ئاپتورى: ئابدۇقادىر يۈسۈپ

<<ئاناڭنى>> دەپ تىللىما مېنى،
سەنمۇ شۇنداق ئانىنىڭ ئوغلى.
بۇ دۇنيادا قايسى بەندىنىڭ،
تۇغۇلۇشتا يوقكەن ئانىسى؟

<<ئاناڭنى>> دەپ تىللىما مېنى،
ئانام ساڭا نېمە ئىشىتتى؟
بار گۇناھنى ئۈستۈمگە ئالاي،
ماڭا ھالال ئانامنىڭ سۈتى.

<<ئاناڭنى>> دەپ تىللىما مېنى،
ئانام گۇناھسىز،ئانام مېھرىبان.
ئانام ئۈچۈن ھەربىر دەقىقە،
بولالايمەن باتۇر پاسىبان.

<<ئاناڭنى>> دەپ تىللىما مېنى،
ئاناڭنى ھەم مەنمۇ تىللىماي.
ئېيتقان ئاشۇ ئەللەيلىرىگە،
تاڭ ئاتاتتى خوراز چىللىماي.

دوستۇم ئىشىتكىل ئۇشبۇ سۆزۈمنى،
ئانا گوياكى گۈلخان مەشئىلى.
ھامانەم سېنى مۇزلىتىپ قويماس،
بېرىپ قۇياشتەك ئىسسىق تەپتىنى.

ئانىلار ئۇلۇغ،ئانىلار جەسۇر،
ئانىنى ھەر چاغ قەدىرلەيلى بىز.
ئانىسىز ئالەم ____ لەززەتسىز دۇنيا،
ھەرگىز ئانىسىز يارالمىغان بىز.

مەنبە:   ئاپتورنىڭ خاتىرىسىدىن يېزىۋالغان.