى بىلمىگەچكە ئۇنۇڭ بىلەن جىق پاراڭلاشماي ئازراق ماددى مەنپەئەتنى دەپ ئاللاھنىڭ كالامىنى ساتقان بىرتۈركۈم كىشلەرگە ئاچچىغىم كىلىپ يېنىپ چىقتىم  
2يېقىندا دۇكاندا ئولتۇرسام بىر كىچىك بالا بىر يېىندا ئاللاھ يانا بىر يېىندا پەيغەمبىرىمنىڭ ئىسمى يېزىلغان گىلاپكىنى يەردە دىگىلتىپ ئوينىغىلى تۇرۇپتۇ  ئۇبالنىڭ قۇلدىن  ئېلۋىلىپ ئانسىغا ئازراق تەربىيە قىلىپ قۇلغا تۇتقۇزۇپ قويغان ئىدىم

ئابدۇنۇر 2011-12-04 23:35
ئەسسالامۇ ئەلەيكۇم قېرىنداشلار !
تاملارغا ئايەت يېزىلغان رامكا-جازىلارنى ئېسىشنىڭ ھۆكمى؟
مۇپتى : پەزىلەتلىك شەيخ مۇھەممەد سالىھ ئەلمۇنەججىد
تەرجىمە قىلغۈچى : سەيپىددىن ئەبۇ ئابدۇلئەزىز
تەكشۈرۈپ بېكىتكۈچى : ن.تەمكىنى
254-نومۇرلۇق سوئال سوئال: بەزى مۇسۇلمانلارنىڭ ئۆيلىرىنى زىيارەت قىلغان ۋاقتىمدا تاملىرىغا قۇرئان ئايەتلىرى ۋە ئاللاھنىڭ ئېسىم-سۈپەتلىرى ياكى باشقا دۇئا-زىكىرلار يېزىلغان رامكا-جازىلارنى ئېسىۋالغانلىقىنى كۆردۈم؟، بۇنداق قىلىشنىڭ شەرىئەتتە دەلىلى بارمۇ؟.
جاۋاپ: بارلىق گۈزەل ماختاشلار ئالەملەرنىڭ پەرۋەردىگارى بولغان ئاللاھغا خاستۇر. قۇرئان ئايەتلىرى يېزىلغان رامكا-جازىلارنى ئۆينىڭ، تىجارەت ئورۇنلىرىنىڭ، مەكتەپلەر ۋە كۇلۇپلارنىڭ تاملىرىغا ئېسىپ قويۇش بىرقانچە تەرەپتىن شەرىئەت چەكلىگەن مۇنكەر ئىشلاردىن ھېسابلىنىدۇ:
1- كۆپىنچە ھالدا قۇرئان ئايەتلىرى ۋە زىكىر-دۇئالار بىلەن چىرايلىق نەقىشلەنگەن رامكا-جازىلارنى تاملارغا ئېسىش زىننەت ئۈچۈن بولىدۇ. بۇ قۇرئان كەرىمنىڭ تىلاۋەت قىلىنىش، تەدەببۇر قىلىش ۋە كىشىلەرگە ھىدايەت، ۋەز-نەسىھەت قىلىشتىن ئىبارەت ئالى مەقسىتىگە توغرا كەلمەيدۇ. قۇرئان كەرىم ئەسلىدە تاملارنى زىننەتلەش ئۈچۈن چۈشۈرۈلمىگەن بەلكى كىشىلەرنى توغرا يولغا ھىدايەت قىلىش ئۈچۈن نازىل قىلىنغان.
2-بەزى كىشىلەر بۇنىڭغا ئوخشاش رامكا-جازىلارنى بەرىكەت تەلەپ قىلىش مەقسىتىدە ئاسىدۇ. بۇ بىدئەت ئىشلاردىن ھېسابلىنىدۇ. بەرىكەت تەلەپ قىلىش، قۇرئان ئايەتلىرىنى چىرايلىق ھۆسنىخەتلەر بىلەن يېزىپ تاملارغا ئېسىپ قويۇش بىلەن بولماستىن، بەلكى قۇرئان كەرىمنى تىلاۋەت قىلىش، ئۇنىڭدىكى ھېكمەتلەرنى تەپەككۇر قىلىش بىلەن بولىدۇ.
