غەزەل قىزلار (ئاپتورى ھۇشۇر ئبراھىم )
كۆزۈمنى مەن ئۈزۈپ تاشلاي سىلەرگە تەگمىسۇن قىزلار
تىلىم كۆيسۇن، خۇسۇمەتلەر سىلەرگە يەتمىسۇن قىزلار.
كۆزۈڭلار چاقنىغان چولپان قېشىڭلار ئايغا ئەندىزدۇر
لېۋىڭلارغۇنچىدەك يۇمران تۇزانلار قونمىسۇن قىزلار.
چېچىڭلار ئەۋرىشىم تالدەك بېشىڭلاردا چىمەن دوپپا
بۇيۇڭلار تىك چىنار يەڭلىغ شاماللار ئەگمىسۇن قىزلار.
قېلىشماي ئۇزۇن كۆڭلەك گۇيا شاھلار لىباسىدىن
گۈلى چاقنايدۇ يۇلتۇزدەك تۇمانلار توسمىسۇن قىزلار.
چىمەنلەر يەلپۈنەر نازۇك سەھەر-ئاخشام يېنىڭ يەلدىن
قەدەملەر شۇ كەبى لەرزان قۇيۇنلار بۇزمىسۇن قىزلار.
چىرايىدا ھۈر-پەرىلەردىن گۈزەل ھەم ئاي خىجىل ھەتتا
ئەقىل-زېھنى ئەزىم دەريا بىھۇدە ئاقمىسۇن قىزلار.
چېلىشتا ،ئىشتا -ئەمگەكتە،بىلىمدە كۆككە ئۆرلەڭلار
گۈزەل ياشلىق باھارىڭلار بىكارغا كەتمىسۇن قىزلار.
غەزەل رەنجىدىڭ(ئاپتورى ھوشۇر ئىبراھىم)
ئايىلىم قىز تۇغدى ،دەپ دوستۇم بىكاردىن رەنجىدىڭ
تۆھپىسى ئالەمشۇمۇل سەن دىلنىگاردىن رەنجىدىڭ.
يىلتىزى بولماي دەرەخنىڭ بەرمىگەي ئالتۇن مىيۋە
ئەسلى ئەجدادىڭ مۇنەۋۋەر سەن مۇماڭدىن رەنجىدىڭ.
قىز ھاياتلىقنىڭ گۈلى، گۈلدەك ھاياتلىق بۇلبۇلى
ئەس-ھۇشۇڭنى يۇقىتىپ تەكتى ئاناڭدىن رەنجىدىڭ.
بولمىسا قىز سەن قەيەردىن تۇغۇلۇپ ئۆسكەن ئىدىڭ
سەن ھاياتلىققا نىجاتكار قىز بالاڭدىن رەنجىدىڭ.
سۈيى يوق ئۆستەڭ قەيەردە،قىزى يوق گۈلگۈن ھايات
سەن ھاياتلىق باغۋىنى قەددى چىناردىن رەنجىدىڭ.
