كىتاپ ئوقۇپ ئولتۇراتتىم ، ئادىل تۇنىيازنىڭ < پەيغەمبەر دىيارىدا كېچىلەر> ناملىق ماقالىلەر توپلىمىدىكى <نەدىن كەلدىڭ ؟ نەگە بارىسەن ؟>دىگەن تېمىغا كۆزۈم چۈشتى ، خىيالىمدا بۇ سۇئال مەندىن سورالغان، تېمىنى كۆرۈپ تېكىستنى كۆرمەي تۇرۇپ جاۋابىنى ئويلىدىم،،،
ھەر خىل شارائىتتا ھەر خىل جاۋاپ بېرىدىلىكەن،كوچا ئاپتۇبۇسغا چىققىنىڭىزدا بۇ سۇئالغا <پالانى بېكەتتە چۈشىمەن > . بىر شەھەردىن يەنە بىر شەھەرگە يولغا چىقسام<پالانى شەھەردە چۈشىمەن> .ئۆز دۆلىتىمدىن باشقا دۆلەتلەرگە يولغا چىققىنىمدا بۇ سۇئالغا < پالانى دۆلەتكە بارىمەن > دىگەندەك جاۋاپلارنى بېرىمەن .قەيەرگە بېرىش مېنىڭ ئىختىيارىمدا ،ئەمما بىز ھازىرمۇ سەپەر ئۈستىدىكى يولوچى ،ھەر-بىرىمىز ئۆز مەنزىلىمىزگە قاراپ كېتىپ بارىمىز ،پەقەت ئىككىلا يول بار ،بىرى ياخشى يەنە بىرى بىزگە زىيانلىق ، خالىغان يولدا ماڭىمىز ، ھېچكىم بىزنى زورلىمايدۇ< ماۋۇ يولدا ماڭمىدىڭ >دەپ ، ئەمما ئەڭ ئاخىرىدا بىز خالايلى ياكى خالىمايلى مەلۇم بىر بېكەتتە چۈشۈشكە مەجبۇر بۇلىمىز، بىز ئۈچۈن بۇ ئاخىرقى بېكەت ،بۇ بىزنىڭ ئىختىيارىمىزدا ئەمەس، چۈشمەسلىككە ئىلاجىمىز يەتمەيدۇ ، شۇندىلا ھېس قىلىمىز ئۆزىمىزنىڭ نەقەدەر ئاجىزلىقىمىزنى ،،،،،،،
تېكىستنى ئوقۇدۇم  باشتىكى قۇرلاردا < بۇرۇن بۇ سۇئال ئۈستىدە تۈزۈكرەك ئويلىنىپ باقماپتىكەنمەن ، بىر خىل موھىت ،بىر خىل رېتىم ،بىر دۇنيا ئىچىدە بۇ سۇئالغا ئېھتىياج تۇغۇلمىسا كېرەك ، قاچان چەتئەلگە چىقماقچى بولدۇم ، شۇ كۈندىن باشلاپ مەن ھارغۇچە توشتۇرغان جەدىۋەللەر،ماڭغان يوللار ،بارغان جايلار بۇ سۇئالغا مۇناسىۋەتلىك بولدى >دىگەن مەزمونلار،،،،
يەنە ئويلاندىم ،،،
مەيلى قايسى ئىش بىلەن شۇغۇللىنايلى قىلغان ئىشىمىزنى تاپشۇرۋالغۇچى بۇلىدۇ ،<<غوجامنىڭ غوجىسى چامغۇرنىڭ ئورىسى >> دىگەندەك ،ھايات مۇساپىمىزدىمۇ دەل شۇنداق تولدۇرىدىغان جەدىۋەللەر بار ، قانداق تولدۇرىمىز ئۆزىمىزگە باغلىق ،ئەمما ياخشى تولدۇرۇلمىسا ھەم يەتكۈچۈ زىيانمۇ تارتىمىز ،دۇنيا نىممەتلىرىنىڭ ھالاللىرىغا ھىساب ھاراملىرىغا ئازاب بار ، چۈنكى سىز شۇ نىممەتلەرنى قەيەرگە سەرىپ قىلدىڭىز ، يىتىمغا باش پاناھ بولدىڭىزمۇ ؟ غېرىپنىڭ ھالىغا يەتتىڭىزمۇ ؟ ھاياتلىقىڭىزدا ئاتا-ئانىڭىزنى ئەل-خەلقىڭىزنى قانچىلىك ئويلىدىڭىز؟ ياكى شۇ نىممەتلەرنى < ئۆزۈم تاپقان ،،،> دەپ ئولتۇرۇپ بۇزۇپ چېچىپ
