ماۋ زېدۇڭ «مەدەنىيەت زور ئىنقىلابى»نى نېمىشقا قوزغىغان. ماۋ زېدۇڭنىڭ «مەدەنىيەت زور ئىنقىلابى»نى قوزغىشىنىڭ مەلۇم ئارقا كۆرۈنۈشى بار. 1962-يىلى «سىنىپىي كۈرەش» قايتا تىلغا ئېلىنىپ، جۇڭگو بىلەن سوۋېت ئىتتىپاقى ئارىسىدىكى نەزەرىيە كۈرىشى ئۈزلۈكسىز كۈچەيگەچكە، بولۇپمۇ «تۆتنى تازىلاش ھەرىكىتى» ئېلىپ بېرىلغاچقا، ماۋ زېدۇڭ رېۋىزىئونىزم ۋە كاپىتالىزمنى تىرىلدۈرۈش خەۋپى بارلىقىنى بارغانسېرى ھېس قىلىشقا باشلىغان. ئۇ: جۇڭگودا رېۋىزىئونىزم يولىغا ماڭىدىغان ئىجتىمائىي قاتلام بار، ئۇلارنىڭ دائىرىسى خېلىلا كەڭ، ئادەم سانى ئاز بولسىمۇ، يەنىلا مەلۇم تەسىرى بار. جۇڭگونىڭ سوتسىيالىزم يولىدىن ۋاز كېچىپ، كاپىتالىزم يولىغا مېڭىش-ماڭماسلىقىنىڭ ئاچقۇچى ئاساسىي قاتلامدا ئەمەس، بەلكى يۇقىرى قاتلامدا، بولۇپمۇ مەركەزدە، دەپ قارىغان. ئۇ: «رەھبەرلەر، بولۇپمۇ رەھبەرلىك گۇرۇھى بەك مۇھىم...1962-يىلى ناتوغرا شامال پەيدا بولدى، ئەگەر مەن ۋە بىرنەچچە دائىمىي كومىتېتنىڭ ئەزاسى بۇنىڭغا بەرداشلىق بېرەلمەي، باش لىڭشىتىپ قويساقلا، ئۇزاققا قالمايلا (يەنى يېرىم يىل ئۆتمەيلا) جۇڭگونىڭ <رەڭگى> ئۆزگىرىپ كېتىدۇ. نۇرغۇن ئىشلار مۇشۇنداق، رەھبەرلەر ئۆزگەرسىلا، ھەممە ئۆزگىرىپ كېتىدۇ» دېگەن. 1965-يىلى 8-، 9-ئايلاردا ئۆتكۈزۈلگەن مەركەز خىزمىتى يىغىنىدا، ماۋ زېدۇڭ «مەركەزدە رېۋىزىئونالىزم پەيدا بولسا، ئىسيان كۆتۈرۈش كېرەك» دېگەن مەسىلىنى تۇنجى قېتىم ئوتتۇرىغا قويغان. شۇنىڭدىن كېيىن بۇ ئىشنى توختىماي تەكىتلەپ كەلگەن.
رېۋىزىئونالىزم ۋە كاپىتالىزمنىڭ قايتا تىرىلىشىنىڭ ئالدىنى ئېلىش ماۋ زېدۇڭ ئاخىرقى ئۆمرىدە ئويلىشىدىغان ھەم ئەندىشە قىلىدىغان قىزىق نۇقتا بولۇپ قالغان. مانا بۇ ماۋ زېدۇڭنىڭ «مەدەنىيەت زور ئىنقىلابى»نى قوزغاشتىكى تۈپ ئاساسى ۋە سۇبيېكتىپ مەقسىتى بولۇپ قالغان. بىر قېتىم ئۇ يېنىدىكى سېستىراغا: « بۇ مەسىلىنى كۆپ قېتىم ئوتتۇرىغا قويغان بولساممۇ، ئۇلار بۇنى قوبۇل قىلمىدى، توسقۇنلۇق بەك چوڭ... ئەگەر ئۇلارنىڭ دېگىنى بويىچە قىلىدىغان بولساق، مەن ۋە نۇرغۇن پېشقەدەملەرنىڭ سىڭدۈرگەن ئەجرى يوققا چىقىدۇ. مېنىڭ شەخسىي نىيىتىم يوق، مەن جۇڭگودىكى پۇقرالارنىڭ جاپا چېكىۋاتقانلىقىنى بىلىمەن، ئۇلارنىڭ ھەممىسى سوتسىيالىزم يولىغا مېڭىشنى ئۈمىد قىلىدۇ. شۇڭا مەن ئۇلارغا تايىنىمەن، ئۇلارنىڭ كونا يولغا مېڭىشىنى خالىمايمەن» دېگەن. ئۇ تارىخ ۋە رېئال پاكىتلاردىن بۇ مەسىلىنىڭ تەخىرسىزلىكىنى ھېس قىلىشقا باشلىغان.
