ھەممىدىن توغرىسىنى بىلگۈچى اللە !
ئەرلەر قەبرە يوقلىسا بولىدىغانلىقى ۋە قەبرە يوقلىغۇچىنىڭ ئوقۇيدىغانلىرى توغرىسىدا
بۇرەيدە رەزىيەللەھۇ ئەنھۇ رىۋايەت قىلىپ مۇنداق دەيدۇ: پەيغەمبەر ئەلەيھىسالام مۇنداق دېگەن:
< سىلەرنى قەبرىنى يوقلاشتىن چەكلىگەنىدىم، ئەمدى قىلساڭلار بولىدۇ>.
__ مۇسلىم رىۋايەت قىلغان.
ھەدىسنىڭ مۇھىم نوقتىلىرى :
1.قەبرىنى زىيارەت قىلىشنىڭ جائىز ئىكەنلىكى ، ئۆلىمالار - ئەرلەرنىڭ دادىسىنى، دوستىغا ئوخشاش يېقىن ئادەملىرىنىڭ
ھەققىنى ئادا قىلىش ئۈچۈن قەبرىنى زىيارەت قىلىشنىڭ ياخشى ئىكەنلىكىگە بىرلىككە كەلگەن. چۈنكى قەبرىنى
زىيارەت قىلىش كىشىگە ئاخىرەتنى ئەسلىتىدۇ. ئۆلۈم ۋە قەبرىدىكى سۇئال- سوراق، ھېساب - كىتابلارنى ئەسكە سېلىش
ئۈچۈن دىللارنى ئېرىتىدۇ.
2. ئەمما ئاياللارنىڭ قەبرىنى زىيارەت قىلىشى يامان كۆرۈلىدۇ، شۇنداقلا بۇ ھەقتە چەكلەش بايان قىلىنغان. ئەگەر ئاياللارنىڭ
قەبرىنى زىيارەت قىلىشى پىتنە ۋە ئاۋازىنى يۇقۇرى كۆتۈرۈپ يىغلاشتەك شەرىئەتتە چەكلەنگەن ئىشلار بىلەن باغلىنىپ
قالسا ئۇلارنى زىيارەتتىن چەكلەش كېرەك. ئۆلگۈچى ئايالنىڭ ناھايىتى يېقىن ئادىمى بولسا، شۇنداقلا قەبرىنى زىيارەت
قىلىشى شەرىئەتتە چەكلەنگەن ئىشلار بىلەن باغلانمىسا، قەبرىنى زىيارەت قىلىشى مۇباھ ھېسابلىنىدۇ.
3. پەيغەمبەر ئەلەيھىسالامنىڭ قەبرىسىنى زىيارەت قىلىشنىڭ ياخشى ئىكەنلىكى.
4. ئىسلام شەرىئىتىدە بەزى ئەھكاملارنىڭ نەسخى( ئەمەلدىن قالدۇرۇش) قىلىنىشى جائىز ئىكەنلىكى، پەيغەمبەر ئەلەيھىسالام
دەسلەپتە جاھىلىيەت دەۋرىنىڭ ئادەتلىرى تەلتۆكۈس يوقالمىغانلىقىنى، بۇتپەرەسلىكنىڭ يوقالمىغانلىقىنى ۋە كىشىلەرنىڭ
قەبرە بېشىدا ئىسلام دىنىدا چەكلەنگەن ھۇ تارتىپ يىغلاشلىرىدەك قىلمىشلارنى كۆزدە تۇتۇپ كىشىلەرنى قەبرىلەرنى
زىيارەت قىلىشتىن چەكلىگەن.
5. ئىسلام دىنىنىڭ قائىدىلىرى ئوبدان ئورنىتىلغان ، ئەھكاملىرى روشەنلەشكەن. تەۋھىد ئەقىدىسى كىشىلەر قەلبىگە
مەھكەم ئورناشقاندىن كېيىن چەكلەشنى ئەمەلدىن قالدۇرۇپ قەبرىلەرنى زىيارەت قىلىشقا رۇخسەت قىلىنغان.
ئائىشە رەزىيەللاھۇ ئەنھادىن رىۋايەت قىلىندۇركى، پەيغەمبەر ئەلەيھىسالام ھەر قاچان ئائىشە رەزىيەللاھۇ ئەنھانىڭ
نۆۋەت كېچىسى بولسا، كېچىنىڭ ئاخىرىدا بەقى قەبرىستانلىقىغا چىقىپ:< ئى مۆئمېنلەر، سىلەرگە سالام!
ۋەدە قىلىنغان نەرسىلەر سىلەرگە كەلدى. ئەتە كۆز ئالدىڭلارغا ھازىر بولىدۇ، ئەگەر اللە تائاللا خالىسا، بىزمۇ سىلەرگە
قوشۇلىمىز. ئى اللە! بەقىدىلىكلەرنى مەغفىرەت قىلغىن>. دەيتتى.
___ مۇسلىم رىۋايەت قىلغان.
ئىبن ئابباس رەزىيەللەھۇ ئەنھۇ رىۋايەت قىلىندۇركى، پەيغەمبەر ئەلەيھىسالام قەبرىستانلىقتىن ئۆتۈپ كېتىۋىتىپ،
قەبرىستانلىققا يۈز كەلتۈرۈپ:< ئى مۆئمېن مۇسۇلمانلار! اللە تائاللا بىزنى ۋە سىلەرنى ئەپۇ قىلغاي، سىلەر بىزدىن
بۇرۇن كەلگۈچىلەر، پات يېقىندا بىزمۇ سىلەرگە ئەگىشىپ كېلىمىز>. دېدى.
__ تېرمىزىي رىۋايەت قىلغان
مەنبە: ياخشىلار باغچىسىدىن مۇھەممەد سالىھ مۇتەرجىم
