ئېھ، ئانا يۇرت - مۇقەددەس ماكان!!
ئۆمەر
ئىھ، ئانا يۇرت - مۇقەددەس ماكان،
سۆيۈملۈكسەن ئانامدەك گويا.
بۈگۈن ماڭا بولدىغۇ ئايان،
چىمدىم توپاڭ ئىكەن تۇتىيا!
يىگىتلىرىڭ باتۇر، چىداملىق،
ھۆر قىزلىرىڭ شۇنچىلىك ئوماق.
بوۋايلىرىڭ ئىنساپ، ئىمانلىق،
مومايلىرىڭ پەرىشتە سىياق.
تار يوللىرىڭ، پاكار ئۆيلىرىڭ،
قەلبىمدىكى ئەڭ گۈزەل شەھەر.
نەغمە-ناۋا، مەشرەپ، كۈيلىرىڭ،
مېنىڭ ئۈچۈن بۈيۈك شۇ قەدەر!
گەرچە نامرات بولساڭمۇ خەلقىم،
سەندە باردۇر ئىنساپ-دىيانەت.
بەرمەك بولسا پۇل ئەمەس، بەلكىم-
ئۇلۇغ اللە بەرسۇن ھىدايەت!...
سېغىندىم مەن مەسچىتلىرىڭنى،
يانتاق باسقان مازارلىرىڭنى.
مۈشۈك-ئاسلان، ھەم ئىتلىرىڭنى،
ئاددىي، قايناق بازارلىرىڭنى.
سېغىندىم مەن ئېتىز-باغلارنى،
سېغىندىم مەن قاداق قوللارنى.
سېغىندىم ھەم قارلىق تاغلارنى،
شۇ ئېگىز-پەس پاتقاق يوللارنى!…
تېنىم بۇندا، يۈرۈكىم سەندە،
يۈرگەن بىلەن چاڭجاڭنى بويلاپ.
پىراقىڭدا مەن جۇنۇن بەندە،
كۈنۈم ئۆتەر سېنىلا ئويلاپ!
ئارىمىزدا بولسىمۇ داۋان،
چۈشلىرىمدە بولىسەن ئايان!
ئېھ، سۆيۈملۈك تۇغۇلغان ماكان،
بەختىم ئۈچۈن ئامان بول ھامان!!!...
2009 – يىلى 24 – دېكابر
چوڭچىڭ