ماۋ زېدۇڭ ۋاقىتنىڭ كۈتۈپ تۇرمايدىغانلىقىنى ھېس قىلىپ، 73 ياشقا كىرگەن يىلى «مەدەنىيەت زور ئىنقىلابى»نى باشلىغان. «خەي رۈينىڭ مەنسىپىدىن ئېلىپ تاشلىنىشى» پەقەت بۇنىڭ بىر بۆسۈش ئېغىزىلا خالاس.
لېكىن ماۋ زېدۇڭ پارتىيە ۋە دۆلەت ئىچىدىكى سىياسىي ۋەزىيەتكە ئەمەلىيەتكە ماس كەلمەيدىغان ھالدا ئېغىر باھا بېرىپ، ئوخشاش بولمىغان قاراشتىكى ھەر دەرىجىلىك رەھبەرلەرنى «رېۋىزىئونىزمچى»، «كاپىتالىزم يولىغا ماڭغان ھوقۇقدار» دەپ قارىغان ھەم سىنىپىي كۈرەشكە ياتمايدىغان مەسىلىلەرنى «سىنىپىي كۈرەش» دەپ، ھەق-ناھەق ۋە دۈشمەن بىلەن ئۆزنى ئېغىر دەرىجىدە ئاستىن-ئۈستۈن قىلىۋەتكەن.
ماۋ زېدۇڭ پارتىيە ئىچى ۋە جەمئىيەتتە مەۋجۇت بولۇپ تۇرۇۋاتقان بەزى يوشۇرۇن مەسىلىلەرنى قانداق قىلغاندا تەلتۆكۈس ھەل قىلغىلى بولىدىغانلىقى توغرىسىدا ناھايىتى خېلى ئۇزاق تەھلىل قىلغان. ئۇ: «ئاممىنى قوزغاتقاندىلا، ئاندىن ئامالىنى تاپقىلى بولىدۇ، ئامما بولمىسا، ھەرگىز ئامال تاپقىلى بولمايدۇ»، دېگەن.
لېكىن ماۋ زېدۇڭ ئاممىنى قوزغىتىشتا يۈزەكى ئويلىغان. ئۇ: «بەزى كادىرلىرىمىز خەلق ئاممىسىغا يېقىنلاشماي، ئەمەلدار بولسىلا، بەگ-غوجامغا ئايلىنىپ قېلىۋاتىدۇ. ئۇلارغا تاقابىل تۇرۇشقا قىلچە ئامال قىلالمايۋاتىمەن. ئەمدى ياخشى بولدى. ئامما ئۇلارنىڭ جاجىسىنى بېرىۋاتىدۇ» دېگەن. شۇڭا، پارتىيە رەھبەرلىكىدىن ۋاز كەچكەن ئەھۋالدا، تۈرلۈك ئىجتىمائىي زىددىيەتلەر ھەم كىشىلەر ئارىسىدىكى ئادەتتىكى ئاداۋەتلەر ئۆزلۈكىدىن قوزغالغان ھەم تىزگىنسىز قالغان ئاممىۋى ھەرىكەتتە ئىنقىلاب نامى بىلەن رادىكال شەكىلدە مەركەزلىك پارتلاپ، ئىجتىمائىي قالايمىقانچىلىق پەيدا قىلغان.