خەجلىدىڭىزمۇ ،ئىسراپ قىلدىڭىزمۇ ؟ ،،،ئەجىرسىز ، ھارام تاپقان دۇنيارىڭىز ئۈستىدىنچۇ ؟قانداق ھىساپ بېرىسىز ؟ ئۇ چاغدا سىزنىڭ ھالىڭىز ۋاي ~~~ باشقىلارنى قاقشىتىپ ،ھېلىگەرلىك بىلەن ۋاقىتلىق خۇش بۇلىۋالغىنىڭىز ئۆزىڭىزنى مەڭگۈلۈك ئازاپقا تاشلىغىنىڭىز بولماي نىمە ؟! ئىنسان تۈزگەن <<قانون >> ئالدىدا ئادوۋكاتىڭىزبار ، باشقىلار كۆرمىسە قۇتۇلۇپ كېتەلەيسىز ،ياكى<< ئارقا ئېشىك>>نىڭ يولى بار ، بەك بولمىسا شۇ گۇناھىڭىز ئۈچۈن تۈرمىدە ياتارسىز ، ئەمما سىزنىڭ بارچە ئىشلىرىڭىزنى ،ئوي-خىياللىرىڭىزنى كۆرۈپ تۇرغۇچى بىر زاتنىڭ بارلىقىنى بىلەمسىز ؟ئادوۋكات تەكلىپ قىلالمايسىز ، يالغان سۆزلىيەلمەيسىز،،،،مانا بۇلار بىزنىڭ تولدۇردىغان جەدىۋەللىرىمىز قاتارىدىمۇ بار .بىراۋنىڭ ئۆيىگە بارماقچى بولسىڭىزمۇ چوقۇم سوۋغاتلىق داستۇرخان تەييارلايسىز ،قۇرۇق بارمايسىز ، ئۇنداقتا بىزمۇ كېتىپ بارىمىز ،  نىمە تەييارلىدۇق ئۆزىمىزگە ئايان،،،،،
<بىر-بىرىگە ناتونۇش يولوچىلار ، تەغدىرى باشقا مەنزىلى بىر ئادەملەر ، گەرچە ھەممىمىز ئوخشاش تۇپراقتىن كەلگەن، ئوخشاشلا تۇپراققا قايتىدىغان بولساقمۇ ،،،،بىردىنلا ئايروپىلان سىلكىنىپ كەتتى . ئۆلۈم يادىمغا يەتتى ، ئۆلۈم بىلەن ھاياتنىڭ ئارىسى بىر غېرىچلا ، نەدىن كەلدىم ؟ نەگە بارىمەن ؟ دىگەن سۇئال كاللامدىن چاقماقتەك ئۆتتى چىن ئىخلاس بىلەن ياراتقۇچىغا تەسبىھ ئېيتىپ دۇئاغا قولۇمنى كۆتۈردۈم ، ئىچ-ئىچىمدىن يىغىغا ئوخشايدىغان نامەلۇم بىر ھاياجان ئېتىلىپ چىقتى ،ئۇنىڭدا مۇھەببەت ،ئىمان ،سېغىنىش بار ئىدى ، ئۇنىڭدا زور كائىناتنى ئىلكىگە ئالغۇچى ئالدىدا چۈمۈلىدەك ئاجىز ، پاناھسىز بىر جان ئىكەنلىكىمنى ئويلاپ ياراتقۇچىغا سېغىنىشمۇ ، تەكلىماكانلارغا خاس تەنھالىق ۋە ئازابمۇ ،يۈرەك پارە ئوغلۇمدىن،ئۇرۇق-تۇغقان،دوست-بۇرادەرلەردىن ، مىھرىبان ئەل-يۇرت قوينىدىن ئايرىلىشقا قىيالماسلىقمۇ ، شارجا ئايرودرومىدا مېنى ساقلاۋاتقان ئايالىم بىلەن تېزرەك دىدارلىشىش تەقەزدالىقىمۇ بار ئىدى . >
،،،،،،،،
سىز بۇ سۇئالغا ئۇچرىغانمۇ ؟ بەلكى سىز كىندىك قېنىڭىز تۆكۈلگەن ئانا يۇرتىڭىزدىن ئايرىلىپ باشقا يۇرىتتا ، بەلكى شۇ تۇغۇلغان يۇرتىڭىزدا ، بىراۋ سىزدىن سورىسىمۇ دەرھال بېرىدىغان جاۋابىڭىز < مەن مۇشۇ يۇرتلۇق، ئانا يۇرتۇم مۇشۇ > ياكى < مەن پالانى يۇرتلۇق ، پالانى يۇرتقا بارىمەن >دىگەن جاۋاپ بۇلىدۇ ، ئەمما ،سىزنىڭ قەيەردىن كەلگەن ياكى قايسى يۇرىتلىق ئىكەنلىكىڭىزنى بىلىپ تۇرۇپ يەنە بۇ سۇئالنى سورىسا بەلكى سىز شۇ سۇئالنى سورىغان كىشىگە ئەجەپلىنىپ قاراپ قېلىشىڭىز مومكىن ياكى نىمىلەرنىدۇر ئويلىنىپ قالىسىز .

مەنبە _ ئويلىغانلىرىم