3- بۇنداق قىلىش پەيغەمبەر ئەلەيھىسسالام، توغرا يول تۇتقۇچى خەلىپىلەر ئاللاھ رازى بولغان ساھابىلارنىڭ پرىنسىپلىرىغا ئۇيغۇن كەلمەيدۇ. چۈنكى ئۇلارنىڭ ھېچبىرى بۇنداق ئىشلارنى قىلمىغان. ئۇلارغا ئەگىشىش دىندا بىدئەت پەيدا قىلىش بىلەن بولماستىن، بەلكى  ياخشىلىقتا ئۇلارنى ئۆرنەك قىلىش بىلەن روياپقا چىقىدۇ. تارىخى ماتىرياللاردىمۇ قۇرئان كەرىم ئايەتلىرىنى نەقىشلىك رامكا-جازىلارغا ئېلىپ زىننەتلەپ ئۆينىڭ ۋە مەسچىتنىڭ تاملىرىغا ئېسىپ قويۇش تۈركىيە ۋە ئەندەلۇس دۆلەتلىرىدە مۇسۇلمانلار ئاجىزلىشىپ دىنى ئەقىدىسى سۇسلاشقاندا پەيدا بولغان ئىشلاردىن ئىبارەت دېيىلگەن.
4-ئايەتلەر بىلەن زىننەتلەنگەن جازىلارنى ئېسىش شېرىككە ئىلىپ بارىدىغان ۋەسىلىلەرنىڭ بىرى ھېسابلىنىدۇ، چۈنكى بۇنى تامغا ئاسقان كىشىلەر بۇ ئايەتلەرنىڭ سەۋەبىدىن ئائىلىمىز ھەر تۈرلۈك خېيىم-خەتەر، مۇسىبەتتىن ساقلىنىپ قالىدۇ دەپ قارايدۇ، بۇ شېركى قاراش ھېسابلىنىدۇ. ھەقىقى ھىمايە قىلغۇچى ئاللاھ تائالادۇر. ئاللاھنىڭ ھىمايىسىگە ئېرىشىشنىڭ سەۋەبلىرىدىن؛ قۇرئان تىلاۋەت قىلىش ۋە شەرىئەتتە كۆرسىتىلگەن زىكىر-دۇئالارنى ئىخلاس-ئىشەنچىدە ئوقۇش بىلەن ۋۇجۇتقا چىقىدۇ.
5-تۈرلۈك جازا ۋە رامكىلارغا ئايەت يېزىشنى تىجارەت شەكلىگە كىرگۈزۈپ، كۆپلەپ پايدا ئېلىشنى مەقسەت قىلىدۇ. قۇرئان ئايەتلىرىنى تىجارەت شەكلىگە ئايلاندۇرۇش مۇسۇلمانغا لايىق ئىش ئەمەس. بەلكى بۇ شەكىلدىكى رامكا-جازىلارنى سېتىۋېلىش مالنى ئىسراپ قىلىشتىن ئىبارەتتۇر.
6- بۇ شەكىلدىكى رامكا-جازىلارنىڭ تولىسى ئالتۇندىن ھەل بىرىلگەن بولۇپ، بۇنى تامغا ئېسىپ قويۇش ھارام بولىدۇ.
7- بەزى جازىلارنىڭ خەتلىرى يۆگىمەچ ھۆسنخەت شەكلىدە يېزىلغان بولۇپ، بۇ شەكىلدىكى خەتلەرنى ئوقۇش قېيىن بولغاچقا، ھېچقانداق مەنپەئەتى بولمايدۇ. بەلكى بەزىلىرى قۇشلارنىڭ ياكى سەجدە قىلىپ تۇرغان كىشىلەرنىڭ سۈرىتى شەكلىدە يېزىلغان بولۇپ، بۇنداق قىلغانلىق ئايەت بىلەن ئويناشقانلىق ھەم چەكلەنگەن سۈرەتلەرنى ئاسقانلىق ھېسابلىنىدۇ.
8-بۇنداق قىلىش قۇرئان كەرىم ئايەتلىرىنى تۆۋەن كۆرۈپ خارلىغانلىقتىن ئىبارەت، بولۇپمۇ ئۆيدىن ئۆيگە يۆتكەلگەندە ياكى تاملارنى يېڭىدىن بويىغاندا، بۇ ئايەتلەر پۈتۈلگەن جازىلار باشقا ئۆي جاھازىلىرىغا ئارلىشىپ قالايمىقان تاشلىنىدۇ ياكى ئۇنىڭ ئۈستىگە باشقا نەرسىلەر قويۇلىدۇ.
