ئىنسانلاردا ئۈچ تۈرلۈك گۇناھ بولىدۇ، ــ دېدى بىر دانىشمەن.
كىشىلەر شۇئان ئۇنىڭ گېپىگە قۇلاق سالدى.
_ــ بىرىنچى گۇناھ بىراۋنىڭ بەختسىزلىكىدىن خۇشال بولۇش. ئەگەر قوشنىڭىزنىڭ كالىسى ئۆلۈپ قالسا، بۇ ھەرگىزمۇ سىزنىڭ خۇشال بولۇشىڭىزغا سەۋەب بولۇپ قالمىسۇن. ئۇنىڭغا ياردەم قولىڭىزنى سۇنۇڭ دېمەيمەن، دېمەكچى بولغىنىم باشقىلارنىڭ ئازابى ئۈچۈن خۇشال بولماڭ. قوشنىڭىزمۇ ئادەم، ئۇنىڭ پالاكەتكە يولۇقۇشىنى ئۈمىد قىلماڭ.
كىشىلەر باشلىرىنى لىڭشىتىپ، ئۇنىڭ سۆزىگە قايىل بولۇشتى.!
دانىشمەن سۆزىنى داۋام قىلدى:-
ــ ئىككىنچى گۇناھ ئىشەنچىنى يوقىتىش. سىزنىڭ بىرلا سىيىرىڭىز بار، يەنە كېلىپ سىيىرىڭىز قېرىپ قالغانلىقتىن، جىق سۈت ساغقىلى بولمىغان تەغدىردىمۇ ھەرگىز ئۈمىدسىزلەنمەسلىكىڭىز، ھاياتقا تولۇپ تاشقان ئىشەنچ بىلەن قارىشىڭىز كېرەك. ئۇ سىيىرىڭىز گەرچە ھەم قېرى، ھەم كېسەلچان بولسىمۇ، ھامىنى سىيىر-دە، بەزى كىشىلەرنىڭ ھەتتا بىرەر سىيىرىمۇ يوق.
كىشىلەر يەنە باشلىرىنى لىڭشىتىپ، قايىللىقىنى بىلدۈرۈشتى. شۇ ئەسنادا بىرەيلەن ئېغىز ئېچىپ قالدى:
ــ ئەگەر مەن باشقىلارنىڭ بىرمۇ سىيىرى يوقلۇقى، مېنىڭ بولسا بىر سىيىرىمنىڭ بولغىنى ئۈچۈن خۇشال بولسام، بۇ باشقىلارنىڭ تۇرمۇشى ماڭا يەتمىگەنلىكى سەۋەبلىك كۆرەڭلىگەنلىك بولۇپ قالامدۇ، قانداق؟ ئەجەبا، بۇ بىراۋنىڭ بەختسىزلىكىدىن خۇشال بولۇشقا كىرمەمدۇ؟
كىشىلەر شۇئان جىمىپ، ئۇ كىشىنىڭ سۆزىنى ئويلاشقا باشلىدى.
ــ كىشىلەرنىڭ ئۈچىنچى گۇناھى دەل ئىشنىڭ تېگى-تەكتىنى سۈرۈشتۈرۈشكە ئامراقلىقىدۇر، ــ دېدى دانىشمەن.
مەنبە:تەرمىلەر ژورنىلى
مەن دەيمەن ،تېگى -تەكتىنى سۈرۈشتۈرۈش گۇناھمۇ ؟
مېنىڭ دادام داڭلىق بوكىسچى مۇھەممەت ئەلى بولىدۇ. دادام ياشىنىپ قالغاچقا ھەركۈنى دېگۈدەك ئۆيدە داۋالانغاچ ناماز ئۆتەيدۇ، دوستلىرىنى كۈتىۋالىدۇ. ئالدىنقى يەكشەنبە كۈنى مەن سىڭلىم سەيلا بىلەن ئاتا - ئانامنى يوقلىغىلى باردۇق. بىزمۇ ئادەتتە بەك ئالدىراش بولغاچقا دائىم كېلىپ ئاتا - ئانىمىزنى يوقلاپ تۇرالمايتۇق، شۇڭا بىر ئائىلە كىشىلىرى جەم بولغاندا تولىمۇ خۇشال بولۇپ كېتەتتۇق.