قىسقىسى، ماۋ زېدۇڭ قوزغىغان «مەدەنىيەت زور ئىنقىلابى» رېۋىزىئونالىزمغا قارشى تۇرۇش ۋە ئۇنىڭ ئالدىنى ئېلىشنى مەقسەت قىلغان، شۇنداقلا «سىنىپىي كۈرەشنى تۇتقا قىلىش» دېگەن خاتا ئىدىيەنىڭ يېتەكچىلىكىدە، پارتىيە ۋە دۆلەت ئىچىدىكى سىياسىي ۋەزىيەتكە خاتا باھا بېرىپ، خاتا ئۇسۇل قوللىنىپ ئېلىپ بېرىلغان ئاتالمىش بىر مەيدان «ئىنقىلاب»تىن ئىبارەت. بەزىلەر ماۋ زېدۇڭ قوزغىغان «مەدەنىيەت زور ئىنقىلابى»نى «شەخسىي ھوقۇق كۈرىشى، ماۋ زېدۇڭ بىلەن ليۇ شياۋچى ئارىسىدىكى كۈرەش» دەپ قارىغان. لېكىن بۇ ئەمەلىيەتكە ھەرگىز ئۇيغۇن ئەمەس.
2. «لىن بياۋ ۋەقەسى»نى ماۋ زېدۇڭ پەيدا قىلغان؟
ج ك پ 9-قۇرۇلتىيىدىن كېيىن، دۆلەت ئىچىدىكى ۋەزىيەت پەسىيىشكە يۈزلەنگەچكە، ماۋ زېدۇڭ «مەدەنىيەت زور ئىنقىلابى»نى ئاخىرلاشتۇرىدىغان ۋاقىت كەلدى، دەپ قاراپ، 9-قۇرۇلتايدىن كېيىن مەركىزىي كومىتېت «مەدەنىيەت زور ئىنقىلابى»غا رەھبەرلىك قىلىش گۇرۇپپىسىنى ئەمەلدىن قالدۇرماقچى بولغان بولسىمۇ، ئۇ «لىن بياۋ گۇرۇھى»نىڭ تېخىمۇ يۇقىرى ئورۇن ۋە تېخىمۇ چوڭ ھوقۇققا ئېرىشىشكە ئالدىراپ كېتىۋاتقانلىقىنى ئويلاپمۇ باقمىغانىدى. ئىككى ئىش لىن بياۋ ۋە ئۇنىڭ گۇرۇھىنىڭ سىياسىي قارا نىيىتىنى ئاشكارىلاپ قويغان. بىرى ئاتالمىش«لىن مۇئاۋىن رەئىسنىڭ 1-نومۇرلۇق پەرمانى»، يەنە بىرى دۆلەت رەئىسى تەسىس قىلىشقا مۇناسىۋەتلىك مەسىلە ئىدى.
1969-يىل 10-ئاينىڭ 10-كۈنى سۇجۇدا تۇرۇۋاتقان لىن بياۋ بېيجىڭدىكى ھەربىي كومىتېت ئىش بېجىرىش گۇرۇپپىسىنىڭ باشلىقى، باش ئىشتاب باشلىقى خۇاڭ يۇڭشېڭغا «ئۇرۇش تەييارلىقىنى كۈچەيتىپ، دۈشمەنلەرنىڭ تۇيۇقسىز ھۇجۇم قىلىشىنىڭ ئالدىنى ئېلىش توغرىسىدا جىددىي يوليورۇق» بېرىپ، «دەرھال سەرخىل قوماندانلىق كوللېكتىپى تەشكىللەپ، ئۇرۇش ۋاقتىدا قوماندانلىق قىلىش ئورنىغا كىرىش»نى تەلەپ قىلغان. ھەربىي كومىتېتنىڭ ئىش بېجىرىش گۇرۇپپىسى بۇ يوليورۇقنى «لىن مۇئاۋىن رەئىسنىڭ يوليورۇقى (1-نومۇرلۇق پەرمان)»دېگەن نام بىلەن تارقاتقان. شۇ كۈنى كەچتە بۇ پەرمان تېلېفون ئارقىلىق ھەرقايسى ئۇرۇش قىسىملىرىغا تارقىتىلغاندىن كېيىن، پۈتۈن ئارمىيە دەرھال جىددىي ئۇرۇش ھالىتىگە ئۆتكەن. پەرمان چۈشۈرۈلۈپ ئەتىسى، لىن بياۋ ئاندىن بۇنى «تېلېفون خاتىرىسى» شەكلى ئارقىلىق ماۋ زېدۇڭغا دوكلات قىلغان.