9-بەزى دىنى چۈشەنچىسى تۆۋەن كىشىلەر ئۆزلىرىنىڭ بۇ ئىشلىرىنى دىنى شۇئارلارنى تۇرغۇزغانلىق دەپ ئويلايدۇ، ئەمەلىيەتتە بۇ ئۇلارنىڭ ھېچقانداق بىر دىنى  مەسئۇلىيەتنى ئادا قىلغانلىقىنى ئىپادىلىمەيدۇ.
10-بەزى مۇلازىمەت ئورۇنلىرىدا چاي چەينىكى ياكى پىيالە قاتارلىق ئىستىمال بۇيۇملىرىغا ئاللاھنىڭ ئىسىم-سۈپەتلىرى، سەللەللاھۇ ئەلەيھى ۋەسەللەم دېگەنگە ئوخشىغان ئۇلۇغ سۆزلۈكلەر يېزىلغان بولۇپ، بۇنداق قىلىش ئاللاھ ۋە ئاللاھنىڭ رەسۇلىغا ئېھتىرامسىزلىق قىلغانلىق بولىدۇ. ئۇ كىشىلەرنىڭ ئاللاھتىن قورقۇشى، ئاللاھ ۋە ئاللاھنىڭ رەسۇلىنى ياخشى كۆرسە بۇ يولسىز ئۇسۇل بىلەن ئەمەس، بەلكى قۇرئان ۋە سۈننەتكە ھەقىقى رەۋىش بىلەن ئەگىشىش ئارقىلىق سۆيگۈسىنى ئىپادىلىشى تەۋسىيە قىلىنىدۇ.
گەپنىڭ خۇلاسىسى: بۇنىڭغا ئوخشاش ئىشلاردىن يىراق بولۇپ، ئاللاھ ۋە ئاللاھنىڭ رەسۇلى رازى بولغان، پەيغەمبەر ئەلەيھىسسالام:  ئۇلار ئەقىدە، ئەدەپ-ئەخلاقتا، دىننى چۈشىنىشتە باشقىلارغا ئۈلگە بولىدۇ دەپ گۇۋاھلىق بەرگەن كىشىلەرنىڭ يولىغا ئەگىشىش لازىم. بەزىلەر بىز بۇنى زىننەتلەش ياكى ئىسراپ قىلىش ياكى كەمسىتىش ئۈچۈن ئەمەس بەلكى كىشىلەر توپلانغاندا ئاللاھنى ئەسلەپ ئايەتلەردىن ئىبرەت ئالامدىكىن دەپ قىلدۇق دېيىشى مۇمكىن. ئۇنداق دېگۈچىلەرگە بىزنىڭ جاۋابىمىز: ئۇلارنىڭ بۇ سۆزى رېئاللىقتىن يىراق بولۇپ، كىشىلەر بىر جايغا توپلاشقاندا باشلىرىنى كۆتۈرۈپ تامغا ئىسىلغان جازىدىكى ئايەت ۋە زىكىر-دۇئالارنى ئوقۇمدۇ؟!، بۇنىڭ ئەكسىچە بەزى كىشىلەر بىر جايغا توپلاشقاندا باشلىرى ئۈستىگە ئىسىلغان ئايەت-زىكىرلەردىن ئەيمەنمەستىن ئۆز-ئارا غەيۋەت -شىكايەت قىلىش، يالغان سۆزلەش ۋە بىر-بىرىنى مەسخىرە قىلىش، ئويۇن-چاقچاق بىلەن بولىدۇ، گەرچە بۇنىڭدىن پايدىلىنىدىغان كىشىلەر بار دېيىلسىمۇ ئۇلار ناھايتى ئاز ساندىكى كىشىلەر بولۇپ ئۇلار بۇ ھۆكۈمگە تەسىر كۆرسىتەلمەيدۇ. مۇسۇلمانلاردىن ئاللاھنىڭ كىتابىغا يۈزلىنىپ ئىخلاس بىلەن تىلاۋەت قىلىپ ھۆكمىگە ئەمەل قىلىش تەلەپ قىلىنىدۇ. ئاللاھ تائالادىن قۇرئان -كەرىمنى دىلىمىزنىڭ باھارى، قەلبىمىزنىڭ نۇرى، غەم-قايغۇلىرىمىزنى كەتكۈزۈۋېتىدىغان دىل راھىتى قىلىشىنى سورايمىز. جانابى پەيغەمبىرىمىزگە ئاللاھنىڭ رەھمەت سالاملىرى بولسۇن. ئاللاھ ھەممىدىن ياخشى بىلگۈچىدۇر.

