مۇھەممەتجان راشىدىن
سەھرالارنى تۇنۇمسىلەر، شەھەرلەر،
يوقلا، دېسە ئۇنامسىلەر، شەھەرلەر؟
كېلىپ - كېتىپ يۈرگەنلەردىن دېھقاننىڭ __
ئەھۋالىنى سورامسىلەر، شەھەرلەر؟
*** *** *** ***
ئىزدەمسىلەر قۇلۇم- قوشنا دېگەننى،
ئاش- تاماقمۇ سۇنامسىلەر، شەھەرلەر؟
يىراقلىشىپ بىزدىن ياكى بىر يولى__
قۇلۇڭلارنى يۇيامسىلەر شەھەرلەر؟
*** *** *** ***
كەلگەنلەرنىڭ ئەھۋال ئېيتىپ، ھېلىمۇ
يانچۇقىنى كولامسىلەر، شەھەرلەر؟
ئادىيمىلىك بارمۇ - يوقمۇ سىلەردە،
قۇرۇق بارساق ئۇرامسىلەر، شەھەرلەر؟
رېستۇرانلار كانى ئىكەن ئويۇننىڭ،
كۈندە شۇنداق ئوينامسىلەر، شەھەرلەر؟
تائام دېگەن ئېشىپ قاپتۇ شۇ پېتى،
تۆكمىسەڭلار تويمايسىلەر، شەھەرلەر؟
*** *** *** ***
بەگزادىگە ئايلىنىپتۇ باشلىقلار،
ئويناۋېرىپ قۇرامسىلەر، شەھەرلەر؟
بىر چىرايلىق كېتىۋاتقان ھارۋىنى،
يامان يولغا بۇرامسىلەر، شەھەرلەر؟
*** *** *** ***
سېتىۋالغان ئوغۇت ساختا، دورا جا،
بىزنى ئەمدى بۇلامسىلەر، شەھەرلەر؟
كەلكۈن بىلەن خۇدا ئۇرغان دېھقاننى،
سىلەر يەنە ئۇرامسىلەر، شەھەرلەر؟
*** *** *** ***
جا ماللارنىڭ ئۇۋىسىمۇ، سىلەرمۇ،
مالىنى مەڭگۈ بويامسىلەر، شەھەرلەر؟
يالاڭلارنى يۆلەۋاتقان پۈتۈن ئەل،
سىلەر قاراپ تۇرامسىلەر شەھەرلەر.
*** *** *** ***
كېرەكلىكنى بىزدىن ئېلىپ تا مەڭگۈ،
بىزگە ھاپاش بولامسىلەر، شەھەرلەر؟
شۇنچە چىرىپ كەتتىڭلارمۇ، ۋە ياكى
بىزگە شۇنداق پۇرامسىلەر، شەھەرلەر.
2001-يىل 17- مارت
مەنبە: مۇھەممەتجان راشىدىننىڭ <جاھان دېگەن يالغان شۇنداق> ناملىق شېئىرلار توپلىمىدىن ئېلىندى.