مەركىزىي ھەربىي كومىتېتنىڭ رەئىسى ماۋ زېدۇڭنىڭ تەستىقىنى ئالماي ھەم دوكلات قىلماي تۇرۇپلا، لىن بياۋنىڭ تەپتارتماستىن بۇنداق ھەربىي بۇيرۇق چۈشۈرۈپ، پۈتۈن ئارمىيەنى بىر كېچىدىلا ئۇرۇش ھالىتىگە كىرگۈزۈشى ناھايىتى ئېغىر ۋەقە ھەم ناھايىتى خەتەرلىك سىگنال بولغاچقا، ماۋ زېدۇڭ بۇنىڭدىن ھوشيار بولۇپ، كۈچلۈك ئىنكاس قايتۇرغان.
ئەگەر «1-نومۇرلۇق پەرمان» لىن بياۋنىڭ تېخىمۇ چوڭ ھوقۇقنى تارتىۋېلىش مەقسىتىدە ئېلىپ بارغان تىڭتىڭلاش ھەرىكىتى، دەپ قارالسا، ئۇنداقتا دۆلەت رەئىسى تەسىس قىلىش مەسىلىسىدە لىن بياۋ ماۋ زېدۇڭغا ئاشكارا خىرىس قىلغاچقا، بۇ بىر مەيدان سىياسىي بۆھران پەيدا قىلغان.
1970-يىل 3-ئاينىڭ 8-كۈنى ماۋ زېدۇڭ مەركىزىي كومىتېتقا 4-نۆۋەتلىك خەلق قۇرۇلتىيى ئۆتكۈزۈش ھەم ئاساسىي قانۇنغا تۈزىتىش كىرگۈزۈش توغرىسىدا پىكىر بەرگەن ھەم دۆلەت رەئىسى تەسىس قىلماسلىقنى تەكلىپ قىلغان. بۇ ماۋ زېدۇڭنىڭ دۆلەت رەئىسى تەسىس قىلماسلىقنى تۇنجى قېتىم ئوتتۇرىغا قويۇشى ئىدى. ماۋ زېدۇڭنىڭ پىكرى سىياسىي بىيۇرو يىغىنىدا يەتكۈزۈلگەندىن كېيىن، كۆپچىلىك بۇنىڭغا بىردەك قوشۇلغان. لىن بياۋ سۇجۇدا بۇنىڭدىن خەۋەر تاپقاندىن كېيىن، يې چۇن ئارقىلىق خۇاڭ يۇڭشېڭ ۋە ۋۇ فاشيەنگە: «مەن دۆلەت رەئىسى تەسىس قىلىشنى قوللايمەن» دېگەن سۆزىنى يەتكۈزگەن. شۇنىڭدىن كېيىن دۆلەت رەئىسى تەسىس قىلىش-قىلماسلىق مەسىلىدە لىن بياۋ پوزىتسىيەسىنى ئۆزگەرتىپ، جاھىللىق بىلەن ماۋ زېدۇڭغا قارشى مۇقام توۋلىغان. بۇ پارتىيە ئىچىدىكى ئوخشاش بولمىغان پىكىردىكىلەرنىڭ نورمال تالاش-تارتىشىدىن ھالقىپ كەتكەن بولۇپ، ئۇنىڭدا يەنە يوشۇرۇن مەقسەت بارلىقى ئېنىق ئىدى. بۇ مەسىلىنى يەنىلا يې چۇن ئېنىق ئوتتۇرىغا قويۇپ، لىن بياۋنىڭ دۆلەت رەئىسى تەسىس قىلىشتا چىڭ تۇرۇشىدىكى ھەقىقىي مەقسىتىنى ئاشكارىلىغان. ئۇ خۇپىيانە ھالدا ۋۇفاشيەنگە: «دۆلەت رەئىسى تەسىس قىلمىسا، لىن بياۋ قانداق قىلىدۇ؟ نەگە بارىدۇ؟» دېگەن. دۆلەت رەئىسى تەسىس قىلىش-قىلماسلىق توغرىسىدا 9-نۆۋەتلىك مەركىزىي كومىتېت 2-ئومۇمىي يىغىنى، يەنى لۇشەن يىغىنىدىمۇ تالاش-تارتىش بولغان. 8-ئاينىڭ 23-كۈنى مەركىزىي كومىتېت 2-ئومۇمىي يىغىنى باشلانغان. يىغىن باشلىنىشتىن ئىلگىرى، لىن بياۋ تۇيۇقسىزلا ماۋ زېدۇڭ ۋە باشقا دائىمىي كومىتېت ئەزالىرىغا ئۆز پىكرىنى ئوتتۇرىغا قويغان. ئەسلىدە ماۋ زېدۇڭ بىلەن لىن بياۋ يىغىننىڭ باشلىنىش مۇراسىمىدا سۆز قىلمايدىغانلىقىنى بىلدۈرگەنىدى. ئەمما لىن بياۋ ئالدىنئالا خەۋەر قىلمايلا تۇيۇقسىز سۆز قىلغان. لىن بياۋ سۆز ئارگىنالىنى ئېلىپ بىر سائەتتىن كۆپرەك سۆزلەپ، ئاساسىي قانۇنغا تۈزىتىش كىرگۈزۈش مەسىلىسى ۋە ماۋ زېدۇڭنىڭ رەھبەرلىك ئورنى توغرىسىدا ئاساسلىق توختالغان. شۇنىڭ بىلەن بىللە، لىن بياۋ ۋە يې چۇننىڭ يىغىندىن ئىلگىرىكى ئورۇنلاشتۇرۇشى بويىچە، چېن بودا بىلەن ۋۇ فاشيەن يەنە دۆلەت رەئىسى تەسىس قىلىش توغرىسىدا ئاساسىي قانۇنغا تۈزىتىش كىرگۈزۈش لايىھەسىنى تەييارلىغان. بۇ ھەرىكەتلەرنىڭ ھەممىسى ماۋ زېدۇڭ ۋە جۇ ئېنلەيدىن يوشۇرۇن ئېلىپ بېرىلغان. بۇنىڭدىن لىن بياۋنىڭ ماۋ زېدۇڭنى تەختتىن چۈشۈشكە قىستاۋاتقانلىقى ياكى ماۋ زېدۇڭنىڭ لىن بياۋنى ۋەزىپىسىدىن ئىستېپا بېرىشكە قىستاۋاتقانلىقىنى ناھايىتى ئېنىق كۆرۈۋېلىشقا بولىدۇ.
ماۋ زېدۇڭ يىغىندىكى بىنورمال ئەھۋالنى بايقاپ، دەرھال بۇنى چەكلەپ: دۆلەت رەئىسى تەسىس قىلىش مەسىلىسىنى ئەمدى تىلغا ئالماڭلار، كىم دۆلەت رەئىسى بولىمەن دېسە، شۇ بولىۋەرسۇن، مەن بولمايمەن!» دېگەن. سۆزلەپ بۇ يەرگە كەلگەندە، ماۋ زېدۇڭ لىن بياۋغا: «ئەڭ ياخشىسى سەنمۇ دۆلەت رەئىسى بولىمەن دېمە»، دېگەن.