2094تورىدىن ئېلىندى .  ئەسلى مەنبە:
http://www.2094.com.cn/article/2094_mezmun.php?aid=94&catid=111

060319 2011-12-04 23:45
ئاللا  رەخمەت  قىلسۇن..........  

نۇرجۇلا 2011-12-05 18:07
راس دەيسىز! يۇقارقى باياندىن نىمە مەقسەت بىلەن ئېسىش كۆزدە تۇتۇلۇپتۇ،  شۇنى ھېس قىلدىمكى ئامال بار ئاسماسلىق كېرەك ئىكەن، سىز دىگەندەك بىز ئۇيغۇرلارغا ھەممە يەرگە ئاسسىمۇ ئازلىق قىلىدۇ، شۇڭا ئاز تولا ئاللاھنى، قۇرئاننى، ئىماننى يادىغا كەلتۈرۈش ئۈچۈن ئېسىش كېرەك!

abdullajan 2011-12-06 04:37
دوكتۇر بۇ پەتۋادا خېلى سەل يەڭگىللىك قىپ قاپتۇ، دېمىسىمۇ  ئۇنداق قىلىدىغان كىشىلەرنىڭ كۆپىنچىسى ئۇنى بالا قازادىن ساقلايدۇ ياكى بەرىكەت كەلتۈرىدۇ، دەپ ئېسىشى مۇمكىن. دوكتۇر راسلا بۇ يەرنىڭ ئەھۋالىدىن خەۋەرسىز قاپتۇ، مەنمۇ بىر ساۋاقدىشىمىزنىڭ ياتىقىغا كىرسەم  تامدا ئاللاھنىڭ ئىسمى چۈشۈرۈلگەن بىر  رەخت ئېسىقلىق تۇرىدۇ، لېكىن قارىسام ياتىقىدىكى بەڭگىلەر خىيالىدا يوق تاماكىسىنى چېكىپ ئولتۇرىشىدۇ............توۋۋا دەپ قالدىم...........

abdullajan 2011-12-06 04:41
تېخى يەنە رەختلەرگە تىكىدىغان قىپ ساتىدىغان بوپتۇ، دۆڭكۆرۈكتە مەخسۇس ساتقىلى خېلى بولدى... ئۇلار ئەمدى دوكتۇرنىڭ بۇ پەتۋاسىنى كۆرۈپ تېخىمۇ خاتىرجەم قىلىغان بولدى-دە، سودىسىنى.....ئەسلى بۇنداق ئىشلارنى زادى جائىز ئەمەس دەپ ھەممە ئالم - ئۆلما، موللا بىردەك قارشى چقىپ بىخ ھالىتىدىلا يوقىتىش كېرەك ئىدى. ئىسلام گۈللەنگەن مەمىلىكەتلەردە قىلسا بەلكى جائىز بولار لېكىن، بۇ بىزدەك نادان بىر خەق ئارىىدا ئۇنداق ھە دەپ بەرسەك، ئاللاھنىڭ ئايەتلىرىنىڭ، ئاللاھنىڭ ئىسىملىرىنىڭ خارلىنىشىغا سەۋەپ بوپ قېلىش ئېھتىماللىقىمىز چوڭ. ئاۋۋال قەلبىمىزنى زىننەتلىگەچ تۇرايلى، ئاندىن بەك زىننەتلەپ ئېشىپ كەتكەندە شۇنداق  قىلساقمۇ بولار...
ۋەللاھۇ ئەئلەم.