بىز مېھمانخانا ئۆيدە قەھۋە ئىچىپ، پېچىنە - پىرەنىك يېگەچ مۇڭدىشىپ ئولتۇردۇق. دادام سىڭلىم ئىككىيلەنگە سەپسېلىپ قارىۋەتكەندىن كېيىن گەپ باشلىدى:
ــ خەننا، سەيلا، جېنىم قىزلىرىم، داداڭلارنىڭ كۆڭلىدىكى گەپلىرىگە قۇلاق سېلىڭلار! ئاللاھ ياراتقان نەرسىلەر قىممەتلىك ۋە قىممىتى يوق دەپ ئايرىلىدۇ. ئادەتتە قىممىتى بار نەرسىنىڭ ھەممىسى يوشۇرۇنغان بولۇپ، كىشىلەر ئاسانلىقچە ئۇنى كۆرەلمەيدۇ ھەم بايقىيالمايدۇ، ئېرىشمىكىمۇ تەس. مەسىلەن، مەرۋايىت چوڭقۇر گىرانىت تاش ئارىسىغا يوشۇرۇنغان بولىدۇ، كىشىلەر تىرىشچانلىق كۆرسىتىپ ئىزدەش ئارقىلىقلا بايقىيالايدۇ. قاشتېشى دېڭىز ئاستىدا بولۇپ، قاتمۇقات قاسراقلىرى قوغداپ تۇرغاچقا، ئۇلارنىڭ گۈزەللىكى ئاسان نامايان بولمايدۇ. ئالتۇننى مىسالغا ئالساقمۇ ئوخشاش، ئۇمۇ ئەزەلدىن كىشىلەرنىڭ ئاسانلا بايقىۋېلىشى ئۈچۈن يەر يۈزىگە چىقىپ قالمايدۇ، ئىشچىلار ئالتۇن رۇدىسىنى مىڭ تەستە قېزىپ چىقىرىدۇ، ئاندىن رۇدىنى پارچىلاپ، سۇدا چايقىغاندىن كېيىن ئاز مىقداردىكى ئالتۇننى ئايرىۋالىدۇ.
دادام ئامېرىكا جەمئىيىتىدە مودا بولۇۋاتقان يېرىمى ئوچۇق كىيىمىمىزگە قاراپ، خاپا بولغان ھالدا سۆزىنى داۋاملاشتۇردى:
ــ كىيىۋالغان كىيىمىڭلارغا قاراپ بېقىڭلار، بەلكىم نۇرغۇن پۇل خەجلەپ سېتىۋالغان داڭلىق كىيىم بولسا كېرەك. ئەمما سىلەر ئويلاپ باقتىڭلارمۇ، مۇسۇلمان قىزلارنىڭ ئۆز قەدىر - قىممىتى بولۇشى، ئۆزىنى ئۈنچە - مەرۋايىتتىنمۇ، ئالتۇندىنمۇ قىممەتلىك كۆرۈشى كېرەك. سىلەر ئۆزۈڭلارنى ئاسراشنى ئۆگىنىۋېلىشىڭلار كېرەك. ئۆزىنى ئاسىرىغانلىق ئۆزىنى ھۆرمەتلىگەنلىككە باراۋەر.
دادام پۈتكۈل ئۆمرىدە نۇرغۇن ئەگرى - توقايلىقلارنى، تۈرلۈك دىنىي مەزھەپلەرنى، تۈرلۈك ئوڭۇشسىزلىقلارنى باشتىن كەچۈرۈپ، ئەڭ ئاخىرىدا ئىسلامنى تاللىغان. بىز ئاتا - ئانىمىزنى كۆرمىگىلى خېلى ئۇزاق بولغانىدى، دادامنىڭ بىزگە دېگەن گەپلىرى چىن دىلىدىن چىققان گەپ بولۇپ، بۇنى بىز ئۆمۈرۋايەت ئۇنتۇيالمايمىز. بۇ ئاددىي ھەم چوڭقۇر تەسىرات، مەن بۇ ئۇنتۇلماس تەسىراتنى بارلىق مۇسۇلمان خانىم قىزلىرىنىڭ ئورتاق قوبۇل قىلىشىغا سۇنىمەن.
ئاپتورى: خەننا
ھۆرىيەت سېتىۋالدى تەرجىمىسى
مەنبە: تەرمىلەر ژۇرنىلى 2011 - يىللىق 5 - سان.
