مىللەت ھەققىدە
ت.ئىلىيېف
سۆيىمەن دەيدۇ ھەركىم مىللىتىنى،
مىللەتنى ساتقۇچىمۇ دەيدۇ شۇنى.
سۆيۈشنىڭ راست-يالغىنى شۇندىن ئايان،
يەمدۇ-يوق مىللىتىنىڭ قايغۇسىنى.
تىللىساڭ ھامان باشقا مىللەتنى سەن،
بولامسەن مىللىتىڭنىڭ قەھرىمانى.
مىللەتكە باشلاپ كىلەر يېتىمچىلىك،
مىللەتنىڭ مۇنداق نادان مېھرىبانى.
ئۇ مىللەت پۈتۈنلەيلا داشقال بولۇپ،
بۇ مىللەت كەم-كوتىسىز ئالتۇن ئەمەس.
ئۇ مىللەت پەگادىكى پالاس بولۇپ،
بۇ مىللەت تۆرگىلا خاس دۇردۇن ئەمەس.
مىغىزى، شاكىلى بار ھەر نەرسىنىڭ،
ئەي ئەقىل، شۇنداق چۈشەن مىللەتنىمۇ.
بېيىيدۇ مىللەتنىڭمۇ پەزىلىتى،
چۈشەنسە ئۆزىدىكى ئىللەتنىمۇ.
ياراتقان سىسىقلىققا سەسكىنىشنى،
چىقارغان خۇش پۇراققا ئىشتىياقنى.
يۇيماستىن سېسىقىنى، ماختانسا كىم،
بۇلغايدۇ ئۆزىدىكى خۇش پۇراقنى.