رازىيە 2011-12-06 14:31
.اللا رەخمەت قىلسۇن

nida0998 2011-12-09 16:53
دوكتۇر بۇ پەتۋادا خېلى سەل يەڭگىللىك قىپ قاپتۇ، دېمىسىمۇ  ئۇنداق قىلىدىغان كىشىلەرنىڭ كۆپىنچىسى ئۇنى بالا قازادىن ساقلايدۇ ياكى بەرىكەت كەلتۈرىدۇ، دەپ ئېسىشى مۇمكىن. دوكتۇر راسلا بۇ يەرنىڭ ئەھۋالىدىن خەۋەرسىز قاپتۇ، مەنمۇ بىر ساۋاقدىشىمىزنىڭ ياتىقىغا كىرسەم  تامدا ئاللاھنىڭ ئىسمى چۈشۈرۈلگەن بىر  رەخت ئېسىقلىق تۇرىدۇ، لېكىن قارىسام ياتىقىدىكى بەڭگىلەر خىيالىدا يوق تاماكىسىنى چېكىپ ئولتۇرىشىدۇ............توۋۋا دەپ قالدىم...........  

.....................................................................
دىيارىمىزنىڭ شارائىتىنى بىلگەچكە يول قويغان گەپ ،بىلمىگەن بولسا كىسىپلام رەت قىلغان بولاتتى.

ئابدۇنۇر 2011-12-09 19:35
ئىسلام شەرىئىتى مەيلى دوكتۇر ئابدۇلئەزىزنىڭ بولسۇن ياكى باشقا ئۆلىما ،پەتىۋاچىلارنىڭ بولسۇن ، ئۆز ئالدىغا كېسىدىغان ياكى يول قويىدىغان شەخسى پىچىم رەختى ئەمەس ! دوكتۇرنىڭ بۇ پەتىۋاسىدا دەلىللەردىن تارتىپ ، لوگىكىلىق ھۆكۈملەرگىچە ئېغىر بىر تەرەپلىمىلىك بار ! دىيارىمىزنى چۈشۈنۈشتىن تېخىمۇ ئېغىز ئاچقىلى بولمايدۇ ! پات ئارىدا ،ئىنشائاللاھ ،بۇ پەتىۋاغا تەنقىد يېزىلغۇسى ...
ئالىملار  نېمىنى ئويلايدىكىن تاڭ ؟ پەتىۋاغا ئوبىكتىپ تەنقىد يېزىلسا ، قەتئى چىقارمايدۇيۇ - ماختاش ئىنكاسلىرىنى  ھەسسىلەپ چىقىرىدۇ . بۇنىڭ بىلەن خۇددى بۇ پەتىۋانىڭ توغرىلىقى يۈز پىرسەنتتەك ،خاتا يېرى يوقتەك ،ھەممە ئىلىم ئەھلى قوللاۋاتقاندەك خاتا  ئىپادە ھاسىل بولىدۇ.  بۇنىڭ بىلەن بىر بۆلۈك ئاق قارىنى ئاسان ئايرىيالمايدىغان بۇرادەرلەر سۈرۈشتۈرمەيلا ئەگىشىپ كېتىدۇ ۋە تەرەپ تەرەپلەردە تەشۋىق قىلىدۇ .
شەيىخ  مۇھمەد سالىھ ئەل مۇنەججىدگە ئاللاھ رەھمەت قىلسۇن ! تولىمۇ كەڭ دائىرىلىك ،ئەتراپلىق پەتىۋا بەرگەن بۇ كىشى !...

tirishchan 2011-12-09 20:15
ئىسلام شەرىئىتى مەيلى دوكتۇر ئابدۇلئەزىزنىڭ بولسۇن ياكى باشقا ئۆلىما ،پەتىۋاچىلارنىڭ بولسۇن ، ئۆز ئالدىغا كېسىدىغان ياكى يول قويىدىغان شەخسى پىچىم رەختى ئەمەس !
................................................................................................

دوكتۇرنىڭ بۇ پەتىۋاسىدا دەلىللەردىن تارتىپ ، لوگىكىلىق ھۆكۈملەرگىچە ئېغىر بىر تەرەپلىمىلىك بار ! دىيارىمىزنى چۈشۈنۈشتىن تېخىمۇ ئېغىز ئاچقىلى بولمايدۇ ! پات ئارىدا ،ئىنشائاللاھ ،بۇ پەتىۋاغا تەنقىد يېزىلغۇسى...........
.......................................................................................................................