1971-يىل 8-ئاينىڭ 15-كۈنى ماۋ زېدۇڭ بېيجىڭدىن ئايرىلىپ، ئوتتۇرا-جەنۇبىي جۇڭگو ۋە شەرقىي جۇڭگودىكى ئۆلكىلەرنى كۆزدىن كەچۈرۈپ، ھەرقايسى جايلارنىڭ رەھبەرلىرى بىلەن سۆھبەتلەشكەن. ئۇ: بۇ قېتىم لۇشەندە ئۇلار يوشۇرۇن ھەرىكەت قىلىپ، تۇيۇقسىز ھۇجۇم قوزغىدى، ئۇلارنىڭ پىلانى، تەشكىلى ھەم پىروگراممىسى بار، دېگەن. شۇنىڭ بىلەن بىللە ئۇ يەنە: مۇئاۋىن رەئىس لىن بياۋنى قوغداش كېرەك. ئەلۋەتتە ئۇنىڭمۇ بەلگىلىك مەسئۇلىيىتى بار، دېگەن. 9-ئاينىڭ 5-، 6-كۈنلىرى لىن بياۋ بىلەن يې چۇن بېيدەيخېدا ماۋزېدۇڭنىڭ جەنۇبنى كۆزدىن كەچۈرگەندە قىلغان سۆزىدىن خەۋەر تاپقاندىن كېيىن، ماۋ زېدۇڭنى سەپەر ئۈستىدە قەستلەپ ئۆلتۈرۈپ، قوراللىق سىياسىي ئۆزگىرىش قوزغاشنى قارار قىلغان. 9-ئاينىڭ 7-كۈنى لىن لىگو «بىرلەشمە فىلوت»قا «1-دەرىجىلىك ئۇرۇش تەييارلىقى»دا تۇرۇش توغرىسىدا بۇيرۇق چۈشۈرگەن. 9-ئاينىڭ 8-كۈنى لىن بياۋ شەخسەن ئۆزى يازما بۇيرۇق چۈشۈرۈپ: «يولداش لىن لىگو ۋە يۈچىنىڭ بۇيرۇقى بويىچە ئىش قىلىڭلار»، دېگەن. لىن بياۋنىڭ سۇيىقەستى ئاشكارىلىنىپ قالغاندىن كېيىن، ئۇ جەنۇبتىكى گۇاڭجۇغا قېچىپ بېرىپ، ئايرىم «مەركەز» قۇرۇپ، دۆلەتنى پارچىلىماقچى بولغان. بۇ پىلان ئەمەلگە ئاشمىغاچقا، ئۇ ئايروپىلان بىلەن شىمال ئارقىلىق چەت ئەلگە قاچقاندا، ئۇ ئولتۇرغان مەخسۇس ئايروپىلان موڭغۇلىيەدىكى ئۆندۆرخاندا پاچاقلىنىپ كېتىپ، جېنىدىن ئايرىلغان.
يۇقىرىدا «ماۋ زېدۇڭنىڭ تەرجىمىھالى» دېگەن كىتابتىكى قىسقا بايانلارغا ئاساسەن لىن بياۋ ۋەقەسىنىڭ پۈتكۈل جەريانى تونۇشتۇرۇلدى. «ماۋ زېدۇڭنىڭ تەرجىمىھالى» 1-قول ئىشەنچلىك ماتېرىياللار، جۈملىدىن نۇرغۇن ئارخىپلار ۋە ئەينى ۋاقىتتىكى شاھىتلارنىڭ ئەسلىمىسىگە ئاساسەن يېزىلغان. بۇ ۋەقەلىك ناھايىتى ئېنىق.
