ئىپپىتىڭنى يوقاتما قىزچاق
(مۇخەممەس)
دوغچىنىڭ ئالدىدا تەڭلىنەر ۋاشاق،
خاماندا قالمايدۇ سەن ئۈچۈن باشاق،
كاۋا دەپ كەلسەڭمۇ ئالىسەن قاپاق،
سۇنسا گەر سەندىكى شۇ"ئالتۇن تاۋاق"،
ئۆتۈنەي،ئىپپىتىڭ يوقاتما قىزچاق.
بەزىلەر باي بولۇپ ماڭسىمۇ پولدا،
مېڭىۋەر خاتىرجەم توپىلىق يولدا،
ھەۋەسلىك باقمىغىن ياتسا ھەم ئوڭدا،
ۋاپا يوق ھايانى يوقاتقان پۇلدا،
ئۆتۈنەي،ئىپپىتىڭ يوقاتما قىزچاق.
بەزىلەر ھوقۇققا بولاركەن سوۋغا،
بەزىلەر ئويۇنغا تىكىلەر دوغا،
بەزىلەر ئالتۇن دەپ يىقىلار روغا،
بەزىلەر گۈل دېسەك چىقتى شۇمبۇيا،
ئۆتۈنەي،ئىپپىتىڭ يوقاتما قىزچاق.
"ساتىراچ"كۆپەيدى كوچا-كويلاردا،
"توقاچلار ئېسىلدى"بەزى تويلاردا،
خەقلەرنىڭ نىشانى پەقەت پۇللاردا،
بولمىغىن ئاشۇنداق گۈدەك ئويلاردا،
ئۆتۈنەي،ئىپپىتىڭ يوقاتما قىزچاق.
زارلانما چۆللەردە قالساڭ پىيادە،
تاۋىقىڭ تولمىسا،ئىشلەت پىيالە،
يار بولسۇن ساڭا قىز جۈرئەت-ئىرادە،
بولغىن ھەم ئەخلاقلىق،ئەقلىڭ زىيادە،
ئۆتۈنەي،ئىپپىتىڭ يوقاتما قىزچاق.
بەزىلەر ئۆيىنى ياساپ رەڭمۇرەڭ،
قىلاركەن ئۆزىچە قونالغۇ-ئۆتەڭ،
بولاركەن ئۆيىدە ھاياسىز بىر جەڭ،
نېمە ئىش بۇ؟خۇدايىم يۈزمىڭ توۋا دەڭ،
ئۆتۈنەي،ئىپپىتىڭ يوقاتما قىزچاق.
ھايانى يوقۇتۇپ مىنسەڭمۇ پاسات،
ۋەياكى ئۇچساڭمۇ چىقىرىپ قانات،
يىگىتلەر ئالدىدا بازىرىڭ كاسات،
بىلسەڭ بۇ ئاددىيلا ئەقەللىي ساۋات،
ئۆتۈنەي،ئىپپىتىڭ يوقاتما قىزچاق.
مەنبە:ئۆزەم