بىر ئالىم ئۆز ئىلمى ئىجتىھاد قۇۋۋىتى يەتكەن بويىچە  ھۆكۈم قىلىپ چىقارسا ھىچقانداق ئەھلى ئىلىمنىڭ ئۇنىڭغا قارىتا ئىسلام شەرىئىتى ئۇنىڭ نىمىسى ئەمەس، بۇنىڭ بىر نىمىسى ئەمەس دەپ ئۇنداق ساپاسىز رەددىيە بىرىدىغان ئىش نەدە بار؟ ھەممە ھۆكۈم سىزنىڭ كۆڭلىڭىزدىكىدەك پىچىپ بىرىلىشى زۆرۈرمۇ ئۇنداقتا؟ ئۇنداق بولغاندا شەرىئەتنى پىچىم رەختى قىلىۋىلىۋاتقان نەخ ئۆزىڭىز بولمامسىز؟ 

  بىر تەرەپلىمىلىك بار دەپ قارىسىڭىز قوبۇل قىلمىسىڭىزلا بولمىدىمۇ، ئىختىلاپى مەسىلىدە بىرلا تەرەپنىڭ يۈز پىرسەن توغرا بوپ كىتىدىغان ئىش يوق، تەنقىد يازغۇڭىز كەلسە كىچىكتۈرمەڭ، بەرىبىر سىزنىڭلا يۈز پىرسەن توغرا بوپ كەتمەيدۇ. 
 ئىختىلاپى مەسىلىدە قايسىسىنىڭ دەلىلىنى كۈچلۈك دەپ قارىغانلا شۇنى قوبۇل قىلسا بۇ يوللۇق ئىش. مىنىڭ دىگىنىمدەك چىقمىغان پەتىۋاغا باشقىلار ئەگەشسە قانداق بولىدۇ دەپ ساراسىمگە چۈشۈشنىڭ ئورنى يوقتە.
 بولىدۇ دىگەن يالغۇز بىر دوكتۇرنىڭ قارىشى بولسىكەن كاشكى، پەتىۋادا ئىنىق ئسىلام ئالىملىرى ئارىسىدا ئۈچ خىل قاراشنىڭ مەۋجۇت ئىكەنلىكىنى ۋە بىرسىگە ئۆزىنىڭ توختالغانلىقىنى ۋە بۇندىكى سەۋەپلەرنى تەپسىلى يىزىپتىغۇ، سىز  قالغان ئىككى خىل قاراشنىڭ بىرسىگە توختالسىڭىز ئۆزىنىڭ ئىختىيارى ئەمەسمۇ؟ شۈنچىلىك ئىشنى كاللىدا توغرا ھەل قىلالماي شەرىئەتتىن سۆزلەش سەل بالدۇرلۇقمۇ قانداق؟ فۇرۇئاتتىكى ئىختىلاپ مەسىللىرگە قانداق مۇئامىلە قىلىش توغرسىدا سەلەپ سالىھىنلاردىن كۆپرەك ئۆرنەك ئىلىشىڭىزنى تەۋسىيە قىلىمەن قېرىندىشىم.

