ئىش ھەققىڭدىن تۇتىمەن

ئاپتورى؛ مۇھاممەتجان راشىدىن

ئىشتىن بالدۇر كېتشسەڭ ، ئىش ھەققىڭدىن تۇتىمەن ،
قايسىڭ ئىشقا كېچىكسەڭ ، ئىش ھەققىڭدىن تۇتىمەن .
كېچىكمەمسەن خىزمەتكە يېتىۋەرسەڭ چىرمىشىپ ،
بىر كارۋاتتا يېتىشساڭ ، ئىش ھەققىڭدىن تۇتىمەن .

جان يېرى بار ئادەمنىڭ ، جان يېرىڭدۇر ئىش ھەققىڭ ،
مېنىڭ بىلەن ئېتىشساڭ ، ئىش ھەققىڭنى تۇتىمەن .
بۇندىن باشقا تەدبىرنىڭ ئانىسىنى تۈمەنمىڭ ...
مەندىن قۇسۇر تېپىشساڭ ، ئىش ھەققىڭنى تۇتىمەن .

ئىدارىغا يولاتما بۇندىن كېيىن بالاڭنى ،
بۇندا بالا بېقىشساڭ ، ئىش ھەققىڭدىن تۇتىمەن .
چىقىپ كەتسەڭ كىرمەيسەن خالا جايدىن بىر سائەت ،
يىغىن ئاچسام ، قېچىشساڭ ، ئىش ھەققىڭدىن تۇتىمەن .

قېشىڭدىكى ئوسمىنى قاچان قويدۇڭ ، ئېيتمىدىڭ ،
ئەمدى خېنە يېقىشساڭ ، ئىش ھەققىڭنى تۇتىمەن .
گەپنى ئوچۇق دەپ قوياي ، مېنى كۆرسەڭ پىچىرلاپ ،
قۇلقىڭنى يېقىشساڭ ، ئىش ھەققىڭنى تۇتىمەن .

ئىنتىزامىڭ بولمىسا ، كۈندە كېسەل بولمامسەن ،
بالنىستتا يېتىشساڭ ، ئىش ھەققىڭنى تۇتىمەن .
بارالايدۇ پېقىرمۇ ، بارغان يەرگە ھەر قايسىڭ ،
رەھبەرلىككە چىقىشساڭ ، ئىش ھەققىڭنى تۇتىمەن .