3. ماۋ زېدۇڭ بىلەن «تۆت كىشىلىك گۇرۇھ»نىڭ تۈپ پەرقى
ماۋ زېدۇڭ قوزغىغان ھەم رەھبەرلىك قىلغان «مەدەنىيەت زور ئىنقىلابى» پارتىيە ۋە دۆلەت يېڭى جۇڭگو قۇرۇلغاندىن بۇيان ئۇچرىغان ئەڭ ئېغىر ئوڭۇشسىزلىقتىن ئىبارەت. بۇ ماۋ زېدۇڭ ئۆتكۈزگەن ئومۇميۈزلۈك ئېغىر خاتالىقتۇر. ماۋ زېدۇڭ «مەدەنىيەت زور ئىنقىلابى»دا جياڭ چىڭ، جاڭ چۇنچياۋ، ۋاڭ خۇڭۋېن، ياۋ ۋېنيۈەن قاتارلىق كىشىلەرنى ئەتىۋارلاپ ئىشلەتكەن، ئۇلار ماۋ زېدۇڭنىڭ خاتالىقىدىن پايدىلىنىپ، ئۇنىڭدىن يوشۇرۇنچە دۆلەت ۋە خەلققە ئاپەت كەلتۈرىدىغان نۇرغۇن جىنايى ھەرىكەتلەرنى سادىر قىلغان. «تارىخىي قارار»دا مۇنداق دېيىلگەن: ماۋ زېدۇڭنىڭ خاتالىقى بىر ئۇلۇغ پىرولېتارىيات ئىنقىلابچىسى ئۆتكۈزگەن خاتالىق. ئۇ پارتىيە ئىچى ۋە دۆلەت تۇرمۇشىدا ساقلىنىۋاتقان يېتەرسىزلىكلەرنى تۈزىتىشكە دائىم دىققەت قىلىپ كەلگەن. ئۇ ئېغىر خاتالىق ئۆتكۈزۈش جەريانىدا، يەنە پارتىيەدىن ماركس، ئېنگلىس، لېنىن ئەسەرلىرىنى ئۆگىنىشنى كۆپ قېتىم تەلەپ قىلغان. ئۇ يەنە ئىزچىل ئۆز نەزەرىيەسى ۋە ئەمەلىيىتىنى ماركسىزم نەزەرىيەسى ۋە ئەمەلىيىتىگە ئۇيغۇن، پىرولېتارىيات دىكتاتورىسىنى مۇستەھكەملەشتە كەم بولسا بولمايدۇ، دەپ قارىغان. بۇ پەيدا قىلغان تىراگېدىيەدىن ئىبارەت. «تۆت كىشىلىك گۇرۇھ» يەنە بىر خىل ماھىيەتلىك مەسىلە. ئۇلار پارتىيە ۋە دۆلەتنىڭ ئالىي رەھبەرلىك ھوقۇقىنى تارتىۋېلىشقا ئۇرۇنغان ئەكسىلئىنقىلابىي گۇرۇھتىن ئىبارەت. ئۇلار ماركسىزمنى بۇرمىلاپ، ئۇنى پارتىيە ۋە دۆلەتنىڭ ئالىي رەھبەرلىك ھوقۇقىنى تارتىۋېلىش مەقسىتى ئۈچۈن خىزمەت قىلدۇرغان. ئۇلار ئەمەلىيەت داۋامىدا ماۋ زېدۇڭنىڭ بەزى تەشەببۇسلىرىنى بۇرمىلىغان.
ئۇلار ماۋ زېدۇڭنىڭ بەزى خاتا تەشەببۇسلىرىنى يۈكسەكلىككە كۆتۈرۈشنىمۇ مۇشۇ مەقسەت ئۈچۈن خىزمەت قىلدۇرغان. «ماۋ زېدۇڭنىڭ تەرجىمىھالى»دا نۇرغۇن ئەمەلىي ۋە كۈچلۈك پاكىتلار ئارقىلىق ماۋ زېدۇڭ بىلەن «تۆت كىشىلىك گۇرۇھ» ئارىسىدىكى تۈپ پەرق چۈشەندۈرۈلگەن. ماۋ زېدۇڭ «تۆت كىشىلىك گۇرۇھ»نى كۆپ قېتىم كەسكىن تەنقىد ۋە پاش قىلىپ، ئۇلارنىڭ سىياسىي قارا نىيىتىنى ئېچىپ تاشلاپ، پارتىيە ۋە دۆلەتنىڭ ئالىي ھوقۇقىنى ئۇلارغا بەرمىگەن.كېيىن بۇ پارتىيەمىزنىڭ «تۆت كىشىلىك گۇرۇھ»نى بىتچىت قىلىشىغا ئاساس سېلىپ بەرگەن.
http://www.nur.cn/html/news/62989.shtml