ئابدۇلەي 2011-12-09 22:34
سىزنىڭ شەيخىڭىز مۇنەججىدنىڭ پەتىۋاسى بويىچە بولغاندا قۇرئان ئايەتلىرى ھۆسنىخەتلەپ يېزىلغان نەرسىلەرنى تاملارغا ئېسىشىمىزغا بولمايدۇ، گەرچە بىز ئۇنى ياخشى كۆرۈپ، ھەر كۈنى كۆزىمىز كۆرۈپ تۇرسۇن، ئۆيىمىزگە، كۆزىمىزگە، قەلبىمىزگە زىننەت بولسۇن دېگەن نىيەتتە ئاسساقمۇ. (ئەگەر ياخشى كۆرمىسەك، ئاسمايتتۇق. شۇنداققۇ؟ بىر كاپىرنىڭ ئۆيىدە يوق بۇنداق ئايەتلەر.)
كومپارتىيەنىڭ يوليۇرۇقى بويىچە، دىن مەسچىتتىن سىرتقا چىقىشقا رۇخسەت قىلىنمىغاچقا، كىشىلەرنىڭ ھەر قانداق يەردە  قۇرئان ئايەتلىرىدىن ئۇزاق تۇرۇشىنى تەكىتلەيدۇ. باشلانغۇچ ئوتتۇرا مەكتەپلەردىكى سىنىپلارنىڭ تاملىرىغا قارايدىغان بولسىڭىز، بۇ يەردە ماركىس، ئېنگلىس، ماۋزىدۇڭ، جىياڭ زېمىن، كوڭزى، لى شىجىن قاتارلىقلارنىڭ رەسىملىرى ياكى ئەقلىيە سۆزلىرى تامغا ئېسىغلىق. بۇ يەرگىمۇ قۇرئان ئايەتلىرىنى ئېسىشنى كومپارتىيە قاتتىق چەكلەيدۇ.
شەيخىڭىز مۇنەججىدنىڭ بۇ پەتىۋاسىنىڭ كومپارتىيەگە بەك خوش ياقىدىغانلىقى ئېنىق.
لېكىن، مەن ئىسلام ئۈلىمالىرىنىڭ ئىجتىھاد بىلەن چىقارغان پەتىۋالىرىغا گەرچە پەرقلىق پەتىۋا بولسىمۇ ھۆرمەت قىلىمەن. شەيخىڭىز مۇنەججىدنىڭ پەتىۋالىرىغا ئەگىشىدىغانلارغىمۇ ھۆرمەت قىلىمەن.
مۇستەقىل ئەقلى بار بىر مەخلۇق بولۇش سۈپىتىم بىلەن دوكتور ئابدۇلئەزىزنىڭ پەتىۋاسىنى شەخسەن مۇۋاپىق كۆرگەنلىكىم ئۈچۈن، ئۆيۈمگە «ئەسمائۇل ھۇسنا» (ئاللاھنىڭ 99 ئىسمى)، ئەسىر سۈرىسى، ئايەتۇل كۇرسى ھۆسنىخەتلەپ يېزىلغان كەشتە ۋە ياغاچ جازىنى مېھمانخانا ئۆيۈم بىلەن كىتابخانامنىڭ تۆرىگە ئېسىپ قويىمەن. سۈرە بەقەرەنىڭ 286-ئايىتى ھۆسنىخەتلەپ يېزىلغان كەشتىنى تاپالىسام، ئۇنىمۇ ئۆيۈمنىڭ تۆرىگە ئاسىمەن. كۆزۈم كۆرىنىدىغان يەردە تۇرسا، كۆپرەك كۆرەرمەن. كۆزۈمنىڭ پىتىنى ئۆلتۈرۈش ئۈچۈن باشقا رەسىملەرنى كۆرۈشنىڭ ئورنىغا ئايەتكە قارامەن. يەنە «بىسمىللاھىررەھمانىررەھىيىم» ھۆسنىخەتلەپ يېزىلغان جازا بولسا ئىزدەۋاتىمەن. ئۇنىمۇ ئۆيۈمگە كىرىدىغان ئىشىكنىڭ ئۈستىگە ئاساي دەۋاتىمەن. ئۆيگە كىرىدىغان چاغدا «بىسمىللاھ» دېيىشنى ئۇنتۇپ قالغۇچىلار مۇشۇ جازىدىكى «بىسمىللاھ»قا قاراپ بولسىمۇ، بۇنداق دېيىشنى ئەسكە ئالسا ئەجەپ ئەمەس. «بىسمىللاھىررەھمانىررەھىيىم» قۇرئان-كەرىمدە 114 يەردە تەكرارلانغان ئايەت. بۇنى داۋاملىق زىكىر قىلىشنىڭ پايدىسى باركى، زىيىنى يوق.  

ئابدۇنۇر 2011-12-09 23:31
ئەسسالامۇ ئەلەيكۇم !
قايسى ئالىمنىڭ پەتىۋاسى سۈننەتكە ئۇيغۇن بولسا شۇنى ياقلاش كېرەك ! ئىختىلاپى مەسلە دەپ قويۇپ ، كەڭچىلىك بار...دەپ خاتىرجەم يۈرۈۈش كېرەكمۇ؟ «...ھەقىقەتتىن قالسىلا گۇمراھلىقتىن باشقا نەرسە مەۋجۇت ئەمەس ...»دېگەن ئايەتنى ئۇنۇتتۇڭلارمۇ ...  ئېسىڭلاردا بولسۇن ،مەن دوكتۇر ئابدۇلئەزىزنى سىلەردىنمۇ بەكرەك ھۆرمەتلىشىم مۈمكىن . ئاۋۇ گېپىم پەقەت ئاۋۇ ئۈستىدىكى كىشىنىڭ «دوكتۇر بىلگەچكە مانداق دېدى ، بىلمىگەن بولسا كېسىپلا...ماندا دەيتى ...»دەپ غەيپ دەۋاسى قىلىۋاتقاچقا دېيىلدى.
بىرەر گەپ قىلا قىلمايلا ،قايناپ كېتىدىكەنسىلەر ؟
خاتىرجەم بولۇڭلار قېرىنداشلىرىم ، مەن بىرىنى تېپىۋالسام ھارغۇچە ئۇچۇرۇپ ،بىرىنى ھارغۇچە چۆكۈرىدىغان تائىپىلەردىن ئەمەسمەن .شەيىخنىڭ پەتىۋاسىنى ماختىغىنىم - ئۇنىڭ شۇنچە كەڭ دائىرىدە ، ئەتراپىلىق ،ماھىيەتلىك كۆزەتكىنى بولدى . بۇ يۇقارقى  ئىككى پەتىۋادا ئېنىقلا تۇرۇپتۇ .
ئۇيغۇر جەمىئىتىدە ئۆزىنى بىر مۆئمىن دەپ ھېسابلاپ مېڭىپ يۈرىۋاتقان بىرىنىڭ - ئۆزى ۋە ئەتراپىدىكى مۆئمىنلەر ،ئۆلىمالار خاتا دەپ قاراۋاتقان بىر ئىش - تۈزۈك دەلىلسىز ياكى (سۈننەتتە بولماي تۇرۇپ) ھەق ھەتتا مۇستەھەب دەپ پەتىۋا بېرىلسە ، ئانچە مۇنچە سۈرۈشتۈرىشى نورمال ئىش دەپ بىلمەمسىلەر؟
سىلەرنىڭ قايسى نۇقتىدا يۇقاردىكى بىر قاتار تەنبىھلەرنى يازغىنىڭلارنى چۈشۈنۈپ تۇرۇپتىمەن . ھەم سىلەردىنمۇ رەنجىمىدىم .
ئەمما سىلەرنى يامان گۇماندىن يىراق تۇرۇشقا  ئاگاھلاندۇرىمەن ....
كىيىنكى ئىنكاسلىرىمىزدا مۇسۇلمانغا ۋە قېرىنداشلىققا خاس ھالدا سىلىق مۇنازىرە قىلىشىمىزنى ئۈمۈد قىلىمەن .
ئاللاھ ،ھەممىمىزنىڭ دىلىنى بىر بىرىمىزگە باغلىسۇن ، رەھمىتىنى ھەم بىزدىن ئايىمىسۇن ! ئامىن.

alxira2008 2011-12-09 23:51
ئاللاھ  رەھمەت  قىلسۇن

0991 2011-12-10 01:45
ئەسسالامۇ ئەلەيكۇم ؛ قىرىنداشلار ، مەن بۇ  تىمىنى  ناھايىتى كىيىنرەك  كورۇپتىمەن . ئاللا  رەخمەد  قىلسۇن ، يۇقۇردىكى ئابدۇ نۇر قىرىندىشىممىزغا :::: ھەقىقەتەن  ياخشى  ئېنكاس  بوپتۇ  بىلىمىڭىزنى ئاللا   زىيادە  قىلسۇن .  ئۇرۇمچىلىك  قىرىنداشلار  بولسا  شاڭموچىڭنىڭ  كەينى  تەرىپىدە مەدىنى بۇيۇملار نى  ساتىدىگان  بىنانىڭ2 چى 3چى  قەۋىتىگە  چىقىپ  كورۇپ  باقسۇن،  ئۇ  يەرلەردە  يىيىلىپ  ياتقان  قۇرئان  ئاياتلىرىنى  كورىسىز  بۇلانى  نىمە  دىيەلەيمىز.  كوپ  سوزلىمەيلى  نەزەر سىلىپ  جاھاننى  كورىلى.  بەرگەن  پەتىۋا  تازا   ياخشى  بولماپتۇ .

بىگان 2011-12-10 11:59
ئەزا يېزىش چەكلەندى ، بۇ مەزمۇن تاقالدى

بىگان 2011-12-10 12:34
ئەزا يېزىش چەكلەندى ، بۇ مەزمۇن تاقالدى


查看完整版本: [-- قۇرئان ئايەتلىرى يېزىلغان كۆرۈنۈشلەرنى تامغا ئېسىشقا بولامدۇ؟ --] [-- top --]


Powered by PHPWind v7.3.2 Code © 2003-08 PHPWind
Time 0.057568 second(s),query:3 Gzip enabled

You can contact us